Lé Kpẹ̀a E Máátìù Beè Emí
16 Tṍó ea ni íná kĩá, pá Fárìsíì nè pá Sádùsíì beè dúé ló gé ẹ̀bmàe, ba beè kọ á sí ene kà tóm dũ̀ùnè ea zógè kọọ̀ Bàrì ní ea beè lẹ̀ẹ̀làẹ ẹ́. 2 À kọ́ nè va kọọ̀: “Tṍó e nàànì ni dọ vaá sĩ́dee à dú mii-mii, ò ólò kọi kọọ̀, ‘Sĩ́dee é beè dú lé,’ 3 vaá tṍó e sĩ́dee kúm mii, vaá kuu gín boo lọ̀ọ̀le, ò ólò kọi kọọ̀, ‘Tọ́ọ é di vaá boo é dọọ́ nieí.’ Ò nyímàì tẽ́ gè ẹbvii sĩ́dee vaá nyimái bé e deeá é meà naa, sõò nóo láà monii gbò nú ea gé nááá kátogóí vaá nyimai nú ea tõó dọ̀. 4 Gbò pọ́lọ́ nè gbò e bà náa bọ́ló dẹ̀lẹ̀ nyíé boo* ólò gbĩ́ gè mònmà dẽè tóm dũ̀ùnè, sõò bà náa é mon tọ́ọ̀ kà, daalá lọl ló ní ea beè naaá ló Jónàa.” Tṍó ea ni kọ́ vó lọ̀l, à gbóó tú va gbẹẹ́ kĩá tení àà.
5 Pá a gbò nyòòne nvée beè fùl sábá múúá, sõò a beè tá vá nyíe gè faalá fétúlú. 6 Jíízọ̀s à gbóó kọ́ nè va kọọ̀: “Palàge dií zìle vaá ò íei ọ̀ẹ̀ dẽe ló nú ea ólò gbuuve fétúlú pá Fárìsíì nè pá Sádùsíì.” 7 Bà gbóó dààmà togó gè kọ́ nè ene kọọ̀: “Née beè faalá tọ́ọ̀ kpò fétúlú.” 8 Boo béè kọọ̀ Jíízọ̀s nyímá nú e bà gé kọ́, à gbóó kọ́ nè va kọọ̀: “Boólo eo íèi ńkem̀ zìgà, éé ní ea náa ò kọi neai bọọ bá kọọ̀ nóo íèì tọ́ọ̀ kpò fétúlú é? 9 Ò gáà dãi gé ból ló, nóo kẽeàì boo vòò kpò fétúlú em beè nèèmà gyã́á 5,000 nen vaá gã́bug kùn à sigá ló á? 10 Sẹ̀ nóo kẽeàì boo àlàbà kpò fétúlú em beè nèèmà gyã́á 4,000 nená, nè gã́bug pọ̀bkà kùn ea beè sigá ló? 11 Éé ní ea náa vaá nóo dã́ì ból ló kọọ̀ ním gé ló bel ea kil ló fétúlú nèi ẽ́? Iei ọ̀ẹ̀ dẽe ló nú ea ólò gbuuve fétúlú pá Fárìsíì nè pá Sádùsíì.” 12 Tṍóá, bà gbóó dã́ ból ló kọọ̀ náa géè kọ bà á ọẹ̀ dẽe ló nú ea ólò gbuuve fétúlú, sõò à géè kọ bà á ọẹ̀ dẽe ló nòòmànù pá Fárìsíì nè pá Sádùsíì.
