Kpá E Pọ́ọ̀l Beè Lẹ̀ẹ̀là Má Pá Róm̀
1 Kpáí aa bá nda Pọ́ọ̀l, em dúù gyóòloò Kráìst Jíízọ̀s, e ba beè kolím kọ ḿ dú nen e Jíízọ̀s lẹẹlà, vaá kpòòlàm sẹlẹ́ kele kọ ḿ vee lé kpẹ̀a ea aa bá Bàrì. 2 A beè zìgà tenmá gã́ gbò kọ́ọ̀ bùlà Bàrì tṍó ea kil nvéeá kọ à é domàè lé kpẹ̀aí, vaá ba beè emí mm̀ Kpá Káí. 3 Lé kpẹ̀aí kil ló a Sã́áná ea beè mèà aa tọọ̀ Dévìd, 4 sõò Bàrì beè naa kọ á dọ bàlà kẽ tení dú ló a kpóó kọọ̀ ẹ̀ẹ̀ Sã́áná Bàrì tṍó ea kẽée lọl kemà ú—mm̀ kà-kà, Jíízọ̀s Kráìst dú Nen Ea Íéi. 5 Vaá tení dúé ló, e íe sàn nyíe ea aa bá Bàrì, vaá dú gbò e Jíízọ̀s lẹẹlà, kọbé tení dú ló zìgà, gbò e bà aa dénè dó láá gbànie tṍ ló vaá nvèè ka ló a bée, 6 vaá boolo dṹùnà nàìgé gbò dó e Bàrì beè kolí kọ bà á dú gbò nyòòne nvéè Jíízọ̀s Kráìst. 7 Kpáí mááá dénè boolo eo dií Róm̀, e Bàrì vulè vaá sài kọ ó dií káí:
Bàrì ea dú bẹẹ Tẹ̀ nè Nen Ea Íéi, ea dú Jíízọ̀s Kráìst á iéi sàn nyíe ló, vaá ba fẹ́ẹ́-fẹẹ̀ ló á dìí ló.
8 Túá kà, tení dú ló Jíízọ̀s Kráìst, m̀ ṍà ńdáà Bàrì zaa boo béè dénè bọ̀ì, boo béè kọ bà gé ló bel ea kil ló bọọ zìgà gbẹá dénè ketõ̀ò ea di bàlà booí. 9 Bàrì em ólò tú dénè nà dùm siimá tóm nè tení dú ló gè kọ́ lé kpẹ̀a ea kil ló a Sã́áná, sí neǹ ditõ̀ò kilma ló bé e ním ólò aa ló gè kolí bọọ bée mm̀ nà tã̀àgã ló naa, 10 nè bé em ólò bàn kọọ̀ be à válí vaá à dú a bùlà, á naa kọ ḿ láá dù gé mònii kátogóí naa. 11 Boo béè kọ à gé taním gè mònii kọbé m̀ síèi kpóó ló kọ ó láá iei kà lé gbaa ló kilma ló Bàrì, 12 àbèè ge kọọ̀ kọbé è síè kpóó ló ene tení dú ló zìgà e boolo nè nda íè.
13 Sõò pá vígà, m̀ gbĩ́ gè naa kọ ó nyimai kọọ̀, gã́bug tṍó, m beè gbĩ́ gè dù gé mònii kọbé m̀ mon lé nú ea silà aa mm̀ nà sìtóm kọ̀ kpẹ̀a, dì belí bé e lé nu beè sìlà aa m gbẹá nagbò dóá naaá, sõò buù tṍó em noò ge dù, à íe nú ea ólòó kpègàḿ deè, bã̀àna kátógóí. 14 M̀ síì kom bá gbò e bà dú Gríìs nè gbò e bà náa dú Gríìs, gbò e bà nyímá nu nè gbò e bà náa nyímá nu. 15 Níà nú ea náa à palàge tànim gè vee lé kpẹ̀aí nè nàgé boólo eo dií Róm̀ ẽ. 16 Kẹ́ẹ náa ólò siím ló lé kpẹ̀aí. Mm̀ kà-kà, níà kpóó e Bàrì ólò dùùmà kọ̀láá gbò e bà íée zìgà m ẽ́. A beè zẹ́ẹ́ dì nè pá Júù besĩ́ à kalá dì nè gbò e bè níì pá Júù nì. 17 Tení dú ló lé kpẹ̀aí ní e Bàrì ólò tú a lé lab dògò tẹlẹ bàlà kẽ nè gbò e bà íée zìgà m ẽ́, vaá à ólò naa kọ ba zìgà á aga ló dì belí bé e ba beè emí mm̀ Kpá Káí naaá kọọ̀: “Neǹ lé lab dògò é tõó dùm boo béè a zìgà.”
