Lé Kpẹ̀a E Máátìù Beè Emí

8 Tṍó ea aa boo gùa, gã́bug nen beè gbóó bììàẹ́ nvée. 2 Vaá ene kà gbálà e kom̀ kulè dìé ló beè dù gé kumíe dúnú ke gbàà vaá kọọ̀: “Neń Ea Íém, be à dú o bùlà, ò é láá naa kọ ḿ boá.” 3 À gbóó nììnà bá daaẹ́ ló vaá kọọ̀: “M̀ gbĩ́ì kọ ó boá!” Tẽ̀ènè tṍóá, kom̀ kulèa beè gbóó táẹ́ ló. 4 Tṍóá, Jíízọ̀s à gbóó kọ́ nèe kọọ̀: “Ó gá kọ́ nè tọ́ọ̀ nen, sõò àà gé tú o lóó zogè neǹ vààla gyọ́ọ, vaá ò tú o dõ̀ònù e Log Mózìs kọ́á nèe, kọbé bà nyímá kọ o õoà.”

5 Tṍó ea íná Kàpánìòm, enè neǹ togó gbò bé* beè dúé ló gé bànie 6 kọọ̀: “Tẹ́ẹ̀, kpáló ńdáà gyóòlo gé palàge zọ̀ vaá náa láà aa boo.” 7 À gbóó kọ́ nèe kọọ̀: “M̀ é bóe tṍó em é íná kĩá.” 8 Neǹ togó gbò béá à aalá nèe kọọ̀: “Tẹ́ẹ̀, ním bọ́ọ̀ló gè kọ ó dú nà tọ. Dõogẽ ló gé bel, mè ńdáà gyóòlo é bóá. 9 Boo béè kọọ̀ nda dì nàgé kè kẽè kpóó lẹ̀ẹ̀là bel, vaá m̀ íè gbò bé em gé lẹẹlà bel ló. M̀ ólò kọ́ nè na není kọọ̀, ‘Àà!’ vaá à aà, m̀ kọ́ nè na nená kọọ̀, ‘Dù!’ vaá à dú, vaá m̀ kọ́ nè nà gyóòlo kọọ̀, ‘Naa nuí!’ vaá à náa.” 10 Tṍó e Jíízọ̀s dã́ naa vó, a beè palàge bọọẹ́ ló naa ní ea kọ́ nè gbò e ba beè dìé nvéeá kọọ̀: “M̀ lóò kà-kà bel nèi kọọ̀, m̀ gáà mòn tọ́ọ̀ neǹ Ízrẹẹ̀l ea íe agẹ zìgà naaí. 11 Sõò m̀ kọ́ọ̀ nèi kọọ̀ gã́bug nen é aa deè báà nàànì nè dọ̀ọ̀mà tẽ́ nàànì dù gé zọ̀ Ébràhám̀, Áízìk, nè Jékọ̀b deá gyã́á gbẹá mm̀ Boǹ Méné Bàrì; 12 boo tṍó e bà é tóbví gbò e bà gáẹ̀ beè bã mm̀ Boǹ Ménéá vaá bà náa bọ́ ná ló tẹlẹ mm̀ kùkùù gín kèdẹi. Kĩá ní e bà é tõo tò vaá taa dáa ẹ́.” 13 Tṍóá, Jíízọ̀s à gbóó kọ́ nè neǹ togó gbò béá kọọ̀: “Àà. O zìgà á naa kọ á naaá ní ló naa vó.” Vaá a gyóòlo beè gbóó boá tẽ̀ènè tṍóá.

14 Tṍó e Jíízọ̀s íná tọọ̀ Pítà, a beè mòn kà vaà Pítà ea di mà kẽ e sìsã́ gé síé ló. 15 À gbóó daáẹ bá ló bá vaá sìsã́á à gbóó táẹ́ ló. À gbóó aa boo naa nu nèe. 16 Sõò tṍó ea dú ló èlà, gbò nen beè tú gã́bug gbò e zọ di m domáé ló, vaá a beè ló bel kpoomá zọá lọ̀l vá m, vaá bó dénè gbò e kpáló va géè zọ̀, 17 kọbé à ḿm̀-mè bel e Bàrì beè kọ́ tenmá gã́ neǹ kọ́ọ̀ bùlà Bàrì Àìzáíà kọọ̀: “A beè tú bẹẹ zọ̀ló lọ̀l vaá bó gbò kom ea beè dìí ló.”