13 Tṍó e Jíízọ̀s íná bálásĩ́ Sìzàríà Fílipaì, a beè bĩiná pá a gbò nyòòne nvée kọọ̀: “Mée ní e gbò nen kọ́ọ̀ Sã́áná nená dú é?” 14 Bà aalá kọọ̀: “Sìgà gbò kọ́ọ̀ ẹ̀ẹ̀ Jṍòn Neǹ Dììlè Nen Múú, sìgà gbò à kọọ̀ ẹ̀ẹ̀ Èláíjà, vaá sìgà gbò à kọọ̀ ẹ̀ẹ̀ Jèrèmáíà àbèè enè neń ea dṹùnà gbò kọ́ọ̀ bùlà Bàrì.” 15 Jíízọ̀s à gbóó bĩiná va kọọ̀: “Mée ní boólo bulàì kọọ̀ nda dúù e?” 16 Sáímòn Pítà à aalá kọọ̀: “Oloò Kráìst, eo dúù Sã́áná Bàrì ea di dùm.” 17 Jíízọ̀s à aalá nèe kọọ̀: “Ẹ́ẹ́-ẹẹ̀ nyíe á dì ní ló e Sáímòn nvín Jónà, boo béè kọọ̀ níì nom̀ kpáló nè mii ní ea náa kọ ó nyimáé nì, sõò ńdáà Tẹ̀ ea di káálá ní ea náa kọ ó nyimá ẽ́. 18 Nagé, m̀ kọ́ọ̀ nè ni kọọ̀: Oloò Pítà, vaá boo demí ní e nda é tib ńdáà bõ̀ònatõ̀ò ẽ, vaá nùtọọ̀ Bànà Ú* náa é láá bé èlbá. 19 Nda é né ni íílaà Boǹ Méné Bàrì, vaá kọ̀láá kà nu eo bọ́bvì gbẹá boo kunukẽ̀í é dú nú e ba beè bọbví gbẹá káála, vaá kọ̀láá kà nu eo táàlà gbẹá boo kunukẽ̀í é dú nú e ba beè taalá gbẹá káála.” 20 Tṍóá, à gbóó palàge ãane pá a gbò nyòòne nvée kọ bà á gá kọ́ nè tọ́ọ̀ nen kọọ̀ ẹlẹ ní ea dúè Kráìst e.
21 Lọl tṍóá ààmà, Jíízọ̀s beè gbóó dààmà togó gè baatẽ́ nè pá a gbò nyòòne nvée kọ à é kilìè Jèrúselẹ̀m, vaá à é monìè gã́bug tã̀àgã̀ gbẹá bá gbò kànen pá Júù nè gbò togó vààla gyọ́ọ nè gbò émì kpá, vaá bà é fẹ́ẹ̀ẹ, sõò ní ea égè taà dee Bàrì é kẽeèèe lọl kemà ú. 22 Tṍóá, Pítà à gbóó faaláẹ kilma kpògà kẽ gé kọ́ẹ bel kọọ̀: “Á lọ̀ e Neń Ea Íém, nú ea náa vó náa é nááa ní ló.” 23 Jíízọ̀s à gbóó kììa ló kẽ ẹ̀b Pítà vaá kọ́ nèe kọọ̀: “Tení ààḿ sĩ́, e Sétàn! Ò dúù kpò dem̀ kúm̀ tọ́ ló nèàm, boo béè kọọ̀ nóo bugì togó belí Bàrì, sõò ò bugì togó belí nen.”
24 Tṍóá, Jíízọ̀s à gbóó kọ́ nè pá a gbò nyòòne nvée kọọ̀: “Be à íe neń ea gbĩ́ gè nyooném nvée, á kìn a lóó, vaá dàlà a té tã̀àgã̀* vaá gbóó kilsĩ́ gè nyooném nvée. 25 Boo béè kọọ̀ kọ̀láá nen ea gbĩ́ gè kpènà a dùm é pee, sõò kọ̀láá neń ea pee a dùm boo béè nda, é íe dùm. 26 Mm̀ kà-kà, mókà bélè ní e nen é íe be à íe dénè nu ea di bàlà booí vaá à pee a dùm ẽ, sẹ̀ éé ní e nen é láá nè kọbé à kpáá ié dùm ẽ? 27 Boo béè kọọ̀ Sã́áná nená é fáálá ka e a Tẹ̀ beè nèe domá, vaá à é fáálá pá a gbò nyómá tóm bììa ló, vaá à é ne kpẽ́ buù nen dẹ̀ẹ̀a boo a láb. 28 M̀ lóò kà-kà bel nèi kọọ̀ sìgà gbò e bà di kĩí náa é ú dọ̀ọ̀mà tṍó e bà é mon Sã́áná nená ea gé dú mm̀ a Boǹ Méné.”