Lé Kpẹ̀a E Lúùk Beè Emí

11 À íe tṍó e Jíízọ̀s beè di enè ketõ̀ò ea géè tã̀àgã ló Bàrì. Tṍó ea ni tãàgã ló Bàrì lọ̀l, enè neń ea ólò nyoonée nvée à gbóó kọ́ nèe kọọ̀: “Neń Ea Íéi, noomài bé eé tãàgã ló Bàrì naa dì belí bé e Jṍòn beè noomà gbò e bà ólò nyoonée nvée naaá.”

2 À gbóó kọ́ nè va kọọ̀: “Kọ̀láá tṍó eo gé tãagãi ló Bàrì, kọi kọọ̀: ‘Tẹ̀, naa kọọ̀ o bée á di káí. Naa kọ o Boǹ Méné á dù. 3 Nèi gyã́á eé dé buù dee dẹ̀ẹ̀a boo bé e íè bíi ló naa. 4 Ia ló bẹẹ pọ́lọ́ nèi, boo béè kọọ̀ beéle ólò ìà nàgé ló nè kọ̀láá nen ea sí pọ́lọ́ beele, vaá ó gá zìgà kọ é dọ bá ẹ̀bmà.’”

5 Tṍóá, à gbóó kọ́ nè va kọọ̀: “Beè enè bọ̀ì íe kóò vaá ò gbóó síé ló taa tóm dáá gé kọ́ nèe kọọ̀, ‘Kóò, bọọlẹ́m taà kpò fétúlú, 6 boo béè kọọ̀ ene kà ńdáà kóò ea beè di boo kyẽè ínaḿ ló vaá ním íè tọ́ọ̀ kà nú em é née.’ 7 Tẹ̀ íè tọá à gbóó tõó mm̀ tọ aalá nèe kọọ̀: ‘Ó gá tãagém. M beè kùb nùtọ, vaá pá ńdáà nvín nè m̀m̀ a má kẽ. Ním é láá aa boo gé nè ni tọ́ọ̀ nu.’ 8 M̀ kọ́ọ̀ nèi kọọ̀, náa gáẹ̀ aa boo gé nèe tọ́ọ̀ kà nu kọ̀láá bé ea dú a kóò naa, sõò boo béè kọ à kilsĩ́ gè bàn, à é aa boo gé nèe kọ̀láá kà nú ea íe bíi ló. 9 Vó à naa, m̀ kọ́ọ̀ nèi kọọ̀, kilíí sĩ́ gè bĩinai, mè bà é néi; kilíí sĩ́ gè gbĩi, mè ò é monii; kilíí sĩ́ gè konii bá nvée, mè bà é kuulà nèi. 10 Boo béè kọọ̀ kọ̀láá neń ea kilsĩ́ gè bĩiná, é íe, vaá kọ̀láá nen ea kilsĩ́ gè gbĩ̀, é mon, vaá kọ̀láá nen ea kilsĩ́ gè kòn bá nvée, bà é kuulà nèe. 11 Mm̀ kà-kà, mókà tẹ̀ ní e beè a nvín bĩ́íná gyã́à, à é tú naanà nèe ẽ́? 12 Àbèè kọọ̀ be à bĩ́íná ké kõ̀ò, à é née pèèle é? 13 Vó à naa, beè booló gbò pọ́lọ́ lab dògò nyímàì tẽ́ gè tui lé nu nei bọọ gbò nvín, é kọọ̀ bọọ Tẹ̀ ea di káála náa é tú nyómá káí nè gbò e bà bĩ́inaé bá!”

14 Tṍó e tṍó téní, a beè kpó zọ ea beè naa kọọ̀ ene kà gbálà á gá láá ló bel lọ̀líé m. Tṍó e zọá aàẹ́ m, gbálàa à gbóó láá ló bel naa ní ea bọọ́ ló dénè gbò e ba beè di kĩá. 15 Sõò sìgà ọ̀và beè kọọ̀: “Kpóó Pọ́lọ́ Nyómá ea kọlà Bìẹ́lzẹbọ̀b ea di togó gbò zọ ní ea kpóómá zọ lọ̀líé m ẽ́.” 16 Sìgà gbò à gbóó kọ á sí ene kà tóm dũ̀ùnè ea zógè kọọ̀ Bàrì ní ea beè lẹ̀ẹ̀làẹ ẹ́, naamá gè ẹ̀bmàe. 17 Boo béè kọọ̀ Jíízọ̀s nyímá nú e bà gé bugi togó boo, à gbóó kọ́ nè va kọọ̀: “Kọ̀láá kà boǹ méné ea pooà vaá beá ene é kyọa sĩ́, vaá kọ̀láá kà tọ ea pooà vaá beá ene é labvà. 18 Mm̀ tẽ̀ènè sĩ́deeá, beè Sétàn pooà vaá bé áá ẹ̀ẹ̀, éé ní ea é náa kọọ̀ a boǹ méné á gá kyọasĩ́ ẽ́? Boo béè kọ ò kọ́ì kọọ̀ m̀ túù kpóó Bìẹ́lzẹbọ̀b kpoomá zọ lọl mm̀ nen. 19 Beè nda túù kpóó pọ́lọ́ nyómá ea kọlà Bìẹ́lzẹbọ̀b kpoomá zọ lọl mm̀ nen, kpóó mée ní e bọọ gbò nvín ólò kpoomá zọ lọl mm̀ nen ẽ́? Níà nú ea náa vaá bọọ gbò nyòòne nvée é béélái bel ló é. 20 Sõò beè kpóó* ea aa bá Bàrì ní e nda kpóòmà zọ lọl mm̀ nen ẽ́, Boǹ Méné Bàrì a ténií kẽ. 21 Tṍó e neń ea íe kpóó bọ́á dénè a nuù bé vaá kùdẽe ló a tọ, gbò a ìènù náa ólò kyọa sĩ́. 22 Sõò tṍó e neń ea íe kpóó èlie dú gé bée vaá bée èlbá, à ólò gbóó tú dénè nuù bé ea géè dẹlẹ nyíé booá lọ̀líé bá, vaá dõo dénè nú ea beè tú lọ̀líé báá nè dõona gbò. 23 Kọ̀láá neń e bè náa zọ́m dù gé bé m, vaá kọ̀láá nen e bè náa zọ́m bõonè ló gé lagẹlẹ.

