Lé Kpẹ̀a E Jṍòn Beè Emí

6 Tṍó e níí nááá lọ̀l, Jíízọ̀s beè gbóó fùl sábá Pène Gálilì àbèè Tàìbérìàs. 2 Vaá gã́bug nen beè bììàẹ́ nvée, boo béè kọ bà géè ẹ̀b gbò tóm dũ̀ùnè ea géè sí boomá gbò zọ̀ló. 3 Jíízọ̀s à gbóó kil boo gù gé zọ̀ pá a gbò nyòòne nvée ĩìtẽ́ kĩá. 4 Tṍóá, Nàànù Ténì Zelí ea dú sẹ̀lẹ̀nù pá Júù a íná kuló. 5 Tṍó e Jíízọ̀s dalà dẽé boo vaá mòn gã́bug gbò e bà gé dúé ló, à gbóó bĩiná Fílìp kọọ̀: “Ãàe ní eé sí gé zalí fétúlú e dénè gbòí é dé é?” 6 Sõò a beè ló belí naamá gè ẹ̀bmàe, boo béè kọ a beè nyimá nú e ẹlẹ é gé naa. 7 Fílìp à aalá nèe kọọ̀: “Kọbèè è tú bàà gbò dìnárìọ̀s zalmá fétúlú vaá dõo ńkem-kem, náa é íná ló dénè nen.” 8 Enè neń ea ólò nyoonée nvée ea bée kọlà Ándrù, ea dú vígà Sáímòn Pítà, à gbóó kọ́ nèe kọọ̀: 9 “Ene kà ńkem̀ nvín págbálà ea di kĩí íe vòò kpò fétúlú e ba beè tú báàlì naamá nè bàà kà ńkem̀ paà gyã́à. Sõò éé ní e níí é náá ló dénè gbò e bà di kĩí ẽ́?”

10 Jíízọ̀s à gbóó kọọ̀: “Kọi neí va kọ bà á ĩìtẽ́ kẽ.” Boo béè kọọ̀ gã́bug víl beè di kĩá, bà gbóó ĩìtẽ́ boo vílá, vaá nú ea é láá dú 5,000 gbò gbálà beè dì vá gbàà. 11 Jíízọ̀s beè gbóó tú fétúlúá, vaá tṍó ea ni tãàgã ló Bàrì boo lọ̀l, à gbóó dõo nè gbò e bà di ĩ́ìtẽ́ kĩá. A beè naa nagé vó pálaa kà ńkem̀ paà gyã́àa, vaá dénè ọ̀và beè dè vaá à m-má va. 12 Tṍó e ba ni dé vaá à m-má va, à gbóó kọ́ nè pá a gbò nyòòne nvée kọọ̀: “Bõonei ló gbò ńsã́gã́-sã́gã́ ea sígá ló kọbé tọ́ọ̀ kà náa pe.” 13 Bà gbóó bõonè ló gbò ńsã́gã́-sã́gã́ ea sígá ló vòò kpò fétúlú e ba beè tú báàlì naamá e gbòa beè dèa, vaá à m-má mm̀ 12 kà kùn.

14 Tṍó e gbòa mon tóm dũ̀ùnè ea sí, bà gbóó dààmà togó gè kọọ̀: “Mm̀ kà-kà, níì Neǹ Kọ́ọ̀ Bùlà Bàrì e ba beè kọọ̀ à é dú bàlà booíá ẹ́.” 15 Tṍó e Jíízọ̀s nyímá kọ bà gbĩ́ gè dù gé siilìèe naamá méné, à gbóó kpáá ììlà ló kil boo gù kĩée ea é dú áá ẹ̀ẹ̀.

