Lé Kpẹ̀a E Máátìù Beè Emí

12 À íe Deè Bõ̀séi e Jíízọ̀s géè kyã̀à tení boo bàlà ól e ba beè fó nu. Tákói à gbóó tá ló pá a gbò nyòòne nvée naa ní e bà dààmà togó gè kã̀ànà nu taa. 2 Tṍó e pá Fárìsíì mon naa vó, ba gbóó kọ́ nèe kọọ̀: “Ẹ̀b! Pá o gbò nyòòne nvée gé náa nú e log náa ténmá kọ bà á naá Deè Bõ̀séi.” 3 À aalá nè va kọọ̀: “É kọọ̀ ò gáà beè bugii nú e Dévìd beè naa tṍó e tákói beè tá ló gbò e ba beè dìé lóá nè ẹ̀ẹ̀? 4 A beè bã tọọ̀ Bàrì tú fétúlú e ba beè nè Bàrì, vaá pá a gbò nè ẹ̀ẹ̀ à dè, ea dú nú e log beè tenmá kọọ̀ áá gbò vààla gyọ́ọ ní bà á dèe, níì ẹlẹ nè gbò e ba beè dìé ló nì. 5 Sẹ̀ ò gáà beè bugii log ea kọ́ọ̀ gbò vààla gyọ́ọ ólò sí tóm Deè Bõ̀séi, sõò bà náa bẽ́gẽ̀ va bel? 6 Kọ̀láá bé ea dì naa, m̀ kọ́ọ̀ nèi kọọ̀ neń ea bọọ èl tọọ̀ káí di kĩí. 7 Be o beè dãi ból ló bel ea kọ́ọ̀, ‘M̀ gbĩ́ì sàn nyíe, níì vààla gyọ́ọ nì,’ nóo gáẹ̀ beè bẽgẽi bel gbò e bà náa dọ log. 8 Boo béè kọọ̀ Sã́áná nená ní ea gé lẹẹlà bel ló Deè Bõ̀séi é.”

9 Tṍó ea aa kĩá, à gbóó àà kil mm̀ ba tọ bõ̀ònaló fã̀, 10 vaá ene kà gbálà e ene kà báẹ ọọ beè di kĩá. Kọbé bà síìmàe log, bà gbóó bĩináe kọọ̀, “É kọọ̀ log ténmá kọ bà á bó nen Deè Bõ̀séi?” 11 À gbóó bĩiná va kọọ̀: “Be ò íei ene kà naanà ból vaá à dọ bànà Deè Bõ̀séi, é kọ à íe neń ea dìí zẹ̀ẹ̀ e bè náa é túe lọl m? 12 Nen palàge bọọ èl naanà ból. Vó à naa, log ténmá kọọ̀ nen á naa nú ea dú lé Deè Bõ̀séi.” 13 À gbóó kọ́ nè gbálàa kọọ̀: “Nììnà bá ni.” À gbóó nììnà báẹ, vaá kà à gbóó bã m belí nakà báá. 14 Pá Fárìsíì beè gbóó àà gé bilá ló kọbé bà fẹ́ẹ̀ Jíízọ̀s. 15 Tṍó e Jíízọ̀s nyímá naa vó, à gbóó aa kĩá àà. Sõò gã́bug nen beè nyoonée, vaá a beè bó dénè ọ̀và. 16 Sõò a beè palàge ãané va kọ bà á gá naa ní e gbò nen é nyímàèe ló, 17 kọbé à ḿm̀-mè bel e Bàrì beè kọ́ tenmá gã́ neǹ kọ́ọ̀ bùlà Bàrì Àìzáíà kọọ̀:

18 “Neenii ńdáà gyóòlo em beè sàí. M̀ vulèe vaá nyíém palàge ẹẹẹ́ ló! M̀ é née ńdáà nyómá, vaá à é náa kọọ̀ dénè dó á nyimá ló nú em ténmà kọ à lelà. 19 Náa é káná-kàna àbèè ge tó dàlà moń boo, vaá tọ́ọ̀ nen náa é dã́e mon gbẹá boo pọ̀b èèlè. 20 Náa é búni víl ea vẹgà lọl dẽe, vaá náa é gímè káa-káà sã́ ea gé bẹ́, dọ̀ọ̀mà tṍó ea é náa kọọ̀ lé bèèla á dọ bàlà kẽ. 21 Mm̀ kà-kà, tení dú ló a bée ní e dénè dó é íe ból dẽesĩ́ ẽ́.”

