Lé Kpẹ̀a E Jṍòn Beè Emí

8 12 Tṍóá, Jíízọ̀s à gbóó kpáá ló bel nè va kọọ̀: Nda ní em dúù ẹ́ẹ́ deè nakà bàlà booí é. Kọ̀láá nen ea nyooném nvée náa é kyãa mm̀ kùkùù gín, tãa vó, à é íe ẹ́ẹ́ dee ea é náa kọ á ié dùm. 13 Pá Fárìsíì à gbóó kọ́ nèe kọọ̀: “Ò síì neǹ ditõ̀ò kilma ló o bá, sõò bel eo lóò náa dú kà-kà.” 14 Jíízọ̀s à aalá nè va kọọ̀: “Kọbèè m̀ síì neǹ ditõ̀ò kilma ló nà bá, bel em lóò dú kà-kà, boo béè kọ m̀ nyímà kĩée em beè àà dù nè kĩée em gé kil. Sõò boolo nóo nyímàì kĩée em beè àà dù nè kĩée em gé kil. 15 Boolo ólò beelai bel dẹ̀ẹ̀a boo bé e nen bugi togó naa, sõò nda ním ólò beelá bel ló tọ́ọ̀ nen. 16 Vaá kọbèè m̀ béèlà bel ló nen, ńdáà bèèla bel dú kà-kà, boo béè kọọ̀ níì áá m̀m̀ nì, sõò ńdáà Tẹ̀ ea beè lẹ̀ẹ̀làmá dìḿ ló. 17 Nagé, ba beè emí mm̀ boólò Log kọọ̀: ‘Be bàà nen sí neǹ ditõ̀ò, à dú kà-kà.’ 18 Nda síì neǹ ditõ̀ò kilma ló nà bá, vaá Tẹ̀ ea beè lẹ̀ẹ̀làmá sí neǹ ditõ̀ò kìlmàḿ ló.” 19 Tṍóá, bà gbóó bĩináe kọọ̀: “Ãàe ní eo Tẹ̀ dì e?” Jíízọ̀s à aalá nè va kọọ̀: “Nóo nyímàì ló nda àbèè ńdáà Tẹ̀. Be o beè nyimai ló nda, ò gáẹ̀ beè nyimai ló ńdáà Tẹ̀ nagé.” 20 Jíízọ̀s beè ló gbò belí gbẹá kĩée e bà ólò sẹlẹ kpó gè tẹlẹ̀ kpègè m tṍó ea géè noomà nu gbẹá mm̀ tọọ̀ káíá. Sõò tọ́ọ̀ nen náa beè siíe, boo béè kọọ̀ a tṍó gáà beè lee.

21 À gbóó kpáá kọ́ nè va kọọ̀: “Nda é aà, vaá boolo é gbím mi. Sõò ò é úi gbẹáí mm̀ bọọ náàkyọ̀. Kĩée e nda gé aà kìl, boolo nóo é láá dui.” 22 Tṍóá, pá Júù à gbóó dààmà togó gè kọọ̀: “É kọ à é fẹ́à a bá? Boo béè kọọ̀ à kọ́ọ̀, ‘Kĩée e nda gé aà kìl, boolo nóo é láá dui.’” 23 À gbóó kilsĩ́ gè kọ́ nè va kọọ̀: “Boolo aalìì boo kunukẽ̀í, sõò nda aà káála. Boolo aalìì bàlà booí, sõò nda ním aà bàlà booí. 24 Níà nú ea náa m̀ kọ́ nèi kọọ̀: Ò é úi gbẹáí mm̀ bọọ náàkyọ̀ ẹ. Boo béè kọọ̀ be nóo zigài kọọ̀ nda ní e ba beè kọ à é dúáẹ́, ò é úi gbẹáí mm̀ bọọ náàkyọ̀.” 25 Bà gbóó dààmà togó gè bĩináe kọọ̀: “Oloò mée ẽ́?” Jíízọ̀s à aalá nè va kọọ̀: “Éé ní ea náa m̀ gé kpáá zọ̀i loá bel é? 26 M̀ íè gã́bug bel gè ló kìlmàí ló nè gã́bug bel em é béélá. Mm̀ kà-kà, Nen ea beè lẹ̀ẹ̀làm dú kà-kà, vaá kọ̀láá kà nú em beè dã́ lọ̀líé gã́ ní em gé kọ́ nè gbò e bà di bàlà booí é.” 27 Bà náa beè dã́ ból ló kọọ̀ à géè ló bel ea kil ló a Tẹ̀ nè va. 28 Jíízọ̀s à gbóó kọ́ nè va kọọ̀: “Tṍó eo ni túi Sã́áná nená kaí kú té lọ̀l,* ò é gbóó nyimai kọọ̀ ndaà é nená ẽ́, nè ge kọọ̀ ním ólò naa tọ́ọ̀ kà nú boo nà lóó. Sõò áá nú e ńdáà Tẹ̀ beè noomàm ní em ólò kọ̀ ẹ. 29 Nen ea beè lẹ̀ẹ̀làm dìḿ ló. Náa sọ́m bá gbẹẹ́ kẽ, boo béè kọọ̀ m̀ ólò naa nú ea léémáe lee.” 30 Gã́bug nen beè iée zìgà m tṍó ea gé ló gbò belí.

