Lé Kpẹ̀a E Máátìù Beè Emí

21 Tṍó e ba ni íná Bẹ́tfejì ea di boo Gù Ólìv, ea di kuló Jèrúselẹ̀m, Jíízọ̀s à gbóó lẹ̀ẹ̀là bàà nen e bà ólò nyoonée nvée, 2 vaá kọ́ nè va kọọ̀: “Aalii gé bãí boń ea dìí lèlà sĩ́ àla, mè ò é monii nom̀ tóòmà tò nè a nvín ea di dáà díí. Taalaí va, vaá ò túí va domai. 3 Beè nen ló bel nèi, kọi neíe kọọ̀: ‘Neń Ea Íéi íe bíi ló.’ Mè à é gbẹá boo sọ̀bá kọ ó faalai aamai.”

4 Níí beè naaá kọbé à ḿm̀-mè bel e Bàrì beè kọ́ tenmá gã́ neǹ kọ́ọ̀ bùlà Bàrì kọọ̀: 5 “Kọ́ nè sílà Záíòn kọọ̀: ‘Ẹ̀b! O méné gé dú ní ló. À dú gbọ́ọ́-gbọọ̀ ló vaá à bã́ boo nom̀ tóòmà tò. Ẽei, à bã́ boo põoni nom̀ tóòmà tò.’”

6 Gbò nyòòne nvéè Jíízọ̀s à gbóó àà gé naa gbõ̀ònà bé ea beè kọ́ nè va naaá. 7 Bà gbóó tú nom̀ tóòmà tòa nè a nvín domá vaá tú ba pọ̀b kọ̀là ló zaalí gí boo. À gbóó ĩìtẽ́ boo põoni nom̀ tóòmà tòa. 8 Gã́bug nen beè tú ba pọ̀b kọ̀là ló talí boo èèlè, boo tṍó e sìgà nen géè fùl laà gyoo tẹlẹ boo èèlèa. 9 Vaá sìgà gbó e bà géè kyã̀à gyàẹ́ deèsĩ́ nè deè nvée géè vulí kpã́ kọọ̀: “È banì kọ ó dùùlà nvín Dévìd! Tã́áná deè bá á di ló neń ea dú boo béè Jìhóvà!* Bàrì eo di káála, è banì kọ ó dùùlàẹ!”

10 Tṍó ea bã́ Jèrúselẹ̀m, zivèkà boná beè gbóó bũ̀ùgã̀, naa ní e bà bĩ́íná kọọ̀: “Níì méeí ẽ́?” 11 Gbò e ba beè kõ̀òà bììàẹ́ nvéeá beè kilsĩ́ gè kọọ̀: “Níà Jíízọ̀s, neǹ kọ́ọ̀ bùlà Bàrì ea aa Názarẹ̀t ea di Gálilì!”

12 Jíízọ̀s beè bã boo beè tọọ̀ káíá vaá kpó gbò e bà géè oo nu nè gbò e bà géè zalí nu. A beè làbgì tébòl gbò e bà géè nyaaná kpègè nè kpòté gbò e bà géè oo kú-kuú kẽ. 13 A beè kọ́ nè va kọọ̀: “Kpá Káí beè kọọ̀, ‘Bà é kólí ńdáà tọ kolíe tọ gè tõó m tã̀àgã ló Bàrì,’ sõò boolo kiilàì naamai kóló zib.” 14 Nagé, gbò gímá dẽe nè gbò kọ̀và beè dúé ló gbẹá boo beè tọọ̀ káíá, vaá a beè bó va.

15 Tṍó e gbò togó vààla gyọ́ọ nè gbò émì kpá mon gbò tóm dũ̀ùnè ea sí, nè bé e gbò pá nvín gé tõó mm̀ tọọ̀ káíá vulí kpã́ naa kọọ̀: “È banì kọ ó dùùlà nvín Dévìd!” bà gbóó nvèè súng 16 vaá kọ̀ nèe kọọ̀: “Ò dã́à gé nú e bà gé kọ́á?” Jíízọ̀s à aalá nè va kọọ̀: “Ẽei. Ò gáà beè bugií mm̀ Kpá Káí kọọ̀, ‘O náa kọọ̀ gbò pá nvín nè gbò nvín e bà di nù má kà á tú ba gã́ lèèmà ni’?” 17 À gbóó àà vá ló kil Bẹ́tanì vaá tõó kĩá bílá deè deeá.

