Tóm Gbò E Jíízọ̀s Beè Lẹ̀ẹ̀là

16 Pọ́ọ̀l beè iná Dẹ́bì vaá a beè si nágé Lístrà. À íe ene kà neǹ nyòòne nvée ea bée kọlà Tímotì ea beè di kĩá. A kà dú Júù vaá à ólò fã̀ Bàrì, sõò a tẹ̀ dú Gríìs, 2 vaá pá vígà e bà di Lístrà nè Àìkónìòm géè ló lé bel ea kilíé ló. 3 Pọ́ọ̀l beè kọ́ tẹlẹ bàlà kẽ kọ à léèmàèe kọọ̀ Tímotì á nyoonèèe. A beè gbóó túe vaá koóe boo béè pá Júù e bà di gbò kĩá, boo béè kọọ̀ dénè ọ̀và beè nyimá kọ a tẹ̀ dú Gríìs. 4 Ba beè aa bon dọ bon vaá kọ́ nè pá vígà nú e gbò e Jíízọ̀s lẹẹlà nè gbò kànen e bà di Jèrúselẹ̀m ni ténmá kọ bà á naa. 5 Mm̀ kà-kà, pá vígà e bà di gbò bõ̀ònatõ̀òa beè kilsĩ́ gè ié agẹ zìgà vaá olòó bọọ dọ ló kọ̀láá dee.

6 Ba beè tení Fríjìà nè Gàlésìà, boo béè kọọ̀ nyómá káí náa beè zìgà kọ bà á ló moǹ belá gbẹá bálásĩ́ Ésìà. 7 Tṍó e bà íná Mísìà, ba beè pììga boo gè bã Bìténìà, sõò tení dú ló nyómá káí, Jíízọ̀s náa beè sọ̀va tọ́ deè kọ bà á bã̀. 8 Vó à naa, ba beè gbóó tení Mésìà kil Tróàs. 9 Tṍó e dee ni bílá, Pọ́ọ̀l beè gbóó mòà nuù dẽe e ene kà gbálà Màsìdónìà di élaẹ́ ló ea gé baníe kọọ̀: “Dú Màsìdónìà gé nvèè bá nèi.” 10 À gé moà gé nuù dẽeá lọ̀l, e beè gbóó pììga boo gè àà kil Màsìdónìà, boo béè kọ e beè tuumá kọọ̀ Bàrì a lẹẹlàì kọ é gé vee lé kpẹ̀aá nèva.

11 Vó à naa, e beè gbóó bã mm̀ faà sĩ́ múú aa Tróàs le-le kil Sámotrìs. Sõò deé ea bẽene, e beè kil Nìápolìs. 12 Tṍó e aà kĩá, e beè kil Fílipaì ea dú boń ea di kèbá lẹ̀ẹ̀là bel pá Róm̀ vaá dú pọ̀b boǹ pá Màsìdónìà. E beè tú sìgà dee tõ̀òma boní. 13 Tṍó ea ni dú Deè Bõ̀séi, e beè gbóó aa boná kil nùgã́ múú, kĩée e beè dòòmà kọọ̀ bà ólò tõo tã̀àgã ló Bàrì, vaá dààmà togó gè ló bel nè gbò bia e ba beè di bṍóná kĩá. 14 A íe ene kà pábia ea aa boǹ Tàìàtáírà ea ólò fã̀ Bàrì, ea géè pãanée tṍ ló. A bée kọlà Lìdíà vaá à ólò oo do-doò dẽè kàn, vaá Jìhóvà* beè nvèè bá nèe kọ á palàge pãane tṍ vaá zìgà gbò nú e Pọ́ọ̀l géè kọ̀a. 15 Tṍó e pábiaí nè pá a tọ ni diia múú lọ̀l, a beè gbóó bànii kọọ̀: “Be ò ẹbvìì kọ m̀ bọ́ọ̀ló dẹ̀lẹ̀ nyíé boo nè Jìhóvà,* dui gé tõoníí ńdáà tọ.” E beè gbóó nyoonée boo béè kọọ̀ a beè kilsĩ́ gè bànii.

16 Boo tṍó e gé aà kil ketõ̀ò ge tõo tã̀àgã ló Bàrì, e beè zọ̀ ene kà gyóòlo nvín pábia nyòònà, vaá zọ ea ólò naa kọ á mòà nuù dẽe beè dìé m. À ólò naa kọọ̀ pá a tẹ̀ íe á ié gã́bug bélè lọl ló a gè kọ́ dì deèsĩ́. 17 Nvín pábiaí beè kilsĩ́ gè tó bììa nvéè Pọ́ọ̀l nè beele vaá olòó kọọ̀: “Gbòí dú gbò gyóòlo Bàrì Ea Bọọ Lọ̀l Vaá À Lee vaá bà gé kọ́ nú ea kil ló èèlè ea é náa kọ ó iei dùùà.” 18 A beè naa nuí gã́bug dee. Dee deè nvée, tṍó ea ḿ-má ló dẽè Pọ́ọ̀l, à gbóó kììa ló kẽ vaá kọ́ nè nyómáá kọọ̀: “M̀ túù boo béè Jíízọ̀s Kráìst kọọmá nè ni kọ ó ààẹ́ m.” Vaá a beè gbóó ààẹ́ m tẽ̀ènè tṍóá.

