Kpá E Pọ́ọ̀l Beè Lẹ̀ẹ̀là Má Pá Róm̀
3 Beè vó, mókà bélè ní ea di ló gè dú neǹ Júù e, àbèè mókà bélè ní ea di ló gè kòòà ẹ? 2 Gã́bug bélè di ló mm̀ kọ̀láá sĩ́deè. Túá kà, baala ní e Bàrì beè ló bel ea di káí nèe. 3 Vaá beè sìgà ọ̀và náa bọ́ló dẹ̀lẹ̀ nyíé boo, é kọọ̀ níá é gbóó naa kọọ̀ Bàrì á gá bọ́ló dẹ̀lẹ̀ nyíé boo? 4 Níì vó nì! Bàrì ólò ló kà-kà bel, kọbèè à gá náa kọ̀láá nen à dú neǹ kyáá bel. Níà nú ea náa ba beè emí kọọ̀: “Kọbé gbò bel eo lóò zógè kọọ̀ ò dúù neǹ lé lab dògò nè kọbé ò láá èlbá tṍó e bà béélá ni bel ló.” 5 Sõò èé kọ́ vàẹ beè beélè pọ́lọ́ lab dògò náa kọ á dọ bàlà kẽ kọọ̀ Bàrì dú neǹ lé lab dògò e? É kọọ̀ Bàrì sí pọ́lọ́ tṍó ea tú kpọ̀té tẹlẹ boo gbò nen? (M̀ gé ló belí dì belí nen.) 6 Níì vó nì! Beè Bàrì á gé lèlà, à é náà và à láá beelá bel ló bàlà booí é?
7 Soò beè kyáá bel em kpọ́ọ̀ tú kà-kà bel ea kil ló Bàrì tẹlẹ bàlà kẽ vaá naa kọọ̀ gbò nen á nvèèe ka ló, éé ní ea náa bà beelám bel ló kọ m̀ dúù neǹ náàkyọ̀ ẹ? 8 Vaá éé ní ea náa nóo kọ́ì kọọ̀, “Naanii mè èé náa pọ́lọ́ nu kọbé lé nu silà aa m,” dì belí bé e sìgà gbò kpọ́i kyáá bel ló kọ è kọ́ọ̀ naa ẽ́? Bèèla bel ea é dọ́ vá boo bọ́ va ló.
9 Beè vó, é kọ èé gbóó láá kọọ̀ beele dúù lé èl nagbòa? Níì vó nì! Boo béè kọ e beè kọọ̀ pá Júù nè gbò e bè níì pá Júù nì di kèbá lẹ̀ẹ̀là bel náàkyọ̀, 10 dì belí bé e Kpá Káí beè kọ́ naaá kọọ̀: “Tọ́ọ̀ neǹ lé lab dògò á gé, bã̀àna enè nen. 11 Tọ́ọ̀ nen náa nyímá nu. Tọ́ọ̀ nen náa gé gbĩ́ Bàrì. 12 Dénè nen a ooà aa ló Bàrì vaá tọ́ọ̀ ọ̀và náa dọ nà bélè. Tọ́ọ̀ nen náa gé lábví ná lé láb, bã̀àna enè nen.” 13 “Ba òò níà bànà ú ea di sèèla. Baa tú ba dém kẹ̀ẹ̀mà gbò nen.” “Múú tã́a ea dú gã́ naanà dì vá bũunu.” 14 “Vaá pṍò nè pọ́lọ́ bel di ḿ-ma vá gã́.” 15 “Ba kpóó tọ ólò gbalá nyoone gè èèlà mii.” 16 “Bà ólò kyọ̀sĩ́ nen vaá nvèè tã̀àgã̀ kọ̀láá kĩée e bà téní, 17 vaá bà gáà nyima sĩ́deè ge nvèè fẹ́ẹ́-fẹẹ̀ ló.” 18 “Bà náa ólò siiá pọ̀ ló Bàrì.”
