Lé Kpẹ̀a E Máàk Beè Emí

5 Tṍóá, ba beè gbóó fùl sábá pèneá iná bálásĩ́ Gèrásà. 2 Jíízọ̀s gé aà gé mm̀ faà sĩ́ múúá dọ kẽ, ene kà gbálà e zọ dìé m à gbóó aa gbàà gbò kóló dem* e bà ólò lì nen dúé ló. 3 Gbàà gbò kóló demá ní ea ólò tõo ẽ́, vaá tọ́ọ̀ nen náa beè láá bọbví náe, bã̀àna gè tú gẹ́l kpọ́gọ́lọ́ bọbmáe. 4 Gã́bug tṍó, bà ólò tú kpọ́gọ́lọ́ bọbmáe bá nè tọ, sõò à ólò kàb zaali lọa ló, vaá tọ́ọ̀ nen náa beè láá ié kói gè lẹ̀ẹ̀màe bel ló. 5 À ólò tõó gbàà gbò kóló demá nè gbàà gù vulígi kpã́ bílá dee nè ẹ́ẹ́ èlà, vaá tú dem bààmàgì kpálóe. 6 Sõò tṍó ea tõó kpã́á mòn Jíízọ̀s, à gbóó teelá nyoonée vaá kumí sĩ́ kẽ nèe. 7 À gbóó vulí kpã́ kọọ̀: “Éé ní eo gbĩ́ìḿ ló e Jíízọ̀s, eo dúù Sã́áná Bàrì Ea Bọọ Lọ̀l Vaá À Lee é? Tú Bàrì zilmá zíl kọ nóo é neèm kpọ̀té.” 8 A beè vulí kpã́ naa vó boo béè kọ Jíízọ̀s géè kọ́ nèe kọọ̀: “Aa mm̀ gbálàí, e zọ.” 9 Jíízọ̀s à gbóó bĩináe kọọ̀: “O bée kọlà vàẹ?” À aalá kọọ̀: “Ńdáà bée kọlà Gã́bug Gbò, boo béè kọ è bọọ̀ tõ̀ò.” 10 A beè kilsĩ́ gè bàn Jíízọ̀s kọ á gá lẹ̀ẹ̀là gbò zọá lọl dóá.

11 Tṍóá, à íe gã́bug diì máá e ba beè di boo gùa e bà géè dé nu. 12 Gbò zọá à gbóó bànie kọọ̀: “Lẹ̀ẹ̀lài nvee mm̀ gbò diì mááí, kọbé è bã́ vá m.” 13 À gbóó sọ̀va tọ́ deè. Gbò zọá à gbóó aa mm̀ gbálàa bã mm̀ gbò diì mááá. Nú ea é láá dú 2,000 diì mááá beè gbóó kònà aa boo gùa dọ pène, vaá pè gbẹá m. 14 Sõò gbò e bà ólò kùdẽe ló diì mááá beè gbóó teelá bã bon nè gbò bon ea di kuló kĩá gé kọ́ nú ea nááá, naa ní e gbò nen dú gé mònmà dẽè nú ea beè naaá. 15 Tṍó e bà íná ló Jíízọ̀s vaá mòn gbálà e gã́bug zọ beè dìé m-má, ea nveà kọ̀là ló ĩìtẽ́ kẽ vaá di mm̀ a bug, pọ̀ beè gbóó sií va. 16 Nagé, gbò e ba beè mònmà dẽe beè gbóó nootẽ́ nu ea nááá ló gbálà e zọ beè di m-má, nè nú ea nááá ló gbò diì mááá nè va. 17 Boo béè vó, bà gbóó dààmà togó gè bàn Jíízọ̀s kọ á aalìè ba bálásĩ́.

18 Tṍó ea ni kpóógá dee ló gè bã mm̀ faà sĩ́ múú, gbálà e zọ beè di m-má à gbóó bànie kọ à é nyoonèèe. 19 Sõò náa beè zìgà. Tãa vó, a beè kọ́ nèe kọọ̀: “Àà kil be ló pá o dúà ló, vaá ò kọ́ nè va kọ̀láá kà nu e Jìhóvà* ni náa nè ni, nè bé ea ni íé ni sàn nyíe ló naa.” 20 Gbálàa beè gbóó àà kil Dìkápolìs* gé kọ́ dénè nu e Jíízọ̀s ni náa neèe, vaá a beè bọọ́ ló dénè gbò e bà di kĩá.

21 Jíízọ̀s beè kpáá bã mm̀ faà sĩ́ múú òòà kil na sábá pèneá, vaá gã́bug nen beè m-máé ló gbẹá gã́ múúá. 22 Tṍó e ene kà neǹ tùle tọ bõ̀ònaló fã̀ pá Júù e a bée kọlà Jéírọ̀s dú vaá mònie, a beè gbóó dọ̀ kumíe dúnú ke gbàà. 23 À gbóó kilsĩ́ gè bànie kọọ̀: “Kpáló ńdáà ńkem̀ nvín pábia palàge zọ̀. Sóo-sóo dù gé dẹlẹ́ẹ bá ból kọbé à bóá vaá tõó dùm.” 24 Tṍóá, Jíízọ̀s beè gbóó nyoonée àà vaá gã́bug nen beè kõ̀òà nyoonée vaá àng kẽ bììmàe.

