Kpá E Pọ́ọ̀l Beè Lẹ̀ẹ̀là Má Pá Róm̀
6 Beè vó, éé ní e gé kọ́ ẹ́? É kọ èé kilsĩ́ gè sí pọ́lọ́ kọbé sàn nyíè Bàrì láá bọọ́ tõ̀ò? 2 Níì vó nì! È monì kọọ̀ e beè ú kilma kĩée e gè sí pọ́lọ́ dì. Vó à naa, à é náa và è láá kpáá kilsĩ́ gè sí pọ́lọ́ ẹ́? 3 Sẹ̀ é kọ nóo nyímàì kọọ̀ dénè bẹ̀ì e beè dììa múú mm̀ Kráìst Jíízọ̀s beè dììà nàgé múú kọ èé zọ́ẹ ù? 4 Vó à naa, ba beè túi biié ló lì tení dú ló dììa múú e beè dììà kọ èé zọ́ẹ ù, kọbé dì belí bé e Kráìst beè kẽ̀èà aa kemà ú tení dú ló ka ea aa bá a Tẹ̀ naaá, níà bé ea bọ́ló kọ beele é tõó ãa sĩ́deè tõò dùm naa ẽ́. 5 Dì bélí bé e beè gbaáẹ́ ló vaá ú dì belí bé ea beè ú naaá, níà bé e Bàrì é kẽeéi lọl kemà ú dì belí bé ea beè kẽée lọl kemà ú naa ẽ́. 6 Boo béè kọ è nyímà kọọ̀ ba beè tú nómá nen e beè dùa biié ló ká kú té, kọbé bẹẹ nom̀ kpáló e náàkyọ̀ di lóá náa íe na kpóó naa ní e née é kpáá du ná gyóòlo nè náàkyọ̀. 7 Boo béè kọọ̀ nen ea ni ú a dí pọ́ì aa bá a náàkyọ̀.
8 Nagé, be e beè zọ̀ Kráìst ù, è nyímà kọọ̀ èé zọ nàe gé tõó dùm. 9 Boo béè kọ è nyímà kọọ̀ kátogóí e Kráìst ni kẽeà aa kemà úí, náa é ú ná tọ́ọ̀ dee. Ú náa é íé náe kóí ló. 10 Boo béè kọọ̀ ú ea beè ù dú áá enè tóm boo béè ge lọ̀l pọ́lọ́, sõò à tõó dùm boo béè ge naa bùlà Bàrì. 11 Mm̀ tẽ̀ènè sĩ́deèá, ẹbvii bọọ bá kọ ò úì kilma kĩée e náàkyọ̀ dì, sõò ò dií dùm boo béè ge naanii bùlà Bàrì tení dú ló Kráìst Jíízọ̀s.
12 Vó à naa, ó gá zigai kọọ̀ náàkyọ̀ á kilsĩ́ gè lẹ̀ẹ̀là bel ló bọọ nom̀ kpáló ea é láá ù, kọbé nóo gbanìì tṍ ló nú e bọọ nom̀ kpáló gbĩ́ kọ ó naanii. 13 Ó gá tu naigé bọọ nom̀ kpáló nei náàkyọ̀ dì belí nuù bé e pọ́lọ́ lab dògò íe, sõò tui bọọ lóó nei Bàrì dì belí gbò e ba ni kẽeà aa kemà ú, vaá ò tú naigé bọọ nom̀ kpáló nei Bàrì dì belí nuù bé e lé lab dògò íe. 14 Ó gá zigai kọọ̀ náàkyọ̀ á iéi kóí ló, boo béè kọọ̀ ó géí kèbá log, sõò ò dií kèbá sàn nyíe ea aa bá Bàrì.
15 Éé ní eé kpáá kọ̀ ẹ? É kọọ̀ èé sí pọ́lọ́ boo béè kọọ̀ e di kèbá sàn nyíe ea aa bá Bàrì vaá é gé kèbá log? Ẽ́èe, níì vó nì! 16 É kọ nóo nyímàì kọọ̀ be ò túi bọọ lóó nveeníí kèbá nen dì belí gyóòlo ea íe dùm gbàntṍ ló, ò dúì gyóòlo nei nen eo gbanìì tṍ ló á? Ò é láá dui gyóòlo nei náàkyọ̀ ea é náa kọ ó ui àbèè ò íei dùm gbàntṍ ló ea é náa kọ ó dui gbò lé lab dògò. 17 Sõò è ṍà Bàrì zaa kọọ̀ náa kal ló béè kọọ̀ o beè zẹ́ẹ́ dui gyóòlo nei náàkyọ̀, kátogóí ò gbóò gbanii tṍ ló nú e Bàrì beè noomàiá lọlíí mm̀ bọọ nyíe. 18 Mm̀ kà-kà, tã́gíní bé e nóo dú nàì gyóòlo nei náàkyọ̀a, ò gbóò dui gyóòlo nei lé lab dògò. 19 M̀ gé ló belí nèi dì belí bé e nen ólò ló bel naa, boo béè kọọ̀ ò dúì gbò ọ́ọ́-ọọ, boo béè kọọ̀ dì belí bé eo beè tui bọọ nom̀ kpáló naamai gyóòlo nei gbò láb e bè náa õoà nè dùm ge lọ̀l togó kèbá log ea náa kọ ó dọi log naaá, níà bé eo é gbóó tui bọọ nom̀ kpáló naamai gyóòlo nei lé lab dògò ea é náa kọ ó dií káí naa ẽ́. 20 Tṍó eo beè dui gyóòlo nei náàkyọ̀a, bà náa géè ẹ̀b dẽe sĩ́ kọ ó naanii nú ea lelà.
21 Éé ní ea géè sìlà aa mm̀ láb eo géè labvii tṍóá ẽ́? Níà gbò nú ea ni síìmài kẹ́ẹ kátogóí. Boo béè kọọ̀ ú ní ea ólò sìlà aa mm̀ gbò nú eo géè naaniiá ẽ́. 22 Sõò kátogóí eo ni dií pọ́ì aalíí bá náàkyọ̀ vaá dui gyóòlo nei Bàrìí, ò dii eo gé lábvii láb ea di káí, vaá níí é náa kọ ó iei dùm e bè náa tá. 23 Boo béè kọọ̀ kpẽ̀ kòm ea dú ló náàkyọ̀ dú ú, sõò dõ̀ònù e Bàrì ne dú dùm e bè náa tá, vaá à ne tenmá bá Kráìst Jíízọ̀s, ea dú Neń Ea Íéi.