Lé Kpẹ̀a E Lúùk Beè Emí

16 Tṍóá, à gbóó kọ nágé nè gbò e bà ólò nyoonée nvée kọọ̀: “À íe ene neǹ méné e ba beè dúé ló gé kọ́ nèe kọọ̀ a gyóòlo tú pọ́lọ́ bá sẹ̀ẹ̀mà a gyọ́. 2 À gbóó kolíe vaá kọ́ nèe kọọ̀, ‘Éé ní em dã́à ea kil ní lóí é? Domà kpá ea kọ́ bé eo beè tú nà kpègè siimá tóm naa, boo béè kọọ̀ nóo é láá ẹ̀b nà nú ea kil ló nà tọ.’ 3 Tṍóá, gyóòloá à gbóó kọ́ nèà a bá kọọ̀, ‘Éé ní em é náa ẽ́, boo béè kọọ̀ ńdáà tẹ̀ tọ é gé kpóm? Ním íè kói gè ùlmà kẽ vaá kẹ́ẹ síím ló gè bàn nu. 4 Ẽ̀hẽè. M̀ nyímà nú em é náa, kọbé tṍó ea ni kpóm lọl ló tóm, gbò nen láá túm nvee tọ.’ 5 À gbóó kolí gbò e ba beè sii kom bá a tẹ̀ tọ, vaá bĩiná túá nen kọọ̀, ‘Éé ní eo beè sii bá nà tẹ̀ tọ ẹ́?’ 6 À aalá kọọ̀, ‘2,200 lítà* nóò ólìv.’ À kọ́ nèe kọọ̀, ‘Tú o kpá, ĩitẽ́ kẽ, vaá ò valẹ̀ bá emí dẽe kọọ̀ 1,100.’ 7 À bĩiná dõona neǹ kọọ̀, ‘Éé ní e olo beè sii é?’ À aalá nèe kọọ̀, ‘Enè gbò bẹ̀lẹ̀* wíìt.’ À kọ́ nèe kọọ̀, ‘Tú o kpá vaá ò émí dẽe kọọ̀ 80.’ 8 A tẹ̀ tọ à gbóó lèèlà gyóòloá, níì boo béè kọọ̀ à náa nú ea lelà nì, sõò boo béè kọ à lábví láb e nyìmànù di m. Boo béè kọọ̀ gbò e bà di nakà kúúlíi* ólò palàge nyimá nu tṍó e bà gé zọ gbò e bà bélí baala naaá nu elmà bé e gbò nvín Bàrì ólò naa naa.

9 “M̀ kọ́ nàgé nèi kọọ̀: Tui gyọ́ bàlà booí bãamai kóò, kọbé tṍó e gyọ́á náa é di nà, bà láá túi nvee kĩée e gbò nen é di dọ̀ọ̀mà dè-dè. 10 Neń ea bọ́ló dẹ̀lẹ̀ nyíé boo mm̀ ńkem̀ nu é bọ́ nágé ló dẹ̀lẹ̀ nyíé boo mm̀ nú ea bọọ́ tõ̀ò, vaá neń e bè náa bọ́ló dẹ̀lẹ̀ nyíé boo mm̀ ńkem̀ nu náa é bọ́ nágé ló dẹ̀lẹ̀ nyíé boo mm̀ nú ea bọọ́ tõ̀ò. 11 Vó à naa, be nóo bọ́ì ló dẹ̀lẹ̀ nyíé boo kilmaí ló gyọ́ eo gbóì mm̀ pọ́lọ́ bàlà booí, tọ́ọ̀ nen náa é zigà ge tú kàà gyọ́ nèi. 12 Vaá be nóo bọ́ì ló dẹ̀lẹ̀ nyíé boo kilmaí ló gyọ́ dõona nèn, tọ́ọ̀ nen náa é tú gyọ́ ea kuu boolo nèi. 13 Tọ́ọ̀ nen náa é láá dú gyóòlo bàà kà tẹ̀ tọ, boo béè kọọ̀ à é vulè enè ọ̀và vaá à ọ́bví na nená, àbèè kọọ̀ à é dává gbẹá ló enè ọ̀và vaá à ẹb na nená tẹlẹ kẽ. Nóo é láá dui gyóòlo Bàrì nè Gyọ́ tẽ̀ènè tṍó.”

14 Tṍóá, pá Fárìsíì e bà dú gbò e bà ólò vùlè kpègè géè pãanée tṍ ló. Bà gbóó gbẽená sĩ́ ẹ̀bmàe. 15 À gbóó kọ́ nè va kọọ̀: “Boolo ólò naanii kọọ̀ gbò nen á ẹ̀bvii kọ ò dúì gbò lé lab dògò, sõò Bàrì nyímá nú ea dìí nyíe. Nú e gbò nen ẹb kọọ̀ ka di ló dú nuù zílá ló kèsĩ́ Bàrì.

