Lé Kpẹ̀a E Máátìù Beè Emí

23 Tṍóá, Jíízọ̀s à gbóó kọ́ nè gbò e ba beè di kĩá nè pá a gbò nyòòne nvée kọọ̀: 2 “Gbò émì kpá nè pá Fárìsíì a tú ba lóó naamá gbò ge baatẽ́ Log Mózìs nè gbò nen. 3 Vó à naa, naanii kọ̀láá kà nu e bà kọ́ nèi, sõò ó gá noi ba láb, boo béè kọọ̀ baála náa ólò naa nú e bà gé kọ́. 4 Bà ólò noo gbele nyèè tò toolè gbò nen, sõò baála á gé kpènà ló gè tú bã̀àna enè kpóó nvéé bá daá ló. 5 Bà ólò sí kọ̀láá kà tóm e bà gé sí kọbé gbò nen monìè va. Boo béè vó, bà ólò bọ̀ọ̀vẹ̀ gbàà ńkpó e gbò dọ̀ Kpá Káí e ba beè emí di m, vaá sẹ̀ẹ̀a boo gbọ̀sĩ́ kọbè à kpenàè va. Bà ólò bọ̀ọ̀vẹ̀ beg zái ea di gã ba pọ̀b kọ̀là ló. 6 À ólò leemá va gè ĩìtẽ́ kĩée e ka di ló tṍó e bà gé dé gyã́á èlà nè ge ĩìtẽ́ deèsĩ́ té gbẹá ba gbò tọ bõ̀ònaló fã̀. 7 Vaá à ólò leemá va tṍó e gbò nen kanà va mon gbẹá kèki nè tṍó e bà kolí va Neǹ Dòbá.* 8 Sõò boólo, ó gá kọlai Neǹ Dòbá, boo béè kọọ̀ áá enè nen ní ea dú bọọ Neǹ Dòbá ẹ́, vaá dénè bọ̀ì dúì vígà. 9 Nagé, ó gá kolii tọ́ọ̀ nen ea di boo kunukẽ̀í kolííe bọọ tẹ̀, boo béè kọọ̀ áá enè nen ní ea dú bọọ Tẹ̀ ẹ, vaá à di káála. 10 Ó gá kọla nai gé neǹ tùle, boo béè kọọ̀ áá Kráìst ní ea dú bọọ Neǹ Tùle é. 11 Sõò nen ea bọọ ea dìí zẹ̀ẹ̀ é íè ge sí tóm nè nagbòa. 12 Kọ̀láá nen ea dalà kpáló boo, bà é kilmàé kẽ, vaá kọ̀láá nen ea kilmà kpáló kẽ, bà é dalàẹ́ boo.

13 “Pọ́lọ́ múú kyáá á di ló booló gbò émì kpá nè pá Fárìsíì. Ò dúì gbò bààsĩ́! boo béè kọọ̀, ò kubvìì èèlè ea téní bã mm̀ Boǹ Méné Bàrì, kọbé gbò nen náa bã́ m. Boólo nóo gbĩ́ì ge bãí m, vaá nóo zigàì kọọ̀ gbò e bà gbĩ́ gè bã m, á bã m. 14* ——

15 “Pọ́lọ́ múú kyáá á di ló booló gbò émì kpá nè pá Fárìsíì. Ò dúì gbò bààsĩ́! boo béè kọọ̀ ò ténìì sĩ́ múú nè boo kpò gé gbĩi enè neń ea é zọ́i fã̀ bọọ Bàrì, vaá tṍó ea ni zọ́i fã̀e, ò gbóó naanii kọọ̀ pọ́lọ́ ea sí, ea é náa kọ á bã mm̀ Gẹ̀hénà á dú bàà tóm ńboólo.

16 “Pọ́lọ́ múú kyáá á di ló boolo eo dúì gbò gímá dẽè tùle, eo kọ́ì kọọ̀, ‘Log náa sííá neń ea tú tọọ̀ káí zilmá zíl, sõò log sííá nen ea tú nóò kpé ea di mm̀ tọọ̀ káí zilmá zíl.’ 17 Booló gbò ból nè gbò gímá dẽe! Mókà ea di gbàà ní ea bọọ ẹ́, é kọọ̀ nóò kpé sẹ̀ tọọ̀ káí ea náa kọọ̀ nóò kpéá á di káí é? 18 Ò kọ́ nàì gé kọọ̀, ‘Log náa sííá neń ea tú gbàni vààla gyọ́ọ zilmá zíl, sõò log sííá neń ea tú dõ̀ònù ea di boo gbàni vààla gyọ́ọá zilmá zíl.’ 19 Gbò gímá dẽe, mókà ea di gbàà ní ea bọọ ẹ́, é kọọ̀ dõ̀ònù sẹ̀ gbàni vààla gyọ́ọ ea náa kọọ̀ dõ̀ònùa á di káí é? 20 Vó à naa, kọ̀láá neń ea tú gbàni vààla gyọ́ọ zilmá zíl tú gbàniá nè kọ̀láá kà nu ea di boo zilmá nágé zíl. 21 Vaá kọ̀láá nen ea tú tọọ̀ káí zilmá zíl, tú nágé Bàrì ea íe tọọ̀ káíá zilmá zíl. 22 Vaá kọ̀láá neń ea tú káála zilmá zíl, tú nágé kpòté méné Bàrì nè Neń ea di ĩ́ìtẽ́ boo zilmá zíl.