22 Tṍóá, bà gbóó faalá ene kà gbálà e zọ dìé m, e dẽée gímí vaá náa ólò láá ló bel domáé ló. À gbóó bóe naa ní ea gbóó kpáá ló bel vaá mòn nu. 23 A beè palàge bọọ́ ló dénè gbò e bà di kĩá naa ní e bà bĩ́íná kọọ̀: “É kọọ̀ gbálàí níì nvín Dévìd nì?” 24 Tṍó e pá Fárìsíì dã́ naa vó, bà gbóó kọọ̀: “Kpóó Pọ́lọ́ Nyómá ea kọlà Bìẹ́lzẹbọ̀b ea di togó gbò zọ ní ea gé kpóómá zọ lọl mm̀ gbò nen ẽ́.” 25 Boo béè kọọ̀ Jíízọ̀s nyímá nú ea dì vá nyíe, à gbóó kọ́ nè va kọọ̀: “Kọ̀láá kà boǹ méné ea pooà vaá beá ene é kyọa sĩ́, vaá kọ̀láá kà bon àbèè tọ ea pooà vaá beá ene é labvà. 26 Mm̀ tẽ̀ènè sĩ́deèá, beè Sétàn kpó Sétàn lọl mm̀ nen, à bé áá ẹ̀ẹ̀. Éé ní ea é náa kọọ̀ a boǹ méné á gá kyọa sĩ́ ẽ́? 27 Beè nda túù kpóó Pọ́lọ́ Nyómá ea kọlà Bìẹ́lzẹbọ̀b kpoomá zọ lọl mm̀ nen, kpóó mée ní e bọọ gbò nvín ólò kpoomá zọ lọl mm̀ nen ẽ́? Níà nú ea náa vaá bọọ gbò nyòòne nvée é béélái bel ló é. 28 Sõò beè nyómá káí Bàrì ní e nda gé kpóómá zọ lọl mm̀ nen ẽ́, Boǹ Méné Bàrì a ténií kẽ. 29 Sẹ̀ é kọọ̀ à íe neń ea é láá bã tọọ̀ kpã̀àmà gbálà vaá zìb a nu, e bè náa zẹ́ẹ́ tú díí bọbmáe sẹlẹ́ kẽ? Áá tṍó ea náa vó, ní ea é gbóó láá bã a tọ zìb nu ẽ́. 30 Kọ̀láá nen e bè náa zọ́m dù, gé bém, vaá kọ̀láá nen e bè náa zọ́m bõonè ló gé lagẹlẹ.

31 “Boo béè vó, nda kọ́ọ̀ nèi kọọ̀, bà é ia ló nè kọ̀láá neń ea sí pọ́lọ́ vaá òn nen, sõò bà náa é ia ló nè neń ea on nyómá káí Bàrì. 32 Dì belí nu dòòmà bá, bà é ia ló nè kọ̀láá nen ea ló bel uú boo Sã́áná nená, sõò bà náa é ia ló nè neń ea ló bel uú boo nyómá káí. Bà náa é ia ló nèe mm̀ nakà bàlà booí* àbèè ní ea gé dú sĩ́.

33 “Ò é láá naa kọọ̀ té á dú lé naa ní ea ból súú é dú lé, àbèè ò náa kọọ̀ té á dú pọ́lọ́ naa ní e a ból súú é dú pọ́lọ́. Boo bèè kọọ̀ ból súú ea múmí ní ea é náa kọ bà á nyimá ló téá ẹ́. 34 Booló pá nvín kpí bom, éé ní ea é náa kọ ó láá loi lé bel, boo tṍó eo dúì pọ́lọ́ ẹ́? Boo béè kọọ̀, nú ea ḿ-má mm̀ nen ní ea ólò kọ́ tẹlẹ bàlà kẽé. 35 Lé nen ólò ló lé bel, boo béè kọọ̀ lé nu ní ea dìé nyíe ẽ́, boo tṍó e pọ́lọ́ nen ólò ló pọ́lọ́ bel boo béè kọọ̀ pọ́lọ́ nu ní ea dìé nyíe ẽ́. 36 Nda kọ́ọ̀ nèi kọọ̀ Deè Bèèla Bel, gbò nen é beè nè kpẹ̀a ea kil ló kọ̀láá kà pọ́lọ́ bel e bà géè lò. 37 Boo béè kọọ̀ bel eo lóì ní e bà é élá boo leevèi bel é, vaá bel eo lóì ní e bà é élá boo bẽgẽ̀i bel é.”

