Lé Kpẹ̀a E Jṍòn Beè Emí

15 “Nda ní em dúù lèlà sĩ́ té vã́ìn ẽ, vaá ńdáà Tẹ̀ ní ea gé ẹb nú ea kil ló téá ẹ́. 2 À ólò gbọ́ kọ̀láá kà gbónó e bè náa múmí ból lọ̀lím ló, vaá lalá kọ̀láá kà ní ea mumí ból súú kọbé à kpáá mumí gã́bug. 3 Boolo dií õ̀òa boo béè gbò bel e nda beè kọ́ nèi. 4 Kilíí sĩ́ gè iei lé gbaa ló kilmai ló nda, mè nda é kilsĩ́ gè ié lé gbaa ló kìlmàí ló. Dì belí bé e gbónó e náa gbẹá ló té vã́ìn náa é láá mumí ból súú naaá, níà bé e nóo é láá mumii ból súú be nóo kilìì sĩ́ gè iei lé gbaa ló kilmaí ló nda naaé. 5 Nda ní em dúù té vã́ìn ẽ. Boolo ò dui gbò gbónó ea di ló. Kọ̀láá nen ea kilsĩ́ gè ié lé gbaa ló kilma ló nda, vaá nda à ié lé gbaa ló kìlmàé ló é mumí gã́bug ból súú, boo béè kọ nóo é láá naanii tọ́ọ̀ kà nu be nda á géí ló. 6 Kọ̀láá nen e bè náa kilsĩ́ gè ié lé gbaa ló kilma ló nda, bà é tobvíe gbẹẹ vaá à kã́a belí gbónó té. Gbò nen é bṍònè ló gbò gbónó téá vaá tobví tẹlẹ dáà sã́ naa ní ea é bẹ́. 7 Be ò kilíí sĩ́ gè iei lé gbaa ló kilmai ló nda, vaá gbò bel em lóò à gbẹáí nyíe, ò é íei kọ̀láá kà nú eo bĩ́ìnàì. 8 À é nveè ka ló ńdáà Tẹ̀ be ò kilíí sĩ́ gè mumii gã́bug ból súú, vaá zogei kọ ò dúì pá ńdáà gbò nyòòne nvée. 9 Dì belí bé e Tẹ̀a vulè nda naaá, níà bé e nda vulè nàgé boólo naa ẽ́. Kilíí sĩ́ gè naanii nú ea é náa kọ ḿ vùlèi. 10 Be ò sẹlẹi nà log, m̀ é kilsĩ́ gè vùlèi, dì belí bé e nda beè sẹlẹ log ńdáà Tẹ̀ vaá à kilsĩ́ gè vùlèm naaá.

11 “M̀ lóò gbò belí nèi kọbé ò íei zààvà e nda íè, naa ní e bọọ zààvà é gbõoma. 12 Log e nda neèi dú gè kọ ó vulei ene, dì belí bé e nda vulè boolo naaá. 13 Náa íe nen ea íe vulè ea bọọ èl níí, kọọ̀ nen é tú a dùm ne boo pá a kóò. 14 Ò dúì pá ńdáà kóò be ò náanii gbò nú em kọ́ọ̀ nèi. 15 Ním kólì nài gyóòlo, boo béè kọọ̀ gyóòlo náa ólò nyimá gbò nú ea tẹ̀ tọ gé náa. Sõò m̀ kólìi pá ńdáà kóò, boo béè kọ m náa kọ ó nyimai kọ̀láá kà nú em beè dã́ lọl gã́ nà Tẹ̀. 16 Boolo nóo beè sai nda, sõò nda ní em beè sà boolo vaá nvèèi tóm bá kọ ó kilíí sĩ́ gè mumii ból súú ea é di lee é, kọbé Tẹ̀a néi kọ̀láá kà nú eo bĩ́ínàìe boo ńdáà bée.

17 “Nakà logí ní em gbóò nèié; vulei ene. 18 Beè pá bàlà boo ọ́bvíi, nyimai kọ ba beè zẹ́ẹ́ ọbví nda besĩ́ bà kalá ọbví boolo. 19 Be o beè dũunai pá bàlà boo, pá bàlà boo gáẹ̀ beè vùlèi. Sõò boo béè kọ nóo dṹùnàì pá bàlà boo, vaá nda beè sài lọl mm̀ bàlà booí, ní ea náa bà ọbvíi é. 20 Tui gbò bel em beè ló nèiá sẹẹaí bùlà, ea kọ́ọ̀: Gyóòlo náa bọọ èl a tẹ̀ tọ. Be ba beè biigè ló nda, bà é bíìgè nàgé ló boólo. Be ba beè tú nà moṅ bel, bà é tú nágé ńboólo. 21 Sõò bà é náa dénè gbò nuí boo béè ńdáà bée, boo béè kọ bà náa nyímá ló Nen ea beè lẹ̀ẹ̀làm. 22 Be ním beè dù gé ló gbò belí nè va, bel náa gáẹ̀ bẽè va. Sõò kátogóí, bà náa íe tọ́ọ̀ kà nú e bà é kọ́, vaá bel aa ló gè bẽè va. 23 Kọ̀láá nen ea ọ́bví nda, ọ́bví nágé ńdáà Tẹ̀. 24 Bel náa gáẹ̀ bẽè va, be ním beè gbẹá vá zẹ̀ẹ̀ sí gbò tóm e tọ́ọ̀ nen gáà laa sì. Sõò kátogóí, baa moním vaá tení boo ọbví ńdáà Tẹ̀ nè m̀m̀. 25 Sõò níí nááá kọbé à ḿm̀-mè nú e ba beè emí mm̀ ba Log, ea kọ́ọ̀: ‘Bà ọ́bvím e bè ním náà va tọ́ọ̀ nu.’ 26 Tṍó e neǹ nvèè bá em é lẹẹlà mái, ea dú nyómá kà-kà bel ea aa bá nà Tẹ̀ é dú, à é élá neǹ ditõ̀ò kìlmàḿ ló. 27 Mm̀ tẽ̀ènè sĩ́deèá, boolo si naigé neǹ ditõ̀ò kilmam mí ló, boo béè kọ o beè dim mí ló lọl dààà togó.