Lé Kpẹ̀a E Jṍòn Beè Emí

16 “M̀ lóò gbò belí nèi kọbé nóo dọì. 2 Gbo nen é kpói lọl mm̀ tọ bõ̀ònaló fã̀. Kàsĩ́, tṍó gé dú e kọ̀láá nen ea fẹ́i é íé bùlà kọọ̀ à síè tóm neè Bàrì. 3 Sõò bà é náa gbò nuí boo béè kọ bà gáà nyima ló Tẹ̀a àbèè nda. 4 Náa kal ló béè vó, m̀ lóò gbò belí nèi kọbé tṍó e gbò nuí é nááá, ò kẽeaí boo kọ m beè kọ́ nèi.

“Ním beè kọ́ nèi túá ból, boo béè kọ m beè dìí ló. 5 Kátogóí, m̀ gé aà nyoone Nen ea beè lẹ̀ẹ̀làm, sõò tọ́ọ̀ bọ̀ì nóo bĩ́ìnàm mi kọọ̀, ‘Ãàe ní eo gé kil é?’ 6 Tãa vó, ò gbóò iei tã̀àgã̀ bùlà boo béè kọ m̀ lóò gbò belí nèi. 7 Sõò m̀ lóò kà-kà bel nèi kọọ̀, boo béè boólò lee ló ní ea náa vaá m̀ gé aà ẹ. Be ním aà, neǹ nvèè báá náa é dúí ló, sõò be m̀ aà, m̀ é lẹẹlàẹ mái. 8 Vaá tṍó ea é dú, à é náa kọ pá bàlà boo á mòn nú e náàkyọ̀ kọlà, nú e lé lab dògò kọlà, nè nú e bèèla bel Bàrì kọlà. 9 À é zẹ́ẹ́ tú náàkyọ̀ pá bàlà boo ẹẹ́ dẹ̀i, boo béè kọ bà náa íém zìgà m. 10 Tṍóá, à é gbóó naa kọọ̀ pá bàlà boo á nyimá kọ m beè naa nú ea lelà, boo béè kọ m̀ gé aà nyoone Tẹ̀a vaá nóo é mon naḿ mi. 11 Tṍóá, à é gbóó naa kọ bà á mòn gbò e Bàrì é béélá bel ló, boo béè kọ baa béélá bel ló nen ea gé bẹl bàlà booí.

12 “M̀ íè gã́bug nu gè kọ́ nèi, sõò nóo é láá dãi ból ló déne kátogóí. 13 Sõò tṍó e neǹ nvèè bá, ea dú nyómá kà-kà belá é dú, à é leléi dee bá vaá naa kọ ó nyimai dénè nú ea dú kà-kà, boo béè kọọ̀ náa é kọ́ nú ea dú a bùlà, sõò nú ea beè dã̀ ní ea é kọ́ ẹ́, vaá à é náa kọ ó nyimai gbò nú ea é nááá dì deèsĩ́. 14 À é nveèm ka ló, boo béè kọọ̀ gbò nú ea dã́ lọl gã́ nda ní ea é kọ́ nèi ẽ́. 15 Kọ̀láá kà nú e Tẹ̀a íe níà ńda. Níà nú ea náa vaá m̀ kọ́ nèi kọọ̀, kọ̀láá kà nú ea dã́ lọl gã́ nda ní ea é kọ́ nèi ẽ́. 16 Pọ́ì ńkem̀ tṍó àla, nóo é beè mon naḿ mi, sõò tṍó e pọ́ì ńkem̀ tṍó ni téní, ò é kpáá moním mi.”