23 “Pọ́lọ́ múú kyáá á di ló booló gbò émì kpá nè pá Fárìsíì. Ò dúì gbò bààsĩ́! boo béè kọọ̀ ò ólò kpẽi ené boo òb ea dú ló míǹt, díìl, nè kúmìn,* sõò ò gbẹ́màì nvéè ní ea palàge bọọ ea di ló Logá, ea dú lé bèèla, sàn nyíe, nè bọ́ọ̀ló dẹ̀lẹ̀ nyíé boo. À dú bíi kọ ó kpẽi ené boo òbví, sõò ó gá gbẹmai nvéè nagbò nuá. 24 Booló gbò gímá dẽè tùle, ò kolèì múm lọlíí sĩ́ míí, sõò ò sọọlàì mèn kámeẹ̀l!

25 “Pọ́lọ́ múú kyáá á di ló booló gbò émì kpá nè pá Fárìsíì. Ò dúì gbò bààsĩ́! boo béè kọọ̀ ò lógìì kpáló bọọ gbàág nè bũ̀ õonai, sõò áá gọ̀l òò nè tàn e bè nóo láà lẹẹlai bel ló ní ea di ḿ-má m ẽ́. 26 Booló pá Fárìsíì, eo dúì gbò gímá dẽe, zẹ́ẹ́ õonai mm̀ bọọ gbàág nè mm̀ bọọ bũ̀, kọbé kpáló gbóó láá õ̀òà nàgé.

27 “Pọ́lọ́ múú kyáá á di ló booló gbò émì kpá nè pá Fárìsíì. Ò dúì gbò bààsĩ́! boo béè kọọ̀ ò bélìì kpòlí e ba beè tẹlẹ̀ ágbá ló, naa ní ea palàge kpe dẽe gè ẹ̀b, sõò áá kpóó-kpóó nen nè kọ̀láá íb nu e náa õoà ní ea di m ẽ́. 28 Mm̀ tẽ̀ènè sĩ́deèá, ò sẹlẹ̀ì ló belí kọọ̀ ò dúì gbò lé lab dògò kèsĩ́ gbò nen, sõò áá dùm bààsĩ́ nè pọ́lọ́ láb* ní ea di ḿ-maí m ẽ́.

29 “Pọ́lọ́ múú kyáá á di ló booló gbò émì kpá nè pá Fárìsíì. Ò dúì gbò bààsĩ́! boo béè kọọ̀, ò tṍì kpòlí gbò kọ́ọ̀ bùlà Bàrì vaá sii tóm ló bànà ú gbò lé lab dògò. 30 Ò gbóó kọi kọọ̀, ‘Be beéle beè di mm̀ deè beélè gbò nómá tẹ̀a, née gáẹ̀ beè zọ̀ va èèlà miì gbò kọ́ọ̀ bùlà Bàrì.’ 31 Boo béè vó, ò gé náanii kọọ̀ gbò nen á nyimá kọọ̀ boóloò pà nvín gbò e ba beè fẹ́ gbò kọ́ọ̀ bùlà Bàrìa. 32 Beè vó, agẹlẹi ló sii tóm e bọọ gbò nómá tẹ̀ géè sìa lọlíí dẽe.

33 “Booló gbò naanà, pá nvín kpí bom, à é náa và ò láá dií pọ́ì aalíí bá bèèla bel Gẹ̀hénà ẽ? 34 Boo béè vó, m̀ é lẹẹlà gbò kọ́ọ̀ bùlà Bàrì, gbò e bà nyímá nu, nè gbò dòbá mái. Ò é fẹ́i sìgà ọ̀và, vaá tui sìgà ọ̀và kaí kú té. Ò é bomii sìgà ọ̀và gbẹaí mm̀ bọọ gbò tọ bõ̀ònaló fã̀, vaá biigei ló sìgà ọ̀và aa bon dọ bon, 35 kọbé miì dénè gbò lé lab dògò e ba beè fẹ́ gbẹá boo kunukẽ̀í díí boo togó. Lọl ló miì Ébẹ̀l ea beè dú neǹ lé lab dògò, tẹlẹ ló miì Zèkàráíà, ea dú nvín Bèràkáíà, eo beè fẹi gbẹá gbà-gbá ketõ̀ò káí nè gbàni vààla gyọ́ọ á. 36 M̀ lóò kà-kà bel nèi kọọ̀, dénè gbò nuí é dí boo togó gbò e bà di nakà kúúlíí.

37 “Jèrúselẹ̀m, Jèrúselẹ̀m, boólo eo ólò fẹi gbò kọ́ọ̀ bùlà Bàrì vaá tobmai dem̀ gbò e Bàrì beè lẹ̀ẹ̀là mái—m piiga boo gè bõonèi ló gã́bug tṍó belí bé e kà kõ̀ò ólò bõonè ló pá a nvín sẹẹa kè pó naaá, sõò nóo zigàì! 38 Ẹbvii! Bàrì a kin bọọ tọ gbẹẹí ló. 39 Nda kọ́ọ̀ nèi kọọ̀, nóo é mon naḿ mi dọ̀ọ̀mà tṍó eo é kọ́i kọọ̀, ‘Tã́áná deè bá á di ló neń ea dú boo béè Jìhóvà!’”*