Lé Kpẹ̀a E Jṍòn Beè Emí

12 A beè sigè ọ̀ọ̀lẹ̀ dee besĩ́ Nàànù Ténì Zelíá kálá dààà togó. Jíízọ̀s à gbóó iná Bẹ́tanì, ea dú kĩée e Lázarọ̀s e Jíízọ̀s beè kẽee lọl kemà úá dì. 2 Bà gbóó bùl gyã́á èlà nèe gbẹá kĩá. Mátà ní ea géè nè va gyã́á ẽ́, vaá Lázarọ̀s beè di gbàà gbò e bà géè zọ̀ẹ dé gyã́áá. 3 Tṍóá, Mérì beè gbóó tú enè ló-ló* kpée-kpéè nù ló nóo ea kọlà náàd, ea palàge sí kpègè tṍ boo kátọọ̀ Jíízọ̀s, vaá tú a gyáa fã̀àmà. Zivèkà tọá beè gbóó simì kpée-kpéè nù ló nóoá. 4 Sõò Júdàs Ìskáriọ̀t, ea dṹùnà gbò e bà ólò nyoonée nvée, ea é gé teníé ló nvee bá gbò ọ́b beè gbóó kọọ̀: 5 “Éé ní ea náa bà náa beè oo kpée-kpéè nù ló nóoí ló 300 dìnárìọ̀s* vaá tú kpègèá nè gbò tãa ẽ́?” 6 Náa beè ló belí boo béè kọ à bulà nú ea kil ló gbò tãa, sõò a beè ló belí boo béè kọọ̀ ẹ̀ẹ̀ neǹ zib, vaá ẹlẹ ní ea ólò faalá kpó kpègè e, vaá à ólò zìb kpègè e bà tẹ́lẹ m. 7 Tṍóá, Jíízọ̀s à gbóó kọọ̀: “Ààẹ́ ló kọbé a náa nuí naamá gè kpoogèm dee ló sẹ̀ẹ̀ deé e bà é lím. 8 Boo béè kọọ̀ gbò tãa ólò dìí ló lee, sõò nda ním é díí ló lee.”

9 Tṍóá, gã́bug pá Júù beè gbóó nyimá kọọ̀ Jíízọ̀s di kĩá. Bà gbóó dù kọbé bà moníe bií ló Lázarọ̀s ea beè kẽee lọl kemà úá. 10 Gbò togó vààla gyọ́ọ à gbóó bilá ló kọbé bà fẹ́ nàè gé Lázarọ̀s, 11 boo béè kọọ̀ ẹlẹ ní e gã́bug pá Júù beè di boo sí kĩá vaá ié zìgà mm̀ Jíízọ̀s e.

12 Deé ea bẽene, gã́bug gbò e ba beè sí kẽè sẹ̀lẹ̀nùa beè gbóó dã́ kọọ̀ Jíízọ̀s é dú Jèrúselẹ̀m. 13 Bà gbóó tú laà gyoo vaá àà gé zọ̀ẹ nyòònà, vaá vulí kpã́ kọọ̀: “È banì kọ ó dùùlàẹ! Tã́áná dee bá á di ló Méné Pá Ízrẹẹ̀l, ea dú boo béè Jìhóvà!”* 14 Tṍó e Jíízọ̀s mon ene kà põòni nvín nom̀ tóòmà tò, à gbóó ĩìtẽ́ boo, dì belí bé e Kpá Káí beè kọ́ naa kọọ̀: 15 “Pọ̀ á gá sií ni e sílà Záíòn. Ẹ̀b! O méné di ĩ́ìtẽ́ boo põòni nvín nom̀ tóòmà tò ea gé dú.” 16 Pá a gbò nyòòne nvée náa beè vàlẹ̀ bá dã́ ból ló, sõò tṍó e bà nveè ka ló Jíízọ̀s, bà gbóó kẽ̀èa boo kọọ̀ Kpá Káí beè kọ́ gbò nuí kìlmàé ló vaá ba beè naa gbò nuí nèe.

