Lé Kpẹ̀a E Jṍòn Beè Emí
17 Tṍó e Jíízọ̀s ló gbò belí lọ̀l, à gbóó dàlà dẽe ẹ̀bmà káála vaá kọọ̀: “Tẹ̀, tṍó a lée. Nvèè ka ló o nvín kọbé o nvín nveè ni ka ló. 2 O beè nèe kpóó gè lẹ̀ẹ̀mà bel ló dénè nen, kọbé à láá tú dùm e bè náa tá nè kọ̀láá gbò eo beè nvèèé báá. 3 Bà é íe dùm e bè náa tá be bà nyímá ló olo, eo dúù áá kà-kà Bàrì ea dì, nè nen eo beè lẹ̀ẹ̀là, ea dú Jíízọ̀s Kráìst. 4 M beè nvèè ni ka ló gbẹá boo kunukẽ̀í, vaá sí tóm eo beè nèm lọ̀l. 5 Vó à naa, kátogóí e Tẹ̀, nvèèm ka ló. Tú íb ka em beè ié tṍó em beè dì ní kpàn besĩ́ bàlà booí à kalá dààà togóá nvèèḿ ló.
6 “M náa kọ gbò eo beè tú lọl bàlà booí nvèèḿ báá á nyimá o bée. Baẹ̀ beè ńlo, sõò o beè tú va nè nda, vaá baa gban tṍ ló o moǹ bel. 7 Kátogóí, baa nyímá kọọ̀ dénè nú eo beè nèmá aa bá olo, 8 boo béè kọọ̀ tṍó em lóò gbò bel eo beè kọ́ nèm nè va, bà tú vaá gbóó nyimá kọọ̀ m̀ aà ló olo dù, vaá baa zigà kọọ̀ olo ní eo beè lẹ̀ẹ̀làm ẽ́. 9 M̀ banì vá boo, ním banì boo pá bàlà boo, sõò m̀ banì boo gbò eo beè nvèèḿ báá, boo béè kọ bà dú pá ńlo. 10 Kọ̀láá kà nú e nda íè níà ńlo, vaá kọ̀láá kà nú e olo íè níà ńda, vaá gbòí a nveèm ka ló.
11 “Nda á gé ná bàlà booí, sõò baala di bàlà booí. Nda gé dú ló olo. Tẹ̀ Eo Di Káí, ẹ̀b nú ea kil vá ló boo béè o bée eo beè nèmá, kọbé bà gbá dú tẽ̀ènè kà, belí bé e olo nè nda dúù tẽ̀ènè kà naaá. 12 Tṍó em beè dì vá ló, m̀ beè olòó kù va dẽe ló boo béè o bée eo beè nèmá. M beè kpènà va, vaá tọ́ọ̀ ọ̀và náa beè pè, daalá lọl ló nvín pèa, kọbé nú e ba beè emí mm̀ Kpá Káí ḿḿ-má. 13 Kátogóí, nda gé dú ló olo, sõò m̀ lóò gbò belí gbẹá bàlà booí, kọbé bà íe zààvà e nda íè, naa ní e ba zààvà é gbõoma. 14 M beè tú o moǹ bel nè va, sõò bàlà booí ọ́bví va, boo béè kọ bà náa dṹùnà bàlà booí, dì belí bé e nda ním dṹùnà bàlà booí naaá.
15 “Ním banì kọ ó tú va lọl bàlà booí, sõò m̀ banì kọ ó kù va dẽe ló boo béè pọ́lọ́ nená. 16 Bà náa dṹùnà bàlà booí, dì belí bé e nda ním dṹùnà bàlà booí naaá. 17 Naa kọ bà á di káí tení dú ló kà-kà belá. O moǹ bel dú kà-kà bel. 18 Nda lẹẹlà va tẹlẹ bàlà booí, dì belí bé e olo beè lẹ̀ẹ̀là nda tẹlẹ bàlà booí naaá. 19 Vaá m̀ túù nà lóó sẹlẹ́ káí boo béè baala, kọbé bà láá di káí tení dú ló kà-kà belá.
20 “Ním banì boo áá nagbòí, sõò m̀ banì nàgé boo gbò e bà é íém zìgà m tení dú ló gè pãane tṍ ló nú e gbòí nóòmà, 21 kọbé dénè ọ̀và dú tẽ̀ènè kà, dì belí bé e oló Tẹ̀ íè lé gbaa ló kilma ló nda, vaá nda à ié lé gbaa ló kilma ló olo naaá. M̀ banì kọbé baala íe nagé lé gbaa ló kilma ló beele, naa ní e bàlà booí é zigà kọọ̀ olo ní eo beè lẹ̀ẹ̀làm ẽ́. 22 M beè tú íb ka e olo beè nvèèḿ lóá nvèè vá ló, kọbé bà láá dú tẽ̀ènè nen, dì belí bé e olo nè nda dúù tẽ̀ènè nen naaá. 23 Nda íè kà lé gbaa ló kìlmà vá ló, vaá olo ò ié kà lé gbaa ló kìlmàḿ ló, kọbé bà láá dú tẽ̀ènè nen, naa ní e bàlà booí é nyímá kọọ̀ olo ní eo beè lẹ̀ẹ̀làm ẽ́, nè ge kọ ò vulè va dì belí bé eo vulè nda naaá. 24 Tẹ̀, m̀ gbĩ́ì kọọ̀ gbò eo beè nvèèḿ báá á dìḿ ló kĩée em dì, kọbé bà mon ka eo beè nvèèḿ ló, boo béè kọọ̀ ò beè vùlèm besĩ́ì bàlà booí à kalá dààà togó. 25 Tẹ̀ eo ólò naa nú ea lelà, à dú kà-kà kọọ̀ pá bàlà booí náa nyímá ni ló, sõò nda nyímà ni ló, vaá nagbòí nyímá kọọ̀ olo ní eo beè lẹ̀ẹ̀làm ẽ́. 26 M náa kọ bà á nyimá o bée, vaá m̀ é kilsĩ́ gè naa kọ bà á nyimá, kọbé bà láá vùlè dõona gbò belí bé e olo vulè nda naaá, kọbé nda láá ié lé gbaa ló kìlmà vá ló.”