Lé Kpẹ̀a E Máátìù Beè Emí

4 Tṍóá, nyómáá* beè gbóó faalá Jíízọ̀s kilma boo kpáà bàlà ól naa ní e Pọ́lọ́ Nyómá ẹbmàe. 2 Tṍó ea ni ká gã́ mm̀ 40 ẹ́ẹ́ èlà nè 40 bílá dee lọ̀l, tákói beè gbóó táẹ́ ló. 3 Pọ́lọ́ Nyómá beè gbóó dù gé ẹ̀bmàe vaá kọ́ nèe kọọ̀: “Be ọ̀ọ̀ sã́áná Bàrì, kììlà gbò kpò demí naamá gyã́á.”* 4 Sõò, a beè aalá nèe kọọ̀: “Ba beè emí mm̀ Kpá Káí kọọ̀: ‘Níì áá gyã́á ní ea é sẹlẹ neń dùme nì, sõò kọ̀láá kà moǹ bel ea aa gã́ Jìhóvà* é ne dùm nen.’”

5 Tṍóá, Pọ́lọ́ Nyómá beè gbóó faaláẹ kilma Jèrúselẹ̀m ea dú boǹ káíá, vaá túe ele kĩée ea palàge bọọ́ gãboo ea di ló tọọ̀ káíá. 6 À gbóó kọ́ nèe kọọ̀: “Be ọ̀ọ̀ sã́áná Bàrì, pẹẹ dọ kẽ, boo béè kọ ba beè emí kọọ̀: ‘À é lẹẹlà pá a gbò nyómá tóm má ni,’ vaá ‘Bà é tavẹ́ ni kọbé nóo dọọ̀ boo tọ́ọ̀ kà kpò dem.’” 7 Jíízọ̀s à gbóó kọ́ nèe kọọ̀: “Ba beè emí nágé kọọ̀: ‘Nóo é íè ge ẹ̀bmà Jìhóvà* ea dú o Bàrì.’”

8 Pọ́lọ́ Nyómá beè faalá náe gé kilma boo gù ea palàge bọọ́ gãboo vaá zogèe dénè boǹ méné bàlà boo nè bé e bà kpé dẽe naa. 9 À gbóó kọ́ nèe kọọ̀: “M̀ é né ni dénè gbò nuí be ò kúmí sĩ́ kẽ vaá fàm áá enè tóm.” 10 Tṍóá, Jíízọ̀s à gbóó kọ́ nèe kọọ̀: “Tení ààḿ sĩ́, e Sétàn! Boo béè kọ ba beè emí kọọ̀: ‘Jìhóvà* ea dú o Bàrì ní eo é íè ge fã̀e, vaá áá ẹlẹ ní eo é sí tóm ea di káí nèe.’” 11 Tṍóá, Pọ́lọ́ Nyómá à gbóó ààẹ́ ló àà vaá gbò nyómá tóm beè gbóó dù gé nvèè bá nèe.

12 Tṍó ea dã́ kọ bà síi Jṍòn nvee tọọ̀ kpọ́gọ́lọ́, à gbóó àà kil Gálilì. 13 Tṍó ea aa Názarẹ̀t, a beè gbóó àà gé tõó Kàpánìòm ea di kpàn pène ea di bálásĩ́ kĩée e pá gãà Zẹ́bulọ̀n nè Náftalaì ólò tõo, 14 kọbé à ḿm̀-mè nú e neǹ kọ́ọ̀ bùlà Bàrì Àìzáíà beè kọ̀a, ea kọ́ọ̀: 15 “Booló pá gãà Zẹ́bulọ̀n nè Náftalaì eo dií kpàn èèlè ea téní dọ ló pène ea di na sábá Jọ́dàna, eo dií Gálilì, kĩée e gbò e bè níì pá Júù nì ólò tõo, 16 eo dií ĩ́ìtẽ́ kĩée ea kuu gíná, o monii ẹ́ẹ́ dee ea palàge mò. Vaá ẹ́ẹ́ dee a mó boo boólo eo dií kĩée e ú kọl bá boo.” 17 Lọl tṍóá ààmà, Jíízọ̀s beè gbóó dààmà togó gè kọ́ kpẹ̀a kọọ̀: “Ọgai, boo béè kọọ̀ Boǹ Méné Bàrì a íná kuló.”

18 Tṍó ea gé kyãa gã́ Pène Gálilì, a beè mòn Sáímòn ea kọlà nàgé Pítà nè a vígà Ándrù e bà gé tóbví gbṍò boo béè kọọ̀ ba beè dú gbò síì dọọ̀. 19 À gbóó kọ́ nè va kọọ̀: “Dui gé nyooném mi nvée, mè nda é nóòmài bé eo é gbĩ́i gbò nen belí bé eo ólò kpoi dọọ̀ naanii ã́.” 20 Tẽ̀ènè tṍóá, bà gbóó sọ̀bá ba gbṍò gbẹẹ́ kẽ vaá nyoonée nvée. 21 Tṍó ea aa kĩá, a beè mòn dõona kà bàà vígà. Ba bée kọlà Jém̀z nè Jṍòn e bà dú pá nvín Zẹ́bidì. A beè kolí va tṍó e bà di mm̀ faà sĩ́ múú ló ba tẹ̀ Zẹ́bidì e bà géè saalá gbṍò. 22 Tẽ̀ènè tṍóá, ba beè aa ló ba tẹ̀ mm̀ faà sĩ́ múúá vaá nyoonée.

23 Tṍóá, a beè gbóó kyã̀à tení zivèkà Gálilì vaá noomà nu gbẹá mm̀ gbò tọ bõ̀ònaló fã̀ pá Júù. A beè kọ nágé kpẹ̀a ea kil ló Boǹ Méné Bàrì vaá bó kọ̀láá íb zọ̀ló nè bo ea beè di ló gbòa. 24 Kpẹ̀a ea kilíé ló beè zààlà iná dénè ketõ̀ò ea di Sìríà, naa ní e ba beè faalá gbò e bà di kèbá kele-kele íb nyaa ló nè zọ̀ló máe, bií ló gbò e zọ di m, gbò e gọ́í gé síi, nè gbò e báàsĩ́ va ọọ, vaá a beè bó va. 25 Vó beè naa kọọ̀ gã́bug gbò e bà aa Gálilì, Dìkápolìs,* Jèrúselẹ̀m, Jùdíà, nè na sábá Jọ́dàna á bììàẹ́ nvée.