31 Tṍóá, Jíízọ̀s à gbóó kọ́ nè pá Júù e bà íée zìgà m ã́ kọọ̀: “Ò dúì kà-kà gbò eo gé nyooném mi nvée be ò kilíí sĩ́ gè gbanii tṍ ló nà moǹ bel. 32 Ò é gbóó nyimai ló kà-kà bel, vaá kà-kà bel é náa kọ ó dií pọ́ì.” 33 Bà kọ́ nèe kọọ̀: “Beeleè pá nvín Ébràhám̀ vaá è gáà dú gyóòlo nè tọ́ọ̀ nen. Éé ní ea náa ò kọọ̀, ‘Ò é gbóó dií pọ́ì e’?” 34 Jíízọ̀s à aalá nè va kọọ̀: “M̀ lóò kà-kà bel nèi kọọ̀, kọ̀láá nen ea kilsĩ́ gè sí pọ́lọ́ dú gyóòlo nè náàkyọ̀. 35 Nagé, gyóòlo náa ólò gbẹá tọọ̀ a tẹ̀ tọ lee, sõò nvín tẹ̀ íè tọá ní ea ólò gbẹá lee é. 36 Vó à naa, be Sã́áná Bàrì náa kọ ó dií pọ́ì, ò é íei kàà dì pọ́ì. 37 M̀ nyímà kọọ̀ bọ̀ì pá nvín Ébràhám̀. Sõò ò gé gbĩ́ gè fẹḿ mi, boo béè kọọ̀ nóo túì nà moǹ bel. 38 Nda kọ́ọ̀ gbò nú em beè mòn tṍó em beè di ló ńdáà Tẹ̀, sõò boolo gé náanii gbò nú eo beè dãi lọlíí gã́ bọọ tẹ̀.” 39 Bà aalá nèe kọọ̀: “Beeleè pá nvín Ébràhám̀.” Jíízọ̀s à kọ́ nè va kọọ̀: “Be o beè dui pá nvín Ébràhám̀, ò gáẹ̀ beè sii gbò tóm e Ébràhám̀ beè sì. 40 Sõò kátogóí, ò gé gbĩ́ gè fẹi nda, em dúù nen em gé ló kà-kà bel em beè dã́ lọl gã́ Bàrì nèi. Ébràhám̀ náa beè naa vó. 41 Boolo gé síi tóm bọọ tẹ̀.” Bà aalá nèe kọọ̀: “Beele níì nvín gã̀* nì. Áá tẽ̀ènè kà Tẹ̀, ea dú Bàrì ní e íèe.”