38 Tṍóá, sìgà gbò émì kpá nè pá Fárìsíì à gbóó kọ́ nèe kọọ̀: “Neǹ Dòbá, zẹ́ẹ́ sí ene kà tóm dũ̀ùnè e beele é monmà dẽe.” 39 À aalá nè va kọọ̀: “Gbò pọ́lọ́ nè gbò e bà náa bọ́ló dẹ̀lẹ̀ nyíé boo* ólò gbĩ́ gè mònmà dẽè tóm dũ̀ùnè, sõò bà náa é mon tọ́ọ̀ kà, daalá lọl ló ní ea beè naaá ló neǹ kọ́ọ̀ bùlà Bàrì Jónàa. 40 Boo béè kọọ̀ dì belí bé e Jónà beè tõó gbàà pọ̀b kà gyã́à taà bílá zìlà dee naa ã́, níà bé e Sã́áná nená é tõó mm̀ bànà ú taà bílá zìlà dee naa ẽ́. 41 Deé e Bàrì é béélá bel, gbò e bà di nakà kúúlíí nè pá Nínevà é kẽeà aa kemà ú, vaá pá Nínevà é náa nú ea zógè kọọ̀ bel bẽ́è gbòi, boo béè kọọ̀ ba beè ọgá tṍó e Jónà kọ́ kpẹ̀a nè va. Sõò ẹbvii! Neń ea el kpãà Jónà di kĩí. 42 Deé e Bàrì é béélá bel, pábia ea géè bẹ̀l deè kpọ̀lọ̀-kpọ̀lọ̀ nè gbò e bà di nakà kúúlíí é kẽeà, vaá à é zógè kọọ̀ bel bẽ́è gbòí, boo béè kọ a beè aa kpã́á deè dù gé pãane tṍ ló nyìmànù e Sólomòn íe. Sõò ẹbvii! Neń ea el kpãà Sólomòn di kĩí.

43 “Tṍó e zọ aa mm̀ nen, à ólò tení gbò kĩée e múú á gé, gé gbĩ́ ketõ̀ò bõ̀séi, sõò náa ólò mòn. 44 Tṍóá, à ólò gbóó kọọ̀, ‘M̀ é ooà kil nà tọ em beè dì,’ tṍó ea íná vaá mòn kọọ̀ tọ́ọ̀ nen á gé m, sõò ba beè kpalí õ̀ònà vaá sí tóm ló, 45 à ólò gbóó òòa kẽ gé tú dõona kà àlàbà kà nyómá e bà dú pọlọ́ èl ẹlẹ tẹẹá ló, vaá tṍó e ba ni bã́é m, bà ólò gbóó tõoé m. Dìtõ̀ò nená ólò gbóó zoogá èl bé ea beè dì naa túá bólá. Níà bé ea é meà nàgé naa ló nakà pọ́lọ́ kúúlíí é.”

46 Boo tṍó ea dì ea gé ló bel nè gbòa, a kà nè pá a vígà págbálà beè di kèdẹi e bà géè gbĩ́ gè ló bel nèe. 47 Enè nen à gbóó kọ́ nèe kọọ̀: “Ẹ̀b! O kà nè pá o vígà págbálà di élá kèdẹi e bà gbĩ́ gè ló bel nè ni.” 48 À gbóó bĩiná nen ea ló bel nèeá kọọ̀: “Mée ní ea dú ńdáà kà ẹ, vaá bà mée ní e bà dú pá ńdáà vígà págbálà ẹ?” 49 À gbóó nììnà bá nyòòmà pá a gbò nyòòne nvée vaá kọọ̀: “Nee ńdáà kà nè pá ńdáà vígà págbálàí! 50 Boo béè kọọ̀ kọ̀láá nen ea náa bùlà ńdáà Tẹ̀ ea di káála ní ea dú ńdáà vígà págbálà, ńdáà vígà pábia, nè ńdáà kà ẹ.”