16 Tṍó ea ni dú ló èlà, pá a gbò nyòòne nvée à gbóó àà kil nùgã́ pène, 17 vaá bã mm̀ faà sĩ́ múú fùl kil Kàpánìòm. Dénè tṍóí, dee a bílá, sõò Jííizọ̀s gáà òòà iná vá ló. 18 Gbele kpóóló fọ́ọ́lọ́ géè ùlà nàgé vaá tãagẽ pèneá. 19 Sõò tṍó e ba ni ọ́ví nú ea é láá dú taa àbèè ténì kà máẹ̀l* gbẹá sĩ́ pèneá, bà gbóó mòn Jíízọ̀s ea gé kyãa boo pèneá dú deè kĩée e ba faà sĩ́ múú dì. Pọ̀ à gbóó sií va. 20 Sõò, a beè kọ́ nè va kọọ̀: “Níà nda. Pọ̀ á gá siíi!” 21 A beè tàn va gè túe nvee mm̀ faà sĩ́ múúá. Tẽ̀ènè tṍóá, faàa à gbóó kọ̀ọ̀a nùgã́ múú ea di kĩée e bà géè kìla.

22 Deé ea bẽene, gbò e ba beè di na sábá pèneá náa beè mòn tọ́ọ̀ kà faà sĩ́ múú daalá lọl ló ene kà ńkem̀ faà sĩ́ múú, vaá ba beè nyimá kọọ̀ Jíízọ̀s náa beè zọ̀ pá a gbò nyòòne nvée bã mm̀ faà sĩ́ múúá àà. Áá ọ̀và ní e ba beè bã m àà ẹ. 23 Sõò gã́bug faà sĩ́ múú beè aa Tàìbérìàs vaá kọ̀ọ̀la kuló kĩée e ba beè tõo dé fétúlú e Neń Ea Íéi beè tã̀àgã ló Bàrì booá. 24 Tṍó e gbòa mon kọọ̀ Jíízọ̀s àbèè gbò e bà ólò nyoonée nvée á gé kĩá, bà gbóó bã mm̀ gbò faà sĩ́ múúá kil Kàpánìòm gé gbĩ́ Jíízọ̀s.

25 Tṍó e bà moníé sábá pèneá, bà gbóó bĩináe kọọ̀: “Neǹ Dòbá, mó tṍó ní eo beè iná kĩí ẽ́?” 26 Jíízọ̀s à aalá nè va kọọ̀: “M̀ lóò kà-kà bel nèi kọọ̀, nóo gé gbím mi boo béè gbò tóm dũ̀ùnè eo beè monii, sõò ò gé gbím mi boo béè fétúlú eo beè dei vaá à m-mái ã́. 27 Ó gá sii tóm nyoomai gyã́á ea é kyọà, sõò sii tóm nyoomai gyã́á ea é di lee vaá naa kọ ó iei dùm e bè náa tá, e Sã́áná nená é néi, boo béè kọọ̀ ẹlẹ ní e Bàrì, ea dú bẹẹ Tẹ̀, beè nvèè kpíi ló kọ à ténmàè ẽ.”

28 Bà gbóó bĩináe kọọ̀: “Éé ní eé íè ge naa kọbé à zógè kọ è gé sí tóm nè Bàrì e?” 29 Jíízọ̀s à aalá nè va kọọ̀: “Tóm Bàrì eo é síi dú gè ié zìgà mm̀ neń ea beè lẹ̀ẹ̀là.” 30 Bà gbóó bĩináe kọọ̀: “Mókà tóm dũ̀ùnè ní eo é sí kọbé è mon vaá zìgà ní ló é? Mókà tóm ní eo gé sí é? 31 Bẹẹ gbò nómá tẹ̀ beè dé mánà gbẹá boo kpáà bàlà ól dì belí bé e Kpá Káí beè kọ́ naa kọọ̀: ‘A beè nè va gyã́á ea aa káála kọ bà á dè.’” 32 Jíízọ̀s à gbóó kọ́ nè va kọọ̀: “M̀ lóò kà-kà bel nèi kọọ̀ Mózìs náa beè nèi gyã́á ea aa káála, sõò ńdáà Tẹ̀ néi kà-kà gyã́á ea aa káála. 33 Boo béè kọọ̀ neń ea beè aa káála dù, vaá naa kọọ̀ gbò e bà di bàlà booí á ié dùm ní ea dú gyã́á ea aa bá Bàrì e.” 34 Bà gbóó kọ́ nèe kọọ̀: “Neń Ea Íéi, olòó nèi nakà gyã́áí lee.”

