Lé Kpẹ̀a E Máàk Beè Emí

7 Pá Fárìsíì nè sìgà gbò émì kpá e bà aa Jèrúselẹ̀m beè gbóó dù gé bõonáé ló. 2 Bà gbóó mòn sìgà gbò e bà ólò nyoonée nvée e bà gé tú dĩ́ bá deemá gyã́á. Níà ge kọọ̀, bà náa lógá bá. 3 (Boo béè kọọ̀ beè pá Fárìsíì nè dénè pá Júù gáà loga bá iná dúnú bá, bà náa ólò dé gyã́á, naamá gè tõó boo nàànù kunukẽ̀ gbò nómá tẹ̀. 4 Vaá tṍó e bà aa kèki dù, bà náa ólò dé nu be bà gáà bìlà múú. À íe nagé gã́bug dõona kà gbò nàànù kunukẽ̀ e bà ólò tõó boo, dì belí gè tú gbàág, gyóògò, nè gbò nú e ba beè tú gbébílí naamá diilé múú.) 5 Vó à naa, pá Fárìsíì nè gbò émì kpáí à gbóó bĩináe kọọ̀: “Éé ní ea náa vaá pá o gbò nyòòne nvée náa ólò tõó boo nàànù kunukẽ̀ gbò nómá tẹ̀, vaá bà olòó tú dĩ́ bá deemá gyã́á ẽ́?” 6 À aalá nè va kọọ̀: “Neǹ kọ́ọ̀ bùlà Bàrì Àìzáíà beè palàge kọ́ nu ea kil ló boólo gbò bààsĩ́ kọọ̀, ‘Gbòí tú ba bũunu nvèèmàm ka ló, sõò ba nyíe di kpã́á ààḿ ló. 7 Bà gé fám mm̀ zọ̀là pọ́ì, boo béè kọọ̀ bà nóòmà dòbá nuù nen kọ níà log Bàrì.’ 8 Ò sọ̀ì bá log Bàrì gbẹẹlíí kẽ, vaá biilii bá ló nàànù kunukẽ̀ gbò nen.”

9 À gbóó kpáá kilsĩ́ gè kọ́ nè va kọọ̀: “Ò túì kyèèlè gbẹẹmai mòn bel Bàrì kọbé ò kilíí sĩ́ gè biilii bá ló bọọ gbò nàànù kunukẽ̀. 10 Dì belí nu dòòmà bá, Mózìs beè kọọ̀, ‘Nvèè ka ló o tẹ̀ nè o kà, vaá kọ̀láá neń ea ló pọ́lọ́ bel nè a tẹ̀ àbèè a kà, bà á fẹ́ẹ.’ 11 Sõò boolo kọ́ì kọọ̀, ‘Nen é láá kọ́ nè a tẹ̀ àbèè a kà kọọ̀: “M beè tú kọ̀láá kà nu em íè ea gáẹ̀ láá dọ̀ bélè nè ni naamá dõ̀ònù em neè Bàrì.”’* 12 Nóo zigài kọ á kpáá naa ene kà nu nè a tẹ̀ àbèè a kà. 13 Ò lọlìì ka ló moǹ bel Bàrì boo béè nàànù kunukẽ̀ eo beè dui dọí boo, vaá ò ólò naanii gã́bug nu ea bélí vóí.” 14 À gbóó kpáá kolí gbòa vaá kọ́ nè va kọọ̀: “Dénè bọ̀ì pãaném mi tṍ ló vaá ò dã́i kà ea di m. 15 Tọ́ọ̀ nú ea bã́ gã́ nen náa ólò kyọ̀ nen, sõò nú ea aa mm̀ nen ní ea ólò kyọ̀ẹẹ́.” 16* ——

