Lé Kpẹ̀a E Lúùk Beè Emí

18 Tṍóá, à gbóó tú nu dòòle ló loomá bel nè va ea kil ló nú ea náa vaá à dú bíi kọ bà á kilsĩ́ gè tã̀àgã ló Bàrì vaá lóó va á gá ọọ. 2 À gbóó kọ́ nè va kọọ̀: “À íe ene kà neǹ bèèla ea di ene kà bon e náa ólò siiá pọ̀ ló Bàrì nè gbò nen. 3 À íe ene kà vaà tãa ea beè dì nàgé boná ea beè kilsĩ́ gè síé ló gé kọ́ nèe kọọ̀, ‘Naa kọọ̀ bel ea di gbàà nen nè m̀m̀ á leèm.’ 4 Túá ból, náa beè tànie gè naa, sõò tṍó e tṍó téní, a beè gbóó kọ́ nèà a bá kọọ̀, ‘Náa kal ló béè kọ ním ólò siiá pọ̀ ló Bàrì àbèè nen, 5 sõò boo béè kọọ̀ ńnvááí kilsĩ́ gè tãagém, m̀ é gbĩ́ mòn kọọ̀ bel léèe kọbé náa kpáá kilsĩ́ gè tãagém.’” 6 Tṍóá, Neń Ea Íéi à gbóó kọọ̀: “Dãi nú e neǹ bèèlaá kọ́, náa kal ló béè kọọ̀ ẹ̀ẹ̀ neǹ pọ́lọ́ lab dògò! 7 Beè vó, é kọọ̀ Bàrì náa é béélá bel leè pá ńlẹ́ẹ̀ gbò e bà kilsĩ́ gè tó kolíe ẹ́ẹ́ èlà nè bílá dee, boo tṍó ea gé íe ĩ̀ìmà kìlmà vá ló? 8 Nda kọ́ọ̀ nèi kọọ̀, à é náa kọọ̀ bel á leè vá mm̀ gbala-gbala. Náa kal ló béè vó, tṍó e Sã́áná nená é dú, é kọ à é mon íb zìgàí boo kunukẽ̀í?”

9 A beè lo nágé bel dòòle ló nè sìgà gbò e ba beè ẹ̀b ba bá kọ bà dúè lé lab dògò, vaá ẹ̀b dõona gbò kọ bà á gé ló tọ́ọ̀ nu kọọ̀: 10 “Bàà nen beè àà kil mm̀ tọọ̀ káí gé tã̀àgã ló Bàrì. Enè nen beè dú neǹ Fárìsíì vaá na nená à dú neǹ lọ̀l kpègè gbáá. 11 Neǹ Fárìsíìa à gbóó elá èla vaá dààmà togó gè tã̀àgã ló Bàrì kọọ̀, ‘Ọ̀ọ̀ zaa gé e Bàrì, kọ nda ním bélì dénè nagbòa—gbò e bà ólò tú bá kpóó tuumá nu lọl bá nen, gbò pọ́lọ́ lab dògò, gbò e bà ólò gbẹẹ ba va àbèè ba dóm kuná gã̀—àbèè nakà neǹ lọ̀l kpègè gbáá àla. 12 M̀ ólò ká gã́ bàà tóm mm̀ enè sè, vaá m̀ ólò kpẽ́ ené boo òb ea dú ló kọ̀láá kà nú em íè.’ 13 Sõò neǹ lọ̀l kpègè gbááá beè elá kpã́á vaá náa beè gbĩ́ gè ẹ̀b gbàn deè, sõò a beè kilsĩ́ gè saá bá nù nyíée vaá kọọ̀, ‘Iém sàn nyíe ló e Bàrì, boo béè kọọ̀ ndaà neǹ náàkyọ̀.’ 14 M̀ kọ́ọ̀ nèi kọọ̀, gbálàí beè gbóó àà kil be, vaá nú ea náa zógè kọọ̀ à dú neǹ lé lab dògò èl neǹ Fárìsíìa. Boo béè kọọ̀ kọ̀láá neń ea dalà a lóó boo, bà é kilmàé kẽ, sõò kọ̀láá neń ea kilmà lóó kẽ, bà é dalàẹ́ boo.”

15 Tṍóá, gbò nen beè gbóó faalá ba gbò nvín domáé ló kọ à daá va bá ló, sõò tṍó e pá a gbò nyòòne nvée mon naa vó, bà gbóó dààmà togó gè bèl va bel ló. 16 Sõò Jíízọ̀s beè gbóó kolí gbò pá nvíná nvea ló vaá kọọ̀: “Sọi bá gbò pá nvín kọ bà á dúm ló. Ó gá kpegíí va, boo béè kọọ̀ Boǹ Méné Bàrì dì nè gbò e bà bélí gbò pá nvíní. 17 M̀ lóò kà-kà bel nèi kọọ̀, kọ̀láá neń e bè náa tú Boǹ Méné Bàrì belí pá nvín náa é bã́ m.”

