Tóm Gbò E Jíízọ̀s Beè Lẹ̀ẹ̀là

13 A beè ié gbò kọ́ọ̀ bùlà Bàrì nè gbò e bà ólò noomà nu e ba beè di bõ̀ònatõ̀ò ea di Ántiọ̀k. Béè gbòí kọlà Bánabàs, Símiòn e bà ólò kolíe Náíjà, Lúsìọ̀s ea dú Sàìrínì, Mánèàn e Hẹ́rọ̀d ea gé bẹl enè bálásĩ́ nè ẹ̀ẹ̀ beè gbá sí tọọ̀ kpà, nè Sọ́ọ̀l. 2 Boo tṍó e bà gé sí tóm nè Jìhóvà* vaá ká gã́, nyómá káí à gbóó kọọ̀: “Tui Bánabàs nè Sọ́ọ̀l neḿ mi kọbé bà sí tóm em beè kolí va ló.” 3 Tṍó e ba ni ká gã́ vaá tã̀àgã ló Bàrì lọ̀l, bà gbóó dẹlẹ́ va bá ból vaá lẹ̀ẹ̀là va ààmà.

4 Vó à naa, gbò e nyómá káí beè lẹ̀ẹ̀là vaí beè gbóó kil Sèlúsìà, vaá tṍó e bà aa kĩá, bà gbóó bã mm̀ faà sĩ́ múú kil Sáíprọ̀s. 5 Tṍó e bà íná Sálamìs, bà gbóó dààmà togó gè vee moǹ bel Bàrì gbẹá mm̀ tọ bõ̀ònaló fã̀ pá Júù. Jṍòn beè dì vá ló nagé ea géè nvèè bá nèva.

6 Tṍó e ba ni kyãà tení zivèkà kpò kunukẽ̀ e múú bééá tení lóá vaá iná Páfọ̀s, bà gbóó mòn ene kà gbálà ea dú Júù, ea kọlà Báá-Jíízọ̀s, ea ólò bó biè vaá kpọ́ kyáá kọ ẹlẹẹ̀ neǹ kọ́ọ̀ bùlà Bàrì. 7 A beè di ló ene kà gbálà ea géè bẹ̀l ea palàge nyimá nu, ea kọlà Sẹ́jìọ̀s Pọ́lọ̀s. Sẹ́jìọ̀s Pọ́lọ̀s beè gbóó kolí Bánabàs nè Sọ́ọ̀l nvea ló, boo béè kọọ̀ a beè palàge tànie gè dã́ moǹ bel Bàrì. 8 Sõò Ẹ́limàs ea dú neǹ bóò bièa beè gbóó dààmà togó gè bé uú vá boo, vaá pììga boo gè naa kọọ̀ ménéá á gá dã́ moǹ bel Bàrì. (Bà tab Ẹ́limàs naamá neǹ bóò biè.) 9 Tṍóá, boo béè kọọ̀ nyómá káí beè di ló Sọ́ọ̀l, ea kọlà nàgé Pọ́ọ̀l, à gbóó gọ̀líé ló ẹ̀b 10 vaá kọọ̀: “Olo e dénè íb kẹ̀lẹ̀ nè pọ́lọ́ láb di ḿ-ma ní m, oló nvín Pọ́lọ́ Nyómá eo ólò bé kọ̀láá kà nú ea lelà, gbóó kùb ge tãagẽ lèlà èèlè Jìhóvà.* 11 Ẹ̀b! Jìhóvà* é né ni kpọ̀té vaá dẽé ni é gímí naa ní e nóo é mon ẹ́ẹ́ dee mm̀ sìgà tṍó.” Tẽ̀ènè tṍóá, dẽée à gbóó dú dúu-dúu vaá kuu gín. À gbóó dààmà togó tọgá bá vaá gbĩ́ nen ea é sííe bá ló kyã̀àmà. 12 Tṍó e nen ea gé bẹl mon nú ea nááá, à gbóó ié zìgà mm̀ lé kpẹ̀aá boo béè kọọ̀ nú ea nó ea kil ló Jìhóvà* beè palàge bọọẹ́ ló.

