Lé Kpẹ̀a E Máàk Beè Emí

6 A beè gbóó aa kĩá àà kil boń e ẹlẹ dú, vaá pá a gbò nyòòne nvée beè bììàẹ́ nvée. 2 Tṍó ea ni dú Deè Bõ̀séi, a beè gbóó dààmà togó gè noomà nu gbẹá mm̀ tọ bõ̀ònaló fã̀ pá Júù, vaá a beè palàge bọọ́ ló gã́bug gbò e bà géè pãanée tṍ ló naa ní e bà bĩ́íná kọọ̀: “Ãàe ní e gbálàí beè nó gbò nuí lọ̀l ẹ? Vaá éé ní ea náa bà nèe nyìmànù nè kpóó ea síímá íb gbò tóm dũ̀ùnèí ẽ́? 3 É kọọ̀ níí níì neǹ káà nu, ea dú nvín Mérì, vaá à dú vígà Jém̀z, Jósẹ̀f, Júdàs, nè Sáímòna nì? É kọ níì pá a vígà pábia ní e bà ólò dìí lóáẹ́ nì?” Vó beè naa kọ bà á gá iée zìgà m. 4 Jíízọ̀s à gbóó kọ́ nè va kọọ̀: “Bà ólò nvèè ka ló neǹ kọ́ọ̀ bùlà Bàrì gbẹá kọ̀láá kĩée ea íná, sõò pá a bon, pá a dúà ló, nè pá a tọ náa ólò nvèèe ka ló.” 5 Vó beè naa kọ á gá sí tọ́ọ̀ kà tóm dũ̀ùnè gbẹá kĩá daalá lọl ló gè dẹlẹ bá ból ńkem̀ gbò e kpáló va beè zọ̀, vaá bó va. 6 Mm̀ kà-kà, a beè palàge bọọẹ́ ló kọ bà náa íèèe zìgà m. Tṍóá, à gbóó àà gé noomà nu mm̀ gbò boń ea di kĩá.

7 A beè gbóó kolí Òb Nè Bàà Nen e bà ólò nyoonée nvéeá vaá lẹ̀ẹ̀là bàà-bàà ọ̀và kọ bà á gé kọ́ kpẹ̀a, vaá nè va kpóó gè lẹ̀ẹ̀mà bel ló gbò zọ. 8 A beè kọ nágé nè va kọọ̀ bà á gá faalá tọ́ọ̀ nu daalá lọl ló kpóóté gè tọgá kẽ. A beè kọ bà á gá faalá gyã́á, nu gè nvèè gyã́á m, àbèè bẹ̀lẹ̀ kpègè. 9 Sõò a beè kọ bà á nvèà kpá kátọ, vaá bà á gá nvèà bàà kpá kọ̀là ló.* 10 A beè kpáá kọ́ nè va kọọ̀: “Kọ̀láá kà tọ eo bãì, tõoníí kĩá dọ̀ọ̀mà tṍó eo é aalii. 11 Vaá kọ̀láá kĩée eo ínàì vaá bà náa túi àbèè ge pãanéi tṍ ló, kpalai sãa lọaí kè kátọ́i tṍó eo gé aalíí kĩá, kọbé à sí va neǹ ditõ̀ò ló.” 12 Tṍóá, bà gbóó àà gé vee nè gbò nen kọ bà á ọgá. 13 Vaá ba beè kpogági zọ lọl mm̀ gbò nen, tú nóo lẹlẹ̀ gbò e kpáló va náa dú lé, vaá bó va.

14 Méné Hẹ́rọ̀d à gbóó dã́ nú ea kil ló, boo béè kọọ̀ baa kọ́ nu ea kil ló béè Jíízọ̀s inmá dénè ketõ̀ò, vaá gbò nen géè kọọ̀: “Jṍòn Neǹ Dììlè Nen Múú a kẽeà aa kemà ú, níà nú ea náa vaá à ié kpóó gè siimági tóm dũ̀ùnèí ẽ́.” 15 Sìgà gbò géè kọọ̀: “Níà Èláíjà.” Boo tṍó e sìgà gbò géè kọọ̀: “Níà enè neǹ kọ́ọ̀ bùlà Bàrì ea bélí gbò kọ́ọ̀ bùlà Bàrì e ba beè di deè kéléá.” 16 Sõò tṍó e Hẹ́rọ̀d dã́, ẹlẹ à kọọ̀: “Jṍòn e nda beè fùl togó lọl mená a kẽeà aa kemà ú.” 17 Boo béè kọọ̀ Hẹ́rọ̀d beè lẹ̀ẹ̀là kọ bà á sii Jṍòn nvee tọọ̀ kpọ́gọ́lọ́ boo béè Hẹ̀ródìàs ea dú vaà a vígà Fílìp, boo béè kọọ̀ Hẹ́rọ̀d beè ilí Hẹ̀rọ́dìàs. 18 Boo béè kọọ̀ Jṍòn géè kọ́ nè Hẹ́rọ̀d kọọ̀: “Náa lelà kọ ó tú vaà o vígà naamá o va.” 19 Vó beè naa kọọ̀ Hẹ̀ródìàs á ká súng gbẹá gbàà nyòòmàe vaá gbĩ́ gè fẹ́ẹ, sõò náa beè láá fẹ́ẹ. 20 Hẹ́rọ̀d beè olòó siiá pọ̀ ló Jṍòn boo béè kọ a beè nyimá kọọ̀ ẹ̀ẹ̀ neǹ lé lab dògò vaá à di káí. A beè olòó kpènàe kọbé tọ́ọ̀ nu náa náaé ló. Buù tṍó ea pãane tṍ ló Jṍòn, nyíée beè olòó ẹẹ vaá náa ólò nyimá nú ea gá náa.

