Lé Kpẹ̀a E Máàk Beè Emí
10 À gbóó aa kĩá kil bálásĩ́ Jùdíà ea di na sábá Jọ́dàna, vaá gbò nen beè kpáá kõ̀òà m-máé ló. A beè gbóó dààmà togó gè noomà va nu dì belí bé ea ólò naa naaá. 2 Pá Fárìsíì beè gbóó dúé ló boo béè ge ẹ̀bmàe vaá bĩináe be log ténmá kọọ̀ págbálà é láá zaali ba ílà dóm nè va. 3 À bĩiná va kọọ̀: “Éé ní e Log Mózìs kọ́ ó naanii ẽ́?” 4 Bà aalá kọọ̀: “Log Mózìs beè tenmá kọọ̀ nen é láá emí kpá zààlà dóm nè va nè a va, vaá kọ á àà.” 5 Jíízọ̀s à kọ́ nè va kọọ̀: “Agẹ nyíe eo íèì ní ea beè naa kọọ̀ Mózìs á nèi nakà logí é. 6 Sõò, lọl dààmà togó tṍó e Bàrì beè dèm nen, ‘A beè dèm va naamá págbálà nè pábia. 7 Boo béè vó, págbálà é aa ló a tẹ̀ nè a kà, 8 vaá pálaa ọ̀và é gbóó dú tẽ̀ènè nen.’ Bà náa kpáá duná bàà nen, sõò tẽ̀ènè nen. 9 Boo béè vó, tọ́ọ̀ nen á gá zaali nú e Bàrì ni gbá lọ̀l.” 10 Tṍó e ba beè gbá di tọ, pá a gbò nyòòne nvée beè gbóó dààmà togó gè bĩináe bíb ea kil ló belí. 11 À gbóó kọ́ nè va kọọ̀: “Kọ̀láá neń ea kpó a va lọa ló vaá ilí dõona kà va, kúná gã̀ gbẹẹ a va. 12 Vaá pábia ea kpó a dóm lọa ló vaá iá dõona nèn, kúná gã̀.”
13 Gbò nen beè gbóó tú gbò pá nvín domáé ló kọ á daá va bá ló, sõò pá a gbò nyòòne nvée beè bèl va bel ló. 14 Nyíè Jíízọ̀s beè palàge bììlà tṍó ea mon naa vó, naa ní ea kọ́ nè va kọọ̀: “Sọi bá gbò pá nvín kọ bà á dúm ló. Ó gá kpegíí va, boo béè kọọ̀ Boǹ Méné Bàrì dì nè gbò e bà bélí gbò pá nvíní. 15 M̀ lóò kà-kà bel nèi kọọ̀, kọ̀láá neń e bè náa tú Boǹ Méné Bàrì belí pá nvín náa é bã́ m.” 16 À gbóó dàlà gbò pá nvíná sẹ̀ẹ̀a bá, dẹlẹ́ va bá ból, vaá tãanè va dee bá.
17 Boo tṍó ea di èèlè ea gé aà, ene kà gbálà beè teelá nyoonée gé kumíe dúnú ke gbàà, vaá bĩináe kọọ̀: “Lé Neǹ Dòbá, éé ní em é íè ge naa kọbé m̀ íe dùm e bè náa tá ẹ́?” 18 Jíízọ̀s à kọ́ nèe kọọ̀: “Éé ní ea náa ò kolím lé nen ẽ́? Tọ́ọ̀ nen náa dú lé, daalá lọl ló Bàrì. 19 Ò nyímà gbò log ea kọ́ọ̀: ‘Ó gá fẹ́ nen, ó gá gbẹẹ o va àbèè o dóm kuná gã̀, ó gá zìb nu, ó gá elá kyáá neǹ ditõ̀ò, ó gá kẹlẹ nen tú nu lọ̀líé bá, nvèè ka ló o tẹ̀ nè o kà.’” 20 Gbálàa à kọ́ nèe kọọ̀: “Neǹ Dòbá, m beè sẹlẹ dénè gbò logí lọl tṍó em beè di-dí pá nvín.” 21 Boo béè kọ Jíízọ̀s vulèe, à gbóó ẹ̀bvie vaá kọ́ nèe kọọ̀, “À íe nú eo gáà naa. Àà gé oo o gyọ́ vaá ò tú kpègè ea dú ló nè gbò tãa, mè ò é íe gyọ́ mm̀ káála vaá ò gbóó dù gé nyooném nvée.” 22 Sõò nyíée beè biila ló ààlaá naa ní ea tú bììla nyíe ààmà, boo béè kọ a beè ié gã́bug gyọ́.
