Lé Kpẹ̀a E Máátìù Beè Emí

5 Tṍó ea mon gã́bug gbòa, à gbóó àà kil boo gù; vaá tṍó ea ni ĩ́ìtẽ́ kẽ, pá a gbò nyòòne nvée beè gbóó dúé ló. 2 À gbóó ló bel vaá dààmà togó gè noomà va nu kọọ̀:

3 “Ẹ́ẹ́-ẹẹ̀ nyíe á di ló gbò e bà nyímá kọ bà íèè bíi ló tùle ea aa bá Bàrì, boo béè kọọ̀ Boǹ Ménè Bàrì kuú va.

4 “Ẹ́ẹ́-ẹẹ̀ nyíe á di ló gbò e bà gé bãagã̀, boo béè kọọ̀ bà é nveè vá nyíé gbàà.

5 “Ẹ́ẹ́-ẹẹ̀ nyíe á di ló gbò kìlmà bùlà kẽ, boo béè kọọ̀ bà é tõó boo kunukẽ̀í.

6 “Ẹ́ẹ́-ẹẹ̀ nyíe á di ló gbò e tákói tá vá ló vaá òò va à ká kpáá nyòòmà ge naa nú ea lelà, boo béè kọọ̀ Bàrì é náa nú ea dú va bíi ló.

7 “Ẹ́ẹ́-ẹẹ̀ nyíe á di ló gbò e bà íe sàn nyíe, boo béè kọọ̀ bà é íé va sàn nyíe ló.

8 “Ẹ́ẹ́-ẹẹ̀ nyíe á di ló gbò e bà íe õ̀òa bùlà, boo béè kọọ̀ bà é mon* Bàrì.

9 “Ẹ́ẹ́-ẹẹ̀ nyíe á di ló gbò e bà ólò nvèè fẹ́ẹ́-fẹẹ̀ ló, boo béè kọọ̀ bà é kólí va gbò nvín Bàrì.

10 “Ẹ́ẹ́-ẹẹ̀ nyíe á di ló gbò e bà bíìgè va ló boo béè ge naa nú ea lelà, boo béè kọọ̀ Boǹ Méné Bàrì kuú va.

11 “Nyíéi á ẹẹ tṍó e gbò nen nveemài lẹ́ vaá biigèi ló, vaá kpọ́ kọ̀láá íb kyáá bel uuí boo boo béè nda. 12 Õi kaagai vaá nyíéi á palàge ẹẹ tã́gíní bé e bọọ kpẽ́ mm̀ káála palàge bọọá, boo béè kọọ̀ níà bé e ba beè biigè ló gbò kọ́ọ̀ bùlà Bàrì e ba beè dì besĩ́ boólo ò kalá dui naa ẽ́.

13 “Boolo ní eo dúì ló eo dií boo kunukẽ̀í ẽ́, sõò beè lóá náa kpóná ló nu, bà é náa naa và vaá à láá kpáá kpṍ ló nu belí ló é? Bà náa é láá naamá ná tọ́ọ̀ kà nu èlmà ge tobví èèla kẽ naa ní e gbò nen é zag tọ́ boo.

14 “Boolo ní eo dúì ẹ́ẹ́ deè nakà bàlà booí é. Boń ea di boo gù náa é láá gũá. 15 Gbò nen náa ólò mùn sã́ sẹlẹ́ kè ńkùn, sõò bà ólò sẹlẹ́ boo nu gè mùn sã́ sẹlẹ́ boo, vaá à ólò gbóó ẹẹlẹ̀ dénè ketõ̀ò ea di mm̀ tọ. 16 Mm̀ tẽ̀ènè sĩ́deèá, naanii kọọ̀ bọọ ẹ́ẹ́ dee á mo kèsĩ́ gbò nen kọbé bà mon lé tóm eo gé síi vaá nvèè ká ló bọọ Tẹ̀ ea di káála.