19 Kátogóí, è nyímà kọọ̀ kọ̀láá kà nú ea di mm̀ Logá gé lóá bel nyòòmà gbò e bà di kèbá Log, kọbé à gbá gã́ kọ̀láá nen vaá naa kọ bàlà boo á nyimá kọọ̀ bel bẽ́ènìè va kèsĩ́ Bàrì. 20 Vó à naa, Bàrì náa é ténmá kọọ̀ nen dú neǹ lé lab dògò boo béè kọ à náa nú e log kọ́ á naa, boo béè kọọ̀ log ní ea ólò naa kọ nen á nyimá nú e náàkyọ̀ kọlà ẹ.
21 Sõò kátogóí, a palàge dọa bàlà kẽ kọọ̀ Bàrì dú neǹ lé lab dògò, níì boo béè nú e log kọ́ nì, dì belí bé e Log nè Gbò Kọ́ọ̀ Bùlà Bàrì sí neǹ ditõ̀ò kilma ló naa. 22 Mm̀ kà-kà, Bàrì ólò tenmà kọ̀láá gbò e bà íe zìgà mm̀ Jíízọ̀s Kráìst kọ bà dú gbò lé lab dògò, boo béè kọ náa ólò ẹ̀b sĩ́ nen naamá nu. 23 Boo béè kọọ̀ kọ̀láá nen beè sí pọ́lọ́ vaá dọ̀ aa nvéè ka ea dú ló Bàrì, 24 vaá gè kọ Bàrì kọ́ọ̀ bà dú gbò lé lab dògò dú dõ̀ònù ea né va boo béè sàn nyíe ea íe vá ló tení dú ló ú vààa gyọ́ọ̀ Kráìst Jíízọ̀s. 25 Bàrì beè túe vaamá gyọ́ọ boo gbò nen kọbé bà láá zọ̀ Bàrì dia mm̀ fẹ́ẹ́-fẹẹ̀ ló tení dú ló zìgà e bà íé mm̀ a mii. Bàrì beè naa níí kọbé à zógè kọ à dúè neǹ lé lab dògò. A beè ia ló pọ́lọ́ e gbò nen beè sí tṍó ea kil nvéeá boo béè kọ à ólò ĩ̀ìmà nu. 26 A beè naa nagé vó kọbé à zógè kọ à dúè neǹ lé lab dògò kátogóí nè tṍó ea gé ténmá kọọ̀ nen ea íe zìgà mm̀ Jíízọ̀s dú neǹ lé lab dògò.
27 Beè vó, éé ní ea é náa kọ nen á gaavá ẹ́? Náa íe nú ea é náa kọọ̀ nen á gaavá. Mókà log ní e nen é élá boo gaavá ẹ́? É kọọ̀ log ea kọ́ tóm e gbò nen é sí? Ẽ́èe, níì vó nì. Sõò nen é gáává boo log ea tẹ́lẹ bàlà kẽ beè nen íe zìgà. 28 Boo béè kọọ̀ è ẹbvì kọọ̀ Bàrì ólò tenmá kọọ̀ nen dú neǹ lé lab dògò tení dú ló zìgà e nen íe, níì boo béè kọ à sẹlẹ log nì. 29 É kọọ̀ Bàrì níà áá Bàrì pá Júù? É kọ náa dú nágé Bàrì pá dõona kà dó? Mm̀ kà-kà, à dú nágé Bàrì pá dõona kà dó. 30 Tã́gíní bé e Bàrì dú tẽ̀ènè kàa, à é ténmá kọọ̀ gbò e ba beè kòòà nè gbò e bà gáà kòòà dú gbò lé lab dògò tení dú ló ba zìgà. 31 Beè vó, é kọ èé ẹb kọọ̀ log á gé ná ló tọ́ọ̀ nu boo béè kọ è íè zìgà? Níì vó nì. Tãa vó, è ólò nvèè sãa kúm log.