Lé Kpẹ̀a E Máátìù Beè Emí

7 “Kubvii gè beelai bel ló dõona gbò kọbé bà náa béélái bel ló; 2 boo béè kọọ̀ bá eo béèmàì bel ló dõona gbò ní e bà é béémái bel ló é, vaá nú eo doomàì nei dõona gbò ní e bà é doomà nè boolo é. 3 Éé ní ea náa ò mòn pẹ́l té ea di dẽè o vígà, vaá nóo monì kélè té ea di dẽè olo é? 4 Àbèè kọọ̀, à é náa và ò láá kọ́ nè o vígà kọọ̀, ‘Elá mè m̀ é tú pẹ́l té lọ̀l ní dẽe,’ boo tṍó e kélè té di dẽè olo é? 5 Neǹ bààsĩ́! Zẹ́ẹ́ tú kélè té ea dì ní dẽeá lọ̀l kọbé ò láá palàge mòn nu vaá tú pẹ́l té ea di dẽè o vígà lọ̀l.

6 “Ó gá tui nú ea di káí nei gbò gbógó, àbèè ge tui bọọ ból lọ́ọ̀ tẹlẹí ke gbàà diì máá kọbé bà náa zag tọ́ boo lọ̀l, vaá òòa kẽ dù gé tagíi.

7 “Kilíí sĩ́ gè bĩinai, mè bà é néi; kilíí sĩ́ gè gbĩi, mè ò é monii; kilíí sĩ́ gè konii bá nvée, mè bà é kuulà nèi; 8 boo béè kọọ̀ kọ̀láá neń ea kilsĩ́ gè bĩiná, é íe, vaá kọ̀láá nen ea kilsĩ́ gè gbĩ̀, é mon. Vaá kọ̀láá nen ea kilsĩ́ gè kòn bá nvée, bà é kuulà nèe. 9 Mée ea dìí zẹ̀ẹ̀, ní ea nvín é bĩ́ínáe fétúlú, vaá à née kpò dem ẽ́? 10 Vaá be à bĩ́ínáe gyã́à, náa é née naanà, sẹ̀ à é náa vó é? 11 Vó à naa, be booló gbò pọ́lọ́ lab dògò nyímàì tẽ́ gè tui lé nu nei bọọ gbò nvín, é kọọ̀ bọọ Tẹ̀ ea di káála náa é tú lé nu nè gbò e bà bĩ́inaé bá?

12 “Boo béè vó, kọ̀láá kà nu e boolo gbĩ́ì kọọ̀ gbò nen á naanìè neèi, boolo é íè ge naa nai gé neí va. Mm̀ kà-kà, níà nú e Logá nè Nòòmà Nù Gbò Kọ́ọ̀ Bùlà Bàrì kọ́ ẹ́.

13 “Teníí bìbìì gbànsĩ́á bãamai, boo béè kọọ̀ gbànsĩ́ nè èèlè ea bọọ́ gbààa é tú nen nvee kèbá kyọ̀àsĩ́, vaá gã́bug nen gé téní boo; 14 boo tṍó e gbànsĩ́ nè èèlè ea biilàa é náa kọ nen á ié dùm, vaá pọ́ì ńkem̀ gbò ní e ba gé téní boo é.

15 “Ọẹi dẽe ló gbò e bà kpọ́ kyáá bel kọọ̀ baalaà gbò kọ́ọ̀ bùlà Bàrì, e bà sẹlẹ ló belí naanà ból, sõò ọ̀vàà kpọ́í. 16 Ò é nyímaí va ló tení dú ló ba láb.* Gbò nen náa ólò kã̀ànà lògòlog àbèè fíìg lọl bè té e suu di ló, sẹ̀ bà ólò naa vó é? 17 Mm̀ tẽ̀ènè sĩ́deèá, kọ̀láá kà lé té ólò mumí lé ból súú, sõò kọ̀láá kà pọ́lọ́ té ólò mumí pọ́lọ́ ból súú. 18 Lé té náa é láá mumí pọ́lọ́ ból súú, vaá pọ́lọ́ té náa é láá mumí lé ból súú. 19 Bà ólò kẽe kọ̀láá kà té e bè náa múmí lé ból súú tẹlẹ kẽ vaá tobví tẹlẹ dáà sã́. 20 Vó à naa, ò é nyímai ló gbò kyáá kọ́ọ̀ bùlà Bàrì tení dú ló ba láb.*

21 “Níì kọ̀láá neń ea kólím, ‘Neń Ea Íém, Neń Ea Íém,’ ní ea é bã́ Boǹ Méné Bàrìe nì, sõò áá neń ea náa bùlà nà Tẹ̀ ea di káála ní ea é bã ẽ́. 22 Kà lèlà deeá, gã́bug nen é kọ́ nèm kọọ̀: ‘Neń Ea Íéi, Neń Ea Íéi, é kọ née beè tú o bée kọọmá bùlà Bàrì, vaá tú o bée kpoomá zọ lọl mm̀ gbò nen, vaá tú o bée siimá gã́bug tóm dũ̀ùnè?’ 23 Tṍóá, nda é gbóó kọ́ nè va kọọ̀: ‘Ním nyímài ló! Tenii aalím mí sĩ́, e booló gbò sìì pọ́lọ́ tóm!’

24 “Vó à naa, kọ̀láá neń ea dã́ gbò bel em gé lóí vaá à naa, é bélí neǹ nyìmànù ea tú a tọ tib boo dem. 25 Vaá tṍó e boo dọọ́ ló, múú à bú kòn, fọ́ọ́lọ́ à saá ló, náa dọ, boo béè kọọ̀ ba beè tib boo dem. 26 Sõò kọ̀láá neń ea dã́ gbò bel em gé lóí vaá náa náa, é bélí neǹ ból ea tú a tọ tib gbàà sãa. 27 Tṍó e boo dọọ́ ló, múú à bú kòn, fọ́ọ́lọ́ à saá ló, à gbóó kõoá dọ̀.”

28 Tṍó e Jíízọ̀s ló gbò belí lọ̀l, bé ea nóòmà nu naa beè palàge bọọ́ ló gbòa, 29 boo béè kọọ̀ náa beè noomà nu belí ba gbò émì kpá, sõò a beè noomà nu belí neń e kpóó lẹ̀ẹ̀là bel di bá.