13 Tṍóá, Pọ́ọ̀l nè gbò e ba beè dìé ló beè gbóó bã faà sĩ́ múú aa Páfọ̀s kil Pẹ́gà ea di Pàmfílìà, sõò Jṍòn beè òòà àà vá ló kil Jèrúselẹ̀m. 14 Bà gbóó kilsĩ́ boo ba kyẽè, vaá aa Pẹ́gà kil Ántiọ̀k ea di Pìsídìà. Tṍó ea dú Deè Bõ̀séi, bà gbóó bã mm̀ tọ bõ̀ònaló fã̀ pá Júù vaá ĩìtẽ́ kẽ. 15 Tṍó e ba ni bugi Kpá Log nè Kpá Gbò Kọ́ọ̀ Bùlà Bàrì lọ̀l, gbò e ba di togó tọ bõ̀ònaló fã̀ pá Júùa à gbóó kọ́ nè Pọ́ọ̀l nè Bánabàs kọọ̀: “Pá vígà, be ò íèì bel sìà kpóó ló gè kọi nei gbòí, ò kọ́i neí va.” 16 Pọ́ọ̀l à gbóó elá ela vaá dàlà bá boo kọ bà á pãane tṍ. À gbóó kọọ̀:

“Booló pá Ízrẹẹ̀l nè dénè boólo eo síiàì pọ̀ ló Bàrì, pãanei tṍ. 17 Bàrì pá Ízrẹẹ̀l beè sà bẹẹ gbò nómá tẹ̀, vaá naa kọ bà á palàge ié kpóó tṍó e ba beè dú gbò kyáà gbẹá boo kunukẽ̀ Íjìpt, vaá a beè tú a bá e kói di lóá dùùmà va lọl Íjìpt. 18 Vaá mm̀ nú ea é láá dú 40 gbáá e ba beè tõ̀òma boo kpáà bàlà ólá, a beè ĩ̀ìmà ba pọ́lọ́. 19 Tṍó ea ni kyọsĩ́ àlàbà kà dó e ba beè di boo kunukẽ̀ Kénaàn lọ̀l, à gbóó tú ba kunukẽ̀ nè bẹẹ gbò nómá tẹ̀ naamá ba ìènù. 20 Dénè nuí beè naaá mm̀ nú ea é láá dú 450 gbáá.

“Tṍó e níí nááá lọ̀l, à gbóó íbá ló gbò bèèla ea é túlè va dọ̀ọ̀mà tṍó e Sámuẹ̀l, ea dú neǹ kọ́ọ̀ bùlà Bàrì dú. 21 Sõò tṍó e tṍó téní, bà gbóó bĩiná nen ea é bẹlìè va, Bàrì à gbóó íbá ló Sọ́ọ̀l, ea dú nvín Kíìsh, ea aa gãà Bénjamìn kọ á bẹ̀l va, vaá a beè bẹ̀l va mm̀ 40 gbáá. 22 Tṍó ea tú méné lọ̀líé bá, à gbóó sà Dévìd naamá ba méné vaá a beè kọ́ kìlmàé ló kọọ̀: ‘Nda a mon Dévìd, ea dú nvín Jẹ́sì, vaá nyíém ẹ́ẹẹ́ ló. À é náa kọ̀láá kà nú ea dú nà bùlà.’ 23 Dì belí bé e Bàrì beè zìgà naa, a beè domà nen ea é duulà pá Ízrẹẹ̀l, ea dú Jíízọ̀s lọl mm̀ mana-manaà gbálàí. 24 Besĩ́ à kalá dù, Jṍòn beè vee vaá kọ́ nè pá Ízrẹẹ̀l kọ bà á dììa múú kọbé à zógè kọọ̀ baa ọ́ga ló ba pọ́lọ́. 25 Sõò tṍó e Jṍòn é gé sí a tóm lọ̀l, à géè olòó bĩiná kọọ̀: ‘Mée ní e boolo doomàì kọọ̀ nda dúù e? Nda níì ẹ̀ẹ̀ nì. Sõò ẹbvii! Ním sim̀ tùlà ge taalá díí boo kpá kátọọ̀ nen ea gé dú nvéè nda.’