17 Tṍóá, sìgà pá a gbò nyòòne nvée à gbóó bĩiná ene kọọ̀: “Éé ní ea gé kọ́ tṍó ea kọ́ nèi kọọ̀, ‘Pọ́ì ńkem̀ tṍó àla, nóo é beè mon naḿ mi, sõò tṍó e pọ́ì ńkem̀ tṍó ni téní, ò é kpáá moním mi,’ nè tṍó ea kọ́ọ̀, ‘boo béè kọ m̀ gé aà nyoone Tẹ̀a’ ẹ?” 18 Bà géè olòó bĩiná kọọ̀: “Éé ní ea gé kọ́ tṍó ea kọ́ọ̀, ‘pọ́ì ńkem̀ tṍó’ ẽ́? Née nyímà nú ea gé ló bel kilma ló.” 19 Boo béè kọ Jíízọ̀s nyímá kọọ̀ bà gbĩ́ gè bĩinàèe bíb, à gbóó kọ́ nè va kọọ̀: “Ò gé bĩ́inai bel ene, boo béè kọ m̀ kọ́ọ̀ nèi kọọ̀: ‘Pọ́ì ńkem̀ tṍó àla, nóo é beè mon naḿ mi, sõò tṍó e pọ́ì ńkem̀ tṍó ni téní, ò é kpáá moním mi’? 20 M̀ lóò kà-kà bel nèi kọọ̀, ò é tói vaá ò bãagãi, sõò pá bàlà boo é ṍ kààgà. Nyíéi é biilà, sõò bọọ bììla nyíe é beè kììa kẽ dú ẹ́ẹ́-ẹẹ̀ nyíe. 21 Tṍó e pábia gé man nvín, à ólò ié tã̀àgã̀ bùlà, boo béè kọ a tṍó tã̀àgã̀ a lée. Sõò tṍó ea ni man nvín lọ̀l, náa ólò kpáá kẽ̀èa boo tã̀àgã̀ ea géè tení báá, boo béè kọ nyíée gé ẹ́ẹ kọọ̀ nvín meà bã bàlà booí. 22 Níà bé ea dì nàgé naa ló boolo é. Kátogói nyíéi gé tãagã̀, sõò m̀ é kpáá mònii, vaá nyíéi é gbóó ẹẹ iná kĩée e tọ́ọ̀ nen náa é láá naana kọọ̀ nyíéi á kpáá tã̀àgã̀. 23 Tṍóá, nóo é bĩ́ina naḿ mi tọ́ọ̀ kà bíb. M̀ lóò kà-kà bel nèi kọọ̀, be à íe nú eo bĩ́ìnàì bá Tẹ̀a, à é néi boo béè ńdáà bée. 24 Dọ̀ọ̀mà kátogóí, ò gáà bĩinai tọ́ọ̀ kà nú boo nà bée. Bĩinai, mè ò é íei, kọbé bọọ zààvà gbõoma.

25 “M̀ túù nu dòòle ló loomá gbò belí nèi. Tṍó gé dú e ním é tú ná nu dòòle ló loomá bel nèi, sõò m̀ é kọ́ nú ea kil ló Tẹ̀a tẹlẹ bàlà kẽ nèi. 26 Tṍóá, ò é banii nu bá Tẹ̀a boo ńdáà bée. Ním gé kọ́ọ̀ nda é ban nu bá Tẹ̀a boói. 27 Tẹ̀a vulèi, boo béè kọ ò vulèì nda vaá zigai kọọ̀ Bàrì ní ea beè lẹ̀ẹ̀làm ẽ́. 28 M beè dú bàlà booí dì belí nen e Tẹ̀a lẹẹlà. Kátogóí, m̀ é gé aa bàlà booí àà, vaá m̀ é aà nyoone Tẹ̀a.”

29 Pá a gbò nyòòne nvée à gbóó kọ́ nèe kọọ̀: “Kátogóí ní eo ni lọà bel gã́ ẽ́! Nóo tú nà nu dòòle ló loomá bel nèi. 30 Kátogóí, e nyímá kọọ̀ ò nyímà dénè nu, vaá náa dú bíi kọọ tọ́ọ̀ nen á bĩiná ni bíb. Níí náa kọ é zìgà kọọ̀ o beè aa ló Bàrì dù.” 31 Jíízọ̀s à kọ́ nè va kọọ̀: “O zigai kátogóá? 32 Ẹbvii! Tṍó gé dú, vaá a lée tṍó e buù nen é téélá kil a tọ gbẹẹ áá m̀m̀. Sõò náa dú áá m̀m̀, boo béè kọọ̀ Tẹ̀a dìḿ ló. 33 M̀ lóò gbò belí nèi kọbé ò íei fẹ́ẹ́-fẹẹ̀ ló tení dú ló nda. Pá bàlà boo é bíìgèi ló, sõò iei agẹ ló! Nda a bé bàlà boo èlbá.”