17 Gã́bug gbò e ba beè dìé ló tṍó ea beè kẽee Lázarọ̀s lọl kemà úá beè kilsĩ́ gè sí neǹ ditõ̀ò kìlmàé ló. 18 Níà nú ea náa vaá gbòa beè sì gé zọ̀ẹ nyòònàe, boo béè kọọ̀ ba beè dã́ kọ a beè sí nakà tóm dũ̀ùnèí. 19 Tṍóá, pá Fárìsíì à gbóó kọ́ nè ene kọọ̀: “Ò monìì gé kọọ̀ gbò nú e beè noo náa íe togó. Ẹbvii! Bõ̀òna bàlà boo a kõoà bììàẹ́ nvée.”

20 Sìgà pá Gríìs beè di zẹ̀ẹ̀ gbò e ba beè dú kè sẹ̀lẹ̀nùa boo béè ge fã̀ Bàrì. 21 Gbòí beè gbóó bã ló Fílìp, ea dú boǹ Bẹ̀tsáídà, ea di Gálilì, vaá bànie kọọ̀: “Tẹ́ẹ̀, è gbĩ́ gè mòn Jíízọ̀s.” 22 Fílìp à gbóó sì gé kọ́ nè Ándrù naa vó. Ándrù nè Fílìp à gbóó gbá tọ sì gé kọ́ nè Jíízọ̀s.

23 Jíízọ̀s à gbóó kọ́ nè va kọọ̀: “A lée tṍó e bà é gé nvèè ka ló Sã́áná nená. 24 M̀ lóò kà-kà bel nèi kọọ̀, beè súú wíìt dọ́ kunukẽ̀ vaá náa bem,* náa é bọọ zelí ló enè súú. Sõò be à bem, à é gbóó láá bọọ vaá mumí gã́bug súú. 25 Kọ̀láá nen ea vulè a dùm é pee, sõò kọ̀láá nen ea ọ́bví a dùm mm̀ nakà bàlà booí é kpenà kọbé à íe dùm e bè náa tá. 26 Kọ̀láá nen ea gbĩ́ gè sí tóm nèm á bììàḿ nvée, vaá kọ̀láá kĩée e nda dì ní e nen ea gé sí tóm nèm é di nàgé é. Ńdáà Tẹ̀ é nveè ka ló kọ̀láá nen ea sí tóm nèm. 27 Kátogóí, nyíém palàge tã̀àgã̀, vaá éé ní em é láá kọ̀ ẹ? Tẹ̀, dùùlàm lọl bá tṍó tã̀àgã̀í. Kọ̀láá bé ea dì naa, boo béè tṍó tã̀àgã̀í ní ea beè naa m̀ dùe. 28 Tẹ̀, nvèè ka ló o bée.” Tṍóá, mon à gbóó sìlà aa káála kọọ̀: “M beè nvèè ka ló vaá m̀ é kpáá nvèè ka ló.”

29 Tṍó e gbò e ba beè di élá kĩá dã́ moń ea silà naa vó, bà gbóó kọọ̀, níà kòvà náà káála. Sìgà gbò à kọọ̀: “Nyómá tóm ló bel nèe.” 30 Jíízọ̀s à gbóó kọ́ nè va kọọ̀: “Moní náa silà boo béè nda, sõò à silà boo béè boolo. 31 A lée tṍó e Bàrì é béélá bel ló bàlà booí, vaá à é kpó nen ea gé bẹl bàlà booí lọ̀l. 32 Sõò, kilma ló nda, tṍó e ba ni dalàm nè boo,* m̀ é duulà kọ̀láá íb nen nèà nà bá.” 33 À géè ló bel kilma ló íb ú ea é gé ù. 34 Tṍóá, gbòa à gbóó kọ́ nèe kọọ̀: “Beele beè bugí mm̀ kpá Log kọọ̀ Kráìst é di dọ̀ọ̀mà dè-dè. Éé ní ea náa olo ò kọọ̀ bà é íè ge dàlà Sã́áná nená nè boo é?* Mée ní ea dú é Sã́áná nená ẽ́?” 35 Vó à naa, Jíízọ̀s à gbóó kọ́ nè va kọọ̀: “Pọ́ì ńkem̀ tṍó ní e ẹ́ẹ́ deeá é kpáá di-díí ló é. Kyãanii tṍó e ẹ́ẹ́ dee dìí ló, kọbé kùkùù gín náa íéi kói ló. Kọ̀láá nen ea kyãa mm̀ kùkùù gín náa ólò nyimá kĩée ea gé kil. 36 Iei zìgà tṍó e ẹ́ẹ́ deeá di-díí ló kọbé ò dúi gbò nvín ẹ́ẹ́ dee.”