25 À íe ene kà ńnváá e mii ni síé ló mm̀ 12 gbáá. 26 A mon gã́bug tã̀àgã̀ gbẹá bá gbò dóm biè vaá a kpẽ́ dénè kpègè ea beè dìé bá lọ̀l, sõò kpálóe náa váli, tãa vó, à kilsĩ́ gè zoogá. 27 Tṍó ea dã́ nú ea kil ló Jíízọ̀s, à gbóó bã gbàà gã́bug gbò e ba beè dìé lóá vaá daa bá ló a pọ̀b kọ̀là ló. 28 Boo béè kọ à géè kọọ̀: “Be m̀ láá daa gé bá ló a pọ̀b kọ̀là ló, m̀ é bóá.” 29 Tẽ̀ènè tṍóá, mii ea géè síé lóá à gbóó fùlà. À gbóó nyimá kọ a bóàẹ̀ aa bá gbele agẹ bá zọ̀ló ea beè dièé lóá.

30 Jíízọ̀s à gbóó gbẹá boo nyimá kọọ̀ kpóó aalìèé ló. À gbóó kììa ló kẽ gbẹá gbàà gbòa vaá bĩiná kọọ̀: “Mée daa bá ló nà pọ̀b kọ̀là ló é?” 31 Gbò e bà ólò nyoonée nvée à gbóó kọ́ nèe kọọ̀: “Ò monì kọọ̀ gbò nen gé ang kẽ bììmà ni, ò bĩiná kọọ̀, ‘Mée daám bá ló é?’” 32 Sõò a beè kilsĩ́ gè gbĩ́ neń ea daáẹ bá ló á. 33 Pọ̀ beè palàge sii ńnvááá naa ní e lóóe kéní, boo béè kọ à nyímá nú ea ni nááàèé ló. À gbóó kumíe dúnú ke gbàà vaá kọ́ kọ̀láá kà nu nèe. 34 Jíízọ̀s à gbóó kọ́ nèe kọọ̀: “Nà nvín pábia, o zìgà a náa kọ ó boá. Aa mm̀ fẹ́ẹ́-fẹẹ̀ ló, vaá ò gbóó boá aa bá o zọ̀ló.”

35 Boo tṍó ea dì ea gé lo-ló bel, sìgà gbò e bà aa tọọ̀ Jéírọ̀s beè gbóó dù vaá kọ́ nèe kọọ̀: “O nvín pábia a ú! Éé ní ea náa ò gé kpáá tãagẽ Neǹ Dòbá ẹ́?” 36 Jíízọ̀s à gbóó dã́ bel e bà gé ló vaá kọ́ nè Jéírọ̀s kọọ̀: “Pọ̀ á gá sií ni. Áá gè ié zìgà ní ea dú bíi é.” 37 Náa beè zìgà kọọ̀ tọ́ọ̀ nen á nyoonèèe daalá lọl ló Pítà, Jém̀z, nè Jṍòn ea dú vígà Jém̀z.

38 Tṍó ea íná tọọ̀ Jéírọ̀s, à gbóó mòn bé e kẽ bũugã̀ naa nè bé e gbò nen gé tó vẹ̀ẹ̀và naa. 39 Tṍó ea bã́ tọá, à gbóó kọ́ nè va kọọ̀: “Éé ní ea náa kọ ó toi vaá nveenii kòvà ẹ? Nvíní gáà ù, sõò à di dáá.” 40 Tṍó ea kọ́ vó, bà gbóó dààmà togó gè màngã̀e vaá nvèèmàe lẹ́. Tṍó ea ni kpó dénè gbòa tẹlẹ kèdẹi lọ̀l, à gbóó faalá tẹ̀ nvíná nè a kà nè gbò e ba beè dìé lóá kilma kĩée e nvíná dì. 41 À gbóó sii bá ló nvíná vaá kọ́ nèe kọọ̀: “Tàlítà kúmì,” ea tõó dọ̀: “Ńkem̀ nvín pábia, m̀ kọ́ọ̀ nè ni kọọ̀, aa boo!” 42 Tẽ̀ènè tṍóá, nvíná à gbóó aa boo vaá kyã̀à. (A beè toolá 12 gbáá.) Nyíè gbò e ba beè di kĩá beè gbóó palàge ẹẹ. 43 Sõò a beè palàge ãané va kọ bà á gá zìgà kọọ̀ tọ́ọ̀ nen á nyimá. À gbóó kọ bà á nèe nu gè dè.