Lé Kpẹ̀a E Lúùk Beè Emí

22 Tṍó Sẹ̀lẹ̀nù Ge Dé Fétúlú E Nú Ea Ólò Gbuuve Nu Á Gé Gbàà, e bà ólò kolí náe gé Nàànù Ténì Zelíá beè gbóó iná kuló. 2 Gbò togó vààla gyọ́ọ nè gbò émì kpá géè gbĩ́ tṍó ea é léé ló gè fẹẹmáe, boo béè kọọ̀ pọ̀ beè sií va ló gbò nen. 3 Tṍóá, Sétàn beè gbóó bã mm̀ Júdàs, e bà ólò kolíe Ìskáriọ̀t, ea beè dũunà Òb Nè Bàà Nená. 4 À gbóó àà gé zọ̀ gbò togó vààla gyọ́ọ nè gbò e bà di togó tọọ̀ káíá bilá ló bé ea é náa vaá à láá tenìèé ló nvèè vá bá. 5 Nyíé va beè palàge ẹẹ ló níí, naa ní e bà zigà kọ bà é kpẽ́è kpègè e bà náàmà ẹ́ẹ́ kpé nèe. 6 Vó à naa, a bee zìgà vaá gbóó dààmà togó gè gbĩ́ lé tṍó ea é láá tení ló Jíízọ̀s nvèè vá bá, vaá tọ́ọ̀ nen náa é nyímá.

7 Deè Ge Dé Fétúlú E Nú Ea Ólò Gbuuve Nu Á Gé Gbààa beè gbóó lee, naamá deé e bà é íè ge nè vààla gyọ́ọ̀ Ténì Zelíá. 8 Jíízọ̀s à gbóó kọ́ nè Pítà nè Jṍòn kọọ̀: “Aalii gé kpoogei dee ló gyã́á Nàànù Ténì Zelí kọbé è dé.” 9 Bà bĩináe kọọ̀: “Ãàe ní eo gbĩ́ì kọ é tõo kpoogè dee ló é?” 10 À aalá nè va kọọ̀: “Tṍó eo ni bãí Jèrúselẹ̀m, ene kà gbálà ea tóólá féé múú é zọ́i nyòònà. Nyooneíe vaá ò bãí tọ ea bã. 11 Vaá ò kọ́i nei tẹ̀ íè tọá kọọ̀, ‘Neǹ Dòbá kọ́ é bĩiná ni kọọ̀: “Ãàe ní e nda nè gbò e bà ólò nyooném nvée é tõo dé gyã́á Nàànù Ténì Zelí é?”’ 12 Gbálàá é gbóó dòbá gbele gbàà mm̀ tọ gbàn deè e ba beè sí tóm ló lọ̀l nèi. Tõoníí kĩá kpoogei dee ló gyã́á Nàànù Ténì Zelí sẹ̀ẹ̀i.” 13 Bà gbóó àà vaá mòn gbõ̀ònà bé ea beè kọ́ nè va naaá. Bà gbóó tõó kĩá naa gyã́á Nàànù Ténì Zelíá.

14 Tṍó e tṍó ni lée, à gbóó zọ̀ pá a gbò tóm dé gyã́á Nàànù Ténì Zelíá. 15 À gbóó kọ́ nè va kọọ̀: “A beè palàge tànim ge zọ̀i dé gyã́á Nàànù Ténì Zelíí besĩ́ m̀ kálá mòn tã̀àgã̀, 16 boo béè kọ m̀ kọ́ọ̀ nèi kọọ̀, ním é kpáá de ná dọ̀ọ̀mà tṍó e tóm̀ bùlà ea di nvée é ḿḿ-má mm̀ Boǹ Méné Bàrì.” 17 À gbóó tú gbàág e míí di m, vaá tṍó ea ni ṍá Bàrì zaá boo lọ̀l, à gbóó kọọ̀: “Tui vaá ò ténmai nei ene, 18 boo béè kọ m̀ kọ́ọ̀ nèi kọọ̀, lọl kátogóí ààmà, ním é kpáá oná míí e bà tú vã́ìn naamá dọ̀ọ̀mà tṍó e Boǹ Méné Bàrì é dú.”