26 “Pá vígà, booló eo dúì pá nvín Ébràhám̀ nè booló eo síìàì pọ̀ ló Bàrì, moǹ bel dùùà a íná ló dénè bẹ̀ì. 27 Pá Jèrúselẹ̀m nè gbò e bà géè bẹ̀l va náa beè nyimáe ló, sõò tṍó e bà gé sí tóm dì belí gbò bèèla, ba beè mm-mè nú e Gbò Kọ́ọ̀ Bùlà Bàrì beè kọ̀, e bà ólò bugi dàlà moń boo kọ̀láá kà Deè Bõ̀séi á. 28 Náa kal ló béè kọ bà náa beè mòn tọ́ọ̀ nú ea náa kọ á bọ́ló gè fẹ́ẹ, ba beè kọ́ nè Páílèt kọ á fẹ́ẹ. 29 Tṍó e ba ni ḿm̀-mè kọ̀láá kà bel e ba beè emí kìlmàé ló, bà gbóó túe lọl boo téá gé li mm̀ kóló dem. 30 Sõò Bàrì beè kẽée lọl kemà ú, 31 vaá a beè sila ló gbò e ba beè zọ̀ẹ aa Gálilì kil Jèrúselẹ̀ma gã́bug dee. Nagbòí ní e bà gé sí neǹ ditõ̀ò ea kilíé ló nè gbò nen ẽ́.

32 “Vó à naa, beele gé kọ́ lé kpẹ̀a ea kil ló zìgànù e Bàrì beè zìgà nè bẹẹ gbò nómá tẹ̀ nèi. 33 Bàrì a ḿm̀-mè zìgànùá nè beéle e dúù ba gbò nvín tení dú ló gè kẽee Jíízọ̀s lọl kemà ú, dì belì bé ea beè ẽá mm̀ ní ea égè bàà kà kpá sọ́l lẹ̀ẹ̀là naaá kọ́ọ̀: ‘Oloò ńdáà nvín. Nieí nda a dú o tẹ̀.’ 34 À dú kà-kà kọọ̀ Bàrì beè kẽée lọl kemà ú vaá nèe nom̀ kpáló e náa é bem na. A beè kọọ̀: ‘M̀ é íe vulè ea kyãa mm̀ bọ́ọ̀ló dẹ̀lẹ̀ nyíé boo em beè zìgà nè Dévìda kìlmàí ló. Gbò moǹ belí bọ́ló dẹ̀lẹ̀ nyíé boo.’ 35 Ba beè emí nágé mm̀ dõona kà kpá sọ́l lèèlà kọọ̀: ‘Nóo é aa ló o gyóòlo ea bọ́ló dẹ̀lẹ̀ nyíé boo kọ á bèm gbẹá mm̀ bànà ú.’ 36 Sõò kilma ló Dévìd, a beè tú dénè deé mm̀ a dùm siimá tóm nè Bàrì, vaá tṍó ea ú, ba beè túe li ló pá a gbò nómá tẹ̀, vaá a beè bèm. 37 Sõò nen e Bàrì beè kẽee lọl kemà úá náa beè bèm.