18 Tṍó e Jíízọ̀s mon kọọ̀ gbò nen a ḿ-màèé ló, à gbóó kọ́ nè pá a gbò nyòòne nvée kọ bà á naa bà é fulìè kilìè na sábá pèneá. 19 Enè neǹ émì kpá beè gbóó dúé ló gé kọ́ nèe kọọ̀: “Neǹ Dòbá, nda é nyooné ni kil kọ̀láá kĩée eo kilì.” 20 Jíízọ̀s à aalá nèe kọọ̀: “Kpòòlò íe kóló ea ólò tõó m, vaá gbò ńnóm à ié tẹ̀ e bà ólò ma m, sõò Sã́ánà nená náa íe tọ́ọ̀ ketõ̀ò ea ólò dẹlẹ togó.” 21 Tṍóá, dõona nèn ea ólò nyoonée nvée à kọ́ nèe kọọ̀: “Neń Ea Íém, nèm tṍó, mè m̀ é zẹ́ẹ́ sí be gé lì ńdáà tẹ̀.” 22 Jíízọ̀s à aalá nèe kọọ̀: “Kilsĩ́ gè nyooném nvée vaá ò sọbá gbò íí* kọ bà á lì gbò íí.”

23 Tṍó ea bã́ mm̀ faà sĩ́ múú, pá a gbò nyòòne nvée beè zọ̀ẹ bã m. 24 Gbele bá kpóó fọ́ọ́lọ́ beè ula sĩ́ pèneá naa ní e dálí a íná boo gè diilè faàa; sõò Jíízọ̀s beè di dáá. 25 Ba beè gbóó kẽée lọl boo vaá kọ́ nèe kọọ̀: “Neń Ea Íéi, dùùlài, mè èé gé pè!” 26 Tṍóá, à gbóó kọ́ nè va kọọ̀: “Booló eo íèì ńkem̀ zìgà, éé ní ea náa pọ̀ à siíi naa vó é?” À gbóó aa boo vaá kọ́ bel fọ́ọ́lọ́ nè pèneá, vaá dénè kẽ à gbóó ọ̀b. 27 A beè palàge bọọ́ vá ló, naa ní e bà kọ́ọ̀: “Níì mó íb nen ẽ́? Bã̀àna fọ́ọ́lọ́ nè pène gbaníe tṍ ló.”

28 Tṍó e bà ful sábá pèneá iná bálásĩ́ Gàdárà, bàà neń e zọ di m beè aa gbàà gbò kóló dem* e bà ólò lì neń m dúé ló. Ba beè olòó palàge gbò gyã̀à naa ní e pọ̀ náa beè zìgà kọọ̀ tọ́ọ̀ nen á tení ná èèlèá. 29 Ba beè kòòlà kpã́ kọọ̀: “Éé ní eo gbĩ́ìí ló e Sã́áná Bàrì e? É kọọ̀ ò dúù ló gè nèi kpọ̀té besĩ́ tṍóá kálá lee?” 30 Gã́bug diì máá beè di kuló kĩá e bà géè dé nu. 31 Gbò zọá à gbóó bànie kọọ̀: “Be ò é kpói, lẹ̀ẹ̀lài nvee mm̀ gbò diì mááá kẽ.” 32 À gbóó kọ́ nè va kọọ̀: “Aalii!” Bà gbóó àà vá m bã mm̀ gbò diì mááá, vaá gbò diì mááá à gbóó kònà aa boo gùa dọ múú, vaá ú gbẹá m. 33 Gbò e bà géè kùdẽe ló diì mááá beè gbóó teelá bã bon, vaá kọ́ kọ̀láá kà nú ea nááá, bã̀àna nú ea nááá ló gbò e zọ beè di m-má. 34 Dénè gbò e bà dú boná beè gbóó dú ló Jíízọ̀s, vaá tṍó e bà moníe, bà gbóó kọ́ nèe kọ á aalìè ba bálásĩ́.