Lé Kpẹ̀a E Máátìù Beè Emí

13 Jíízọ̀s beè gbóó aa tọá deeá gé ĩìtẽ́ kpàn pène. 2 Gã́bug nen beè bõonáé ló, vó à naa, à gbóó àà gé ĩìtẽ́ mm̀ faà sĩ́ múú. Dénè gbòa à gbóó elá-èla nù gã́ múúá. 3 Tṍóá, à gbóó tú gã́bug nu dòòle ló loomá bel nè va kọọ̀: “Enè neǹ kìl ól beè àà gé fó nu. 4 Boo tṍó ea gé fó nuá, sìgà súú beè dọ gã́ èèlè, vaá gbò ńnóm à dù gé tigi. 5 Sìgà à dọ gbàà dem, kĩée e sãa á bọọgẹ̀ gè, vaá ba beè vàlẹ̀ bá sí mée, boo béè kọọ̀ sãa náa beè bọọ́ tõ̀ò. 6 Sõò tṍó e gbei mo, à gbóó taá va naa ní e bà ọọ, boo béè kọọ̀ ba lí náa beè sii kẽ. 7 Sìgà ọ̀và beè dọ gbàà té e suu di ló, vaá téá à gbóó dùm uú va bá boo. 8 Sìgà ọ̀và beè dọ boo sãa ea dú lé, vaá ba beè gbóó dààmà togó gè mumí. Sìgà beè mumí 100 tóm, sìgà à mumí 60 tóm gbò, vaá sìgà à mumí 30 tóm gbò. 9 Neń ea íe tṍ á dã̀.”

10 Sõò pá a gbò nyòòne nvée beè dù gé bĩináe kọọ̀: “Éé ní ea náa vaá ò tú nu dòòle ló loomá bel nè va ẹ́?” 11 À aalá nè va kọọ̀: “Bàrì a náa kọ boolo ó dãi ból ló nuù ke gũ̀a ea di káí ea kil ló Boǹ Ménéá, sõò à gáà naa kọ baala á dã́ ból ló. 12 Kọ̀láá neń ea íe, bà é kpáá nèe gã́bug naa ní ea é bọọ́ tõ̀ò. Sõò kọ̀láá neń e bè náa íe, bà é tú bã̀àna ní ea beè ié lọ̀líé bá. 13 Níà nú ea náa vaá m̀ tú nu dòòle ló loomá bel nè va ẹ́. Boo béè kọọ̀ kọbèè bà gé ẹb nu, bà náa mon, vaá kọbèè bà gé dã́ nu, bà náa tavẹ àbèè ge dã́ ból ló kà ea di m. 14 Kọ́ọ̀ bùlà Bàrì Àìzáíà ḿḿ-má kìlmà vá ló. A beè kọọ̀: ‘Ò é dã́i nu, sõò nóo é dã́i ból ló kà ea di m, vaá ò é ẹbvii, sõò nóo é monii. 15 Boo béè kọọ̀ nyíè gbòí a agà belí dem. Bà dã́ nu, sõò bà náa lábví láb nyòòmà. Bà bii dẽé va vaá ká tṍ va kọbé bà náa mon tọ́ọ̀ nu àbèè ge dã́ nu. Bà náa vó kọbé bà náa dã́ kà ea di m, vaá òòa kẽ dúm ló naa ní em é bó va.’

16 “Náa kal ló béè vó, ẹ́ẹ́-ẹẹ̀ nyíe á di ló boolo, boo béè kọọ̀ bọọ dẽe mon nu vaá bọọ tṍ à dã́ nu. 17 M̀ lóò kà-kà bel nèi kọọ̀, a beè tàn gã́bug gbò kọ́ọ̀ bùlà Bàrì nè gbò lé lab dògò ge mòn gbò nú e boolo gé moniií, sõò bà náa beè mòn, nè ge dã́ gbò nú e boolo gé dã́ií, sõò bà náa beè dã̀.

18 “Gbóó pãanei tṍ ló bààtẽ́ ea kil ló nu dòòle ló gbálà ea géè fó nuá. 19 Kọ̀láá neń ea dã́ kpẹ̀a ea kil ló Boǹ Méné Bàrì vaá náa dã́ ból ló, pọ́lọ́ nená ólò gbóó dù gé tú bel ea beè dã̀a lọ̀líé nyíe. Níà nú ea nááá ló gbò súú ea beè dọ gã́ èèlèa ẹ. 20 Ní ea dọ́ gbàà demá bélí neń ea dã́ moǹ belá vaá gbẹá boo tú ẹ́ẹ́-ẹẹ̀ nyíe tuumá. 21 A beè dùm pọ́ì ńkem̀ tṍó, sõò a lí náa sii kúm kẽ, vó à naa, tṍó ea téní bá tã̀àgã̀ àbèè bíígá ló boo béè moǹ belá, à gbóó dọ̀. 22 Sõò gbò ní ea dọ́ gbàà té e suu di lóá bélí neń ea dã́ moǹ belá, sõò náa múmí ból súú, boo béè kọọ̀ tã̀àgã̀ bùlà ea di mm̀ nakà bàlà booí* nè kẹ̀lẹ̀ ea di ló gè gbó gyọ́ gyẽeme moǹ belá gbẹẹẹ́ m. 23 Gbò ní ea dọ́ boo sãa ea dú léá bélí neń ea dã́ moǹ belá, vaá dã́ ból ló kà ea di m. À ólò palàge mumí ból súú. Sìgà ólò mumí 100 tóm, sìgà ólò mumí 60 tóm gbò, vaá sìgà múmí 30 tóm gbò.”