42 Jíízọ̀s à kọ́ nè va kọọ̀: “Be Bàrì beè dú bọọ Tẹ̀, ò gáẹ̀ beè vuleḿ mi, boo béè kọọ̀ ló Bàrì ní em aà dù e. Ním beè dú boo nà lóó, sõò Ẹlẹ ní ea beè lẹ̀ẹ̀làm ẽ́. 43 Nóo gbĩ́ gè gbànii tṍ ló nú em nóòmà. Níà nú ea náa nóo é láá dãi ból ló nú em gé kọ́ ẹ́. 44 Boolo aalìì ló bọọ tẹ̀ ea dú Pọ́lọ́ Nyómá, vaá ò gbĩ́ gè naanii nú ea dú bùlà bọọ tẹ̀. A beè dú neǹ fẹ̀ neǹ lọl dààà togó, vaá náa beè bii bá ló kà-kà bel, boo béè kọọ̀ kà-kà bel á géé m. Tṍó ea kpọ́ kyáá bel, à gé kọ́ nú ea dìé bùlà, boo béè kọ ẹ̀ẹ̀ neǹ kyáá bel vaá ẹ̀ẹ̀ tẹ̀ kyáá bel. 45 Sõò nda lóò kà-kà bel nèi, níà nú ea náa nóo zigài nú em gé kọ́ ẹ́. 46 Mée ea dìí zẹ̀ẹ̀ ní ea é láá kọ́ pọ́lọ́ em síìe? Be m̀ lóò kà-kà bel, éé ní ea náa nóo zigàì nú em gé kọ́ ẹ́? 47 Gbò nvín Bàrì ólò pãane tṍ ló nú e Bàrì kọ́. Boolo níì gbò nvín Bàrì nì, níà nú ea náa nóo pãanèm mi tṍ ló é.”

48 Pá Júù à gbóó kọ́ nèe kọọ̀: “Née beè lọ̀ tṍó e kọ́ọ̀, ‘Ọ̀ọ̀ neǹ Sàmérìà vaá zọ dì ní m.’” 49 Jíízọ̀s à kọ́ nè va kọọ̀: “Zọ á gém m. Nda ólò nvèè ka ló ńdáà Tẹ̀, sõò boolo nóo nveenìì ka ló nda. 50 Nda ním gé gbĩ́ ka nèà nà bá. À íe Nen ea gbĩ́ kọ bà á nvèèm ka ló, vaá Ẹlẹ ní ea ólò beelá bel é. 51 M̀ lóò kà-kà bel nèi kọọ̀, kọ̀láá nen ea gban tṍ ló nà moǹ bel, náa é ú tọ́ọ̀ dee.” 52 Pá Júù à gbóó kọ́ nèe kọọ̀: “Kátogóí, e agala boo kọọ̀ zọ dì ní m. Ébràhám̀ beè ù, vaá gbò kọ́ọ̀ bùlà Bàrì à u nágé. Sõò olo kọ́ọ̀, ‘Nen ea gban tṍ ló nà moǹ bel, náa é ú tọ́ọ̀ dee.’ 53 É kọ olo bọọ̀ èl beélè tẹ̀ Ébràhám̀ ea beè ù a? Kọbèè gbò kọ́ọ̀ bùlà Bàrì beè u nágé. Ò kọ́ọ̀ oloò mée ẽ́?” 54 Jíízọ̀s à aalá nè va kọọ̀: “Be nda nveà ka ló nà bá, nakà ka dú zọ̀là pọ́ì. Ńdáà Tẹ̀ eo kọ́ì kọọ̀ à dúè bọọ Bàrìa ní ea ólò nvèèm ka ló é. 55 Boolo gáà nyimaíe ló, sõò nda nyímàe ló. Be m̀ kọọ̀ ním nyímàe ló, m̀ é bélí booló gbò kyáá bel. Sõò nda nyímàe ló vaá m̀ ólò gbàntṍ ló a moǹ bel. 56 A beè palàge tàn bọọ tẹ̀ Ébràhám̀ ge mònmà dẽè tṍó e nda é dú. A beè mòn vaá nyíée à ẹẹ.” 57 Tṍóá, pá Júù à gbóó kọ́ nèe kọọ̀: “Ò gáà toola 50 gbáá, vaá ò gé kọ́ọ̀ o beè monìè Ébràhám̀?” 58 Jíízọ̀s à gbóó kọ́ nè va kọọ̀: “M̀ lóò kà-kà bel nèi kọọ̀, besĩ́ì Ébràhám̀ à kalá mèà, nda beè dì.” 59 Bà gbóó labvígi dem kọbé bà tóbmàèe, sõò Jíízọ̀s beè gũá aa mm̀ tọọ̀ káíá àà.