Tóm Gbò E Jíízọ̀s Beè Lẹ̀ẹ̀là
12 Mm̀ gbò tṍóá, Méné Hẹ́rọ̀d beè gbóó dààmà togó gè biigè ló sìgà gbò e bà di mm̀ bõ̀ònatõ̀ò. 2 A beè tú gẹ̀ fẹẹmá Jém̀z, ea dú vígà Jṍòn. 3 Tṍó ea mon kọ à léémá pá Júù, à gbóó sii nagé Pítà. (Níí beè naaá mm̀ gbò tṍó e pá Júù ólò dé Fétúlú E Nú Ea Ólò Gbuuve Nu Á Gé Gbàà.) 4 A beè siíe nvee tọọ̀ kpọ́gọ́lọ́ vaá òb nè ọ̀ọ̀lẹ̀ nen beè dõ̀ònà tṍó e bà é kúe dẽe ló. Ténì nen géè kùe dẽe ló enè tóm, vaá a beè gbĩ́ gè túe domá kèsĩ́ dénè nen tṍó e Nàànù Ténì Zelí ni téní tà. 5 Ba beè tú Pítà gbẹẹ́ tọọ̀ kpọ́gọ́lọ́, sõò bõ̀ònatõ̀òa beè dì e bà géè palàge tã̀àgã ló Bàrì máe.
6 Bílá deè deé ea é zilà besĩ́ Hẹ́rọ̀d kálá tú Pítà ààmà gé beeláẹ bel lóá, Pítà beè di dáá èèlè nyíè zẹ̀ẹ̀ bàà kà neǹ bé, vaá ba beè tú bàà kà gẹ́l kpọ́gọ́lọ́ bọbmáe. Vaá dõona kà gbò bé beè di élá sĩ́ nùtọá e bà géè kùdẽe ló tọọ̀ kpọ́gọ́lọ́á. 7 Sõò ẹ̀b! Nyómá tóm Jìhóvà* beè gbóó dù gé elá kĩá, vaá ẹ́ẹ́ dee beè gbóó mo mm̀ tọọ̀ kpọ́gọ́lọ́ e Pítà dìa. À gbóó kpàlà bá ló Pítà naa ní ea kẽeà. À gbóó kọ́ nèe kọọ̀: “Vàlẹ̀ bá aa boo!” Gẹ́l kpọ́gọ́lọ́á à gbóó fùlà ààẹ́ ló bá. 8 Nyómá tómá à gbóó kọ́ nèe kọọ̀: “Nvèà o kọ̀là ló nè o kpá kátọ.” À gbóó naa vó. Dee deè nvée, à gbóó kọ́ nèe kọọ̀: “Nvèà o pọ̀b kọ̀là ló, vaá ò biiàḿ nvée.” 9 À gbóó dọ kèdẹ̀i vaá kilsĩ́ gè bììàẹ́ nvée, sõò náa beè nyimá kọọ̀ nú ea géè naaá tení dú ló nyómá tómá géè naaá bàlà kẽ. Kàsĩ́, a beè dòòmà kọọ̀ à moàè nuù dẽe. 10 Tṍó e ba ni zélí túá gbò nè ní ea égè bàà gbò kùdẽe ló, bà gbóó iná ló gbànsĩ́ e ba beè tú kpọ́gọ́lọ́ naamá ea téní aa tọọ̀ kpọ́gọ́lọ́á bã boná, áá ẹ̀ẹ̀ à gbóó kùùà. Tṍó e ba ni téní dọ nvée, bà gbóó bã boo ene kà èèlè. Tẽ̀ènè tṍóá, nyómá tómá à gbóó ààẹ́ ló àà. 11 Tṍó e Pítà nyeeà vaá nyimá nú ea gé nááá, à gbóó kọọ̀: “Kátogóí, nda a palàge nyimá kọọ̀ Jìhóvà* ní ea beè lẹ̀ẹ̀là a nyómá tóm kọ á gé dùùlàm lọl bá Hẹ́rọ̀d nè dénè nú e pá Júù géè ẹ̀b dẽesĩ́ kọ à é nááá ẽ́.”
