Lé Kpẹ̀a E Máátìù Beè Emí

22 Dõona tóm, Jíízọ̀s beè kpáá tú nu dòòle ló loomá bel nè va kọọ̀: 2 “Boǹ Méné Bàrì dì belí ene kà méné ea noo sẹ̀lẹ̀nù ílà dóm nè va nè a nvín págbálà. 3 À gbóó lẹ̀ẹ̀là pá a gyóòlo kọ bà á gé kolí gbò e ba beè kolí kọ bà á dú kè ílà dóm nè vaá, sõò náa beè tàn va gè dù. 4 A beè kpáá lẹ̀ẹ̀là dõona kà gbò gyóòlo vaá kọ́ nè va kọọ̀, ‘Kọi nei gbò em beè kolíá kọọ̀: “M beè kpoogè dee ló gyã́á gè dè lọ̀l. M beè kèl láo nè gbò nom e dṍò di gbàà, vaá m kpóògè dee ló dénè nu lọ̀l. Duí kè ílà dóm nè vaí.”’ 5 Sõò kólá beè nyà vá ló, naa ní e neń ea é aà sí ól beè sì, neń ea é aà sí a pííla à sì. 6 Sõò nagbò e bà sígáá beè sii pá a gyóòloá, boomà va bàg, vaá fẹ́ va.

7 “Ménéá beè palàge bã̀ súng naa ní ea lẹẹlà pá a gbò bé kọ bà á fẹ́ gbò e ba beè fẹ́ pá a gyóòloá, vaá tẹlẹ̀ sã́ ló ba bon. 8 Tṍóá, à gbóó kọ́ nè pá a gyóòlo kọọ̀, ‘Sẹ̀lẹ̀nù ílà dóm nè vaí a lée, sõò gbò e beè kolí lábví láb ea zógè kọọ̀ bà náa bọ́ẹ̀ ló gè dù. 9 Vó à naa, bãí boo gbò èèlè ea téní aa mm̀ boní, vaá ò kólii kọ̀láá nen eo monìì kọ á dú kè ílà dóm nè vaí.’ 10 Gbò gyóòloá beè gbóó àà bã boo gbò èèlèa vaá kolí kọ̀láá nen e bà mon, gbò pọ́lọ́ nè gbò lé, vaá gbò e bà gé dé nu beè gbóó m-má mm̀ tọ e ba beè tõo sẹlẹ sẹ̀lẹ̀nù ílà dóm nè va á.

11 “Tṍó e ménéá dú gé ẹ̀b gbò kyáàa, a beè mòn ene kà gbálà e náa nveà kọ̀là ló gè siimá kè ílà dóm nè va. 12 À gbóó kọ́ nèe kọọ̀: ‘Gbálàí, o beè kyã̀à naa và iná kĩí, e kọ̀là ló gè siimá kè ílà dóm nè va á gé ní ló é?’ Sõò gbálàá náa beè láá ló tọ́ọ̀ kà bel. 13 Ménéá à gbóó kọ́ nè pá a gyóòlo kọọ̀, ‘Bọbvííe bá nè tọ, vaá ò tóbviíe tẹlẹí mm̀ kùkùù gín kèdẹi. Kĩá ní ea é tõo tò vaá taa dáa ẹ́.’

14 “Boo béè kọọ̀ Bàrì beè kolí gã́bug nen, sõò gbò ea sa dú ńkem.”

15 Tṍóá, pá Fárìsíì à gbóó àà gé bilá ló kọbé bà tú bel ea é ló siimáe. 16 Bà gbóó lẹ̀ẹ̀là ba gbò nyòòne nvée, bií ló gbò nyòòne nvéè Hẹ́rọ̀d siimáé ló kọ bà á kọ́ nèe kọọ̀: “Neǹ Dòbá, è nyímà kọ ò ólò ló kà-kà bel vaá noomà kà-kà bel ea kil ló Bàrì. Nóo ólò naa nu kọbé gbò nen leelà ni, boo béè kọọ̀ nóo ólò ẹ̀b sĩ́ nen naamá nu. 17 Vó à naa, ni kọ́ nèi, o bùlà kọ́ vàẹ? É kọọ̀ log ténmá kọ é kpẽ́ kpègè gbáá nè Sízà, sẹ̀ náa ténmá ẽ́?” 18 Sõò, boo béè kọọ̀ Jíízọ̀s nyímá pọ́lọ́ bùlà e bà íe, à gbóó kọ́ nè va kọọ̀: “Éé ní ea náa ò ẹbmaḿ mi, e booló gbò bààsĩ́ ẽ́? 19 Ni zógeḿ mi kpègè eo ólò kpẽemai kpègè gbáá.” Bà gbóó tú ene kà dìnáriọ̀s nèe. 20 À gbóó bĩiná va kọọ̀: “Sĩ́ mée nè béè mée ní ea di booí é?” 21 Bà aalá nèe kọọ̀: “Níà níí Sízà.” À gbóó kọ́ nè va kọọ̀: “Beè vó, kpẽi nú ea kuu Sízà nei Sízà, vaá ò kpẽ́i nú ea kuu Bàrì nei Bàrì.” 22 Tṍó e bà dã́ naa vó, a beè palàge bọọ́ vá ló, naa ní e bà gbóó ààẹ́ ló àà.