17 “Ó gá iei bùlà kọọ̀ m beè dú ló gè kyọ̀gàlà Logá àbèè Nòòmànù Gbò Kọ́ọ̀ Bùlà Bàrì. Ním beè dú ló gè kyọ̀gàlà, sõò m beè dú ló gè mm-mè. 18 Mm̀ kà-kà, nda kọ́ọ̀ nèi kọọ̀ kọbèè káála nè kunukẽ̀ téní tà, tọ́ọ̀ kà ńkem̀ súú kpá àbèè enè sã́gã́ ea dú ló ene kà súú kpá e ba beè emí mm̀ Logá náa é aa ló dọ̀ọ̀mà tṍó e dénè gbò nuí é nááá. 19 Kọ̀láá neń ea lọl togó kèbá ene kà zẹ̀ẹ̀ gbò log e gbò nen ẹb kọ náa bọọgẹ̀ dú bíií, vaá noomà dõona gbò kọ bà á naa nagé vó, náa bọ́ló gè bã mm̀ Boǹ Méné Bàrì. Sõò kọ̀láá nen ea gban tṍ ló vaá noomà dõona gbò bọ́ló gè bã mm̀ Boǹ Méné Bàrì. 20 Boo béè kọ m̀ kọ́ọ̀ nèi kọọ̀, beè bọọ lé lab dògò náa bọọ èl níí gbò émì kpà nè níí pá Fárìsíì, nóo é bãí mm̀ Boǹ Méné Bàrì.

21 “O beè dãi kọọ̀ ba beè kọ́ nè gbò e ba beè di deè kéléá kọọ̀: ‘Nóo é íè ge fẹ́ nen. Bà é tú kọ̀láá neń ea fẹ́ nen siimá tọ bèèla.’ 22 Sõò nda kọ́ọ̀ nèi kọọ̀, bà é tú kọ̀láá neń ea kilsĩ́ gè ká súng gbẹá gbàà nyòòmà a vígà* siimá kèsĩ́ gbò bèèla, vaá bà é tú kọ̀láá neń ea ló bel gbẹ́a nè a vígà siimá pọ̀b tọ bèèla; boo tṍó e bà é tú kọ̀láá neń ea kọ́ nè nen kọọ̀, ‘Ọ̀ọ̀ kà neǹ ból!’ tẹlẹ Gẹ̀hénà.*

23 “Be ò gé fáálá o dõ̀ònù domá boo gbàni vààla gyọ́ọ vaá ò gbóó kẽ̀èa boo kọọ̀ kyènù di gbàà o vígà nyòòmàe ni, 24 sọ̀bá o dõ̀ònù gbẹẹ́ ketõ̀ò vààla gyọ́ọá vaá ò aà gé zẹ́ẹ́ zọ̀ o vígà naaá fẹ́ẹ́-fẹẹ̀ ló. Tṍó eo ni náa vó lọ̀l, ò gbóó òòa kẽ gé nè o dõ̀ònù.

25 “Vàlẹ̀ bá zọ̀ nen ea náa bel nè ni naaá fẹ́ẹ́-fẹẹ̀ ló tṍó eo dií èèlè eo gé kilíí tọ bèèla, kọbé nená náa tú ni lọa bá nè neǹ bèèla, vaá neǹ bèèla tú ni lọa bá nè neń ea gé sí tóm tọ bèèlaá, naa ní e bà é tú ni nvee kpọ́gọ́lọ́. 26 M̀ lóò kà-kà bel nè ní kọọ̀, bà náa é sọ́ ni bá dọ̀ọ̀mà tṍó eo é kpẽ́ kọ̀láá kà kpègè ea dì ní bá.

27 “O beè dãi kọ ba beè kọọ̀: ‘Nóo é íè ge gbẹẹ o va àbèè o dóm kuná gã̀.’ 28 Sõò nda kọ́ọ̀ nèi kọọ̀, kọ̀láá neń ea kilsĩ́ gè ẹ̀b pábia vaá ié tàn ge kunáe, kúná gã̀ mm̀ a nyíe. 29 Be o súú dẽè bá lè é náa kọ ó dọ̀, tiilá lọa ból vaá ò tóbví gbẹẹ. Boo béè kọọ̀ à é dú lé be ò pee enè kètõ̀ò ea dì ní ló èlmà ge kọọ̀ bà tú zivèkà o kà íí tẹlẹ Gẹ̀hénà.* 30 Nagé, beè o bá lè é náa kọ ó dọ̀, fùl lọa ló vaá ò tóbví gbẹẹ. Boo béè kọọ̀ à é dú lé be ò pee enè kètõ̀ò ea dì ní ló èlmà ge kọọ̀ bà tú zivèkà o kà íí tẹlẹ Gẹ̀hénà.*

31 “Ba beè kọ nágé kọọ̀: ‘Kọ̀láá kà págbálà ea zaali ba ílà dóm nè va, á tú kpá zààlà dóm nè va nè a va.’ 32 Sõò nda kọ́ọ̀ nèi kọọ̀, kọ̀láá neń ea dõogẽ kpó a va, e a va náa gbẹ́ẹ́ẹ kuná gã̀, náa kọ á bã kèbá dìtõ̀ò ea é láá náa kọ á kuná gã̀, vaá kọ̀láá nen ea ílí pábia e ba beè kpó lọa ló, kúná gã̀.

