Lé Kpẹ̀a E Máátìù Beè Emí
3 Mm̀ gbò deeá, Jṍòn Neǹ Dììlè Nen Múú beè dì ea géè kọ́ kpẹ̀a boo kpáà bàlà ól Jùdíà, 2 kọọ̀: “Ọgai, boo béè kọọ̀ Boǹ Méné Bàrì a íná kuló.” 3 Kàsĩ́, Jṍòn ní e neǹ kọ́ọ̀ bùlà Bàrì Àìzáíà beè kọ́ nú ea kil lóá ẹ́, kọọ̀: “À íe neń ea di boo kpáà bàlà ól ea gé vee kọọ̀: ‘Sii tóm ló èèlè Jìhóvà!* Naanii kọọ̀ gbò a èèlè á lèlà.’” 4 Jṍòn beè nvèà kọ̀là ló e bà tú gyáà Kámeẹ̀l naamá vaá tú kpá láá e bà náàmà kpá nom bọá tõ̀ò tẽ́. Ńgùlù bèè nè nóò záá zóó ní ea beè dú a gyã́á ẽ́. 5 Tṍóá, gbò e bà di Jèrúselẹ̀m nè dénè Jùdíà nè dénè dó ea di kuló Jọ́dàn géè síé ló, 6 vaá a beè tú va diilé múú mm̀ Pène Jọ́dàn tṍó e bà kọ́ ba pọ́lọ́.
7 Tṍó ea mon gã́bug pá Fárìsíì nè pá Sádùsíì e bà dú ló gè dììa múú, à gbóó kọ́ nè va kọọ̀: “Booló pá nvín kpí bom, mée ní ea ãanéi kọ ó teelai aalíí bá súng Bàrì e? 8 Beè vó, labvii láb ea zógè kọ o ọ́gai. 9 Ó gá kọi neai bọọ bá kọọ̀, ‘Ébràhám̀ dú bẹẹ nómá tẹ̀.’ Boo béè kọ m̀ kọ́ọ̀ nèi kọọ̀, Bàrì é láá kììlà gbò kpò demí naamá gbò pá nvín nè Ébràhám̀. 10 Kigi a íná kpò kúm gbò téá. Bà é kẽ́e kọ̀láá kà té e náa múmí lé ból súú tẹlẹ kẽ vaá tobví tẹlẹ dáà sã́. 11 Nda túùi diilé múú boo béè kọ ò ọ́gàì, sõò neń ea gé dú nvéè nda el kpãà nda, vaá ním sim̀ tùlà ge tú a kpá kátọ lọ̀líé tọ. À é túi diilé múú tení dú ló nyómá káí nè sã́.* 12 A tọ̀ ge sààmà súú lọl gbàà kpá dìé bá. À é kpálí tọ ea beè tõo sàa õ̀ònà, vaá à é bṍònè ló súúá sẹlẹ́ mm̀ tọ gè kpoogè dee ló nu, sõò à é kpá sã́ ló kpá ea dú ló vaá bà náa é láá gimè.”
13 Tṍóá, Jíízọ̀s beè gbóó aa Gálilì sí Jọ́dàn ló Jṍòn kọ á tuèe diilèè múú. 14 Sõò Jṍòn beè gbĩ́ gè kpègie vaá kọ́ nèe kọọ̀: “Nda ní em gáẹ̀ beè dú ló olo kọ ó túm diilé múú ẽ́. Éé ní ea náa kọ ó dú ló nda ẹ́?” 15 Jíízọ̀s à aalá nèe kọọ̀: “Aa ló á naaá naa vó, boo béè kọọ̀ tṍó ea nááá naa vó ní eé láá naa kọ̀láá kà nú ea lelà kèsĩ́ Bàrì e.” Tṍó ea dã́ naa vó, náa beè kpèg nàe. 16 Tṍó e Jíízọ̀s diia múú lọ̀l, a beè gbóó aa mm̀ múúá dọ bàlà kẽ. Káála beè kùùà vaá à gbóó mòn nyómá káí Bàrì ea meà belí kúkuú kẽ ea dú gé eláẹ́ boo. 17 Tṍóá, mon beè sìlà nàgé aa káála kọọ̀: “Níì nà Sã́áná em vulè, nyíém palàge ẹẹẹ́ ló.”