18 Súng Bàrì é aa káála dọ boo gbò e bà náa fã́e nè gbò pọ́lọ́ lab dògò e bà kpega deè kà-kà belí kọ á gá zààlà, 19 boo béè kọọ̀ nú e bà é láá nyimá ea kil ló Bàrì palàge tọla kẽ lóó va, boo béè kọọ̀ Bàrì beè naa kọ bà á nyimá. 20 Gbò a kpãa e nen náa monmà dẽe palàge dọa bàlà kẽ lọ̀l gé tṍó ea beè dèm bàlà booí, boo béè kọọ̀ gbò nú ea dem náa kọ é dã́ ból ló, vaá nyimá kọọ̀ a kpóó náa íe ke kùbmà nè ge kọọ̀ ẹlẹ ní ea dú Bàrì e. Vó à naa, bà náa íe nú e bà é láá gbá ból vaá kọ bà náa beè nyimàè. 21 Náa kal ló béè kọ bà nyímá ló Bàrì, bà náa beè nvèèe ka ló belí Bàrì àbèè ge õáe zaa, tãa vó, ba beè bugi dìà-dìà bugì togó, vaá ba nyíe e bè náa tavẹ na tọ́ọ̀ kà nuá à gbóó kuu gín. 22 Náa kal ló béè kọọ̀ bà kọ́ bà nyímàè nu, bà dú ból 23 vaá tú ka ea kuu Bàrì ea dì lee nvee ló nú ea meà belí nen, ńnóm, gbò nom ea íe ténì kà kpóó tọ, nè gbò nom e kọ́g di ló e bà ólò tẹlẹ̀ ké, ea é láá ù.
24 Vó à naa, boo béè kọ bà gbĩ́ gè naa nú ea dú ba bùlà, Bàrì à gbóó sọ̀va tọ́ deè kọ bà á labví láb e bè náa õoà, naa ní e bà náa nú ea nveè fàà ló áá ba nom̀ kpáló. 25 Bà tú kyáá bel nyaamá ló kà-kà bel ea aa bá Bàrì. Bà fã vaá sí tóm ea di káí nè nú e Bàrì beè dèm, tãa vó e bà fã Bàrì ea beè dèm gbò nuá, ea dú nen ea bọ́ló gè lèèlà dọ̀ dè-dè. Á dì naa vó. 26 Níà nú ea náa Bàrì à sọ̀va bá gbẹẹ́ bá tàn kúnagã̀ ea dú nuù kẹ́ẹí é, boo béè kọ ba gbò bia náa nú ea téní kele aa ló bé e Bàrì beè noo kọ á dì naa. 27 Mm̀ tẽ̀ènè sĩ́deèá, gbò gbálà gbẹ́ẹ pábia e Bàrì beè kọ bà á zọ̀ mààà vaá ié agẹ bá tàn e bà náa láà lẹ̀ẹ̀là bel ló kilma ló áá ọ̀và. Págbálà zọ págbálà mààà vaá naaá nuù kẹ́ẹ, vaá bà é íe kpọ̀té ea zọ ló pọ́lọ́ e ba beè sì gbõ̀ònà.
28 Boo béè kọọ̀ baala náa beè ẹ̀b kọ à bọ́ló gè nyimá ló Bàrì, Bàrì beè gbóó sọ̀va bá gbẹẹ́ bá ba pọ́lọ́ bug togó ea tú va naamá nú e bè náa bọ́ló kọ bà á naa. 29 Kọ̀láá íb pọ́lọ́ láb beè gbóó m-má vá m. Ba beè dú gbò síì bàg, gbò gọ̀l òò, vaá dú gbò pọ́lọ́. Ba beè bẹ́ nyíe, fẹ́ nen, kaná kàna, kẹlẹ nen, ié tàn ge sí pọ́lọ́ nen, vaá bã̀ pílì. 30 Ba beè dú gbò ge ló bel nvéè nen, gbò ọ́b Bàrì, vaá bà naá beè ié dùm fã̀ dẽe. Bà ólò dàlà kpáló boo, gaavá, noo pọ́lọ́ nu, vaá lọ̀l togó kèbá ba tẹ̀ nè ba kà. 31 Bà náa ólò dã́ ból ló nu, bà náa ólò naa nú e nen nè ọ̀và beè bilá ló, bà náa ólò ié tọa ló kilma ló dõona gbò, vaá bà náa ólò ié sàn nyíe. 32 Náa kal ló béè kọ bà palàge nyimá nú e Bàrì ténmá kọ à lelà—kọọ̀ gbò e bà ólò náa gbò nuí bọ́ló gè ù—níì áá gè kọọ̀ baala kilsĩ́ gè naa gbò nuí nì, sõò bà nveè nàgé sãa kúm gbò e bà gé lábví gbò lábví.