19 Tṍó e pá a tẹ̀ íe mon kọọ̀ nú ea géè naa kọ bà á ièè bélè á gé ná, bà gbóó sii Pọ́ọ̀l nè Sáílàs vaá dùl va kilma kèki ló gbò e bà gé bẹl. 20 Tṍó e bà íná ló gbò bèèla, bà gbóó kọọ̀: “Gbòí dì e bà gé palàge nvèè tã̀àgã boní. Bà dú Júù, 21 vaá bà gé vee gbò nú e log náa ténmá kọ beele é naa, boo tṍó e bà nyímá kọọ̀ beeleè pá Róm̀.” 22 Dénè gbòa beè tú súng loomá bel nè Pọ́ọ̀l nè Sáílàs, vaá tṍó e gbò bèèlaá ni baagi kọ̀là ló lọ̀l vá ló lọ̀l, bà gbóó kọ bà á kpọ́ va té ló. 23 Tṍó e ba ni nveè va gã́bug kom ló lọ̀l, bà gbóó tú va nvee tọọ̀ kpọ́gọ́lọ́ vaá kọ́ nè neǹ kùdẽe ló tọọ̀ kpọ́gọ́lọ́á kọ á palàge kù va dẽe ló. 24 Boo béè kọ bà née log naa vó, à gbóó tú va nvee kà mm̀ àn ea di ló tọọ̀ kpọ́gọ́lọ́á vaá tú ba kpóó tọ nvee dáà té iilá.

25 Tṍó ea é láá dú taa tóm dáá bílá dee, Pọ́ọ̀l nè Sáílàs géè tã̀àgã ló Bàrì vaá ọlí sọ́l lèèmà Bàrì, vaá gbò e ba beè di tọọ̀ kpọ́gọ́lọ́á géè pãané va tṍ ló. 26 Mm̀ bùló, kà agẹ bá zùgà kunukẽ̀ beè gbóó naaá, naa ní e kpò kúm tọọ̀ kpọ́gọ́lọ́á zugà. Nagé, dénè nùtọ beè gbẹá boo kùùà vaá nú e ba beè bọbmá kọ̀láá nen beè taaá. 27 Tṍó e neǹ kùdẽe ló tọọ̀ kpọ́gọ́lọ́á kẽeà vaá mòn kọọ̀ dénè nùtọọ̀ tọọ̀ kpọ́gọ́lọ́á di sèèla, à gbóó mììnà a gẹ̀ bé kọbé à fẹ́àẹ̀ a bá, boo béè kọ a beè dòòmà kọọ̀ gbò e ba beè sii nvee tọọ̀ kpọ́gọ́lọ́á a kil. 28 Sõò Pọ́ọ̀l beè gbóó vulí kpã́ kọọ̀: “Ó gá nvèà kom ló o bá, mè dénè bẹ̀ì di kĩí!” 29 A beè gbóó kọ bà á domà sã́ vaá à gbóó gbalá bã mm̀ tọá. Lóóe beè palàge kení, naa ní ea kúmí dúnú kẽ ke gbàà Pọ́ọ̀l nè Sáílàs. 30 À gbóó faalá va kilma kèdẹi vaá kọọ̀: “Pá nà tẹ̀ íe, éé ní em é íè ge naa kọbé m̀ duuà ẹ?” 31 Bà kọ́ nèe kọọ̀: “Ié zìgà mm̀ Nen Ea Íéi, ea dú Jíízọ̀s, mè olo nè pá o tọ é duuà.” 32 Tṍóá, bà gbóó ló moǹ bel Jìhóvà* nè dénè pá a tọ nè ẹ̀ẹ̀. 33 Tṍóá, a beè gbóó faalá va ààmà gé logí dẽè ba kom bílá deè deeá, vaá ẹlẹ nè dénè pá a tọ beè gbóó gbẹá boo dììa múú. 34 A beè gbóó tú va kilma a tọ gé naa gyã́á nèva. Nyíè pá a tọ nè ẹ̀ẹ̀ beè palàge ẹẹ boo béè kọ a ié zìgà mm̀ Bàrì.

35 Tṍó e dee zilà, gbò bèèlaá beè gbóó lẹ̀ẹ̀là gbò kpóó kọ bà á kọ́ nèe kọọ̀: “Sọ̀bá gbò gbálàá.” 36 Neǹ kùdẽe ló tọọ̀ kpọ́gọ́lóá beè gbóó ló bel e bá lọ́á nè Pọ́ọ̀l kọọ̀: “Gbò bèèlaá lẹẹlà gbò nen domá kọ ḿ sọ̀bá pálaa bọ̀ì. Vó à naa, dọí kèdẹi vaá ò aalíí mm̀ fẹ́ẹ́-fẹẹ̀ ló.” 37 Sõò Pọ́ọ̀l beè kọ́ nèva kọọ̀: “Ba beè kpọ́i té ló gbẹá kèsĩ́ gbò nen tṍó e bà gáà beelái bel ló, vaá tobvíi tẹlẹ tọọ̀ kpọ́gọ́lọ́, náa kal ló béè kọ è dúù Róm̀. Bà gbĩ́ gè gbóó gũá sọ̀i bá kátogóí? Ẽ́èe! Bà á dù gé tulèi ààmà.” 38 Gbò kpóóá à gbóó ló gbò belí nè gbò bèèlaá. Pọ̀ à gbóó palàge sií va tṍó e bà dã́ kọọ̀ gbò gbálàí dú Róm̀. 39 Vó à naa, bà gbóó dù gé tã̀àgã̀ va ló, vaá tṍó e ba ni túlè va lọl tọọ̀ kpọ́gọ́lọ́á, bà gbóó bàn va kọ bà á aa boná. 40 Tṍó e bà aa tọọ̀ kpọ́gọ́lọ́á, ba beè àà kil tọọ̀ Lìdíà, vaá tṍó e bà mon pá vígà, bà gbóó siè va kpóó ló vaá aa kĩá àà.