Kpá E Pọ́ọ̀l Beè Lẹ̀ẹ̀là Má Pá Róm̀
7 Pá nà vígà, nóo nyímàì kọọ̀ Log ólò lẹ̀ẹ̀là bel ló nen dénè dee ea dììma dùm? (M̀ gé ló belí nè gbò e bà nyímá nú ea kil ló log.) 2 Dì belí nu dòòmà bá, log ténmá kọọ̀ pábia ea beè iá dóm é dí ló a dóm tṍó e a dóm di dùm, sõò beè a dóm ú, à di pọ́ì aa kèbá log a dóm. 3 Vó à naa, tṍó e a dóm di dùm, bà é kólíe neǹ kúnàgã̀ be à íá dõona kà dóm. Sõò beè a dóm ú, à di pọ́ì aa kèbá log a dóm, vaá bà náa é kólíe neǹ kúnàgã̀ be à íá dõona kà dóm.
4 Vó à naa e pá nà vígà, o beè u naigé kilmaí kĩée e Log dì tení dú ló nom̀ kpáló Kráìst, kọbé ò láá dii nei Kráìst, ea dú nen e Bàrì beè kẽée lọl kemà ú kọbé è láá mumí ból súú ea é nveè ka ló Bàrì. 5 Boo béè kọọ̀ tṍó e géè tõó dùm dì belí bé e bẹẹ nom̀ kpáló gbĩ́ kọ é tõo naa, Logá beè naa kọ é nyimá kọọ̀ gbò pọ́lọ́ tàn ea di mm̀ bẹẹ nom̀ kpáló ólò naa kọ é sí pọ́lọ́, vaá níí ólò màn ú. 6 Sõò kátogóí, e dí pọ́ì aa kèbá Log, boo béè kọọ̀ náa kpegà nàí deè* naa ní eé gbóó láá dú gyóòlo mm̀ ãa sĩ́deè tení dú ló nyómá káí, vaá née é dú ná gyóòlo mm̀ nómá sĩ́deè tení dú ló log e ba beè emí boo nu.
7 Beè vó, éé ní e gé kọ́ ẹ́? É kọọ̀ Log dú náàkyọ̀? Ẽ́èe, níì vó nì! Mm̀ kà-kà, nda ním gáẹ̀ beè nyima ló nú e náàkyọ̀ kọlà be níì Logá nì. Dì bélí nu dòòmà bá, nda ním gáẹ̀ beè nyimá ló nú ea kọlà ge ié bẹẹ súú dẽe, beè Logá náa beè kọọ̀: “Nóo é íè ge ié bẹẹ súú dẽe.” 8 Sõò log náa kọọ̀ náàkyọ̀ á ié nèà dee ge naa kọ ḿ ié kọ̀láá íb dùm bẹẹ nyíe, boo béè kọọ̀ tṍó e log náa beè dì, náàkyọ̀ náa beè ié kpóó. 9 Kàsĩ́, nda beè di dùm tṍó e log náa beè dì. Sõò tṍó e log dú, à gbóó tẹlẹ bàlà kẽ kọọ̀ m̀ dúù neǹ náàkyọ̀, vaá m̀ gbóò ù. 10 Log ea gáẹ̀ naa kọ ḿ ié dùm ní ea oòa kẽ màn ú nèm ẽ́, 11 boo béè kọọ̀ log náa kọọ̀ náàkyọ̀ á ié nèà dee ge kẹlẹ́m vaá fẹ́m. 12 Vó à naa, Logá boo a lóó di káí vaá gbò nú ea kọ́ di káí, gbõoma, vaá dú lé.
13 Vó à naa, é kọọ̀ nú ea dú lé ní ea man ú nèm ẽ́? Ẽ́èe, níì vó nì! Sõò náàkyọ̀ ní ea náa ẽ́. À náa vó tení dú ló nú ea dú léá kọbé log zógè tẹlẹ bàlà kẽ bé e náàkyọ̀ dú kà pọ́lọ́ naa. 14 È nyímà kọọ̀ Logá aa bá Bàrì, sõò nda di mm̀ nom̀ kpáló, vaá ba beè túm oolá náàkyọ̀. 15 Boo béè kọ ním dã́à ból ló nú em gé náa, ním ólò naa nú ea taním gè naa, sõò nú em ọ́bvì ní em ólò naa ẽ́. 16 Sõò be m̀ náa nú e ním beè gbĩ́ gè naa, m̀ zigà kọọ̀ Logá dú lé. 17 Kátogóí, níì nda ní em gé kpáá naa nuá ẽ́ nì, sõò náàkyọ̀ ea dìḿ m ní ea gé náa ẽ́. 18 Nda nyímà kọọ̀ tọ́ọ̀ kà lé nu á gé mm̀ ńdáà nom̀ kpáló, boo béè kọọ̀ m̀ íè tàn ge naa nú ea dú lé, sõò ním íè kói gè naamá. 19 Ním ólò naa lé nú ea taním gè naa, sõò pọ́lọ́ nú e bè náa taním gè naaá ní em ólò naa ẽ́. 20 Beè vó, be nda náa nú e ním beè gbĩ́ gè naa, níì nda ní em náà nuá ẽ́ nì, sõò náàkyọ̀ ea dìḿ m ní ea náa ẽ́.
21 M̀ monì kọọ̀ à íe log ea gé lẹẹlàm bel ló: Tṍó em gbĩ́ gè naa lé, tàn ge naa pọ́lọ́ ní ea ólò bàḿ m ẽ́. 22 Log Bàrì ólò palàge leemám boo béè íb nen em dúù, 23 sõò m̀ monì kọọ̀ dõona kà log di mm̀ nà nom̀ kpáló ea gé bé log ea dìḿ nyíeá, vaá siím naamá gyóòlo nvee bá log náàkyọ̀ ea di mm̀ nà nom̀ kpálóá. 24 Nda dúù kà ńsàn! Mée ní ea é duulàm lọl bá nom̀ kpáló ea é man ú nèm mí ẽ́? 25 M̀ ṍà Bàrì zaa tení dú ló Jíízọ̀s Kráìst, ea dú Neń Ea Íéi! Mm̀ nà nyíe, nda dúù gyóòlo nè log Bàrì, sõò nà nom̀ kpáló dú gyóòlo nè log náàkyò.