18 Tṍó ea gé oòa kẽ kil Jèrúselẹ̀m boo bòm dee, tákói beè gbóó táẹ́ ló. 19 À gbóó mòn ene kà té fíìg ea di gã́ èèlè vaá kyã̀à nyoone, sõò náa beè mòn tọ́ọ̀ ból bè. Áá pà sãa ní ea beè mòn ẽ. À gbóó kọ́ nè téá kọọ̀: “Ó gá mumí ná ból súú tọ́ọ̀ dee.” Tẽ̀ènè tṍóá, té fíìga à gbóó ọọ. 20 Tṍó e pá a gbò nyòòne nvée mon naa vó, a beè palàge bọọ́ vá ló, naa ní e bà kọ́ọ̀: “Éé ní ea náa vaá té fíìgí à gbẹá boo ọọ ẹ́?” 21 Jíízọ̀s à aalá nè va kọọ̀: “M̀ lóò kà-kà bel nèi kọọ̀, be ò íei zìgà vaá nóo íèì bàà-bàà bùlà, níì áá gè kọọ̀ ò é láá naanii nú em náà té fíìgí nì, sõò ò é láá kọi nei gù kọọ̀, ‘Bùùà dọ pène,’ vaá à nááá. 22 Ò é íei kọ̀láá kà nu eo banììé bá mm̀ tã̀àgã ló, be ò íei zìgà.”

23 Tṍó ea bã́ tọọ̀ káíá, gbò togó vààla gyọ́ọ nè gbò kàneǹ pá Júù beè gbóó dúé ló tṍó ea gé nóòmà nu vaá bĩináe kọọ̀: “Mó íb kpóó ní eo síìmà gbò tómí ẽ́? Vaá mée ní ea beè nè ni kpóóí é?” 24 Jíízọ̀s à aalá nè va kọọ̀: “À íe ene kà bíb e nda é bĩ́íná nágé boolo. Be ò láá aalai, m̀ é kọ́ nèi íb kpóó em ólò naamá gbò nuí. 25 Mée ní ea beè nè kpóó Jṍòn kọ á diile nen múú ẽ́? É kọọ̀ Bàrì sẹ̀ nen ẽ́?” Bà gbóó dààmà togó gè kọ́ nè ene kọọ̀: “Be è kọ́ọ̀, ‘Bàrì ní ea beè nèe ẽ́,’ à é bĩ́ínái kọọ̀, ‘Vaá éé ní ea náa nóo beè zigaíé ló é?’ 26 Sõò pọ̀ sííi ló nú e gbòí é láá naái be è kọ́ọ̀, ‘Nen ní ea beè nèe ẽ́,’ boo béè kọọ̀ bà ólò ẹ̀b Jṍòn naamá neǹ kọ́ọ̀ bùlà Bàrì.” 27 Bà gbóó aalá nè Jíízọ̀s kọọ̀: “Née nyímà.” Jíízọ̀s à òòa kẽ kọ́ nè va kọọ̀: “Beè vó, nda ním é kọ́ nágé íb kpóó e nda ólò siimá gbò tómí nèi.

28 “Bọọ bùlà kọ́ và ẹ? Ene kà gbálà beè ié bàà kà nvín. À gbóó àà sí ló ńtúá kà vaá kọ́ nèe kọọ̀, ‘Ńdáà nvín, àà gé sí tóm mm̀ ól vã́ìná nieí.’ 29 Nvíná à aalá nèe kọọ̀, ‘Ním é láá sì,’ sõò tṍó e tṍó téní, a beè ọgá vaá àà sí ólá. 30 À sí ló ńna ọ̀vàa gé ló tẽ̀ènè kà belá nèe. Ẹlẹ à aalá nèe kọọ̀, ‘M̀ é sí, e Tẹ́ẹ̀,’ sõò náa beè sì. 31 Mée ea di zẹ̀ẹ̀ pálaa kà nvíní ní ea náa bùlà ba tẹ̀ ẹ?” Bà aalá nèe kọọ̀: “Ńtúá kàa.” Jíízọ̀s à kọ́ nè va kọọ̀: “M̀ lóò kà-kà bel nèi kọọ̀, gbò lọ̀l kpègè gbáá nè gbò kyãa ól é gbẹ́ẹ́i bã mm̀ Boǹ Méné Bàrì. 32 Boo béè kọọ̀ Jṍòn beè dù gé dòbá èèlè lé lab dògò nèi, sõò nóo beè zigaié ló. Kọ̀láá bé ea dì naa, gbò lọ̀l kpègè gbáá nè gbò kyãa ól beè zìgàẹ́ ló, sõò bã̀àna tṍó eo monìì naanii vó, nóo beè ọgai vaá zigaié ló.