Tṍó e Jíízọ̀s ló gbò belí lọ̀l, à gbóó gũá àà vá ló àà. 37 Náa kal ló béè kọ a sí gã́bug tóm dũ̀ùnè gbẹá vá kèsĩ́, bà náa beè iée zìgà m, 38 kọbé bel e Àìzáíà ea dú neǹ kọ́ọ̀ bùlà Bàrì beè kọ̀a ḿḿ-má, ea kọ́ọ̀: “Jìhóvà,* mée ní ea ni íé zìgà mm̀ gbò bel ea beè dã́ lọ̀líí gã́ ẽ́? Vaá mée ní e ba ni náa kọ á nyimá kpóó* e Jìhóvà* íe é?” 39 Nú ea náa bà náa beè iée zìgà m dú gè kọọ̀ Àìzáíà beè kpáá kọọ̀: 40 “À gímè va dẽe vaá naa kọọ̀ nyíé va á àgà. À náa vó kọbé bà náa mon nu vaá dã́ ból ló, mè á di vó bà oòa kẽ dúm ló, naa ní em é bó va.” 41 Àìzáíà beè ló gbò belí kìlmàé ló boo béè kọọ̀ a beè mòn dũ̀ùnè ea dúé ló. 42 Nagé, gã́bug gbò e bà gé bẹl beè iée zìgà m, sõò bà náa beè kọ́ tẹlẹ bàlà kẽ, kọbé pá Fárìsíì náa kpóè va lọl mm̀ ba tọ bõ̀ònaló fã̀, 43 boo béè kọọ̀ ka ea aa bá nen beè leemá va èlmà ka ea aa bá Bàrì.

44 Sõò Jíízọ̀s à gbóó tú agẹ mon kọọmá nè va kọọ̀: “Kọ̀láá nen ea íém zìgà m náa íe zìgà mm̀ áá nda, sõò à íe nagé zìgà mm̀ nen ea beè lẹ̀ẹ̀làm, 45 vaá kọ̀láá nen ea mon nda mon nagé Nen ea beè lẹ̀ẹ̀làm. 46 M beè dú dì belí ẹ́ẹ́ dee ea ẹ́ẹ̀lẹ̀ bàlà boo, kọbé kọ̀láá nen ea íém zìgà m náa gbẹá mm̀ kùkùù gín. 47 Sõò ním é béélá bel ló kọ̀láá nen ea dã́ gbò bel em lóò vaá náa náa, boo béè kọọ̀ ním beè dú ló gè beelá bel ló bàlà boo, sõò m beè dú ló gè dùùlà bàlà boo. 48 À íe nen ea é béélá bel ló nen ea ẹbvím tẹlẹ kẽ vaá náa tú gbò bel em lóò. Gbò bel em beè lò ní ea é bééláẹ bel ló mm̀ dee deè nvéè dee é. 49 Boo béè kọọ̀ ním beè kọ́ tọ́ọ̀ kà nú ea dú nà bùlà, sõò Tẹ̀ ea beè lẹ̀ẹ̀làmá beè nèm log ea kil ló bel em é ló nè nú em é nóòmà. 50 M̀ nyímà kọ a log é náa kọọ̀ nen á ié dùm e bè náa tá. Vó à naa, kọ̀láá kà bel em lóò, níà gbõ̀ònà nú e Tẹ̀a beè kọ́ nèm ẽ́.”