Tóm Gbò E Jíízọ̀s Beè Lẹ̀ẹ̀là
19 Tṍó e gbò nuí gé nááá e Àpọ́lọ̀s di Kọ́rìnt, Pọ́ọ̀l beè tení boo kpò ea di kpã́á aa ló pène kil Ẹ́fẹsọ̀s. A beè mòn sìgà gbò nyòòne nvée gbẹá kĩá 2 vaá gbóó kọ́ nèva kọọ̀: “É kọọ̀ Bàrì beè nèi nyómá káí tṍó eo beè dui gbò nyòòne nvéè Jíízọ̀s?” Bà aalá nèe kọọ̀: “È gáà dã nú ea kil ló nyómá káí tọ́ọ̀ dee.” 3 Vó à naa, à gbóó kọọ̀: “Éé ní e ba beè elá boo túi diilé múú ẽ́?” Bà aalá kọọ̀: “E beè dììa múú dẹ̀ẹ̀a boo nòòmànù Jṍòn.” 4 Pọ́ọ̀l à kọọ̀: “Jṍòn beè tú gbò nen diilé múú boo béè kọ bà ọ́gá, vaá kọ́ nèva kọ bà á ié zìgà mm̀ nen ea gé dú nvéè ẹlẹ, ea dú Jíízọ̀s.” 5 Tṍó e bà dã́ naa vó, bà gbóó dììa múú boo béè Jíízọ̀s ea dú Nen Ea Íéi. 6 Vaá tṍó e Pọ́ọ̀l dẹlẹ́ va bá ból, bà beè gbóó ié nyómá káí, naa ní e bà daamà togó gè ló kele-kele dém bel vaá kọ́ bùlà Bàrì. 7 Dénè ọ̀và beè láá toolá 12 nen.
8 A beè bã tọ bõ̀ònaló fã̀ pá Júù, vaá mm̀ taà ẽ́, a beè tú agẹ ló nèèmà lòbèl, vaá palàge zọ̀ va bugi togó boo nú ea kil ló Boǹ Méné Bàrì. 9 Sõò tṍó e sìgà gbò íe agẹ togó vaá bà náa zigà nú ea gé kọ́, vaá ló pọ́lọ́ bel ea kil ló Kà-kà Èèlèa gbẹá kèsĩ́ gbò nen, Pọ́ọ̀l à gbóó kpòòlà lóó lọ̀l vá ló vaá kolí gbò nyòòne nvéeá kilma mm̀ tọọ̀ kpá Tẹ̀ránòs vaá olòó tõó kĩá noomà vá nú kọ̀láá dee. 10 Níí beè kilsĩ́ gè naaá mm̀ bàà gbáá naa ní e dénè pá Júù nè pá Gríìs e bà di bálásĩ́ Ésìà beè dã́ moǹ bel Nen Ea Íéi.