18 Enè neń ea géè bẹ̀l beè gbóó bĩináe kọọ̀: “Lé Neǹ Dòbá, éé ní em é íè ge naa kọbé m̀ íe dùm e bè náa tá ẹ́?” 19 Jíízọ̀s à kọ́ nèe kọọ̀: “Éé ní ea náa ò kolím lé nen ẽ́? Tọ́ọ̀ nen náa dú lé, daalá lọl ló Bàrì. 20 Ò nyímà gbò log ea kọ́ọ̀: ‘Ó gá gbẹẹ o va àbèè o dóm kuná gã̀, ó gá fẹ́ nen, ó gá zìb nu, ó gá elá kyáá neǹ ditõ̀ò, nvèè ka ló o tẹ̀ nè o kà.’” 21 Gbálàa à kọ́ nèe kọọ̀: “M beè sẹlẹ dénè gbò logí lọl tṍó em beè di pá nvín.” 22 Tṍó e Jíízọ̀s dã́ naa vó, à gbóó kọ́ nèe kọọ̀, “À íe nú eo gáà naa. Oo dénè nú eo íè vaá ò tú kpègè ea dú ló nè gbò tãa, mè ò é íe gyọ́ mm̀ káála vaá ò gbóó dù gé nyooném nvée.” 23 Tṍó ea dã́ naa vó, nyíée beè palàge bììlà boo béè kọ a beè ié gã́bug gyọ́.

24 Jíízọ̀s à gbóó ẹ̀bvie vaá kọọ̀: “Ẹ̀b bé ea é tavala ló gbò e bà íe kpègè kọ bà á bã mm̀ Boǹ Méné Bàrì naaà! 25 À é válí kọọ̀ kámeẹ̀l á tení deè ńgà gbógmà nu èlmà ge kọọ̀ neǹ méné á bã Boǹ Méné Bàrì.” 26 Gbò e bà dã́ belí beè gbóó kọọ̀: “Mée ní ea é láá dùùà ẹ?” 27 À kọ́ nè va kọọ̀: “Nú e bè náa válí ló gbò nen ólò valí ló Bàrì.” 28 Pítà à gbóó kọọ̀: “Ẹ̀b! Beele e sọbá dénè nú e beè ié vaá nyooné ni nvée.” 29 Jíízọ̀s à aalá nè va kọọ̀: “M̀ lóò kà-kà bel nèi kọọ̀, kọ̀láá neń ea sọbá tọ àbèè va àbèè pá a vígà àbèè tẹ̀ nè kà àbèè gbò pá nvín, boo béè Boǹ Méné Bàrì 30 é íe gã́bug tóm gbò nú ea beè sọ̀bá gbẹẹ́ kẽá kátogóí, vaá mm̀ ãa bàlà boo* ea gé dú, à é íe dùm e bè náa tá.”

31 Tṍóá, à gbóó kolí Òb Nè Bàà Nen e bà ólò nyoonée nvéeá kilma kpògà kẽ vaá kọ́ nè va kọọ̀: “Pãanei tṍ! È gé aà kil Jèrúselẹ̀m vaá kọ̀láá kà nú e gbò kọ́ọ̀ bùlà Bàrì beè emí kilma ló Sã́áná nená é nááá. 32 Bà é tú Sã́áná nená nvee bá gbò e bè níì pá Júù nì, vaá bà é nveemàe lẹ́ vaá tú pọ́lọ́ bá sẹ̀ẹ̀màe, vaá tumíe múú kyáá ló. 33 Vaá tṍó e ba ni kpọ́ẹ té ló lọ̀l, bà é gbóó fẹ́ẹ, sõò à é kẽeà aa kemà ú ní ea égè taà dee.” 34 Sõò gbò nyòòne nvéeá náa beè dã́ ból ló, boo béè kọ a beè tú nú e gbò belí tõó dọ̀ gṍ vá ló.

35 Boo tṍó e Jíízọ̀s ni íná kuló Jérikò, ene kà gbálà e dẽée gímí beè di ĩ́ìtẽ́ gã́ èèlè ea géè bàn nu. 36 À gbóó bĩiná nú ea gé nááá boo béè kọ à dã́ moǹ gbò e bà gé konà tení. 37 Bà gbóó kọ́ nèe kọọ̀: “Jíízọ̀s ea dú Názarẹ̀t gé téní!” 38 À gbóó vulí kpã́ kọọ̀: “Jíízọ̀s, nvín Dévìd, iém sàn nyíe ló!” 39 Sõò gbò e ba beè di deèsĩ́ beè bèlie bel ló vaá kọ á pĩigã́, sõò a beè kilsĩ́ gè vulí kpã́ kọọ̀: “Nvín Dévìd, iém sàn nyíe ló!” 40 Tṍóá, Jíízọ̀s à gbóó elá vaá kọ bà á tú gbálàá domá. Tṍó ea ínaé ló, Jíízọ̀s à gbóó bĩinae kọọ̀: 41 “Éé ní eo gbĩ́ì kọ ḿ naa nè ni ẽ́?” À aalá nèe kọọ̀: “Neń Ea Íém, naa kọ ḿ kpáá mòn nu.” 42 Jíízọ̀s à gbóó kọ́ nèe kọọ̀: “Kpáá mòn nu. O zìgà a náa kọ ó boá.” 43 Tẽ̀ènè tṍóá, à gbóó kpáá mòn nu vaá dààmà togó gè bììàẹ́ nvée vaá lèèlà Bàrì. Tṍó e dénè gbòa mon naa vó, ba beè gbóó lèèlà nàgé Bàrì.