24 “Tṍó e zọ aa mm̀ nen, à ólò tení kĩée e múú á gé, gé gbĩ́ ketõ̀ò bõ̀séi, vaá tṍó e náa mon tọ́ọ̀ ketõ̀ò, à ólò gbóó kọọ̀, ‘M̀ é ooà kil nà tọ em beè dì.’ 25 Vaá tṍó ea íná vaá mòn kọ ba beè kpalí õ̀ònà vaá sí tóm ló, 26 à ólò gbóó òòa kẽ gé tú dõona kà àlàbà kà nyómá e bà dú pọ́lọ́ èl ẹlẹ tẹẹá ló, vaá tṍó e ba ni bã́é m, bà ólò gbóó tõoé m. Dìtõ̀ò nená ólò gbóó zoogá èl bé ea beè dì naa túá bólá.”

27 Boo tṍó e Jíízọ̀s gé ló gbò belí, ene kà ńnváá beè gbóó tõó gbàà gbòa kọ́ nèe kọọ̀: “Ẹ́ẹ́-ẹẹ̀ nyíe á di ló neń ea beè màn ni nè neń ea beè nè ni má!” 28 Sõò ẹlẹ à kọọ̀: “Ẽ́èe, tãa vó, ẹ́ẹ́-ẹẹ̀ nyíe á di ló neń ea dã́ moǹ bel Bàrì vaá naa nú ea kọ́!”

29 Tṍó e dénè gbòa ni bṍóná, à gbóó kọ́ nè va kọọ̀: “Nakà kúúlíí dú pọ́lọ́, bà gbĩ́ gè mònmà dẽè tóm dũ̀ùnè, sõò bà náa é mon tọ́ọ̀ kà, daalá lọl ló ní ea beè naaá ló Jónàa. 30 Dì belí bé e Jónà beè dú kpíi nèà pá Nínevà naaá, níà bé e Sã́áná nená é dú nágé kpíi nèà nakà kúúlíí naa ẽ́. 31 Deé e Bàrì é béélá bel, pábia ea géè bẹ̀l deè kpọ̀lọ̀-kpọ̀lọ̀ nè gbò e bà di nakà kúúlíí é kẽeà, vaá à é zógè kọọ̀ bel bẽ́è gbòí, boo béè kọ a beè aa kpã́á deè dù gé pãane tṍ ló nyìmànù e Sólomòn íe. Sõò ẹbvii! Neń ea el kpãà Sólomòn di kĩí. 32 Deé e Bàrì é béélá bel, gbò e bà di nakà kúúlíí nè pá Nínevà é kẽeà aa kemà ú, vaá pá Nínevà é náa nú ea zógè kọọ̀ bel bẽ́è gbòi, boo béè kọọ̀ ba beè ọgá tṍó e Jónà kọ́ kpẹ̀a nè va. Sõò ẹbvii! Neń ea el kpãà Jónà di kĩí. 33 Tṍó e nen mun sã́, náa ólò tú sẹlẹ́ kĩée ea é gṹá àbèè ge sẹlẹ́ kè ńkùn, sõò à ólò sẹlẹ́ boo nú e bà ólò mùn sã́ sẹlẹ́ boo, kọbé à ẹ́ẹ̀lẹ̀ kẽ nè gbò e bà é bã́ tọá. 34 Súú dẽe ní ea dú té sã́ ea dì ní ló é. Beè súú dẽé ni nyágĩ́, dénè kẽ é ẹ́ẹ ní ló. Sõò beè súú dẽé ni kọọgà, dénè kẽ é kuú ni gín ló. 35 Vó à naa, ọẹi dẽe kọbéè ẹ́ẹ́ dee ea dìí m náa kuu gín. 36 Beè dénè kẽ ẹ́ẹ ní ló, vaá tọ́ọ̀ ketõ̀ò náa kuu gín, à é ẹ́ẹ belí bé e té sã́ ólò ẹẹlẹ̀ kẽ naaá.”