24 A beè nootẽ́ dõona kà nu dòòle ló nè va kọọ̀: “Boǹ Méné Bàrì di belí neń ea fó kpá kyàlà* mm̀ a ól. 25 Tṍó e gbò nen di dáa, a neǹ ọ́b beè sì gé fó kpá kyàlà kpẽ̀è* gbàà kà kpá kyàlàa,* vaá à gbóó àà. 26 Tṍó e pálaa kà ni bọọ vaá èèlà zágá, ba beè gbóó nyimá kele ea di zẹ̀ẹ̀. 27 Gbò gyóòlo tẹ̀ íè ólá beè gbóó dù gé bĩináe kọọ̀: ‘Tẹ́ẹ̀, é kọọ̀ níì kà kpá kyàlà ní eo beè fó mm̀ o ólé nì? Éé ní ea náa vaá kpá kyàlà kpẽ̀è à di gbàà ẹ?’ 28 À gbóó kọ́ nè va kọọ̀, ‘Neǹ ọ́b ní ea náa nuí ẽ́.’ Pá a gyóòlo à bĩináe kọọ̀, ‘É sì gé bù lọl gbàà?’ 29 À aalá nè va kọọ̀, ‘Aalíí ló, boo béè kọọ̀ ò é láá dií boo gè buulai kpá kyàlà kpẽ̀èá vaá ò buulai kà kpá kyàlà. 30 Sọi bá pálaa kà á dùm dọ̀ọ̀mà tṍó gè fùl kpá kyàlà.* Tṍóá, m̀ é gbóó kọ́ nè gbò e bà é ful kọọ̀: Zẹ́ẹ́ kpọi kpá kyàlà kpẽ̀è bõonei ló kọbé ò kpái sã́ ló, besĩ́ ò kálá fulii kà kpá kyàlà sẹlẹí dógo.’”

31 A beè nootẽ́ dõona kà nu dòòle ló nè va kọọ̀: “Boǹ Méné Bàrì dì belí súú móstàd e ene kà gbálà tú vaá fó mm̀ a ól. 32 Mm̀ kà-kà, níí ní ea dú kà ńdígílí gbàà dénè súú té ea dì e, sõò tṍó ea ni bọọ, à ólò dú zivè té vaá èl té dénè sọ́gọ́ nu e bà fó kè ól, naa ní e gbò ńnóm pẹ̀ẹ̀ ólò gbóó tõó boo gbò a gbónó.”

33 A beè nootẽ́ dõona kà nu dòòle ló nè va kọọ̀: “Boǹ Méné Bàrì dì belí nú ea ólò gbuuve fétúlú e ene kà ńnváá tú nvee gbàà gã́bug fàlávà vaá gbóó feví. À gbóó aa ló dọ̀ọ̀mà tṍó ea gbuuve zivèkà fàlávàa.”

34 Jíízọ̀s beè ló dénè belí nè va tení dú ló nu dòòle ló. Mm̀ kà-kà, náa ólò ló tọ́ọ̀ kà bel nè va e náa é tú nu dòòle ló loomá, 35 kọbé à ḿm̀-mè bel e Bàrì beè kọ́ tenmá gã́ neǹ kọ́ọ̀ bùlà Bàrì kọọ̀: “M̀ é tú nu dòòle ló loomá bel nè va. M̀ é kọ́ tẹlẹ bàlà kẽ gbò nú ea beè di ke gũ̀a lọ̀l gé dààà togó.”