19 A beè tu nágé enè kpò fétúlú, vaá tṍó ea ni ṍá Bàrì zaá boo lọ̀l, à gbóó baagi nè va vaá kọọ̀: “Níí tõó dọ̀ nà nom̀ kpáló em é né boo boólo. Olòó naanii níí naamai gè kẽeam mí boo.” 20 Tṍó e ba ni dé gyã́á ló m̀m̀-neá lọ̀l, a beè tu nágé gbàág e míí di m vaá kọọ̀: “Níí tõó dọ̀ nà mii e Bàrì zílmá zíl ea é eèa boo boólo.

21 “Sõò ẹbvii! Neń ea é téniḿ ló nvee bá ọ́b di kĩí ea gé zọ́m dé gyã́á. 22 Mm̀ kà-kà, Sã́áná nená é ú dì belí bé e ba beè kọ́ naa, sõò pọ́lọ́ múú kyáá á di ló neń ea ténié ló nvee bá gbò ọ́b!” 23 Vó à naa, bà gbóó dààmà togó bĩiná ene kọọ̀, mée ea dìí gbàà ní ea é láá naa íb nakà nuí ẽ́?

24 Ba beè palàge dùlà nàgé bel boo neń ea bọọ lọ̀l vaá à lee ea dì vá zẹ̀ẹ̀. 25 Sõò à gbóó kọ́ nè va kọọ̀: “Gbò méné e bà gé bẹl gbò dó àla ólò lẹ̀ẹ̀là bel ló gbò e bà gé bẹl boo, vaá gbò e kpóó lẹ̀ẹ̀là bel di bá ólò gbĩ́ kọọ̀ gbò nen á kolìè va kele íb bée.* 26 Boolo ó gá dii naanii vó, tãa vó, neń ea bọọ lọ̀l vaá à lee ea dìí zẹ̀ẹ̀ á tú a lóó kilma kẽ belí pá nvín, vaá neń ea gé túlèi á sí tóm nè dõona gbò. 27 Mée ní ea bọọ ẹ́? É kọọ̀ neń ea gé dé gyã́á sẹ̀ neń ea gé tú gyã́á nè gbò nen ẽ́? É kọ níì neń ea gé dé gyã́á nì? Sõò nda dìí zẹ̀ẹ̀ dì belí neń ea gé tú gyã́á nè gbò nen.

28 “Kọ̀láá bé ea dì naa, boolo ní eo beè diḿ mí ló dénè tṍó em géè mòn tã̀àgã̀ ẽ, 29 vaá nda a zọ boolo bã̀àa mm̀ zíl dì belí bé e ńdáà Tẹ̀ beè zọ̀ nda bã̀àa mm̀ zíl kọ à é neèm ene kà Boǹ Méné naaá, 30 kọbé ò zọḿ mi dei vaá õi gbẹaí mm̀ nà Boǹ Méné, vaá ĩinii tẽ́ boo kpòté méné beelai bel ló 12 tẽ́gãà Ízrẹẹ̀l.

31 “Sáímòn, Sáímòn, ẹ̀b! mè Sétàn gbĩ́ gè zìgè dénè bọ̀ì dì belí bé e bà ólò zìgè sál lọl gbàà kpá kyàlà naaá. 32 Sõò m beè tã̀àgã ló Bàrì má ni kọbé lóó o zìgà náa ọọ, vaá tṍó eo ni oòa kẽ dù, siè kpóó ló pá o vígà.” 33 Tṍóá, Pítà à gbóó kọ́ nèe kọọ̀: “Neń Ea Íém, nda di kpènà ló gè zọ̀ ni bã kpọ́gọ́lọ́ nè ge zọ̀ ni ù.” 34 Sõò Jíízọ̀s à kọ́ nèe kọọ̀: “Pítà, nda kọ́ọ̀ nè ni kọọ̀ besĩ́ kõ̀ò kálá kù kpã́ nieí, ò é amàm sàn taà tóm.”

