Tóm Gbò E Jíízọ̀s Beè Lẹ̀ẹ̀là
18 Tṍó e níí nááá lọ̀l, a beè gbóó aa Átèns kil Kọ́rìnt. 2 Vaá a beè mòn enè neǹ Júù ea kọlà Àkúílà, ea beè mèà gbẹá Póntọ̀s, e a va ea kọlà Prìsílà nè ẹ̀ẹ̀ ã́àa aa Ítalì, boo béè kọọ̀ Klọ́dìọ̀s beè nè log kọọ̀ dénè pá Júù á aa Róm̀. Vó à naa, a beè gbóó zọ̀ va àà. 3 Boo béè kọ ba ólò gbá sí tẽ̀ènè íb tóm, a beè tõó ba tọ vaá zọ̀ va siá tóm, boo béè kọ bà ólò lò kàn ge tìbmà tọ. 4 À ólò tõó mm̀ tọ bõ̀ònaló fã̀ pá Júù nè lòbèl kọ̀láá deè bõ̀séi, vaá naa kọọ̀ pá Júù nè pá Gríìs á zìgà kọọ̀ nú ea gé kọ́ẹ̀ dú kà-kà.
5 Tṍó e Sáílàs nè Tímotì aa Màsìdónìà dù, Pọ́ọ̀l beè gbóó dààmà togó gè palàge kọ́ kpẹ̀a nè pá Júù vaá zogè kọọ̀ Jíízọ̀s ní ea dú Kráìst e. 6 Sõò boo béè kọ bà kilsĩ́ gè naa uué boo vaá ló pọ́lọ́ bel nèe, a beè gbóó zìgè a kọ̀là ló, vaá kọ́ nèva kọọ̀: “Bọọ mii á di boo togó áá bọ̀ì. Nda di pọ́ì. Lọl kátogóí ààmà, m̀ é aà sí ló gbò e bà di gbò dó àla.” 7 A beè gbóó aa kĩá àà kil tọọ̀ ene kà gbálà ea kọlà Tétìọ̀s Jọ́stọ̀s, ea ólò fã̀ Bàrì, ea tọ beè di dẽè tọ bõ̀ònaló fã̀ pá Júùa. 8 Sõò Kríspọ̀s, ea dú nen ea beè di togó tọ bõ̀ònaló fã̀a bií ló dénè pá a tọ beè gbóó ié zìgà mm̀ Nen Ea Íéi, vaá gã́bug pá Kọ́rìnt e ba beè dã́ bel ea géè lòa beè ziga ló vaá dììa múú. 9 Gbá ló vó, Nen Ea Íéi beè kọ́ nè Pọ́ọ̀l mm̀ mòànù dẽe bílá dee kọọ̀: “Pọ̀ á gá sií ni. Kilsĩ́ gè ló bel. Ó gá pĩigã́, 10 boo béè kọ nda dì ní ló vaá tọ́ọ̀ nen náa é láá nvèè ni kom ló, boo béè kọ nda íè gã́bug gbò e bà di boní.” 11 Vó beè naa kọ á tõó kĩá enè gbáá nè ọ̀ọ̀lẹ̀ ẽ́, vaá noomà va moǹ bel Bàrì.
12 Tṍó e Gálìò géè bẹ̀l Àkéíà, pá Júù beè bilá ló naa uú boo Pọ́ọ̀l, vaá faaláẹ kilma kĩée e bà é bééláẹ bel ló. 13 Ba beè kọọ̀: “Gbálàí gé tã́gĩ bá gbò nen kọ bà á fã̀ Bàrì mm̀ sĩ́deè e log náa ténmá.” 14 Sõò tṍó e Pọ́ọ̀l é gé ló bel, Gálìò beè gbóó kọ́ nè pá Júù kọọ̀: “Be o beè kọi kọọ̀ gbálàí sí ene kà pọ́lọ́ àbèè kọ à dọ ene kà agẹ bá log, m̀ gáẹ̀ beè láá ĩ̀ìmà pãanéi tṍ ló. 15 Sõò beè tã̀àgã̀í dú boo bel e nen ló, bée, nè bọọ log, áá bọ̀ì aalii gé kpoogei dee ló. Ním gbĩ́ gè beelá íb nakà belí.” 16 Tṍóá, à gbóó kọ́ nèva kọ bà á aa kèsĩ́ kpòté neǹ bèèlaá àà. 17 Vó à naa, dénè ọ̀và à gbóó sii Sọ́stenìs, ea dú nen ea beè di togó tọ bõ̀ònaló fã̀ pá Júùa, vaá dààmà togó gè bòmie gbẹá kèsĩ́ kpòté neǹ bèèlaá. Sõò Gálìò náa beè ló tọ́ọ̀ kà bel tẹlẹ dẽe.