37 Tṍó ea ni ló belí lọ̀l, enè neǹ Fárìsíì beè gbóó kolíe kọ à dù gé zọẹ̀ẹ deè gyã́á. Vó à naa, a beè gbóó bã tọ gé zọ̀ẹ dé gyã́á. 38 Sõò a beè bọọ́ ló neǹ Fárìsíìa tṍó ea mon kọọ̀ náa zẹ́ẹ́ logá bá* besĩ́ à kalá dé gyã́á. 39 Sõò Neń Ea Íéi à gbóó kọ̀ nèe kọọ̀: “Booló pá Fárìsíì ólò logii kpáló gbàág nè bũ̀ õonai, sõò áá gọ̀l òò nè pọ́lọ́ láb ní ea di ḿ-má m ẽ́. 40 Booló gbò ból! É kọ níì neń ea beè dèm kpáló ní ea beè dèm nàgé m ẽ́ nì? 41 Tṍó eo gé dõonii nú nei gbò tãa,* á ààí nyíe, mè kọ̀láá kà nú ea kilíí ló é gbóó õ̀òà. 42 Pọ́lọ́ múú kyáá á di ló booló pá Fárìsíì, boo béè kọọ̀ ò ólò kpẽi ené boo òb ea dú ló míǹt nè rúù nè dõona kà gbò pà sãa e bà ólò bùlmà nu, sõò ò gbẹ́màì nvéè lé bèèla nè ge vùlè Bàrì! À dú bíi kọ ó kpẽi ené boo òbví, sõò ó gá gbẹmai nvéè nagbò nuá. 43 Pọ́lọ́ múú kyáá á di ló booló pá Fárìsíì, boo béè kọ à ólò leemái gè ĩìtẽ́ deèsĩ́ té gbẹá bọọ gbò tọ bõ̀ònaló fã̀ nè tṍó e gbò nen kanài mon gbẹá kèki! 44 Pọ́lọ́ múú kyáá á dìí ló boo béè kọọ̀ ò bélìì kpòlí e bà náa nveè nu kùùmà dẽe ló, vaá gbò nen náa nyímá tṍó e bà kyãà tení boo!”

45 Enè neń ea palàge nyimá Log à gbóó kọ́ nèe kọọ̀: “Neǹ Dòbá, gbò bel eo lóòí zógè kọ ò oǹ nàgé beele.” 46 Tṍóá, à gbóó kọ́ nèe kọọ̀: “Pọ́lọ́ múú kyáá á di ló boólo eo palàge nyimai Log, boo béè kọọ̀ ò túì gbele nyèè tò toolei gbò nen, sõò ó géí kpènà ló gè tui bã̀àna enè kpóó nvéé bá daalíí ló!

47 “Pọ́lọ́ múú kyáá á dìí ló, boo béè kọọ̀ ò tṍì kpòlí* gbò kọ́ọ̀ bùlà Bàrì e bọọ gbò nómá tẹ̀ ní ea beè fẹ́ va ẹ́! 48 Ò palàge nyimai nú e bọọ gbò nómá tẹ̀ beè naa, vaá ò nveeníí va sãa kúm, boo béè kọ ba beè fẹ́ gbò kọ́ọ̀ bùlà Bàrì, sõò boolo gé tṍi ba kpòlí. 49 Níà nú ea náa vaá Bàrì ea nyímá nu beè kọọ̀: ‘M̀ é lẹẹlà gbò kọ́ọ̀ bùlà Bàrì nè gbò tóm má va, vaá bà é fẹ́ va vaá biigè ló sìgà ọ̀và, 50 kọbé miì dénè gbò kọ́ọ̀ bùlà Bàrì e ba beè fẹ́ gbẹá boo kunukẽ̀í lọ̀l gé tṍó e bàlà booí beè dààà togó dí boo togó nakà kúúlíí é. 51 Lọl ló miì Ébẹ̀l tẹlẹ ló miì Zèkàráíà e ba beè fẹ́ gbẹá gbà-gbà gbàni vààla gyọ́ọ nè tọọ̀ káíá.’ M̀ lóò kà-kà bel nèi kọọ̀ ba mii é dí boo togó gbò e bà di nakà kúúlíí.*

52 “Pọ́lọ́ múú kyáá á di ló boólo eo palàge nyimai Log, boo béè kọ ò túì ííla ea é kuulà nùtọ ea dọ́ ló nyìmànù Bàrì aamai. Boolo nóo bãì m, vaá ò kpegàì deè gbò e bà gbĩ́ gè bã m kọ bà á gá láá bã m!”

53 Tṍó ea aa kĩá àà, gbò émì kpá nè pá Fárìsíì beè gbóó palàge tãagẽ́e vaá bĩináe gã́bug bíb, 54 vaá elá bànà tṍó e bà é tú bel ea é ló siimáe.