Lé Kpẹ̀a E Lúùk Beè Emí
6 À íe deè bõ̀séi e Jíízọ̀s géè kyã̀à tení boo bàlà ól e ba beè fó nu. Pá a gbò nyòòne nvée à gbóó dààmà togó gè kã̀ànà nu vaá salí bá ló taa. 2 Tṍóá, sìgà pá Fárìsíì à gbóó bĩiná kọọ̀: “Éé ní ea náa ò gé náanii nú e log náa ténmá kọ bà á naá Deè Bõ̀séi é?” 3 Sõò Jíízọ̀s à aalá nè va kọọ̀: “É kọọ̀ ò gáà beè bugii nú e Dévìd beè naa tṍó e tákói beè tá ló gbò e ba beè dìé lóá nè ẹ̀ẹ̀? 4 Bé ea beè bã mm̀ tọọ̀ Bàrì vaá dé fétúlú e ba beè nè Bàrì, vaá tú sìgà nè gbò e ba beè dìé ló naa, ea dú nú e log ténmá kọọ̀ áá gbò vààla gyọ́ọ ní e bà é láá dèe?” 5 Tṍóá, à gbóó kọ́ nè va kọọ̀: “Sã́áná nená ní ea gé lẹẹlà bel ló Deè Bõ̀séi é.”
6 A beè bã̀ nàgé mm̀ tọ bõ̀ònaló fã̀ pá Júù dõona deè bõ̀séi vaá dààmà togó gè noomà nu, vaá ene kà gbálà e bá lèe beè ọọ táẹ́ ló beè di kĩá. 7 Gbò émì kpá nè pá Fárìsíì géè palàge ẹ̀b Jíízọ̀s be à é bó neń Deè Bõ̀séi kọbé bà síìmàèe log. 8 Sõò a beè nyimá nú e bà gé bugi togó boo. À gbóó kọ́ nè gbálà e báẹ ọọá kọọ̀: “Aa boo dù gé elá èèlè nyíè zẹ̀ẹ̀í.” À gbóó aa boo gé elá kĩá. 9 Tṍóá, Jíízọ̀s à gbóó bĩiná va kọọ̀: “Éé ní e log ténmá kọ é naá Deè Bõ̀séi é, é kọọ̀ ge naa lé nu sẹ̀ ge naa pọ́lọ́ nu ẽ́, é kọọ̀ ge dùùlà dùm nen sẹ̀ ge fẹ́ nen ẽ́?” 10 À gbóó ẹ̀b dénè ọ̀và, vaá kọ́ nè gbálàa kọọ̀: “Nììnà bá ni.” À gbóó nììnà báẹ, vaá kà à gbóó bã m. 11 Bà gbóó nvèè súng e nyìmànù á gé m, vaá dààmà togó gè bilá ló nú e bà é náámá Jíízọ̀s.
12 À íe enè dee ea beè kil boo gù gé tã̀àgã ló Bàrì, vaá a beè tú zivèkà bílá deè deeá tã̀àma ló Bàrì. 13 Tṍó e dee zilà, à gbóó kolí gbò e bà ólò nyoonée nvée, vaá sà 12 nen ea kolí va gbò tóm lọ̀l vá gbàà. 14 Ba bée kọlà Sáímòn, ea ólò kolí náe gé Pítà, Ándrù ea dú a vígà, Jém̀z, Jṍòn, Fílìp, Bàtòlómìù, 15 Máátìù, Tómòs, Jém̀z ea dú nvín Àlfíọ̀s, Sáímòn e bà ólò kolí náe gé “neń ea íe bẹ̀à sã́ bùlà,” 16 Júdàs ea dú nvín Jém̀z, nè Júdàs Ìskáriọ̀t ea beè oo Jíízọ̀s tṍó e tṍó téní ã́.
17 Ẹlẹ nè pá a gbò tóm beè gbóó aa boo gùa gé elá kĩée ea ọ́ọ́gá, vaá gã́bug dõona gbò e bà ólò nyoonée nvée nè gbò e bà aa dénè Jùdíà nè Jèrúselẹ̀m nè nù múú Táíà nè Sáídòn beè dù kọbé bà pãanèèe tṍ ló nè kọbé bà íèè bóa. 18 Bã̀àna gbò e pọ́lọ́ nyómá géè tãagẽ beè boá. 19 Vaá dénè gbò e bà di kĩá géè gbĩ́ gè daáẹ bá ló, boo béè kọọ̀ kpóó ea aàẹ́ ló géè bó dénè ọ̀và.
