Tóm Gbò E Jíízọ̀s Beè Lẹ̀ẹ̀là

1 Mm̀ túá kà kpá em beè emí má ni, e Tìófilọ̀s, m beè emí dénè nú ea kil ló nú e Jíízọ̀s beè naa nè gbò nú ea beè noomà 2 dọ̀ọ̀mà deé e Bàrì túe kilma káála tṍó ea ni tú nyómá káí nèèmà dùùlà bá deè tṍ gbò ea beè sà naamá gbò e ẹlẹ lẹẹlà lọ̀l. 3 Tṍó ea ni mon tã̀àgã̀ lọ̀l, a beè tú a lóó zogè va gã́bug tṍó kọbé bà palàge àgala boo kọ à diè dùm. Ba beè mònie mm̀ 40 dee vaá à géè ló bel ea kil ló Boǹ Méné Bàrì. 4 Tṍó ea beè zọ̀ va bõoná, a beè ãané va kọọ̀: “Ó gá aalíí Jèrúselẹ̀m, sõò kilíí sĩ́ gè elai banai nú e Tẹ̀a beè zìgà eo beè dãi lọlím mí gã́á. 5 Mm̀ kà-kà, Jṍòn beè tú gbò nen diilé múú, sõò pọ́ì ńkem̀ dee aa ló kátogóí, nda é túi diilé múú tení dú ló nyómá káí.”

6 Vó à naa, tṍó e ba ni bṍóná, bà gbóó bĩináe kọọ̀: “Nen Ea Íéi, é kọ ò é gé òòmà boǹ ménéá né pá Ízrẹẹ̀l kátogóí?” 7 À kọ́ nèva kọọ̀: “Náa kuu boolo gè nyimá tṍó nè kpò tṍó e áá Tẹ̀a ní ea íe kpóó gè lẹ̀ẹ̀là bel ló é. 8 Sõò tṍó e nyómá káí é dọ́í boo, ò é íei kpóó, vaá ò é síi neǹ ditõ̀ò kilmam mí ló lọlíí Jèrúselẹ̀m tẹlẹ dénè Jùdíà nè Sàmérìà, nè kpã́á-kpã́á ketõ̀ò* ea di ló boo kunukẽ̀í.” 9 Tṍó ea ni ló gbò belí lọ̀l, e bà gé ẹbvíe, Bàrì à gbóó túe kilma gbàn deè vaá bù dee à gbóó kọ̀lie naa ní e bà náa mon náe. 10 Tṍó e bà gé ẹb gbàn deè tṍó ea gé aàa, bàà nen e bà nveà ẹ́ẹ́ vọ̀b kọ̀là ló à gbóó bú ló elá vá kpàn, 11 vaá kọọ̀: “Booló pá Gálilì, éé ní ea náa ò gé ẹbvii gbàn deè e? Jíízọ̀s e Bàrì túe lọ̀líí ló kilma káálaá é oòa kẽ dú mm̀ tẽ̀ènè sĩ́deè eo monììe ea gé aà kil káálaá.”

12 Tṍóá, bà gbóó òòà aa boo Gù Ólìv kil Jèrúselẹ̀m. Aa boo Gù Ólìv dọ Jèrúselẹ̀m beè láá toolá áá ene kà kìlómità, ea dú begè dẽè kyẽè e nen é láá kyã̀à deè bõ̀séi. 13 Tṍó e bà íná, bà gbóó àà kil mm̀ tọ gbàn deè e bà ólò tõoá. Pítà, bií ló Jṍòn nè Jém̀z nè Ándrù, Fílìp nè Tómòs, Bàtòlómìù nè Máátìù, Jém̀z ea dú nvín Àlfíọ̀s, nè Sáímòn ea íe bẹ̀à sã́ bùlàa, nè Júdàs ea dú nvín Jém̀z beè di kĩá. 14 Dénè ọ̀và, bií ló sìgà gbò bia nè Mérì ea dú kà Jíízọ̀s, nè gbò gbálà e Jíízọ̀s nè ọ̀và dúá gbàà géè tú tẽ̀ènè bùlà tã̀àma ló Bàrì.

15 Mm̀ gbò deeá, Pítà beè gbóó elá èla zẹ̀ẹ̀ pá vígàa (dénè gbò e ba beè di kĩá é láá toolá 120 nen) vaá kọọ̀: 16 “Pá vígà, a beè dú bíi kọọ̀ nú e nyómá káí beè kọ́ gbẹẹ́ kẽ tenmá gã́ Dévìd, vaá bà emí mm̀ Kpá Káí kilma ló Júdàs ea beè tulè gbò e ba beè sii Jíízọ̀sa, á mm-má. 17 A beè dũunài vaá ba beè sàẹ kọ à zọ̀i siá tóm. 18 (Gbálàí beè tú kpègè e ba beè kpẽ́ nèe ló pọ́lọ́ lab dògò zalmá kunukẽ̀. A beè tú togó dọ̀ọ̀mà, vaá gbààẹ à pomí naa ní e dénè nú ea dìé gbàà zaala kẽ. 19 Dénè gbò e bà di Jèrúselẹ̀m beè nyimá nú ea náááí, naa ní e bà kolí kunukẽ̀a kolíe Àkẹ́ldemà mm̀ ba dém bel, ea tõó dọ̀, “Kunukẽ̀ Mii.”) 20 Boo béè kọ ba beè emí mm̀ kpá Sọ́l Lèèlà kọọ̀: ‘A tọ á dú kóló m, vaá tọ́ọ̀ nen á gá tõo ná m,’ vaá bà á tú ‘a dọ̀ tóm dì belí neǹ kùdẽe ló nè dõona nèn.’ 21 Vó à naa, à dú bíi kọọ̀ enè nen zẹ̀ẹ̀ gbò gbálà e ba beè dìí ló dénè tṍó e Jíízọ̀s, ea dú Nen Ea Íéi, géè sí a tóm gbẹáí zẹ̀ẹ̀a, 22 lọl tṍó e Jṍòn beè túe diilé múú tẹlẹ tṍó e Bàrì túe lọ̀líí ló kilma káála, á zọ̀i sí neǹ ditõ̀ò kọọ̀ Bàrì beè kẽée lọl kemà ú.”

23 Bà gbóó íbá ló bàà nen, túá nen kọlà Jósẹ̀f ea kọlà Básabàs, e bà ólò kolí náe gé Jọ́stọ̀s. Ní ea égè bàà nen kọlà Màtáíàs. 24 Tṍóá, bà gbóó tã̀àgã ló Bàrì kọọ̀: “Jìhóvà, olo nyímà nú ea di nyíè dénè nen. Naa kọ é nyimá ló nen ea dì vá gbàà eo saà 25 kọ á sí tómí, vaá á dú nen e Jíízọ̀s lẹẹlà, boo béè kọọ̀ Júdàs beè sọ̀bá gbẹẹ́ kẽ.” 26 Bà gbóó uu ńnóm pálaa ọ̀và, vaá ńnómá à gbóó dọ boo Màtáíàs. Tṍóá, bà gbóó bugíe nvee gbàà 11 nen e Jíízọ̀s beè lẹ̀ẹ̀làa.