36 Tṍó ea ni sọbá gbòa kọ bà á àà, à gbóó àà kil tọ. Gbò e bà ólò nyoonée nvée beè gbóó dúé ló gé kọ́ nèe kọọ̀: “Baatẽ́ nèi nú e nu dòòle ló ea kil ló kpá kyàlà kpẽ̀è e bà fó ólá tõó dọ̀.” 37 À aalá nè va kọọ̀: “Neń ea fó kpá kyàlàa níà Sã́áná nená. 38 Bàlà ólá tõó dọ̀ bàlà booí. Kpá kyàlàa tõó dọ̀ gbò nvín Boǹ Méné, sõò kpá kyàlà kpẽ̀èa tõó dọ̀ gbò nvín pọ́lọ́ nená. 39 Pọ́lọ́ Nyómá ní ea dú neǹ ọ́b ea beè fó nuá ẽ́. Tṍó gè fùl kpá kyàlàa dú kùbmà nvéè nakà bàlà booí, vaá gbò ge bùùlà nuá níà gbò nyómá tóm. 40 Vó à naa, dì belí bé e ba beè bõonè ló kpá kyàlà kpẽ̀è vaá kpá sã́ ló naaá, níà bé ea é meà naa kùbmà nvéè bàlà booí é. 41 Sã́áná nená é lẹẹlà pá a gbò nyómá tóm, vaá bà é tú kọ̀láá kà nú ea náa kọ nen á sí pọ́lọ́ nè gbò sìì pọ́lọ́ tóm lọl mm̀ a Boǹ Méné. 42 Bà é tóbví va tẹlẹ dáà sã́. Kĩá ní e bà é tõo tò vaá taa dáa ẹ́. 43 Tṍóá, gbò lé lab dògò é gbóó mò belí nàànì gbẹá mm̀ Boǹ Méné ba Tẹ̀. Neń ea íe tṍ á dã̀.

44 “Boǹ Méné Bàrì dì belí gyọ́ e ba beè li boo bàlà ól e ene kà gbálà mon vaá gbóó kpáá gõ̀, vaá boo béè ẹ́ẹ́-ẹẹ̀ nyíe ea íe, à gbóó àà gé oo kọ̀láá kà nú ea íe vaá zalí bàlà ólá.

45 “Nagé, Boǹ Méné Bàrì dì belí neǹ ùlà ki* ea gé gbĩ́ ból lọ́ọ̀ ea palàge dú lé. 46 Tṍó ea mon ene kà ból lọ́ọ̀ ea palàge sí kpègè, à gbóó gbẹá boo àà gé oo kọ̀láá kà nú ea íe vaá zalí.

47 “Nagé, Boǹ Méné Bàrì dì belí gbṍò e bà tẹ́lẹ pène, vaá kọ̀láá íb gyã́à à bã dẽe. 48 Tṍó e gyã́à ni ḿ-má dẽe, bà gbóó dùùlà tẹlẹ boo kpò, vaá ĩìtẽ́ kẽ sà gbó ńlé tẹlẹ mm̀ kpúgu, vaá tobví gbò ńpọ́lọ́ gbẹẹ. 49 Níà bé ea é meà naá kùbmà nvéè bàlà booí é. Gbò nyómá tóm é aà gé sà gbò pọ́lọ́ lab dògò lọl gbàà gbò lé lab dògò, 50 vaá bà é tóbví gbò pọ́lọ́ lab dògò tẹlẹ dáà sã́. Kĩá ní e bà é tõo tò vaá taa dáa ẹ́.

51 A beè gbóó bĩiná va kọọ̀: “Ò dã́ì gé ból ló gbò nú em géè kọ̀ á?” Bà aalá naa: “Ẽei.” 52 À gbóó kọ́ nè va kọọ̀: “Tã́gíní bé eo ni dã́i ból lóá, kọ̀láá kà neǹ dòbá e ba beè noomàe nú ea kil ló Boǹ Méné Bàrì dì belí neń ea dú tẹ̀ boo tọ, ea tú kọ̀láá kà ãa nu nè nómá nu ea di mm̀ a kpó gyọ́ tẹlẹ bàlà kẽ.”

53 Tṍó e Jíízọ̀s ni tú gbò nu dòòle lóí loomá bel nè va lọ̀l, à gbóó aa kĩá àà. 54 Tṍó ea íná boń e ẹlẹ dú, à gbóó dààmà togó gè noomà nuù gbòa gbẹá mm̀ ba tọ bõ̀ònaló fã̀. A beè palàge bọọ́ vá ló naa ní e bà kọ́ọ̀: “Ãàe ní e gbálàí beè ié nakà nyìmànù nè kpóó gè siimá tóm dũ̀ùnèí lọ̀l ẹ? 55 É kọọ̀ níí níì nvín neǹ káà nuá nì? É kọọ̀ a kà náa kọlà Mérì, vaá pá a vígà págbálà à kọ̀là Jém̀z, Jósẹ̀f, Sáímòn, nè Júdàs? 56 É kọọ̀ pá a vígà pábia á géí ló boní? Ãàe ní e gbálàí beè ié dénè gbò nyìmànù nè kpóóí lọ̀l ẹ?” 57 Vó beè naa kọ bà á gá iée zìgà m. Sõò Jíízọ̀s à gbóó kọ́ nè va kọọ̀: “Bà ólò nvèè ka ló neǹ kọ́ọ̀ bùlà Bàrì gbẹá kọ̀láá kĩée ea íná, sõò pá a bon nè pá a tọ náa ólò nvèèe ka ló.” 58 Náa beè sí gã́bug tóm dũ̀ùnè gbẹá kĩá boo béè kọọ̀ bà náa beè iée zìgà m.