35 Jíízọ̀s à kọ́ nè va kọọ̀: “Nda ní em dúù gyã́á dùm ẽ. Tákói náa é táná ló kọ̀láá neń ea dúm ló, vaá kọ̀láá neń ea kilsĩ́ gè iém zìgà m, òòe náa é káná kpáá tọ́ọ̀ dee. 36 Sõò dì belí bé em beè kọ́ naa nèiá, o moním mi, sõò nóo íèm mi zìgà m. 37 Kọ̀láá neń e Tẹ̀a ném é dúm ló, vaá ním é kpó tọ́ọ̀ nen ea dúm ló ààmà, 38 boo béè kọ m beè aa káála dú ló gè naa bùlà neń ea beè lẹ̀ẹ̀làm, níì ńdáà bùlà nì. 39 Náa dú bùlà neń ea beè lẹ̀ẹ̀làm kọ ḿ pee bã̀àna enè neń ea di zẹ̀ẹ̀ gbò ea beè nèm, sõò à dú a bùlà kọ ḿ kẽeé va lọl kemà ú mm̀ dee deè nvéè dee. 40 À dú bùlà ńdáà Tẹ̀ kọọ̀ kọ̀láá neń ea nyímá ló a Sã́áná, vaá kilsĩ́ gè iée zìgà m á ié dùm e bè náa tá, vaá nda é kẽée lọl kemà ú mm̀ dee deè nvéè dee.”

41 Tṍóá, pá Júù à gbóó dààmà togó gè nuumi bel kìlmàé ló boo béè kọ a beè kọọ̀: “Nda ní em dúù gyã́á ea aa káála dù e.” 42 Bà gbóó dààmà togó gè kọọ̀: “Níí níì Jíízọ̀s ea dú nvín Jósẹ̀f, e beele nyímà ló a tẹ̀ nè a kàa nì? Éé ní ea náa à kọọ̀, ‘M beè aa káála dù e’?” 43 Jíízọ̀s à gbóó kọ́ nè va kọọ̀: “Kubvii gè nuumii bel. 44 Tọ́ọ̀ nen náa é láá dúm ló, áá bèè kọọ̀ Tẹ̀ ea beè lẹ̀ẹ̀làm ã́, duulàẹ mám, vaá nda é kẽée lọl kemà ú mm̀ dee deè nvéè dee. 45 Bà beè emí mm̀ kpá Gbò Kọ́ọ̀ Bùlà Bàrì kọọ̀: ‘Jìhóvà* é nóòmà nuù kọ̀láá ọ̀và.’ Kọ̀láá nen ea pãane tṍ ló Tẹ̀a vaá nó nu lọ̀líé bá é dúm ló. 46 Tọ́ọ̀ nen gáà mòn Tẹ̀a, daalá lọl ló nda em beè aa ló Bàrì dù. Áá nda ní em ni mon Tẹ̀a ẹ. 47 M̀ lóò kà-kà bel nèi kọọ̀, kọ̀láá neń ea íém zìgà m é íe dùm e bè náa tá.

48 “Nda ní em dúù gyã́á dùm ẽ. 49 Bọọ gbò nómá tẹ̀ beè dé mánà gbẹá boo kpáà bàlà ól, sõò tṍó e tṍó téní, bà u nágé. 50 Nakà gyã́áí aa káála, vaá kọ̀láá neń ea dé náa é ú. 51 Nda ní em dúù gyã́á ea di dùm ea aa káála ẹ́. Kọ̀láá neń ea dé nakà gyã́áí é tõó dùm dọ̀ dè-dè. Mm̀ kà-kà, gyã́á em é ne dú nà nom̀ kpáló kọbé à náa kọọ̀ gbò e bà di bàlà booí á ié dùm.”

