Kpá E Pọ́ọ̀l Beè Lẹ̀ẹ̀là Má Pá Róm̀
4 Be à dì naa vó, éé ní eé láá kọ à dú bélè e bẹẹ nómá tẹ̀ Ébràhám̀ beè ié é? 2 Dì belí nu dòòmà bá, be Bàrì beè tenmà Ébràhám̀ kọ à dú neǹ lé lab dògò boo béè gbò tóm ea sí, à gáẹ̀ beè gaavá, sõò náa gáẹ̀ beè gaavá boo béè Bàrì. 3 Éé ní e Kpá Káí kọ́ ẹ́? À kọ́ọ̀, “Ébràhám̀ beè ié zìgà mm̀ Jìhóvà,* vaá Bàrì beè ẹ̀bvie naamá neǹ lé lab dògò.” 4 Bà náa ólò ẹ̀b kpègè e bà kpẽ́ nè nen ea beè sí tóm naamá sàn nyíe e bà íeé ló, sõò bà ólò ẹ̀b naamá kom e ba beè siié bá. 5 Boo dõona bá, nen e bè náa sí tóm vaá à ié zìgà mm̀ Bàrì ea ólò ẹ̀b neǹ pọ́lọ́ lab dògò naamá neǹ lé lab dògò, Bàrì é ténmàe naamá neǹ lé lab dògò boo béè zìgà ea íe. 6 Dévìd beè kọ nágé nú ea kil ló ẹ́ẹ́-ẹẹ̀ nyíe e nen ólò ié tṍó e Bàrì ẹb kọ à dú neǹ lé lab dògò e bè náa dẹẹa boo tóm ea sí, kọọ̀: 7 “Nyíè gbò e ba beè dọ̀ log vaá bà ia ló nè va á ẹẹ, vaá nyíè gbò e bà ia ló ba náàkyọ̀ nè va á ẹẹ. 8 Nyíè nen e Jìhóvà* náa bugi a pọ́lọ́ á ẹẹ.”
9 É kọọ̀ áá gbò e ba beè kòòà ní e bà ólò ié ẹ́ẹ́-ẹẹ̀ nyíeí ẽ́, sẹ̀ gbò e bà gáà kòòà ólò ié nágé é? Boo béè kọ è kọ́ọ̀: “Zìgà e Ébràhám̀ beè ié beè naa kọọ̀ Bàrì á ẹ̀bvie naamá neǹ lé lab dògò.” 10 Mó tṍó ní e Bàrì beè ẹ̀b kọ à dú neǹ lé lab dògò e? Tṍó ea ni kooà, sẹ̀ tṍó ea gáà kòòà ẹ? Níà tṍó ea gáà beè kòòà. 11 Bàrì beè gbóó kọ á kòòà naamá kpíi ea zógè kọọ̀ a dú neǹ lé lab dògò tení dú ló zìgà ea beè ié tṍó ea gáà beè kòòà, naa ní ea é láá dú tẹ̀ dénè gbò e bà íe zìgà tṍó e bà gáà kòòà, kọbé Bàrì láá ẹ̀b va naamá gbò lé lab dògò, 12 kọbé à láá du nágé tẹ̀ gbò pá nvín e ba beè kòòà. Náa é dú tẹ̀ áá gbò e ba beè kòòà, sõò à é dú nágé tẹ̀ gbò e bà íe íb zìgà e bẹẹ tẹ̀ Ébràhám̀ beè ié tṍó ea gáà beè kòòàa.
13 Boo béè kọ níì tení dú ló log ní e Bàrì beè zìgà kọọ̀ à é túè ene kà bàlà boo neè Ébràhám̀ nè pá a nvíné nì, sõò aẹ̀ beè boo béè lé lab dògò e bà íe tení dú ló ba zìgà. 14 Boo béè kọọ̀ beè gbò e bà tõó boo log é íe nú e ba beè zìgàa, zìgà náa dọ nà tọ́ọ̀ kà bélè vaá zìgànùa dú kóló kẽ. 15 Kà-kà bel ea dì dú gè kọọ̀, Log ólò màn kpọ̀té ea aa bá Bàrì, sõò kĩée e log á gé, nen náa ólò dọ̀ log.
16 Níà nú ea naa èé íe nú e Bàrì beè zìgà nèi tení dú ló zìgà e íèe, boo béè kọ níà sàn nyíe e Bàrì íeí ló kọbé dénè pá a nvín láá àgala boo nú ea beè zìgà nè vaá. Níì áá gbò e bà tõó boo Log ní e bà é íeé nì, sõò gbò e bà íe íb zìgà Ébràhám̀, ea dú tẹ̀ dénè bẹ̀ì é íe nagé. 17 (Níí beè naaá dì belí bé e ba beè emí naaá kọọ̀: “Nda beè íni bá ló naamá tẹ̀ gã́bug dó.”) Ébràhám̀ beè ié zìgàí gbẹá kèsĩ́ Bàrì, ea dú nen ea ólò naa kọọ̀ gbò e ba beè ù á kpáá tõó dùm, vaá à ólò ló bel kilma ló nú e bè á gé belí kọ à dì. 18 Náa kal ló béè kọọ̀ náa beè ié nú ea é élá boo ié ból dẽesĩ́, ból dẽesĩ́ beè naa kọ á ié zìgà kọọ̀ à é dúè tẹ̀ gã́bug dó, dì belí bé e Bàrì beè zìgà nèe naaá kọọ̀: “Níà bé e gbò nvín ea aà ní m é di naa ẽ́.” 19 Vaá náa kal ló béè kọọ̀ lóó a zìgà náa beè ọọ, a beè ẹ̀b a nom̀ kpáló belí kọ a ú (boo béè kọọ̀ tṍóá, à é gé dú 100 gbáá), vaá Sérà a ána naa ní e náa é láá màn nà nvín. 20 A beè ié zìgà vaá náa beè ié bàà-bàà bùlà boo béè nú e Bàrì beè zìgà nèe. Boo béè vó, a zìgà beè agẹ́lẹ́ẹ ló, vaá naa kọ á lèèlà Bàrì, 21 boo béè kọ a beè palàge àgala boo kọọ̀ Bàrì é láá naa nú ea beè zìgà. 22 Vó à naa, “Bàrì beè ẹ̀bvie naamá neǹ lé lab dògò.”
23 Sõò bà náa beè emí moǹ bel ea kọ́ọ̀, “Bàrì beè ẹ̀bvie naamá neǹ lé lab dògò” boo béè áá ẹlẹ. 24 Ba beè emí nágé boo béè beele, tã́gíní bé ea é ẹb nagé beele naamá gbò lé lab dògòa, boo béè kọ è dẹlẹ̀ nyíé boo Ẹlẹ ea dú nen ea beè kẽee Jíízọ̀s, ea dú Nen Ea Íéi lọl kemà ú. 25 Bàrì beè sọ̀tọ́ deè kọ bà á fẹ́ẹ boo béè bẹẹ pọ́lọ́, vaá a beè kẽée lọl kemà ú kọbé à ténmài naamá gbò lé lab dògò.