35 À kọ nágé nè va kọọ̀: “Tṍó em beè lẹ̀ẹ̀lài kọ ó gé kọi kpẹ̀a, vaá kọ ó gá faalai bẹ̀lẹ̀ kpègè, bẹ̀lẹ̀ ge nvèè gyã́á m, nè kpá kátọá, é kọ à íe nú ea beè biíi?” Bà aalá kọọ̀: “Ẽ́èe!” 36 Tṍóá, à gbóó kọ́ nè va kọọ̀: “Sõò kátogóí, kọ̀láá nen ea íe bẹ̀lẹ̀ kpègè, á faalá. Neń ea íe bẹ̀lẹ̀ ge nvèè gyã́á m á faalá nágé, vaá kọ̀láá neń e bè náa íe gẹ̀ bé, á oo a pọ̀b kọ̀là ló zalmá ene kà. 37 Boo béè kọ m̀ kọ́ọ̀ nèi kọọ̀ nú e Kpá Káí beè kọ̀ é íè ge mm-má kìlmàḿ ló, ea kọ́ọ̀, ‘Bà é bugíe nvee gbàà gbò e bà dọ log.’ Mm̀ kà-kà, níí dì ea gé ḿḿ-má kìlmàḿ ló.” 38 Tṍóá, bà gbóó kọọ̀: “Neń Ea Íéi, ẹ̀b! È íè bàà kà gẹ̀ bé.” A gbóó kọ́ nè va kọọ̀: “Níá a gbõoma.”

39 Tṍó ea aa kĩá, à gbóó àà kil boo Gù Ólìv, dì belí bé ea ólò naa naa, vaá pá a gbò nyòòne nvée beè bììàẹ́ nvée nagé. 40 Tṍó e bà íná kĩá, à gbóó kọ́ nè va kọọ̀: “Kilíí sĩ́ gè tãagãi ló Bàrì kọbé nóo dọì bá ẹ̀bmà.” 41 A beè kyã̀à àà vá ló pọ́ì ńkem, vaá gbóó kumí dúnú kẽ tã̀àgã ló Bàrì 42 kọọ̀: “Tẹ̀, be à dú o bùlà, tú gbàágí lọ̀lím sĩ́. Sõò, naa o bùlà, níì ńda nì.” 43 Tṍóá, ene kà nyómá tóm beè gbóó aa káála sìlàẹ́ ló vaá sièe kpóó ló. 44 Sõò a beè ié kà agẹ bá tã̀àgã̀ bùlà naa ní ea kilsĩ́ gè tã̀àgã ló Bàrì mm̀ kà agẹ bá vaá kyẹ̀ẹ̀lẹ̀ ea kalà ààẹ́ ló beè belí mii. 45 Tṍó ea tãagã ló Bàrì lọ̀l vaá òòà ina ló pá a gbò nyòòne nvée, à gbóó mòn kọ bà di dáá boo béè ọ́ọ́-ọọ̀ ló ea dú ló bììla nyíe. 46 À gbóó kọ́ nè va kọọ̀: “Éé ní ea náa ò daalii é? Aalíí boo vaá ò kilíí sĩ́ gè tãagãi ló Bàrì kọbé nóo dọì bá ẹ̀bmà.”

47 Boo tṍó ea gé ló belá, Júdàs ea dṹùnà Òb Nè Bàà Nená beè gbóó faalá gã́bug nen domá. À gbóó kyã̀à bã ló Jíízọ̀s vaá pyovíe bẹ́ẹ́. 48 Sõò Jíízọ̀s à kọ́ nèe kọọ̀: “Júdàs, ò ténì ló Sã́áná nen nvee bá gbò ọ́b tení dú ló gè pyovíe bẹ́ẹ́?” 49 Tṍó e gbò e ba beè dìé ló mon nú ea é gé naaá, bà gbóó bĩiná kọọ̀: “Neń Ea Íéi, é kọ é tú gẹ̀í beemá va?” 50 Kàsĩ́, enè ọ̀và beè fùl tṍ bá lè lọl ló gyóòloò pọ̀b neǹ vààla gyọ́ọ. 51 Sõò Jíízọ̀s beè gbóó kọọ̀: “A lée.” À gbóó daáẹ bá ló tṍ vaá bóe. 52 Jíízọ̀s à gbóó bĩiná gbò togó vààla gyọ́ọ nè gbò e bà ólò di togó tọọ̀ káíá nè gbò kàneǹ pá Júù e ba beè dúé lóá kọọ̀: “Ò fáàlàì gẹ̀ bé nè túm domai gé siimaḿ mi belí neǹ zib? 53 M̀ ólò dìí ló tọọ̀ káí kọ̀láá dee, vaá nóo beè siilím mi. Sõò níì boólò tṍó nè níí neń ea gé lẹ̀ẹ̀là bel ló gbò e bà náa ólò gbĩ́ gè tõó kĩée e ẹ́ẹ́ dee dì.”