11 Vaá Bàrì beè kilsĩ́ gè tú Pọ́ọ̀l siimá gbele-gbele tóm dũ̀ùnè, 12 naa ní e bà géè faalá bã̀àna kọ̀là ló nè báà kàn e bà ólò uuá boo gbàà ea daàa ló Pọ́ọ̀l ààmà gé daá ló gbò e kpáló va gé zọ vaá kpáló va válí, vaá kọbèè zọ géè àà vá m. 13 Sõò sìgà pá Júù e bà ólò kyã̀à tení ló kẽ kpó zọ lọl mm̀ gbò nen beè gbĩ́ gè tu nagé béè Jíízọ̀s, ea dú Nen Ea Íéi kpoomá zọ lọl mm̀ gbò nen. Bà géè olòó kọọ̀: “Nda élà boo béè Jíízọ̀s e Pọ́ọ̀l gé kọ́ kpẹ̀a ea kil lóá kọọmá nè ni kọ ó ààẹ́ m.” 14 Tṍóá, à íe ene kà neǹ togó gbò vààla gyọ́ọ ea dú Júù, ea bée kọlà Sívà, e àlàbà kà pá a nvín géè olòó naa vó. 15 Sõò zọá beè kọ́ nèva kọọ̀: “M̀ nyímà ló Jíízọ̀s vaá m̀ nyímà nàgé ló Pọ́ọ̀l, sõò booloò bà mée ẽ́?” 16 Tṍóá, nen e zọ di m-ã́ beè gbóó pẹẹ tavẹ́ va, vaá bé buù ọ̀và èlbá, naa ní e ba beè kyã̀àmà kóló kpáló teelá aa tọá dọ kèdẹi, vaá kom beè bã̀ vá ló. 17 Dénè pá Júù nè pá Gríìs e bà di Ẹ́fẹsọ̀s beè gbóó dã́ nú ea kil ló. Pọ̀ beè sii dénè ọ̀và vaá ka beè gbóó palàge bã ló béè Jíízọ̀s, ea dú Nen Ea Íéi. 18 Vaá gã́bug gbò e ba ni íe zìgà mm̀ Jíízọ̀s beè gbóó dù gé kọ́ ba pọ́lọ́ nè gbò láb e bà ólò labví. 19 Mm̀ kà-kà, gã́bug gbò e bà ólò bó biè beè tú ba kpá domá vaá kpá sã́ ló gbẹá kèsĩ́ dénè nen. Ba beè bugi kpègè ea sí vaá à toolá 50,000 kpègè e ba náàmà ẹ́ẹ́ kpé. 20 Moǹ bel Jìhóvà* beè gbóó kilsĩ́ gè zààlà vaá palàge ié kói.
21 Tṍó e gbò nuí ni nááá lọ̀l, Pọ́ọ̀l beè gbóó beeláfùl kọọ̀ tṍó ea ni aalìè Màsìdónìà nè Àkéíà, à é kilìè Jèrúselẹ̀m. A beè kọọ̀: “Tṍó em é iná kĩá, m̀ é sí nágé Róm̀.” 22 Vó à naa, a beè gbóó lẹ̀ẹ̀là Tímotì nè Èrástọ̀s e bà ólò zọ̀ẹ siá tóm kilma Màsìdónìà, sõò ẹlẹ beè zẹ́ẹ́ kpáá tõó bálásĩ́ Ésìà.
23 Tṍóá, kà agẹ bá tã̀àgã̀ ea kil ló Kà-kà Èèlèa beè bã kẽ. 24 À íe ene kà gbálà ea kọlà Dìmítrìọ̀s, ea ólò tú ẹ́ẹ́ kpé dèmà nu. À ólò tú ẹ́ẹ́ kpé dèmà ńtọọ̀ káí Átemìs, vaá níí ólò naa kọọ̀ gbò e bà ólò sí tóm kalì á ié gã́bug kpègè. 25 A beè kolí va bií ló dõona gbò e bà ólò sí nágé tẽ̀ènè íb tómá bõonè vaá kọọ̀: “Pá nà kóò, ò palàge nyimai kọọ̀ píílaí ní ea ólò naa kọ é ié kpègè e. 26 Kátogóí, o monii vaá dãi bé e Pọ́ọ̀l ni náa kọọ̀ gã́bug nen á zìgà kọọ̀ gbò ńbàlì e bà náàmà báí náa dú kà-kà bàrì naa. Náa náa gbẹá áá Ẹ́fẹsọ̀s, sõò sigè ńkem à íná dénè ketõ̀ò ea di bálásĩ́ Ésìà. 27 Gbá ló vó, tã̀àgã̀ ea gbóó dì dú gè kọọ̀, níì áá gè kọọ̀ gbò nen é ló pọ́lọ́ bel kilma ló bẹẹ pííla nì, sõò bà é gbóó ẹ̀b tọọ̀ káí gbele bàrì Átemìs* tẹlẹ kẽ. Dénè gbò e bà di bálásĩ́ Ésìà nè gbò e bà di zivèkà boo kunukẽ̀í ólò fã̀e, sõò bel e Pọ́ọ̀l lóí é náa kọ bà á gá lèèlà nàe.” 28 Tṍó e bà dã́ belí, súng à gbóó palàge bã̀ va naa ní e bà vúlí kpã́ kọọ̀: “Átemìs, e pá Ẹ́fẹsọ̀s ólò fã̀ palàge bọọ!”
