Lé Kpẹ̀a E Lúùk Beè Emí

24 Sõò kà lèlà túá dee ló sèa, ba beè gbóó faalá kpée-kpéè nù ló nóo e ba beè naaá domá ló bànà úá* kà bòm dee. 2 Bà gbóó mòn kọ ba beè kpọlẹ̀ báà dem lọl gã́ bànà úá,* 3 vaá tṍó e bà bã́ m, bà náa beè mòn íí Jíízọ̀s ea dú Neń Ea Íéi. 4 Boo tṍó e bà dì e bà gé deega boo nú ea náááí, bàà kà gbálà e bà nveà kọ̀là ló ea nyágĩ́ beè gbóó elá vá kpàn. 5 Pọ̀ beè sii gbò biaí naa ní e bà úu sĩ́ kẽ. Gbò gbálàa à gbóó kọ́ nè va kọọ̀: “Éé ní ea náa ò gé gbĩ́i neń ea di dùm gbàà gbò e ba beè ù e? 6 Á gé ná kĩí, boo béè kọọ̀ Bàrì beè kẽée lọl kemà ú. Kẽeaí boo bel ea beè kọ́ nèi tṍó ea beè di Gálilìa, 7 kọọ̀ bà é tú Sã́áná nená nvee bá gbò náàkyọ̀, vaá bà é túe ká kú té, sõò à é kẽeà ní ea égè taà dee.” 8 Tṍóá, bà gbóó kẽ̀èa boo gbò bel ea beè lò. 9 Bà gbóó òòà aa ló bànà úá,* vaá àà gé kọ́ kọ̀láá kà nuí nè Òb Nè Enè Nená nè dénè nagbòa. 10 Béè gbò pábiaí beè kọ̀là Mérì ea dú Màgdálà, Jòánà, nè Mérì ea dú kà Jém̀z. Nagé, dénè nagbò bia e ba beè dì vá lóá beè kọ nágé gbò nuí nè gbò tómá. 11 Sõò, belí beè tõó vá ló dú kéle-kélè dẽe, vaá bà náa beè zìgà nú e gbò biaá kọ́.

12 Sõò Pítà à gbóó teelá sí ló bànà úá* gé tòòlà dẽe ẹ̀bmà m. À gbóó mòn áá báà kàn e ba beè kọ̀lmàe. À gbóó òòa kẽ àà vaá nú ea nááá beè palàge bọọẹ́ ló.

13 Sõò kà lèlà deeá, bàà nen ea ólò nyoone nvéè Jíízọ̀s géè sí ene kà bon ea kọla Èméọ̀s, ea é láá dú àlàbà kà máẹ̀l* aa ló Jèrúselẹ̀m, 14 vaá bà géè gbá loá sọ́l boo dénè nú ea náááí.

15 Tṍó e bà gé lóá sọ́l boo dénè gbò nuí, Jíízọ̀s beè gbóó kyã̀à bã̀ vá ló vaá zọ̀ va gbá tọ. 16 Ba beè mònie, sõò bà náa beè nyimáe ló. 17 À gbóó bĩiná va kọọ̀: “Éé ní eo gé lóai bel boo gbẹáí boo èèlè eo gé kyãaniií ẽ́?” Bà gbóó elá mm̀ bígálá sĩ́. 18 Enè ọ̀và ea kọlà Klíopàs à gbóó aalá nèe kọọ̀: “É kọọ̀ oloò neǹ kyáà eo di Jèrúselẹ̀m e áá ọ̀ọ̀ di enè ketõ̀ò besĩ́ nóo nyímà nú ea géè naaá kĩá gbò deeí?” 19 À bĩiná va kọọ̀: “Éé géè naaá ẽ́?” Bà aalá nèe kọọ̀: “Níà nú ea kil ló Jíízọ̀s ea dú Názarẹ̀t, e gbò bel ea beè lò nè gbò nú ea beè naa beè zogè kọọ̀ ẹ̀ẹ̀ neǹ kọ́ọ̀ bùlà Bàrì, vaá Bàrì nè gbò nen beè palàge nvèèe ká ló, 20 nè bé e bẹẹ gbò togó vààla gyọ́ọ nè gbò e bà gé bẹl beè túe nvee bá gbò bèèla kọ bà á beelá ú nèe naa, vaá ba beè túe ká kú té. 21 Vaá níà neń e beele géè ẹ̀bmà dẽe kọ à é duulà pá Ízrẹẹ̀l ẹ. Mm̀ kà-kà, nieí ní ea égè taà dee e gbò nuí beè naaá ẽ́. 22 Gbáló vó, sìgà gbò bia e bà dṹùnài dú gé ló bel ea bọọí ló, boo béè kọ ba beè nùmà àà sí ló bànà úá,* 23 vaá tṍó e bà náa mon a íí, bà gbóó dù gé kọ́ nèi kọọ̀, bà monìè gbò nyómá tóm e bà kọ́ẹ̀ neè va kọ à di dùm. 24 Tṍóá, sìgà gbò e bà dṹùnài beè gbóó àà sí ló bànà úá* vaá mòn gbõ̀ònà bé e gbò biaá beè kọ́ naaá, sõò bà náa beè mòn Jíízọ̀s.”