23 Tẽ̀ènè deeá, pá Sádùsíì, e bà náa ólò zìgà kọọ̀ kẽ̀èà aa kemà ú dìa, beè gbóó dù gé bĩináe kọọ̀: 24 “Neǹ Dòbá, Mózìs beè kọọ̀: ‘Beè nen ú gbẹẹ a va, vaá à gáà ie tọ́ọ̀ kà nvín, a vígà á ilí a vaá, vaá bònee nvín gbàà nèe.’ 25 À íe àlàbà kà vígà págbálà e bà dúá gbàà e ba beè dìí ló. Ńtúá kà beè ú gbẹẹ a va tṍó ea gáà ie tọ́ọ̀ kà nvín. A vígà beè gbóó ilí a va á. 26 Tẽ̀ènè kà nuí beè naaá ló ní ea égè bàà nen, nè ní ea égè taà nen, dọ̀ọ̀mà tṍó e àlàbà ọ̀và ú. 27 Dee deè nvée, pábiaá beè gbóó ù. 28 Vó à naa, tṍó e bà é kẽeà aa kemà ú, mée ea di gbàà àlàbà není, ní ea é dú a dóm ẽ́? Boo béè kọọ̀ dénè ọ̀và beè ilí e.”

29 Jíízọ̀s à aalá nè va kọọ̀: “Ò lọì, boo béè kọọ̀ nóo nyímàì nú e Kpá Kái nóòmà àbèè kpóó e Barì íe. 30 Boo béè kọọ̀ tṍó e gbò nen é kẽeà aa kemà ú, gbò gbálà náa é ílí ná va, vaá gbò bia náa é íá ná dóm, boo béè kọ bà é di belí gbò nyómá tóm e bà di káála. 31 É kọ ò gáà beè bugii nú e Barì beè kọ́ nèi ea kil ló kẽ̀èà aa kemà ú? A beè kọọ̀: 32 ‘Nda ní em dúù Bàrì Ébràhám̀, Bàrì Áízìk, nè Bàrì Jékọ̀b e.’ À dú Bàrì gbò e bà di dùm, níì níí gbò e ba ni ú nì.” 33 Tṍó e gã́bug gbò e ba beè di kĩá dã́ naa vó, à gbóó bọọ́ vá ló bé ea nóòmà nu naa.

34 Tṍó e pá Fárìsíì dã́ kọọ̀ Jíízọ̀s áálá bel ea gbá gã́ pá Sádùsíì, pá Fárìsíì à gbóó gbọọlá dúé ló. 35 Enè ọ̀và ea palàge nyimá log à gbóó ẹ̀bmàe tení dú ló gè bĩináe kọọ̀: 36 “Neǹ Dòbá, mókà log ní ea palàge bọọ ea di zẹ̀ẹ̀ gbò Logá ẹ́?” 37 À aalá nèe kọọ̀: “‘Ò é íè ge vùlè Jìhóvà* ea dú o Bàrì lọa mm̀ dénè o nyíe, nè dénè o dùm, nè dénè o bùlà.’ 38 Níí ní ea palàge bọọ vaá dú túá kà log é. 39 Ní ea egè bàà kà ea bélí nágé níí dú gè kọọ̀: ‘Ò é íè ge vùlè o nen* dì belí bé eo vulè o bá naa.’ 40 Pálaa kà logí ní e dénè Log nè Nòòmà Nù Gbò Kọ́ọ̀ Bùlà Bàrì dẹẹ̀a boo é.”

41 Tṍó e pá Fárìsíì di-dí ló Jíízọ̀s, à gbóó bĩiná va kọọ̀: 42 “Bọọ bùlà kọ́ vàẹ kilma ló Kráìst e? Níà nvín mée ẽ́?” Bà aalá nèe kọọ̀: “Níà nvín Dévìd.” 43 Jíízọ̀s à bĩiná va kọọ̀: “Beè vó, éé ní ea náa vaá Dévìd à kolíe Neń Ea Íém gbẹá kèbá tùle nyómá káí Bàrì, vaá kọọ̀, 44 ‘Jìhóvà* beè kọ́ nè Neń Ea Íém kọọ̀: “Ĩìm tẽ́ boo bá lè dọ̀ọ̀mà tṍó em é tú pá o gbò ọ́b nvèè ní kè kátọ ẹ́”’? 45 Be Dévìd beè kolíe Neń Ea Íém, à náà và Kráìst à dú nvín Dévìd e?” 46 Tọ́ọ̀ nen náa beè láá aalá bíbvá nèe, vaá lọl deeá ààmà, tọ́ọ̀ nen náa beè láá kpáá bĩináe bíb.