29 Vó à naa, bà beè gbóó nvèè tã̀àgã̀ boná vaá sii Géíọ̀s nè Àrístakọ̀s e bà dú Màsìdónìà, e ba beè zọ̀ Pọ́ọ̀l gbá tọá kilma kèdẹí tọ gbò. 30 A beè tàn Pọ́ọ̀l ge àà sí ló gbòa, sõò gbò nyòòne nvéè Jíízọ̀s náa beè zìgà. 31 Bã̀àna sìgà pá a kóò e ba beè di togó sẹ̀lẹ̀nù nè gbò bìlà bil e bà ólò bila bálásĩ́ kĩá beè lẹ̀ẹ̀là tóm máe vaá bànie kọ á gá tú a lóó nvee kèbá gẹẹ-gẹẹ ló tení dú ló gè sí kèdẹí tọ gbòá. 32 Kàsĩ́, sìgà gbò e bà di kĩá géè vulígi kpã́ vaá ló bel, boo tṍó e nagbòa gé ló ńdõona ból, boo béè kọọ̀ tã̀àgã̀ beè di gbàà gbò e bà bṍóná kĩá, vaá gbele tõ̀ò ọ̀và náa beè nyimá nú ea náa bà bõoná kèdẹí tọ gbòá. 33 Vó à naa, pá Júù beè gbóó tãgĩ bá Àlẹ̀kzándà lọl gbàà gbòa kilma deèsĩ́. Àlẹ̀kzándà à gbóó tú bá loomá bel nè gbòa kọ bà á pãane tṍ kọbé à lóè bel. 34 Soò tṍó e bà nyímá kọ à dú Júù, dénè ọ̀và beè gbóó kũune mon vulí kpã́ mm̀ nú ea é láá dú bàà kà ávà kọọ̀: “Átemìs, e pá Ẹ́fẹsọ̀s ólò fã̀ palàge bọọ!”
35 Tṍó e nen ea ólò emí kpá boná ni láá naa kọ gbòa á pĩigã́, à gbóó kọọ̀: “Pá nà vígà eo dúì Ẹ́fẹsọ̀s, mée ea dìí gbàà ní e bè náa nyímá kọọ̀ Ẹ́fẹsọ̀s ní ea ólò ẹ̀b nú ea kil ló tọọ̀ káí gbele Átemìs nè nú ea beè dọ̀ aa káála ẹ́? 36 Tã́gíní bé e kọ̀láá nen nyímá naa vóá, dĩinei ló vaá ó gá labvii láb mm̀ gbala-gbala. 37 O beè tui gbò gbálàí domaí kĩí, níì boo béè kọ bà zib nú tọọ̀ káí àbèè kọ bà on bẹẹ bàrì nì. 38 Vó à naa, beè Dìmítrìọ̀s nè gbò e bà ólò sí tóm kalì e bà dìé ló íe bel kilma ló enè nen, è íè gbò e bà gé bẹl nè deé e ólò beelá bel. Bà á tú bel e bà gbĩ́ gè ló ló ene domá deeá. 39 Sõò be à íe dõona kà log eo monìì kọ bà dọ, gbò e bà ólò beelá bel é ẹb m dẹ̀ẹ̀a boo bé e log kọ́ naa. 40 È di kèbá gẹẹ-gẹẹ ló boo béè kọọ̀ gbò nen é láá lói bel ló kọ è lọl togó kèbá kpóó ea gé bẹl, boo béè nú ea nááá nieí, tã́gíní bé e née íè nú eé láá kọ̀ kọọ̀ tã̀àgã̀í dú boo á.” 41 Tṍó ea ló belí lọ̀l, à gbóó kọ́ nè dénè gbòa kọ bà á àà.