21 Sõò Hẹ̀ródìàs beè gbóó láá iée kà lèlà deé e Hẹ́rọ̀d géè sẹlẹ sẹ̀lẹ̀nù ge kẽ̀èa boo deé e ẹlẹ beè mèà. Deeá, Hẹ́rọ̀d beè naa gyã́á nè gbò e bà ólò gbá siá tóm, gbò pọ̀b neǹ bé nè gbò pọ̀b nen e bà di Gálilì. 22 Sílà Hẹ̀ródìàs beè gbóó dù gé zòb-zob naa ní ea léémá Hẹ́rọ̀d nè gbò e bà géè zọ̀ẹ deá gyã́á. Ménéá à gbóó kọ́ nè nvín pábiaá kọọ̀: “Bĩinám kọ̀láá nú ea léémá ni, mè m̀ é náa nè ni.” 23 A beè zìgà nè nvín pábiaá kọọ̀: “Kọ̀láá kà nú eo bĩ́ìnàm, m̀ é né ni, kọbèè à dú báàsĩ́ nà boǹ méné.” 24 À gbóó àà sí ló a kà gé bĩináe kọọ̀: “Ḿ bĩiná éé?” À kọ́ nèe kọọ̀: “Bĩiná togó Jṍòn Neǹ Dììlè Nen Múú.” 25 À gbóó gbẹá boo àà sí ló ménéá gé kọ́ nèe kọọ̀: “M̀ gbĩ́ì kọ ó tú togó Jṍòn Neǹ Dììlè Nen Múú nvee boo náí-náí nèm kátogóí.” 26 Nyíè ménéá beè palàge bììlà boo béè nú ea bĩ́ínáá, sõò náa é láá òòmà nà gã́ boo béè zíl ea beè zilá nè boo béè ge nvèè ka ló gbò e bà géè zọ̀ẹ deá gyã́áá. 27 Ménéá beè gbóó gbẹá boo lẹ̀ẹ̀là neń ea ólò kùe dẽe ló kọ á gé fùl togó lọl meǹ Jṍòn, vaá a beè àà sí tọọ̀ kpọ́gọ́lọ́á gé fùl togó lọ̀líé men. 28 À gbóó nvee boo náí-náí domá vaá tú nè nvín pábiaá. Nvín pábiaá à gbóó tú má a kà. 29 Tṍó e gbò e bà ólò nyoone nvéè Jṍòn dã́ naa vó, bà gbóó dù gé dàlà a íí ààmà gé lì.

30 Gbò tómá beè gbóó dù gé bõoná ló Jíízọ̀s vaá kọ́ dénè nu e ba ni náa nè nú e ba ni nóòmà. 31 Sõò a beè kọ́ nè va kọọ̀: “Dui, mè èé kil kĩée ea é dú áá bẹ̀ì, vaá ò zẹ́ẹ́ bõi séi pọ́ì ńkem.” Boo béè kọọ̀ gã́bug nen géè dù vaá àà, naa ní e bà náa beè ié tṍó gè bõomá séi, bã̀àna tṍó gè deemá gyã́á. 32 Vó à naa, ba beè gbóó bã mm̀ faà sĩ́ múú àà kil kĩée ea é dú áá ọ̀và. 33 Sõò tṍó e gbò nen moń va vaá nyimá kọ bà gé aà, bà gbóó kònà aa dénè bon vaá teemà kpóó tọ gyààva sĩ́ kẽ iná kĩá. 34 Tṍó ea aa mm̀ faàa dọ kẽ vaá mòn gã́bug gbòa, bà gbóó dúe ńsàn nyíe boo béè kọ ba beè belí naanà ból e neǹ kùdẽe ló á gé ló, vaá a beè gbóó noomà va gã́bug nu.