18 Sõò tṍó e Pọ́ọ̀l ni kpáá tú sìgà dee tõ̀òma kĩá, a beè gbóó kọọ̀ pá vígà á agẹlẹ ló, vaá bã faà sĩ́ múú kil Sírià. Prìsílà nè Àkúílà beè nyoonée. A beè kpọ́ boo a gyáa gbẹá Sínkrìà, boo béè zíl ea beè zilá. 19 Tṍó e bà íná Ẹ́fẹsọ̀s, a beè tú va gbẹẹ́ kĩá àà kil mm̀ tọ bõ̀ònaló fã̀ pá Júù gé zọ̀ gbò e bà di kĩá loá bel boo nú ea di mm̀ Kpá Káí. 20 Náa kal ló béè kọọ̀ ba beè kilsĩ́ gè bànie kọ á kpáá tõo, náa beè zìgà, 21 sõò a beè kọ́ nèva kọ bà á agẹlẹ ló vaá kọọ̀: “M̀ é beè òòa kẽ dúí ló be à dú bùlà Jìhóvà.”* À gbóó bã mm̀ faà sĩ́ múú aa Ẹ́fẹsọ̀s 22 kil Sìzàríà. A beè gbóó àà gé kànà moǹ pá vígà e bà di bõ̀ònatõ̀ò ea di kĩá, vaá gbóó àà kil Ántiọ̀k.
23 Tṍó ea ni tú sìgà dee tõ̀òma kĩá, a beè gbóó kyã̀à aa bon dọ bon beeá ló dó Gàlésìà nè Fríjìà, vaá siè kpóó ló dénè gbò nyòòne nvée.
24 Tṍóá, ene neǹ Júù ea bée kọlà Àpọ́lọ̀s, ea beè mèà gbẹá Àlẹ̀kzándrìà beè gbóó iná Ẹ́fẹsọ̀s. À ólò láá palàge ló bel vaá a beè palàge nyimá Kpá Káí. 25 Ba beè noomàe nú ea kil lò èèlè Jìhóvà* vaá nyómá káí beè dìé ló. À géè ló bel vaá noomà lèlà nú ea kil ló Jíízọ̀s, sõò áá nú ea kil ló dììa múú Jṍòn ní ea beè nyimá ẽ́. 26 A beè gbóó dààmà togó gè tú agẹ ló loomá bel gbẹá mm̀ tọ bõ̀ònaló fã̀ pá Júù, vaá tṍó e Prìsílà nè Àkúílà dã́ nú ea gé kọ́, bà gbóó túe nvea ló vaá palàge baatẽ́ kà-kà bel ea kil ló èèlè Bàrì nèe. 27 Nagé, boo béè kọ à géè gbĩ́ gè kil Àkéíà, pá vígà beè gbóó emí kpá má gbò nyòòne nvée e bà di kĩá kọ bà á tú lé bá tuumáe. Vó à naa, tṍó ea íná kĩá, a beè palàge nvèè bá nè gbò e sàn nyíè Bàrì ni náa kọ bà á ié zìgà mm̀ Jíízọ̀s, 28 boo béè kọ a beè tõó kèsĩ́ dénè nen tú agẹ bá bààmà tẽ́ nè pá Júù kọ bà lọ, vaá zogè va lọl mm̀ Kpá Káí kọọ̀ Jíízọ̀s ní ea dú Kráìst e.