52 Tṍóá, pá Júù à gbóó dààmà togó gè zọ̀ ene tàlà kọọ̀: “Mósĩ́ deè ní e gbálàí é láá tú a nom̀ kpáló nèi kọ é bà ẹ?” 53 Boo béè vó, Jíízọ̀s à gbóó kọ́ nè va kọọ̀: “M̀ lóò kà-kà bel nèi kọọ̀, be nóo baì nom̀ kpáló Sã́áná nená vaá õi a mii, nóo é íei dùm.* 54 Kọ̀láá neń ea ba nà nom̀ kpáló vaá ṍ nà mii é íe dùm e bè náa tá, vaá nda é kẽée lọl kemà ú mm̀ dee deè nvéè dee. 55 Boo béè kọọ̀ ńdáà nom̀ kpáló dú lèlà sĩ́ gyã́á vaá ńdáà mii à dú lèlà sĩ́ míí. 56 Kọ̀láá neń ea ba nà nom̀ kpáló vaá ṍ nà mii é kilsĩ́ gè ié lé gbaaló kilma ló nda, vaá nda é íe lé gbaaló kìlmàé ló. 57 Dì belí bé e Tẹ̀ ea di dùm beè lẹ̀ẹ̀làm vaá nda à di dùm tení dú ló Tẹ̀a naaá, níà bé e kọ̀láá neń ea ba ńdáà nom̀ kpáló é dí dùm tení dú ló nda naa ẽ́. 58 Nakà gyã́áí aa káála. Náa bélí gyã́á e bọọ gbò nómá tẹ̀ beè dè vaá tṍó e tṍó téní, bà u nágé á. Kọ̀láá neń ea dé nakà gyã́áí é tõó dùm dọ̀ dè-dè.” 59 A beè ló gbò belí tṍó ea géè noomà nu gbẹá tọ bõ̀ònaló fã̀ pá Júù ea di Kàpánìòm.

60 Tṍó e bà dã́ naa vó, gã́bug pá a gbò nyòòne nvée à gbóó kọọ̀: “Níà kà agẹ bel. Mée ní ea é láá pãane tṍ ló é?” 61 Tṍó e Jíízọ̀s nyímá kọọ̀ pá a gbò nyòòne nvée gé nuumi bel kilma ló bel ea lóè á, à gbóó bĩiná va kọọ̀: “É kọọ̀ belá náa kọ ó gá ie nám mi zìgà m? 62 Ò é naanii vàẹ be ò monii Sã́áná nená ea gé aà kil kĩée ea beè dì e? 63 Nyómá káí ní ea ólò nè dùm nen ẽ́. Tọ́ọ̀ nú e nom̀ kpáló di ló á gé. Nyómá káí ní ea túm loomá gbò bel e nda lóò nèiá ẽ́, vaá à é náa kọ ó iei dùm. 64 Sõò à íe sìgà bọ̀ì e nóo zigàì.” Jíízọ̀s beè ló gbò belí boo beè kọ a beè nyimá ló gbò e bà náa é íée zìgà m lọl dààà togó, nè neń ea é ténié ló nvee bá ọ́b. 65 À gbóó kpáá kọọ̀: “Níà nú ea náa m beè kọ́ nèi kọọ̀, tọ́ọ̀ nen náa é láá dúm ló beè Tẹ̀a náa sọ́ẹ tọ́ deè e.”

66 Gbò belí beè naa kọọ̀ gã́bug pá a gbò nyòòne nvée à òòà ààẹ́ nvée nyoone gbò nú e ba beè sọ̀bá gbẹẹ́ kẽ, vaá bà náa beè bììànàé nvée. 67 Jíízọ̀s à gbóó bĩiná Òb Nè Bàà Nená kọọ̀: “É kọọ̀ boolo é aa naigé?” 68 Sáímòn Pítà à gbóó aalá nèe kọọ̀: “Neń Ea Íéi, mée ní eé aà nyoone ẽ́? Gbò bel eo lóò é náa kọ nen á ié dùm e bè náa tá. 69 Beele e zigà, vaá nyimá kọọ̀, ò dúù Neń Ea Di Káí E Bàrì Beè Lẹ̀ẹ̀là.” 70 Jíízọ̀s à gbóó kọ́ nè va kọọ̀: “M beè sà òb nè bàà bọ̀ì, sẹ̀ ním beè naa vó é? Sõò enè neń ea dìí zẹ̀ẹ̀ dú neǹ kyáá bel.”* 71 Mm̀ kà-kà, à géè ló bel kilma ló Júdàs, ea dú nvín Sáímòn Ìskáriọ̀t, boo béè kọọ̀ ẹlẹ ní ea é beè teníé ló nvee bá gbò ọ́bvẹ́, náa kal ló béè kọọ̀ à dṹùnà Òb Nè Bàà Nená.