23 Tṍó e Jíízọ̀s tẽ́éá dẽe ló lọ̀l, à gbóó kọ́ nè pá a gbò nyòòne nvée kọọ̀: “Ẹbvii bé ea é tavala ló gbò e bà íe kpègè kọ bà á bã mm̀ Boǹ Méné Bàrì naaà!” 24 Sõò belí beè palàge bọọ́ ló pá a gbò nyòòne nvée. Jíízọ̀s à gbóó kọ́ nè va kọọ̀: “Gbò pá nvín, ẹbvii bé ea é tavàlà ge bã mm̀ Boǹ Méné Bàrì naaà! 25 À é válí kọọ̀ kámeẹ̀l á tení deè ńgà gbógmà nu èlmà ge kọ neǹ méné á bã mm̀ Boǹ Méné Bàrì.” 26 A beè kpáá palàge bọọ́ vá ló naa ní e bà bĩ́ínáe kọọ̀: “Mée ní ea é láá dùùà ẹ?” 27 Jíízọ̀s à gbóó ẹ̀b va vaá kọ́ nè va kọọ̀: “Kilma kĩée e nen dì, náa é láá naaá, sõò dénè nu ólò valí ló Bàrì.” 28 Pítà à gbóó kọ́ nèe kọọ̀: “Ẹ̀b! Beele e sọbá dénè nu vaá nyooné ni nvée.” 29 Jíízọ̀s à aalá nè va kọọ̀: “M̀ lóò kà-kà bel nèi kọọ̀, kọ̀láá neń ea sọbá tọ àbèè vígà págbálà àbèè vígà pábia àbèè kà àbèè tẹ̀ àbèè gbò pá nvín àbèè bàlà ól boo béè nda nè boo béè lé kpẹ̀aí, 30 é íe 100 tóm nú ea sọbá gbẹẹ́ kẽá kátogóí. À é íe tọ, gbò vígà págbálà, gbò vígà pábia, kà, gbò pá nvín, nè bàlà ól, bií ló bíígá ló, vaá mm̀ ãa bàlà boo ea gé dú, à é íe dùm e bè náa tá. 31 Sõò gã́bug gbò e bà di deèsĩ́ é beè di deè nvée, vaá gbò e bà di deè nvée é beè di deèsĩ́.”
32 Boo tṍó e ba di èèlè e bà gé aà kil Jèrúselẹ̀m, Jíízọ̀s beè gyà vá deèsĩ́, vaá a beè bọọ́ vá ló, sõò pọ̀ beè sii gbò e bà géè dú vá nvée. A beè kpáá kolí Òb Nè Bàà Nená kilma kpògà kẽ vaá kọ́ gbò nú ea é gé naaá ló ẹlẹ nè va kọọ̀: 33 “Ẹbvii! È gé aà kil Jèrúselẹ̀m vaá bà é tú Sã́áná nená nvee bá gbò togó vààla gyọ́ọ nè gbò émì kpá. Bà é béélá ú nèe vaá túe nvee bá gbò e bè níì pá Júù nì. 34 Bà é nveemàe lẹ́, tumíe múú kyáá ló, kpọ́ẹ té ló, vaá fẹ́ẹ. Sõò à é kẽeà aa kemà ú ní ea égè taà dee.”
