Lé Kpẹ̀a E Jṍòn Beè Emí

11 À íe enè kà gbálà ea bée kọlà Lázarọ̀s e kpálóe géè zọ̀. À dú boǹ Bẹ́tanì, ea dú boǹ bà Mérì nè a vígà pábia ea kọlà Mátà. 2 Nakà Mérìí ní ea beè tú kpée-kpéè nù ló nóo tṍ ból Nen Ea Íéi, vaá tú a gyáa fã̀àmàe kpóó tọ ẹ́. Lázarọ̀s ea dú a vígà págbálà ní e kpálóe beè zọ̀ẹ. 3 Vó à naa, pá a vígà pábia à gbóó lẹ̀ẹ̀là tóm má Jíízọ̀s kọọ̀: “Nen Ea Íéi, ẹ̀b! kpáló nen eo ólò vùlèa gé zọ.” 4 Tṍó e Jíízọ̀s dã́ naa vó, à gbóó kọọ̀: “Zọ̀lóí náa bã́é ló boo béè ge fẹ́ẹ, sõò à bã́é ló kọbé à nveè ka ló Bàrì, naa ní e bà é téní dú ló vó nvèè ka ló Sã́áná Bàrì.”

5 Jíízọ̀s beè vùlè Mátà, bií ló a vígà pábia, nè Lázarọ̀s. 6 Sõò tṍó ea dã́ kọọ̀ kpáló Lázarọ̀s zọ, a beè kpáá tú bàà dee tõ̀òma kĩée ea beè dì. 7 Tṍó e bàà dee ni téní, à gbóó kọ́ nè pá a gbò nyòòne nvée kọọ̀: “Naanii èé kpáá àà kil Jùdíà.” 8 Pá a gbò nyòòne nvée à gbóó kọ́ nèe kọọ̀: “Neǹ Dòbá, pá Jùdíà géè ãàa gbĩ́ gè tobmà ni dem. Ò é kpáá kìl nàgé kĩá?” 9 Jíízọ̀s à aalá nè va kọọ̀: “12 kà ávà e ẹ́ẹ́ èlà íe, sẹ̀ níì vó nì? Beè nen kyãa ẹ́ẹ́ èlà, náa é kúmí tọ́ ló tọ́ọ̀ nu, boo béè kọọ̀ à é mon ẹ́ẹ́ deè nakà bàlà booí. 10 Sõò beè nen kyãa bílá dee, à é kúmí tọ́ ló nu, boo béè kọọ̀ ẹ́ẹ́ dee á géé m.”

11 Tṍó ea ló gbò belí lọ̀l, à gbóó kọọ̀: “Lázarọ̀s, ea dú bẹẹ kóò a dáa, sõò m̀ é sí kĩá gé kẽée lọl boo.” 12 Tṍóá, pá a gbò nyòòne nvée à gbóó kọ́ nèe kọọ̀: “Nen Ea Íéi, be à di dáa, kpálóe é beè valí.” 13 Jíízọ̀s géè kọ a ú. Sõò baala beè dòòmà kọ à géè kọọ̀ à di dáa ea gé bṍséi. 14 Tṍóá, Jíízọ̀s à gbóó lọ̀l gã́ ló kọ́ nè va kọọ̀: “Lázarọ̀s a ú, 15 vaá nyíém ẹ́ẹ kọ ním beè di kĩá kọbé ò zigam mí ló. Naanii mè èé aà síé ló.” 16 Tómòs, e bà ólò kolí náe gé Bàà Nvín Kà, à gbóó kọ́ nè gbò e bà ólò gbá nyoone nvéè Jíízọ̀s kọọ̀: “Naanii mè èé nyoonée sì, kọbé beele zọ́ẹ ù.”

