Tóm Gbò E Jíízọ̀s Beè Lẹ̀ẹ̀là
28 Tṍó e ni íná boo kpò mm̀ fẹ́ẹ́-fẹẹ̀ ló, e beè gbóó nyimá kọ bà kólí kpò kunukẽ̀ e múú bééá tení lóá kolíe Móltà. 2 Gbò e bà di kĩá beè tú kà lé bá tuumái. Ba beè kpá sã́ nèi kọ é zùgà, boo béè kọọ̀ boo géè dọọ vaá tọ́ọ beè dì. 3 Sõò tṍó e Pọ́ọ̀l ṍá kã́áni nvee dáà sã́á, sã́ beè gbóó kòn ene kà kpí bom naa ní ea téélá aa gbàà kã́ániá domí bá Pọ́ọ̀l. 4 Tṍó e gbò e bà dú boná mon naanàa ea di kẹla ló bá Pọ́ọ̀l, bà gbóó kọ́ nè ene kọọ̀: “Mm̀ kà-kà, gbálàíì neǹ fẹ̀ nèn, vaá náa kal ló béè kọọ̀ a duuà aa sĩ́ pène, à é ú boo béè kọọ̀ níà kpọ̀té ea kuúe.” 5 Sõò a beè zìgè naanàa lọa ló báẹ tẹlẹ dáà sã́ vaá tọ́ọ̀ nu náa beè naáe. 6 Bà géè ẹ̀bmà dẽe kọọ̀ báẹ é be àbèè kọọ̀ à é bú ló tooá dọ̀ ù. Sõò tṍó e ba ni élá gã́bug tṍó vaá mòn kọọ̀ tọ́ọ̀ kà pọ́lọ́ nu náa náaé ló, bà gbóó nyaaná nyíe vaá kọọ̀ ẹ̀ẹ̀ bàrì.
7 Pọ́bliọ̀s, ea dú méné boo kpò kunukẽ̀ e múú bééá tení lóá beè ié sìgà kunukẽ̀ kuló kĩá, vaá a beè tú lé bá tuumái vaá faalái kyáà taà dee. 8 Tẹ̀ Pọ́bliọ̀s beè di mà kẽ́ tọ boo béè kọọ̀ sìsã́ géè síé ló vaá gbààẹ géè kolá. Pọ́ọ̀l à gbóó síé ló gé dẹlẹ́ẹ bá ból, tã̀àgã̀e ló Bàrì boo, vaá bóe. 9 Tṍó e níí nááá lọ̀l, dénè nagbò e kpáló va géè zọ̀ e ba beè di boo kpò kunukẽ̀ e múú bééá tení lóá beè gbóó dúé ló, vaá a beè bó va. 10 Ba beè zogè kọ bà zaavàẹ̀ ló nú e Pọ́ọ̀l beè naaá tení dú ló gè dõo gã́bug nu nèi, vaá tṍó e ni bã́ mm̀ mìàlo eé gé àà, ba beè nèi kọ̀láá kà nú e íè bíi ló.
11 Taà ẽ́ aa ló tṍóá, e beè bã mm̀ mìàlo e bà tṍ bée ea kọlà “Pá Nvín Zúùs” sẹlẹ́ deèsĩ́. Mìàloá géè aa Àlẹ̀kzándrìà, vaá a beè zẹ́ẹ́ tõó boo kpò kunukẽ̀ e múú bééá tení lóá tṍó tọ́ọá. 12 E beè gbóó iná nù múú Sírakìùs vaá tõó kĩá taà dee. 13 E beè gbóó aa kĩá iná Rígìòm. Tṍó e enè dee ni téní, fọ́ọ́lọ́ ea aa deè kpọ̀lọ̀-kpọ̀lọ̀ beè ùlà vaá è gbóó iná Pùtíolaì ní ea égè bàà dee. 14 E beè mòn pá vígà gbẹá kĩá vaá ba beè bànii kọ é tú àlàbà dee tõomàè vá ló. Tṍó e aà kĩá, è gbóó kpee sĩ́ deè Róm̀. 15 Tṍó e pá vígà e bà di kĩá dã́ nú ea kilíí ló, bà gbóó dú kà kpã́á Kèkiì Ápiọ̀s nè Taa Kà Tọ Gbò Kyáà gé mònii. Tṍó e Pọ́ọ̀l moń va, à gbóó õá Bàrì zaa vaá ié agẹ ló. 16 Tṍó e ínà Róm̀, ba beè sọ̀tọ́ deè kọọ̀ Pọ́ọ̀l á tõó kĩée ea é dú áá ẹ̀ẹ̀ vaá neǹ bé á kùe dẽe ló.