20 À gbóó ẹ̀b pá a gbò nyòòne nvée vaá kọọ̀:
“Ẹ́ẹ́-ẹẹ̀ nyíe á di ló booló gbò tãa, boo béè kọọ̀ Boǹ Méné Bàrì kuúi.
21 “Ẹ́ẹ́-ẹẹ̀ nyíe á di ló boólo e tákói gé tá ló kátogóí, boo béè kọọ̀ gbàài é beè m-má.
“Ẹ́ẹ́-ẹẹ̀ nyíe á di ló boólo eo gé tói kátogóí, boo béè kọọ̀ ò é beè mangãi.
22 “Ẹ́ẹ́-ẹẹ̀ nyíe á dìí ló kọ̀láá tṍó e gbò nen ọ́bvíi vaá kpòòlài lọa ló, nè tṍó e bà nveèmài lẹ́, vaá kolíi gbò pọ́lọ́ boo béè Sã́áná nená. 23 Õi kaagai vaá nyíéi á ẹẹ tṍó ea nááá naa vó, boo béè kọọ̀ ò é íei gã́bug kpẽ́ mm̀ káála. Tẽ̀ènè kà nuá ní e ba gbò nómá tẹ̀ beè olòó naa gbò kọ́ọ̀ bùlà Bàrì e.
24 “Sõò pọ́lọ́ múú kyáá á di ló booló gbò méné, boo béè kọọ̀ nú ea dìí báá níà kùbmà nú eo é íei é.
25 “Pọ́lọ́ múú kyáá á di ló boólo e gbàài ḿ-má kátogóí, boo béè kọọ̀ tákóí é beè táí ló.
“Pọ́lọ́ múú kyáá á di ló boólo eo gé mangãi kátogóí, boo béè kọọ̀ ò é beè toi vaá bãagãi.
26 “Pọ́lọ́ múú kyáá á dìí ló tṍó e dénè nen ló lé bel kìlmàí ló, boo béè kọọ̀ níì nú e ba gbò nómá tẹ̀ beè olòó naa gbò e bà kpọ́ kyáá bel kọ baalaà gbò kọ́ọ̀ bùlà Bàrì e.
27 “Sõò nda kọ́ọ̀ nè boólo eo gé pãaném mi tṍ lóí kọọ̀: Kilíí sĩ́ gè vulei bọọ gbò ọ́b vaá ò náanii lé gbò e bà ọ́bvíi, 28 tãagãi ló Bàrì mai gbò e bà gé kalíi gbéé nè gbò e bà gé oníi. 29 Beè nen sá ni bá náásĩ́, kììlà na bá náásĩ́á nè nàe gé. Beè nen tú o pọ̀b kọ̀là ló, tu nágé kọ̀là ló eo beè nvee kè kẽ nèe. 30 Dõo nu nè kọ̀láá nen ea bań ni nu, vaá beè nen tú o nu, ó gá kọ á òòma kẽ.
31 “Kọ̀láá kà nu e boolo gbĩ́ì kọọ̀ gbò nen á naanìè neèi, boolo naa naigé neí va.
32 “Mókà bélè ní eo é íei be ò vulei áá gbò e bà vulèi é? Boo béè kọọ̀ bã̀àna gbò náàkyọ̀ ólò vùlè gbò e bà vulè va. 33 Vaá be ò náanii lé áá gbò e bà náái lé, mókà bélè ní eo é íei é? Bã̀àna gbò náàkyọ̀ ólò naa nagé vó. 34 Nagé, be ò nei bọ́ọ̀lẹ̀ nuù gbò eo ẹbvìì dẽesĩ́ kọ bà é láá kpẽ́ nèi, mókà bélè ní eo é íei é? Bã̀àna gbò náàkyọ̀ ólò nè bọ́ọ̀lẹ̀ nuù gbò náàkyọ̀ kọbé bà láá ié nú e ba beè nè bọ́ọ̀lẹ̀a. 35 Boolo ó gá naanii vó. Tãa vó, kilíí sĩ́ gè vulei bọọ gbò ọ́b, naanii lé gbò nen, vaá ò nei bọ́ọ̀lẹ̀ e bè nóo é ẹbmai dẽe kọ bà á òòmà nèi. Tṍóá, bọọ kpẽ́ é bọọ vaá ò é gbóó dui nvín Neń Ea Bọọ Lọ̀l Vaá À Lee, boo béè kọ à ólò naa lé gbò e bà náa ṍáe zaa nè gbò pọ́lọ́. 36 Kilíí sĩ́ gè iei sàn nyíe dì belí bé e bọọ Tẹ̀ íe sàn nyíe naaá.