35 Tṍó e dee ni bọọ, pá a gbò nyòòne nvée beè gbóó dù gé kọ́ nèe kọọ̀: “Kĩí di kpã́á aa ló bon vaá tṍó a íná kpã́á. 36 Lẹ̀ẹ̀là va ààmà kọbé bà láá bã gbò boń ea di kuló kĩí zalí nú e bà é dé.” 37 À kọ́ nè va kọọ̀: “Boolo neí va gyã́á.” Bà gbóó bĩináe kọọ̀: “É àà gé tú 200 dìnárìọ̀s zalmá gyã́á e bà é dé?” 38 À bĩiná va kọọ̀: “Kuù kpò fétúlú ní ea dìí bá ẹ́? Aalii gé ẹbvii!” Bà gbòó sì gé ẹ̀b vaá kọ́ nèe kọọ̀: “Vòò kpò nè bàà paà gyã́à.” 39 À gbóó kọ́ nè dénè gbòa kọ bà á dõ̀òà kpò-kpò vaá ĩìtẽ́ boo vílá. 40 Ba beè gbóó dõ̀òà kpò-kpò. Sìgà gbò beè toolá 100 vaá sìgà gbò à toolá 50. 41 A beè gbóó tú vòò kpò fétúlú nè bàà paà gyã́àa, vaá tṍó ea ni dalà dẽe ẹ̀bmà gbàn deè káála vaá tã̀àgã ló Bàrì boo lọ̀l, à gbóó baagi nè pá a gbò nyòòne nvée kọ bà á nè gbòa. A beè tu nágé bàà paà gyã́àa dõ̀òmà kọ̀láá nen. 42 Dénè ọ̀và beè dè vaá à m-má va. 43 Bà gbóó bõonè ló ní ea sígá ló vaá à m-má mm̀ 12 kà kùn, e gyã́àa á gé ló. 44 Gbò e ba beè dé fétúlúá beè toolá 5,000 gbò gbálà.

45 Tṍó ea náa vó lọ̀l, a beè gbóó gbẹá boo kọ́ nè gbò e bà ólò nyoonée nvée kọ bà á bã mm̀ faà sĩ́ múú fùl kil bálásĩ́ Bẹ̀tsáídà, boo tṍó e ẹlẹ gé lẹẹlà gbòa ààmàa. 46 Tṍó ea ni kọ́ nè va kọ bà á agẹlẹ ló kyã̀à lọ̀l, à gbóó àà kil boo ene kà gù gé tã̀àgã ló Bàrì. 47 Tṍó ea ni dú ló èlà, faàa beè di-dí èèlè nyíè zẹ̀ẹ̀ pène, sõò áá ẹlẹ beè di boo kpò. 48 Tṍó ea ni dú kà bòm dee e dee gáà zìlà, a beè gbóó mòn kọ bà gé bé kpóó ló múú boo béè kọọ̀ fọ́ọ́lọ́ géè ùlà dú vá deèsĩ́. À gbóó kyãa sĩ́ pèneá nyooné va, sõò à gáẹ̀ gé kyã̀à tení vá ló àà. 49 Tṍó e bà moníe ea gé kyãa sĩ́ pèneá, bà gbóó kọọ̀: “Níà nyómá!” Bà gbóó vulí kpã́, 50 boo béè kọ pọ̀ beè sií va tṍó e bà moníe, sõò a beè gbẹá boo kọ́ nè va kọọ̀: “Iei agẹ ló! Níà nda, pọ̀ á gá siíi.” 51 A beè gbóó bã mm̀ faàa lóó va, vaá fọ́ọ́lọ́á à gbóó ọ̀b. À gbóó palàge bọọ́ vá ló, 52 boo béè kọ bà náa beè dã́ ból ló nú e fétúlú ea beè dõo nè gbòa tõó dọ̀. Bà náa beè dã́tẽ́ ló tọ́ọ̀ kà nú ea gé nááá.

53 Tṍó e bà ful pèneá iná Gènésẹrẹ̀t, bà gbóó tìb té ló faàa gbẹá gã́ pèneá. 54 Bà gé aà gé mm̀ faàa dọ kẽ, gbò nen à gbóó gbẹá boo nyimáé ló. 55 Bà gbóó teelá bã dénè ketõ̀ò ea di bálásĩ́ kĩá, vaá tú váì kpàì dààmàgì gbò e kpáló va náa dú lé domá kĩée e bà dã́ kọ à dìa. 56 Vaá kọ̀láá kà ńkem̀ bon àbèè pọ̀b bon àbèè bon ea di boo bàlà ól ea íná, bà ólò dàlàgì gbò e kpáló va náa dú lé domági kèki vaá bànie kọ á sọẹ̀ va tọ́ deè kọ bà á daalìè bá ló áá zái ea di ló a pọ̀b kọ̀là ló. Kọ̀láá neń ea daa bá ló beè boá.