17 Sõò tṍó e taà dee ni téní, a beè gbóó kolí pá Júù e bà íe pọ̀b dọ̀ bõonè. Tṍó e ba ni bṍóná, à gbóó kọ́ nèva kọọ̀: “Pá nà vígà, náa kal ló béè kọ m̀ gáà naa tọ́ọ̀ nu uú boo pá bẹẹ gbò àbèè ge naa uú boo nàànù kunukẽ̀ bẹẹ gbò nómá tẹ̀, ba beè túm nvee kpọ́gọ́lọ́ gbẹá Jèrúselẹ̀m vaá túm lọa bá nè pá Róm̀. 18 Bà géè gbĩ́ gè sọ̀m bá tṍó e ba ni ẹb mm̀ nà bel lọ̀l, boo béè kọ bà náa beè mòn tọ́ọ̀ kà nú ea é náa kọ bà á fẹ́m. 19 Sõò tṍó e pá Júù náa zigà kọ bà á sọ̀m bá, m beè gbóó beeláfùl ge zalí kpá ló belá má Sízà, sõò níì boo béè kọọ̀ à íe nú em gbĩ́ gè kọ́ uú boo pá beélè dó nì. 20 Níà nú ea náa vaá m beè gbĩ́ gè mònii vaá zọ̀i loá bel é, boo béè kọọ̀ ból dẽesĩ́ e pá Ízrẹẹ̀l íe ní ea náa ko bà á tú kpọ́gọ́lọ́í iilám bá ẹ́.” 21 Baala à kọ́ nèe kọọ̀: “È gáà ie tọ́ọ̀ kà kpá lẹ̀ẹ̀la tóm ea aa Jùdíà ea kil ní ló, àbèè kọọ̀ à íe pá bẹẹ vígà e bà aa kĩá e ba ni dú gé nè kpẹ̀a àbèè ge ló ene kà pọ́lọ́ bel ea kil ní ló. 22 Sõò è bulà kọ à dú lé gè dã́ ńlóò bùlà, boo béè kọ è nyímà kọọ̀ bà ólò ló pọ́lọ́ bel uú boo gbò e bà gé nyoone nvéè Jíízọ̀s gbẹá kọ̀láá ketõ̀ò.”
23 Bà gbóó noo deé e bà é síé ló, vaá tṍó e deeá lée, kà gã́bug ọ̀và beè gbóó síé ló gbẹá kĩée ea ólò tõo. A beè baatẽ́ nú ea beè naaá nèva vaá tú agẹ bá siimá neǹ ditõ̀ò ea kil ló Boǹ Méné Bàrì lọl boo lọ̀ọ̀le tẹlẹ̀ ló èlà, vaá noomà va nú ea kil ló Jíízọ̀s lọl mm̀ Log Mózìs nè Kpá Gbò Kọ́ọ̀ Bùlà Bàrì. 24 Sìgà ọ̀và beè ziga ló nú ea kọ́, sõò sìgà ọ̀và náa beè zigà. 25 Vó à naa, boo béè kọ bà ná beè ié kũ̀ùnà mòn, bà gbóó dààmà togó gè àà. Pọ́ọ̀l à gbóó kọọ̀:
“Bel e nyómá káí beè ló nè bọọ gbò nómá tẹ̀ tenmá gã́ neǹ kọ́ọ̀ bùlà Bàrì Àìzáíàa dú kà-kà. 26 A beè kọọ̀, ‘Àà gé kọ́ nè gbòí kọọ̀: “Ò é dã́i nu, sõò nóo é dã́i ból ló, vaá ò é ẹbvii, sõò nóo é monii. 27 Boo béè kọọ̀ nyíè gbòí a aga belí dem. Bà dã́ nu, sõò bà náa lábví láb nyòòmà. Bà bii dẽé va, vaá ká tṍ va kobé bà náa mon tọ́ọ̀ nu àbèè ge dã́ nu. Bà náa vó kọbé bà náa dã́ kà ea di m, vaá òòa kẽ dúm ló naa ní em é bó va.”’ 28 Vó à naa, nyimai kọọ̀ baa kọ́ nú ea kuu dùùà ea aa bá Bàrì nè pá dõona kà dó, vaá bà é pãane tṍ ló.” 29* ——
30 A beè tú bàà gbáá tõ̀òma mm̀ tọ ea beè bàn gbẹá kĩá, vaá à ólò tú lé bá tuumá kọ̀láá gbò e bà dúé ló, 31 vaá tú táàa ló* kọọmá nú ea kil ló Boǹ Méné Bàrì nè ge noomà va nú ea kil ló Nen Ea Íéi, ea dú Jíízọ̀s Kráìst, vaá tọ́ọ̀ nu náa beè kpègie.