54 Tṍóá, bà gbóó siíe ààmà kilma tọọ̀ pọ̀b neǹ vààla gyọ́ọ, sõò Pítà beè kyã̀à ńkem-kem dú vá nvée. 55 Tṍó e bà kpá sã́ gbẹá èèlè nyíè zẹ̀ẹ̀ mm̀ beá vaá gbá ĩìtẽ́ ló, Pítà beè di ĩ́ì va tẽ́ ló. 56 Sõò tṍó e ene kà nvín pábia ea ólò sí tóm boo beá moníe ea di ĩ́ìtẽ́ ló sã́á, à gbóó gọ̀líé ló ẹ̀b vaá kọọ̀: “Nakà gbálàí beè dìé ló nagé.” 57 Sõò a beè àmà sàn vaá kọọ̀: “Ním nyímàe ló, e pábia.” 58 Pọ́ì ńkem̀ tṍó aa ló tṍóá, dõona nèn beè mònie vaá kọọ̀: “Oloò enè ọ̀và nagé.” Sõò Pítà beè àmà sàn vaá kọọ̀: “Gbálàí, níì nda nì.” 59 Tṍó e nú ea é láá dú ene kà ávà ni téní, dõona kà gbálà beè dù vaá tú agẹ bá kọọmá kọọ̀: “Mm̀ kà-kà, gbálàí beè dìé ló nagé, boo béè kọ à dú Gálilì!” 60 Sõò Pítà beè kọọ̀: “Gbálàí, ním nyímà nú eo gé kọ́á.” Boo tṍó ea gé ló belá, kõ̀ò à gbóó kù kpã́. 61 Kà lèlà tṍóá, Neń Ea Íéi à gbóó kììa ló kẽ vaá ẹ̀b Pítà. Pítà à gbóó kẽ̀èa boo bel e Neń Ea Íéi beè kọ́ nèeá kọọ̀: “Besĩ́ kõ̀ò kálá kù kpã́ nieí, ò é amàm sàn taà tóm.” 62 À gbóó àà kil kèdẹi gé palàge tò.

63 Tṍóá, gbò e bà géè kùdẽe ló Jíízọ̀s beè gbóó dààmà togó gè nvèèmàe lẹ́, bòmie, 64 vaá tṍó e ba ni tú nu uué sĩ́ lọ̀l, bà gbóó olòó kọ́ nèe kọọ̀: “Be ọ̀ọ̀ neǹ kọ́ọ̀ bùlà Bàrì, kòl béè neń ea dib ni nèi.” 65 Vaá ba beè ló gã́bug bel uú boo Jíízọ̀s ea zógè kọ bà náa fã dẽè Bàrì.

66 Tṍó e dee ni zilà, gbò kàneǹ pá Júù, gbò togó vààla gyọ́ọ, nè gbò émì kpá beè gbóó bõoná. Bà gbóó faaláẹ kilma ba Pọ̀b Tọ Bèèla vaá kọọ̀: 67 “Ni kọ́ nèi, é kọọ̀ oloò Kráìst?” Sõò à aalá nè va kọọ̀: “Kọbèè m̀ kọ́ nei, nóo é zigai. 68 Gbáló vó, be nda bĩ́ínái bíb, nóo é áalai. 69 Sõò lọ̀l kátogóí ààmà, Sã́áná nená é ĩ́ìtẽ́ boo bá lè Bàrì ea palàge ié kpóóá.” 70 Dénè ọ̀và à gbóó bĩináe kọọ̀: “Naa kọọ̀ oloò Sã́áná Bàrì e?” À aalá nè va kọọ̀: “Boolo ní eo gé kọ́iá.” 71 Bà gbóó kọọ̀: “Née kpáà ié ná bíi ló neń ea é lóe bel ló. Boo béè kọ e dã́àmà tṍ nú ea tú a gã́ kọọmá.”