12 Tṍó e Pítà ni nyímá naa vó, à gbóó àà kil tọọ̀ Mérì, ea dú kà Jṍòn e bà ólò kolíe Máàk, ea dú kĩée e ńkem̀ gã́bug gbò e bà ólò nyoone nvéè Jíízọ̀s beè di bṍóná e bà géè tã̀àgã ló Bàrì. 13 Tṍó ea kon bá nvéè gbànsĩ́ ea di ló beá, ene kà gyóòlo pábia ea kọlà Ródà beè gbóó dù gé zìgàẹ kól gã́. 14 Tṍó ea nyímá kọọ̀ níà moǹ Pítà, nyíée à gbóó palàge ẹẹ naa ní e náa zẹ́ẹ́ kùùlà gbànsĩ́á, tãa vó, à gbóó teelá òòà kil mm̀ be gé kọ́ nèva kọọ̀ Pítà di élá ló gbànsĩ́. 15 Bà kọ́ nèe kọọ̀: “Lóó togó ni náa dú lé.” Sõò a beè kilsĩ́ gè kọ́ nèva kọọ̀ níà nú ea monìèe. Bà gbóó dààmà togó gè kọọ̀: “Níà a nyómá tóm.” 16 Sõò Pítà beè gbẹá kĩá olòó kòn bá nvéè gbànsĩ́á. Tṍó e bà kuulà vaá mònie, a beè palàge bọọ́ vá ló. 17 A beè tú bá loomá bel nèva kọ bà á pĩigã́, vaá baatẽ́ bé e Jìhóvà* beè tuèe lọl tọọ̀ kpọ́gọ́lọ́á naa nèva. À gbóó kọọ̀: “Kọi gbò nuí nei Jém̀z nè dõona kà gbò vígà págbálà.” Tṍó ea kọ́ vó lọ̀l, à gbóó àà kil dõona ketõ̀ò.
18 Tṍó e dee ni zilà, bùlà beè gbóó palàge bã ló gbò béá boo béè nú ea nááá ló Pítà. 19 Hẹ́rọ̀d à gbóó palàge gbĩ́ Pítà, vaá tṍó e náa moníe, à gbóó bĩiná bel gbò kùdẽe lóá vaá nè log kọ bà á nèva kpọ̀té. Hẹ́rọ̀d à gbóó aa Jùdíà kil Sìzàríà gé tõó kĩá mm̀ sìgà dee.
20 Tṍóá, súng beè palàge bã̀ Méné Hẹ́rọ̀d nyòòmà pá Táíà nè Sáídòn. Vó à naa, tṍó e ba ni kọ́ nè Blástùs ea ólò ẹ̀b nú kil ló dénè nú ea di tọọ̀ ménéá kọ á ló bel nèe kọbé à nyááná nyíe, bà gbóó gbọọlá síé ló gè bàn kọ bà gbĩ́ gè zọẹ̀ẹ diàẹ̀ mm̀ fẹ́ẹ́-fẹẹ̀ ló, boo béè kọọ̀ dó e ménéá gé bẹl ní e bà ólò ié gyã́á lọ̀l ẹ. 21 Enè dee, Hẹ́rọ̀d beè gbóó nvèà a kọ̀là ló méné, vaá ĩìtẽ́ boo a kpòté bèèla bel vaá gbóó dààmà togó gè ló bel nè gbò e bà di kĩá. 22 Tṍóá, gbò e ba beè di bṍónáá à gbóó dààmà togó gè vulí kpã́ kọọ̀: “Níà moǹ bàrì, níì níí nen nì!” 23 Tẽ̀ènè tṍóá, nyómá tóm Jìhóvà* à gbóó tú zọ̀ló tẹlẹ̀ẹ́ boo, boo béè kọ à tú ka ea kuu Bàrì, vaá lúé beè gbóó bàẹ vaá fẹ́ẹ.
24 Sõò moǹ bel Jìhóvà* beè kilsĩ́ gè zààlà naa ní e gã́bug nen ziga ló Bàrì.
25 Tṍó e Bánabàs nè Sọ́ọ̀l ni nveè bá nè gbò e ba di Jèrúselẹ̀m lọ̀l, bà gbóó faalá Jṍòn e bà ólò kolíe Máàka bììa ló òòa kẽ.