33 “O beè dã nai gé kọọ̀ ba beè kọ́ nè gbò e ba beè di deè kéléá kọọ̀: ‘Nóo é íè ge zilá zíl e bè nóo é ḿm̀-mè nú eo beè zìgà, sõò ò é íè ge kpẽ́ nu eo beè zìgà nè Jìhóvà.’* 34 Sõò, nda kọ́ọ̀ nèi kọọ̀: Ó gá zilai zíl, ó gá tui káála zilmai zíl, boo béè kọọ̀ kĩá ní e kpòté méné Barì dì e; 35 àbèè ge tui boo kunukẽ̀í zilmai zíl, boo béè kọ níà kĩée ea sẹlẹ a kátọ ẹ́; àbèè ge tui Jèrúselẹ̀m zilmai zíl, boo béè kọọ̀ níà boǹ gbele Méné.* 36 Ó gá tui bọọ togó zilmai zíl, boo béè kọọ̀ nóo é láá naanii kọọ̀ enè paà gyáa ea dìí togó á ẹẹ àbèè ge bilá. 37 Naanii kọọ̀ bọọ ‘Ẽei’ á dú ẽei, vaá bọọ ‘Ẽ́èe’ á dú ẽ́èe, boo béè kọ kọ̀láá nu ea el boo vó aa bá pọ́lọ́ nená.

38 “O beè dãi kọ ba beè kọọ̀: ‘Bà á gimè dẽè neń ea gímè dẽè nen vaá kã̀ànà dáa lọl gã́ neń ea kãanà dáa lọl gã́ dõona nèn.’ 39 Sõò nda kọ́ọ̀ nèi kọọ̀, ó gá bei neǹ pọ́lọ́, tãa vó, kọ̀láá nen ea sá ni bá náásĩ́, kììlà nakà náásĩ́á nèe kọ á sa nágé. 40 Beè nen gbĩ́ gè faalá ní kilma tọ bèèla boo béè ge tú o kọ̀là ló gè nvee kè kẽè kọ̀là ló, tu nágé o pọ̀b kọ̀là ló nèe. 41 Vaá beè neń e kpóó lẹ̀ẹ̀là bel di bá tú bá kpóó siimá ni kọ ó tú ene kà ávà siimàè tóm neèe, tú bàà kà ávà siimá nèe. 42 Dõo nu nè neń ea bań ni nu bá, vaá ó gá aa ló gè bọọlẹ nuù neń ea gbĩ́ gè bọọlẹ́* ni nu bá.

43 “O beè dãi kọ ba beè kọọ̀: ‘Ò é íè ge vùlè o nen* vaá ò ọ́bví o neǹ ọ́b.’ 44 Sõò nda kọ́ọ̀ nèi kọọ̀: Kilíí sĩ́ gè vulei bọọ gbò ọ́b vaá ò tãagãi ló Bàrì mai gbò e bà bíìgèi ló, 45 kọbé à zógè tẹlẹ bàlà kẽ kọọ̀ booloò nvín bọọ Tẹ̀ ea di káála, boo béè kọ à ólò naa kọọ̀ gbei á mo boo gbò pọ́lọ́ nè gbò lé, vaá naa kọọ̀ boo á dọọ́ boo gbò lé lab dògò nè gbò pọ́lọ́ lab dògò. 46 Mókà kpẽ́ ní eo é íei be ò vulei áá gbò e bà vulèi é? É kọọ̀ níì tẽ̀ènè kà nuá ní e gbò lọ̀l kpègè gbáá gé náa nagéé nì? 47 Vaá be ò kanai moǹ áá bọọ vígà, mókà kele nu ní eo náànìì ẽ? É kọọ̀ níì bé e gbò e bà náa nyímá ló Bàrì gé náa nagéé nì? 48 Ò é íè ge gbõomai* belí bé e bọọ Tẹ̀ ea di káála gbõoma naaá.