33 “Pãanei tṍ ló dõona kà nu dòòle ló: À ie ene kà gbálà ea beè ié kunukẽ̀. A beè fó vã́ìn boo vaá bè gbà tenmá ló. À gbóó ùb bànà e bà é tõó m zàg míí sẹlẹ́ boo, vaá tìb tọ e bà é tõó boo kùdẽe ló ólá. Tṍóá, à gbóó tú ólá nè gbò e bà é ẹb nú ea kil ló vaá àà sí kpã́á deè kyẽè. 34 Tṍó e nú e ba beè fò ni léèvè, à gbóó lẹ̀ẹ̀là pá a gyóòlo siimá ló gbò e bà géè ẹ̀b nú ea kil ló ólá, kọ bà á neèe dõò ńlẹ. 35 Sõò gbò e bà géè ẹ̀b nú ea kil ló ólá beè sii gbò gyóòloá. Ba beè bòm enè ọ̀và, fẹ́ enè ọ̀và, vaá tobmà dem̀ enè ọ̀và. 36 A beè lẹ̀ẹ̀là nàgé dõona kà gbò gyóòlo e bà bọọ́ tõ̀ò èl túá gbò ea beè zẹ́ẹ́ lẹ̀ẹ̀làa. Sõò ba beè naa nagé vó baala. 37 Dee deè nvée, à gbóó lẹ̀ẹ̀là a nvín siimá vá ló, vaá kọọ̀: ‘Bà é fã dẽè ńdáà nvín.’ 38 Tṍó e gbò e bà géè ẹ̀b nú ea kil ló ólá mon a nvín, bà gbóó kọ́ nè ene kọọ̀, ‘Neenii nen ea é dé a gyọ́í. Dui mè èé fẹ́ẹ, vaá è tú a gyọ́!’ 39 Bà gbóó siíe lọl mm̀ ólá vaá fẹ́ẹ. 40 Vó à naa, tṍó e tẹ̀ íè ólà é dú, éé ní ea é náa gbò e bà géè ẹ̀b nú ea kil ló ólá ẹ́?” 41 Bà aalá nèe kọọ̀: “Boo béè kọ bà lábví pọ́lọ́ láb, à é kyọ́ va sĩ́ vaá tú ólá nè dõona gbò e bà é ẹb nú ea kil ló, vaá tú dõò ńlẹ nèe tṍó e nú e bà beè fò ni léèvè.”

42 Jíízọ̀s à gbóó kọ́ nè va kọọ̀: “Ò gáà beè bugii lọlíí mm̀ Kpá Káí kọọ̀, ‘Kpò dem e gbò tìb tọ beè gbẹmà nvéeá ní e bà oòa kẽ nòòmà gából deè tọ ẹ́? Nakà kpò demí aa bá Jìhóvà,* vaá à palàge dú lé.’ 43 Níà nú ea náa m̀ kọ́ nèi kọọ̀, Bàrì é tú a Boǹ Méné lọ̀líí bá nè gbò e bà náa nú ea gbĩ́ kọ bà á naa ẽ́. 44 Nagé, kà agẹ bá kom é bã́ ló neń ea dọ́ boo demí. Vaá kọ̀láá nen e demí dọ́ boo é légá.”

45 Tṍó e gbò togó vààla gyọ́ọ nè pá Fárìsíì dã́ bel dòòle lóí, bà gbóó nyimá kọ à gé ló bel nyoomàè va. 46 Náa kal ló béè kọọ̀ bà géè gbĩ́ gè siíe, pọ̀ beè sií va ló gbò e ba beè di kĩá, boo béè kọọ̀ ba beè ẹ̀bvie naamá neǹ kọ́ọ̀ bùlà Bàrì.