17 Tṍó e Jíízọ̀s íná, à gbóó mòn kọọ̀ Lázarọ̀s a tõó mm̀ bànà úá* ténì dee. 18 Bẹ́tanì beè toolá nú ea é láá dú bàà kà máẹ̀l aa ló Jèrúselẹ̀m. 19 Vaá gã́bug pá Júù beè dù gé nvèè nyíé gbàà Mátà nè Mérì boo béè ba vígà págbálà ea úá. 20 Tṍó e Mátà dã́ kọọ̀ Jíízọ̀s gé dú, à gbóó sì gé zọ̀ẹ nyòònà gbẹá èèlè, sõò Mérì beè gbẹá ĩ́ìtẽ́ tọ. 21 Mátà à gbóó kọ́ nè Jíízọ̀s kọọ̀: “Nen Ea Íém, be o beè di kĩí, ńdáà vígà págbálà náa gáẹ̀ beè ù. 22 Sõò kọbèè kátogóí, nda nyímà kọọ̀ kọ̀láá kà nú eo bĩ́ìnà bá Bàrì, Bàrì é náa nè ni.” 23 Jíízọ̀s à gbóó kọ́ nèe kọọ̀: “O vígà págbálà é kẽeà aa kemà ú.” 24 Mátà à kọ́ nèe kọọ̀: “M̀ nyímà kọ à é kẽeà aa kemà ú mm̀ dee deè nvéè dee.” 25 Jíízọ̀s à kọ̀ nèe kọọ̀: “Nda ní em dúù kẽ̀èà aa kemà ú nè dùm ẽ. Kọ̀láá nen ea kilsĩ́ gè iém zìgà m, kọbèè à ú, à é kpáá tõó dùm, 26 vaá kọ̀láá nen ea di dùm vaá à kilsĩ́ gè iém zìgà m náa é ú tọ́ọ̀ dee. Ò zigà gé naa vó?” 27 À aalá nèe kọọ̀: “Ẽei, e Nen Ea Íém, nda zigà kọọ̀ olo ní eo dúù Kráìst ea dú Sã́áná Bàrì, ea dú nen e ba beè kọ à é dú bàlà booíá ẹ́.” 28 Tṍó ea ló belí lọ̀l, à gbóó àà gé kolí Mérì, ea dú a vígà pábia, vaá saagá nèe kọọ̀: “Neǹ Dòbá di kĩí, vaá à gé kólí ni.” 29 Tṍó e Mérì dã́ naa vó, à gbóó gbalá aa boo gé síé ló.

30 Jíízọ̀s gáà beè ina boná, sõò a beè di-dí kĩée e Mátà beè zọ̀ẹ nyòònà gbẹáá. 31 Tṍó e pá Júù e bà géè nvèè nyíé gbàà Mérì gbẹá tọá mon bé ea gbálá aa boo dọ kèdẹi naa, bà gbóó bììàẹ́ nvée, boo béè kọ ba beè dòòmà kọọ̀ à gé aà kil ló bànà úá* gé tò. 32 Tṍó e Mérì íná ló Jíízọ̀s, à gbóó kumíe dúnú ke gbàà vaá kọ́ nèe kọọ̀: “Nen Ea Íém, be o beè di kĩí, ńdáà vígà págbálà náa gáẹ̀ beè ù.” 33 Tṍó e Jíízọ̀s mon Mérì nè pá Júù e ba beè zọ̀ẹ dù e bà gé tó, nyíée à gbóó tũugã́ vaá palàge tã̀àgã̀. 34 À gbóó bĩiná va kọọ̀: “Ãàe ní eo beè liíe é?” Bà kọ́ nèe kọọ̀: “Nen Ea Íéi, dù gé ẹ̀b.” 35 Jíízọ̀s à gbóó tò. 36 Pá Júù à gbóó dààmà togó gè kọọ̀: “Ẹ̀b bé ea vulèe naaà!” 37 Sõò sìgà ọ̀và beè kọọ̀: “Beè gbálàí beè láá mùùnà dẽè nen e dẽée beè gimíá, é kọọ̀ náa gáẹ̀ láá naa kọ gbálàí á gá ù?”