25 À gbóó kọ́ nè va kọọ̀: “Nóo nyímài nu vaá ò ọọlìì ló gè zigai nú e gbò kọ́ọ̀ bùlà Bàrì beè kọ̀! 26 É kọ náa beè dú bíi kọọ̀ Kráìst á mòn tã̀àgã̀ bá dénè gbò nuí kọbé bà nveèe ka ló?” 27 À gbóó dààmà togó gè baatẽ́ nú ea kil ló a bá e ba beè emí mm̀ Kpá Káí nè va, lọl ló nú e Mózìs beè kọ̀ tẹlẹ ló nú e dénè Gbò Kọ́ọ̀ Bùlà Bàrì beè kọ̀.

28 Tṍó e bà kyãà iná kuló bon e bà géè sì, a beè gbóó belí kọ à é kpáá kyãanìè kilìè sĩ́. 29 Sõò ba beè bànie kọọ̀: “Tõoí ló kĩí, boo béè kọ a dú ló èlà e dee é gé bilá.” À gbóó bã tọ vaá zọ̀ va tõó kĩá. 30 Tṍó ea gè zọ́ va dé gyã́á, à gbóó tú fétúlú, tã̀àgã ló Bàrì boo, vaá baagi nè va. 31 Tṍóá, bà gbóó nyèèà vaá nyimáe ló. Sõò a beè ii àà vá ló àà. 32 Bà gbóó dààmà togó gè kọ́ nè ene kọọ̀: “Níà nú ea náa vaá gbò bel ea géè ló nèi gbẹá boo èèlèa nè bé ea baatẽ́ gbò nú ea di mm̀ Kpá Káí naa nèi beè palàge tọáí ló é!” 33 Bà gbóó gbẹá boo àà kil Jèrúselẹ̀m kà lèlà tṍóá, vaá ba beè mòn Òb Nè Enè Nená nè gbò e bà di bṍòna vá ló 34 e bà gé kọ́ọ̀: “Mm̀ kà-kà, Neń Ea Íéi a kẽeà aa kemà ú, vaá a beè sila ló Sáímòn!” 35 Baala à gbóó kọ nágé nè va nú ea beè naaá gbẹá boo èèlè, nè bé e ba beè nyimàèe ló naa tṍó ea baagi kpò fétúlú.

36 Boo tṍó e bà gé ló belí, Jíízọ̀s à gbóó elá vá zẹ̀ẹ̀ vaá kọ́ nè va kọọ̀: “Fẹ́ẹ́-fẹẹ̀ ló á dìí ló.” 37 Sõò boo béè kọọ̀ pọ̀ géè palàge sií va vaá lóó va géè kení, bà gbóó dòòmà kọ bà monìè nyómá. 38 À gbóó bĩiná va kọọ̀: “Éé kọ́ ó iei tã̀àgã̀ bùlà vaá iei bàà-bàà bùlà ẹ? 39 Ẹbvím mi bá nè kpóó tọ. Níà nda. Daalím mi bá ló vaá ò monmai dẽe, boo béè kọọ̀ nyómá náa ólò ié nom̀ kpáló nè kpóó belí bé eo monìì kọ nda íè naaí.” 40 Tṍó ea kọ́ vó lọ̀l, à gbóó tú báẹ nè kpóó tọ́ẹ zogè va. 41 Sõò boo tṍó e ẹ́ẹ́-ẹẹ̀ nyíe nè bé ea bọọ́ vá ló naa gáà naa kọ bà á láá zìgà, à gbóó kọ́ nè va kọọ̀: “É kọọ̀ ò íèì nu gè dè?” 42 Bà gbóó nèe gyã́à e ba beè ọví. 43 À gbóó tú lọ̀l vá bá vaá bà gbẹá vá kèsĩ́.

44 À gbóó kọ́ nè va kọọ̀: “Tṍó em beè dìí lóá, m beè kọ́ nèi kọọ̀ kọ̀láá kà nú e ba beè emí kìlmàḿ ló mm̀ Log Mózìs nè mm̀ Kpá Gbò Kọ́ọ̀ Bùlà Bàrì nè mm̀ kpá Sọ́l Lèèlà* é íè ge mm-má.” 45 Tṍóá, à gbóó nvèè bá nè va kọ bà á palàge dã́ ból ló nú ea di mm̀ gbò dọ̀ Kpá Káíá. 46 À gbóó kọ́ nè va kọọ̀: “Ba beè emí kọọ̀ Kráìst é mon tã̀àgã̀, vaá kẽ̀èà aa zẹ̀ẹ̀ gbò e ba beè ù ní ea égè taà dee, 47 vaá boo béè a bée, bà é kọ́ nú ea kil ló gè ia ló pọ́lọ́ tṍó e nen ọ́gá nè dénè dó—vaá bà é daamà togó lọl Jèrúselẹ̀m. 48 Ò é síi neǹ ditõ̀ò kilmaí ló gbò nuí. 49 Ẹbvii! M̀ é lẹẹlà nú e ńdáà Tẹ̀ beè zìgà mái. Sõò tõoníí Jèrúselẹ̀mí dọ̀ọ̀mà tṍó eo é íei kpóó ea aa bá Bàrì.”

50 Tṍóá, a beè gbóó faalá va kilma Bẹ́tanì. À gbóó dàlà bàà báẹ nè boo vaá tãanè va dee bá. 51 Boo tṍó ea gé tã́ànè va dee bá á, Bàrì à gbóó túe lọ̀l vá ló kilma káála. 52 Bà gbóó kumí sĩ́ kẽ nèe vaá òòà kil Jèrúselẹ̀m mm̀ ẹ́ẹ́-ẹẹ̀ nyíe. 53 Vaá ba beè kilsĩ́ gè olòó tõó mm̀ tọọ̀ káíá lèèlà Bàrì.