37 “Gbáló vó, kubvii gè beelai bel ló dõona gbò, mè bà náa é béélái bel ló. Kubvii gè gbẹi dõona gbò, mè bà náa é gbẹ́i. Kilíí sĩ́ gè iai ló pọ́lọ́, mè bà é ia ló nè boolo. 38 Olòó dõonii nu, mè gbò nen é dõo nu nèi. Bà é do kà tõ̀ò eela mm̀ bẹ̀lẹ̀ ea di ló bọọ kọ̀là ló.* Bà é ká bá boo vaá zìgè, naa ní ea é ḿ-má èèà. Boo béè kọọ̀ nú eo doomàì nei dõona gbò ní e bà é doomà nè nàgé boolo é.”
39 Tṍóá, a beè gbóó ló dõona kà bel dòòle ló nè va kọọ̀: “Neǹ gímá dẽe náa é láá tulè neǹ gímá dẽe, sẹ̀ à é láá naa vó é? Pálaa ọ̀và é dọ́ bànà, sẹ̀ bà náa é dọ ẹ́? 40 Neń ea gé nó nu náa bọọ èl a neǹ dòbá, sõò kọ̀láá nen e bà palàge noomàe nu leevè é bélí a neǹ dòbá. 41 Éé ní ea náa ò mòn pẹ́l té ea di dẽè o vígà, vaá nóo monì kélè tẹ́ ea di dẽè olo é? 42 À é náà và ò láá kọ́ nè o vígà kọọ̀, ‘Ńdáà vígà, elá mè m̀ é tú pẹ́l té lọ̀l ní dẽe,’ boo tṍó e olo nóo monì kélè tẹ́ ea di dẽè olo é? Neǹ bààsĩ́! Zẹ́ẹ́ tú kélè tẹ́ ea dì ní dẽeá lọ̀l, kọbé ò láá palàge mòn nu vaá tú pẹ́l té ea di dẽè o vígà lọ̀l.
43 Tọ́ọ̀ kà lé té náa ólò mumí pọ́lọ́ ból súú, vaá tọ́ọ̀ kà pọ́lọ́ té náa ólò mumí lé ból súú. 44 Ò é nyímai ló té tení dú ló a ból súú. Dì belí nu dòòmà bá, gbò nen náa ólò kã̀ànà fíìg àbèè lògòlog lọl bè té e suu di ló. 45 Lé nen ólò ló lé bel boo béè kọọ̀ lé nu ní ea dìé nyíe ẽ́, sõò pọ́lọ́ nen ólò ló pọ́lọ́ bel boo béè kọọ̀ pọ́lọ́ nu ní ea dìé nyíe ẽ́. Boo béè kọọ̀ nú ea ḿ-má mm̀ nen ní ea ólò kọ́ tẹlẹ bàlà kẽ ẽ́.
46 “Éé ní ea náa ò kolím mi ‘Neń Ea Íéi! Neń Ea Íéi!’ sõò nóo náànìì gbò nú em kọ́ọ̀ ẹ? 47 Nda é zógèi íb nen e neń ea dúm ló gé dã́ nà moǹ bel vaá naa bélí. 48 À bélí ene kà gbálà ea gé tìb tọ, ea palàge baa kunukẽ̀ nvee kẽ vaá dò díí kẽè tọá boo dem. Tṍó e tù múú dú, múú à bú kòn tọá, sõò múúá náa láà kũuná boo béè kọ a beè palàge tìb. 49 Sõò kọ̀láá neń ea dã́ vaá náa náa, bélí neń ea tib a tọ e bè náa zẹ́ẹ́ dò díí kẽ. Múú bú kòn vaá gbẹá boo kũuná, vaá zivèkà toá à gbóó kyọasĩ́.”