16 “Gbò nen géè kọ́ nú ea kil ló Logá nè nú e Gbò Kọ́ọ̀ Bùlà Bàrì beè kọ̀ dọ̀ọ̀mà tṍó e Jṍòn dú. Lọl tṍóá ààmà, ba beè gbóó vee lé kpẹ̀a ea kil ló Boǹ Méné Bàrì vaá kọ̀láá íb nen gé síá kpóó ló kọbé bà láá bã m. 17 Mm̀ kà-kà, à é válí kọọ̀ káála nè kunukẽ̀ á tení tà èlmà ge kọọ̀ enè sã́gã́ ea dú ló ene kà súú kpá e ba beè emí mm̀ Logá náa é nááá.

18 “Kọ̀láá neń ea dõogẽ kpó a va lọa ló vaá ilí dõona nèn, kúná gã̀, vaá kọ̀láá neń ea ílí pábia e dóm beè kpó lọa ló, kúná gã̀.

19 “À íe enè neǹ méné ea ólò nvèà do-doò dẽè kọ̀là ló nè kọ̀là ló e bà tú báà kàn ea palàge dú lé naamá. À ólò tõó kĩée ea palàge dú lé vaá dé zààvà kọ̀láá dee. 20 Sõò bà ólò tú ene kà gbálà ea kọlà Lázarọ̀s ea ólò bàn nu, e kom di ḿ-maé kpáló sẹlẹ́ ló a gbànsĩ́, 21 vaá à ólò tànie gè dé nú ea aa boo tébòl neǹ ménéí dọ kẽ, vaá kọbèè gbò gbógó ólò dù gé dá dẽè a kom. 22 Tṍó e tṍó téní, neń ea ólò bàn nuá beè gbóó ù, vaá gbò nyómá tóm à gbóó dàlàẹ kilma ló Ébràhám̀.*

“Neǹ ménéá beè u nágé vaá bà lìe. 23 À gbóó gbẹá mm̀ Bànà Ú* ea gé mon tã̀àgã̀a dàlà dẽée ẹ̀bmà gbàn dee, vaá mòn Ébràhám̀ ea di kà kpã́á nè Lázarọ̀s ea dìé kpàn.* 24 À gbóó kolíe kọọ̀: ‘Ńdáà tẹ̀ Ébràhám̀, iém sàn nyíe ló, vaá ò lẹẹlà Lázarọ̀s kọ á tú nvéé bá diilé mm̀ múú tẹlẹ̀ḿ boo dém, boo béè kọ m̀ gé mon tã̀àgã̀ gbẹá dáà sã́í.’ 25 Sõò Ébràhám̀ à gbóó kọ́ nèe kọọ̀, ‘Nà nvín, kẽ̀èa boo kọọ̀ o beè dé gã́bug kpéè tṍó eo beè di dùm, sõò Lázarọ̀s géè mòn tã̀àgã̀. Kátogóí, bà gé náa kọọ̀ lóóe á dĩ̀ìnà gbẹá kĩí, sõò olo gé mon tã̀àgã̀. 26 Vaá maaná lọl ló dénè gbò nuí, à íe kà gbààsĩ́ bànà e ba beè sẹlẹ́í zẹ̀ẹ̀ kọbé gbò nen náa láá aa kĩí iná ló boolo, àbèè ge aa kĩá dú ló beelé kĩí.’ 27 Tṍóá, à gbóó kọọ̀, ‘Be à meà naa vó e tẹ̀, lẹ̀ẹ̀làẹ siimá tọọ̀ ńdáà tẹ̀, 28 boo béè kọọ̀ m̀ íè vòò kà vígà págbálà, vaá á palàge kọ́ kpẹ̀a nè va kọbé bà náa dú ketõ̀ò bẹẹ ló e nda dìí.’ 29 Sõò Ébràhám̀ à kọ́ nèe kọọ̀, ‘Mózìs nè Gbò Kọ́ọ̀ Bùlà Bàrì dì vá ló. Bà á pãané va tṍ ló.’ 30 Tṍóá, à gbóó kọọ̀, ‘Ẽ́èe, níì vó nì, e ńdáà tẹ̀ Ébràhám̀, sõò beè neń ea kẽeà aa kemà ú sí vá ló, bà é ọ́gá.’ 31 À kọ́ nèe kọọ̀, ‘Be bà náa gbantṍ ló Mózìs nè Gbò Kọ́ọ̀ Bùlà Bàrì, bà náa é pãane nagé tṍ ló neń ea kẽeà aa kemà ú.’”