38 Tṍó e nyíè Jíízọ̀s ni kpáá tã̀àgã̀ lọ̀l, à gbóó iná ló bànà úá.* Aẹ̀ beè kóló dem e ba beè tòg, vaá ba beè tú báà dem muuné gã́. 39 Jíízọ̀s à gbóó kọọ̀: “Tui demí lọlíí gã́.” Mátà ea dú vígà nen ea beè ùa à gbóó kọ́ nèe kọọ̀: “Nen Ea Íém, à gá dọ vóí, à é íè ge bèm boo béè kọọ̀ ténì dee a téní.” 40 Jíízọ̀s à kọ́ nèe kọọ̀: “Ním beè kọ́ nè ni kọọ̀ be ò ziga ló, ò é mon bé e Bàrì dú dũ̀ùnè naa?” 41 Bà gbóó tú demá lọl gã́. Tṍóá, Jíízọ̀s à gbóó dàlà dẽe ẹ̀bmà gbàn deè vaá kọọ̀: “Tẹ̀, ọ̀ọ̀ zaa kọ ò dã́àm mon. 42 Mm̀ kà-kà, m̀ nyímà kọọ̀ ò ólò dám mon lee, sõò m̀ lóò belí boo béè gã́bug gbò e bà di élá kĩí, kọbé bà zigà kọọ̀ olo ní eo beè lẹ̀ẹ̀làm ẽ́.” 43 Tṍó ea ni ló gbò belí lọ̀l, à gbóó tú agẹ mon kọọmá kọọ̀: “Lázarọ̀s, aa m dù!” 44 Gbálà ea beè ùa à gbóó aa mm̀ bànà úá, vaá kàn e ba beè pìgíé ló bá nè tọ nè ní e ba beè kọ̀lmàe sĩ́ beè dìé ló. Jíízọ̀s à gbóó kọ́ nè va kọọ̀: “Taalaíe vaá ò sọíe bá kọ á àà.”

45 Vó beè naa kọọ̀ gã́bug pá Júù e ba beè dù gé kãa Mérì e bà monmà dẽè nú e Jíízọs náaá á iée zìgà m. 46 Sõò sìgà ọ̀và beè àà gé kọ́ nú e Jíízọ̀s náaá nè pá Fárìsíì. 47 Vó à naa, gbò togó vààla gyọ́ọ nè pá Fárìsíì à gbóó kolí gbò e bà ólò di Pọ̀b Tọ Bèèlaà Pá Júù bõonè vaá kọ́ nè va kọọ̀: “Éé ní eé náa ẽ́, boo béè kọọ̀ gbálàí a sí gã́bug tóm dũ̀ùnè? 48 Be è aàẹ́ ló kọ á kilsĩ́, dénè nen é íée zìgà m, vaá pá Róm̀ é dú gé tú bẹẹ tọọ̀ káí nè bẹẹ dó lọ̀líí bá.” 49 Tṍóá, enè ọ̀và ea kọlà Kéíàfàs, ea beè dú pọ̀b neǹ vààla gyọ́ọ tṍóá à gbóó kọ́ nè va kọọ̀: “Nóo nyímàì tọ́ọ̀ nu, 50 vaá ò gáà bugii togó kọ à é dọ bélè nèi kọọ̀ enè nen á ú boo gã́bug nen èlmà kọọ̀ zivèkà dó á ié kyọ̀àsĩ́.” 51 Náa beè ló belí boo a lóó, sõò boo béè kọọ̀ aẹ̀ beè pọ̀b neǹ vààla gyọ́ọ tṍóá, a beè kọ́ bùlà Bàrì kọọ̀ Jíízọ̀s é ú boo dóá, 52 vaá níì áá boo dóá ní ea é úé nì, sõò à é ú nágé boo béè ge bõonè ló gbò nvín Bàrì e ba beè zààlà. 53 Lọl deeá ààmà, ba beè gbóó bilá ló gè fẹ́ Jíízọ̀s.

54 Boo béè vó, Jíízọ̀s náa beè kpáá dọ na bàlà kẽ kyãa zẹ̀ẹ̀ pá Júù, sõò a beè aa kĩá àà kil ene kà boń ea kọlà Ífrèm, ea di kuló kpáà bàlà ól, vaá a beè gbóó zọ̀ pá a gbò nyòòne nvée tõó kĩá. 55 Tṍóá, Nàànù Ténì Zelí pá Júù beè gbóó iná kuló, vaá gã́bug gbò e bà aa gbò boń ea di kuló kĩá beè tú dee gbẹẹ́ sĩ́ àà kil Jèrúselẹ̀m kọbé bà õonà ba lóó dì belí bé ea dú nàànù kunukẽ̀ pá Júù naa. 56 Bà géè gbĩ́ Jíízọ̀s vaá boo tṍó e bà di élá mm̀ tọọ̀ káíá, bà géè kọ́ nè ene kọọ̀: “Bọọ bùlà kọ́ và ẹ? É kọ náa é dú kè sẹ̀lẹ̀nùí?” 57 Sõò gbò togó vààla gyọ́ọ nè pá Fárìsíì beè kọ́ nè gbòa kọọ̀ kọ̀láá nen ea nyímá kĩée e Jíízọ̀s dì, á kọ̀, kọbé bà síìlìèe.