17 Tṍó e ba ni aa gbàà gbòa bã tọ, pá a gbò nyòòne nvée à gbóó dààmà togó gè bĩináe bíb ea kil ló bel dòòle ló á. 18 À gbóó kọ́ nè va kọọ̀: “Boolo nóo dã́ nàìgé ból ló nu belí baala? É kọ nóo nyímàì kọọ̀ nú ea bã́ gã́ nen náa ólò kyọ̀ nen, 19 tã́gíní bé e náa ólò bã̀é nyíe, sõò à ólò bã̀é gbàà vaá à sí tẹlẹ kẽá?” Vó à naa, a beè naa kọ bà á nyimá kọọ̀ kọ̀láá íb gyã́á õoà. 20 A beè kilsĩ́ gè kọọ̀: “Nú ea aa mm̀ nen ní ea ólò kyọ̀ẹẹ́. 21 Mm̀ nyíè nen ní e pọ́lọ́ bug togó ólò ààẹ: dì belí dùm kúnagã̀, zib, gè fẹ́ nen, 22 ge gbẹẹ va àbèè dóm kuná gã̀, gọ̀l òò, ge labví pọ́lọ́ láb, ge tõó dùm kẹ̀lẹ̀, ge lọ̀à kẹ́ẹ ló sí pọ́lọ́, bẹẹ nyíe, ge òn Bàrì, dàlà kpáló boo, nè ge labví láb e nyìmànù á gé m. 23 Dénè pọ́lọ́ nuí ólò aa mm̀ nen, vaá à ólò kyọ̀ nen.”

24 A beè gbóó aa kĩá kil bálásĩ́ Táíà nè Sáídòn. A beè bã ene kà tọ vaá náa beè gbĩ́ kọ gbò nen á nyimá, sõò gbò nen beè nyimá. 25 Tẽ̀ènè tṍóá, ene kà ńnváá e zọ di mm̀ a ńkem̀ nvín pábia beè gbóó dã́ nú ea kilíé ló, vaá dù gé kumíe dúnú ke gbàà. 26 Ńnvááá dú Gríìk, sõò a beè mèà gbẹá Fìnísìà ea di dó Sìríà. A beè kilsĩ́ gè bànie kọ á kpó zọ̀ lọlìè mm̀ a nvín pábia. 27 Sõò a beè kọ́ nèe kọọ̀: “Elá, gbàà gbò pá nvín á zẹ́ẹ́ m-má, boo béè kọ náa lelà ge tú gyã́á ea kuu gbò pá nvín nè gbò nvín gbógó.” 28 Ńnvááá à aalá nèe kọọ̀: “Níà kà-kà e tẹ́ẹ̀, sõò bã̀àna gbò nvín gbógó e bà di kè kẽè tébòl ólò dé sã́gã́-sã́gã́ ea aa ló gyã́á e gbò pá nvín gé dé.” 29 À gbóó kọ́ nèe kọọ̀: “Boo béè bel eo lóòí, àà, mè zọá a aa mm̀ o nvín pábia.” 30 A beè gbóó àà iná tọ vaá mòn a nvín ea di ma boo vái, e zọá ni aàẹ́ m.

31 Tṍó e Jíízọ̀s aa Táíà, a beè kyã̀à tení bálásĩ́ Sáídòn nè Dìkápolìs kil deè Pène Gálilì. 32 Ba beè gbóó faalá ene kà gbálà e tṍe kááá, vaá náa ólò láá ló bel le-le sĩ́ máe. Bà gbóó bànie kọ á dẹlẹ́ẹ bá ból. 33 À gbóó tú gbálàa lọl gbàà gbòa kilma kpògà kẽ. À gbóó tú nvéé bá diiléé pálaa kà deè tṍ, vaá tú múú kyáá daaẹ́ boo dém. 34 À gbóó ẹ̀b gbàn deè káála, kõoná séi sivè, vaá kọ́ nèe kọọ̀: “Ẹ́fatà,” ea tõó dọ̀, “Gbóó kùùà.” 35 Tṍóá, a beè gbóó láá dã́ nu, vaá nú ea géè naa kọ á gá láá ló bel le-le sĩ́á beè gbóó tà, naa ní ea láá ló bel õ̀ònà dẽe. 36 A beè gbóó ãané va kọ bà á gá kọ́ nè tọ́ọ̀ nen, sõò buù tṍó ea kọ́ nè va kọ bà á gá kọ̀, níà tṍó e bà ólò kpáá palàge kọ̀ẹ. 37 Mm̀ kà-kà, níí beè palàge bọọ́ vá ló naa ní e bà kọ́ọ̀: “Dénè a tóm dú dũ̀ùnè. À láá bo nágé gbò káá tṍ nè gbò bólá gã́.”