38 “Vó à naa, e pá vígà, nyimai kọọ̀ tení dú ló ẹlẹ ní e Bàrì é ia ló bọọ pọ́lọ́ nèi ẽ́, vaá níà nú e gé kọ́ nú ea kil ló nèi ẽ́, 39 kọọ̀ nóo gáẹ̀ beè láá dií pọ́ì aalíí bá bẽgẽ bel tení dú ló Log e Bàrì beè nè Mózìs, sõò kọ̀láá nen ea íe zìgà é dí pọ́ì aa bá bẽgẽ bel tení dú ló Jíízọ̀s. 40 Vó à naa, palàge ọẹi dẽe kọbé gbò nú e Gbò Kọ́ọ̀ Bùlà Bàrì beè kọ̀ náa nááaí ló: 41 ‘Ẹbvii, e booló gbò nvèèmà lẹ́, á palàge bọọí ló vaá fẹ́i, boo béè kọọ̀ gbò tóm e nda gé sí tṍó eo diií dú tóm e kọbèè ba beè kọ́ dénè nú ea kil ló nèi, nóo gáẹ̀ beè zigai.’”

42 Tṍó e bà gé aà, gbòa à gbóó bàn va kọ bà á kpáá dú Deè Bõ̀séi ea bẽene gé kọ́ nú ea kil ló belí. 43 Tṍó e gbò e ba beè bõoná mm̀ tọ bõ̀ònaló fã̀ pá Júùa ni zaalà, pá Júù nè gbò e bè níì pá Júù nì, sõò bà ólò fã̀ Bàrì pá Júù beè gbóó bììa nvéè Pọ́ọ̀l nè Bánabàs. Bà géè ló bel nè gbòa, vaá siè va kpóó ló kọ bà á kilsĩ́ gè naa nú ea é náa kọ Bàrì á ié va sàn nyíe ló.

44 Deè Bõ̀séi ea bẽene, à sigà ńkem, dénè nen ea di boná gá bṍóná boo béè ge dã́ moǹ bel Jìhóvà.* 45 Tṍó e pá Júù mon gã́bug gbòa, bà gbóó bẹ́ nyíe, vaá dààmà togó gè ló pọ́lọ́ bel beemá gbò bel e Pọ́ọ̀l géè lòa. 46 Tṍóá, Pọ́ọ̀l nè Bánabàs beè gbóó tú agẹ ló kọọmá nèva kọọ̀: “A beè bọ́ló kọ é zẹ́ẹ́ ló moǹ bel Bàrì nè túá boolo. Sõò boo béè kọ ò kinìì vaá ẹbvii bọọ bá kọ nóo bọ́ì ló gè iei dùm e bè náa tá, ẹbvii! èé gbóó òòa kẽ gé kọ́ nè gbò e bà di gbò dó àla. 47 Boo béè kọọ̀ Jìhóvà* beè kọ́ nèi kọọ̀: ‘M íi bá ló kọ ó dui ẹ́ẹ́ dee neai gbò dó àla, kọbé ò túi dùùà imaí dénè ketõ̀ò ea di boo kunukẽ̀í.’”

48 Tṍó e gbò e bà aa gbò dó àla dã́ naa vó, bà gbóó dààmà togó gè ié zààvà vaá nvèè ka ló moǹ bel Jìhóvà,* vaá kọ̀láá gbò e bà íe lé bùlà nyòòmà ge ié dùm e bè náa tá beè gbóó dú gbò e bà gé nyoone nvéè Jíízọ̀s. 49 Vó à naa, moǹ bel Jìhóvà* beè gbóó zààlà iná dénè ketõ̀ò ea di dó á. 50 Sõò pá Júù beè gbóó kyọ̀ nyíè gbò bia e gbò nen ólò nvèè va ka ló, e bà ólò siiá pọ̀ ló Bàrì, nè gbò gbálà e bà íe pọ̀b dọ̀ e bà di boná naa ní e bà bíìgè ló Pọ́ọ̀l nè Bánabàs, vaá tobví va tẹlẹ nvéè boná. 51 Vó à naa, bà gbóó kpàlà sãa lọa kè kátọ naamá nú ea é sí va neǹ ditõ̀ò ló. Bà gbóó àà kil Àìkónìòm. 52 Vaá nyíè gbò e bà ólò nyoone nvéè Jíízọ̀s beè kilsĩ́ gè ẹẹ vaá nyómá káí beè dì vá ló.