35 Jém̀z nè Jṍòn e bà dú pá nvín Zẹ́bidì beè gbóó ináé ló vaá kọ́ nèe kọọ̀: “Neǹ Dòbá, è gbĩ́ì kọ ó naa kọ̀láá kà nu e bĩ́ìnà ní bá nèi.” 36 À gbóó bĩiná va kọọ̀: “Éé ní eo gbĩ́ì kọ ḿ naa nèi ẽ́?” 37 Bà aalá nèe kọọ̀: “Zìgà nèi kọọ̀ enè nen é ĩ́ìni tẽ́ boo bá lè vaá enè nen ĩ́ìni tẽ́ boo bá kie gbẹá mm̀ o Boǹ Méné.” 38 Jíízọ̀s à kọ́ nè va kọọ̀: “Nóo nyímàì nú eo gé bĩ́inai. É kọ ò é láá õi nú em gé ṍ, sẹ̀ ò é láá diiaí múú e nda gé diià?” 39 Bà aalá nèe kọọ̀: “Èé láá õ̀.” Tṍóá, Jíízọ̀s à gbóó kọ́ nè va kọọ̀: “Ò é ṍi nú em gé ṍ vaá ò é diiaí múú em gé diià. 40 Náa kuu bá nda gè sà neń ea é ĩ́ìm tẽ́ boo bá lè àbèè boo bá kie, sõò à dì nè gbò e Bàrì beè kpoogè dee ló sẹ̀ẹ̀.”
41 Tṍó e òb nen ea sígáá dã́ naa vó, bà gbóó palàge nvèè súng ló Jém̀z nè Jṍòn. 42 Sõò Jíízọ̀s à gbóó kolí va nvea ló vaá kọ́ nè va kọọ̀: “Boolo nyímàì kọọ̀ gbò e bà gé bẹl ólò lẹ̀ẹ̀là bel ló gbò e bà gé bẹl boo, vaá gbò pọ̀b nen ólò lẹ̀ẹ̀là bel ló gbò e bà dì vá kè kẽ. 43 Boolo ó gá naanii vó, tãa vó, kọ̀láá neń ea gbĩ́ gè ié pọ̀b dọ̀ ea dìí zẹ̀ẹ̀ é íè ge sí tóm nè dõona gbò, 44 vaá kọ̀láá neń ea gbĩ́ gè tú túá dọ̀ ea dìí zẹ̀ẹ̀ é íè ge dú gyóòlo nè kọ̀láá nen. 45 Boo béè kọọ̀ bã̀àna Sã́áná nená náa beè dú ló gè kọ bà á siè tóm neèe, tãa vó, a beè dú ló gè sí tóm nè dõona gbò nè ge tú a dùm aamá gã́bug nen.”
46 Ba beè gbóó kil Jérikò. Sõò tṍó e ẹlẹ nè gbò e bà ólò nyoonée nvée nè sìgà gbò e ba beè bììàẹ́ nvée gé ooà aa Jérikò, Bàtímìọ̀s (nvín Tìmíọ̀s), ea dú neǹ gímá dẽe ea ólò bàn nu, beè di ĩ́ìtẽ́ gã́ èèlèa. 47 Tṍó ea dã́ kọọ̀ níà Jíízọ̀s ea dú Názarẹ̀t, à gbóó dààmà togó vulí kpã́ kọọ̀: “Jíízọ̀s, nvín Dévìd, iém sàn nyíe ló!” 48 Tṍóá, gã́bug nen à gbóó bèlie bel ló vaá kọ á pĩigã́, sõò a beè kilsĩ́ gè vulí kpã́ kọọ̀: “Nvín Dévìd, iém sàn nyíe ló!” 49 Jíízọ̀s à gbóó elá vaá kọọ̀: “Kolííe domai.” Bà gbóó kolí gbálà e dẽée gímíá vaá kọ́ nèe kọọ̀: “Ié agẹ ló! Aa boo, mè à gé kólí ni.” 50 À gbóó tobví a pọ̀b kọ̀là ló lọa ló, pẹẹ elá èla, vaá kyã̀à nyoone Jíízọ̀s. 51 Tṍóá, Jíízọ̀s à gbóó bĩináe kọọ̀: “Éé ní eo gbĩ́ì kọ ḿ naa nè ni ẽ́?” Gbálà e dẽée gímíá à aalá nèe kọọ̀: “Neǹ Dòbá, naa kọ ḿ kpáá mòn nu.” 52 Jíízọ̀s à gbóó kọ́ nèe kọọ̀: “Àà, o zìgà a náa kọ ó boá.” Tẽ̀ènè tṍóá, à gbóó mòn nu vaá dààmà togó gè bììàẹ́ nvée gbẹá boo èèlèa.