Kpá E Pọ́ọ̀l Beè Lẹ̀ẹ̀là Má Pá Róm̀
2 Vó à naa, náa íe nú eo é láá elá boo leevè bel o bá, e nà vígà, be ò béélá bel ló dõona gbò. Boo béè kọọ̀ tṍó eo béèlà bel ló dõona gbò, ò bẽ́gẽ̀ bel o bá, boo béè kọọ̀ nú eo gé élá boo beemá bel ló dõona gbòa ní e olo gé náa ẽ́. 2 Kátogóí, è nyímà kọọ̀ Bàrì é béélá bel ló gbò e bà náa gbò nuí mm̀ sĩ́deè ea gbáá ló kà-kà bel.
3 Sõò nà vígà, ò doomà kọọ̀ ò é fulìè zelìè bá bèèla bel Bàrì tṍó e olo gé béélá bel ló gbò e bà náa íb gbò nú e olo gé náa nagé á? 4 Sẹ̀ ò gbẹ́mà nvéè a sàn nyíe nè ĩ̀ìmà boo béè kọọ̀ nóo nyímà kọọ̀ nú ea náa Bàrì à ié ni sàn nyíe ló dú gè piiga boo gè naa kọ ó ọgá? 5 Sõò boo béè kọọ̀ ò íè agẹ togó vaá nóo gbĩ́ gè ọgá, ò gé kólmà bá súng tẹẹá boo deé e Bàrì é bã súng vaá beelá bel mm̀ sĩ́deè ea lelà. 6 À é ne kpẽ́ buù nen dẹ̀ẹ̀a boo bé ea beè sí a tóm naa. 7 À é ne dùm e bè náa tá gbò e bà gé gbĩ́ lèèlà, ka, nè dùm e bè náa é kyọasĩ́ tení dú ló gè ié ĩ̀ìmà vaá sí lé tóm. 8 Sõò súng Bàrì é dọ́ boo gbò e bà íe dùm ànà-ànà nè gbò e ba náa gban tṍ ló kà-kà bel e bà gé lábví pọ́lọ́ láb. 9 Tã̀àgã̀ é dọ́ boo kọ̀láá nen ea ólò naa nú ea é nveè kom ló dõona gbò. À é zẹ́ẹ́ dọ boo pá Júù besĩ́ à kalá dọ boo gbò e bè níì pá Júù nì. 10 Sõò lèèlà, ka, nè fẹ́ẹ́-fẹẹ̀ ló é dí ló kọ̀láá nen ea ólò naa nú ea dú lé. À é zẹ́ẹ́ di ló pá Júù besĩ́ à kalá di ló gbò e bè níì pá Júù nì. 11 Boo béè kọọ̀ Bàrì náa ólò sà sĩ́ nen naamá nu.
12 Kọ̀láá gbò e bà á gé kèbá log vaá bà sí pọ́lọ́, é ú e bà náa é tú log beemá va bel ló. Sõò kọ̀láá gbò e bà di kèbá log vaá bà sí pọ́lọ́, bà é tú log beemá va bel ló. 13 Níì gbò e bà dã́ nú e log kọ́ ní e Bàrì ólò ẹ̀b kọ bà dú gbò lé lab dògòe nì, tãa vó, gbò e bà náa nú e log kọ́ ní ea ólò tenmá kọ bà dú gbò lé lab dògò e. 14 Boo béè kọọ̀ tṍó e gbò e bà di gbò dó àla e bà á gé kèbá log náa nú e log kọ́, náa kal ló béè kọọ̀ bà á gé kèbá log, bà dú log nèà ba bá. 15 Baalaí ní e bà zógè kọọ̀ nú e log kọ́ diè vá nyíe ẽ́, vaá ba bug gé sí neǹ ditõ̀ò kìlmà vá ló. Ba bug ólò bēgẽ̀ va bel tṍó e bà náa pọ́lọ́ nu àbèè à léèvè va bel tṍó e bà náa lé nu. 16 Níí é nááá kà lèlà deé e Bàrì é tú Kráìst Jíízọ̀s beemá bel ló gbò nen boo béè nú e bà gé náa gbẹá ke gũ̀a, dì belí bé e lé kpẹ̀a em gé veeí tẹ́lẹ bàlà kẽ naa.
17 Kátogóí, be ò kọ́ọ̀ ọ̀ọ̀ neǹ Júù vaá ò dẹlẹ̀ nyíé boo log, vaá ṍ kààgà mm̀ Bàrì, 18 vaá ò nyímà nú ea dú a bùlà nè nú ea palàge dú bíi boo béè kọ ba beè noomà ni Logá, 19 vaá ò agàla boo kọ ò é láá tulè gbò gímá dẽe vaá dú ẹ́ẹ́ dee nèà gbò e bà di kùkùù gín, 20 vaá ò dúù nen eo é láá le-le dee bá gbò e bà náa nyímá nu, nen ea é láá noomà nuù gbò pá nvín, nè nen ea íe nyìmànù vaá dã́ ból ló kà-kà bel ea di mm̀ Logá— 21 oló eo ólò noomà nuù dõona gbò, éé ní ea náa nóo nóòmà nuù o bá ẹ́? Oló eo ólò vee kọọ̀, “Ó gá zìb nu,” é kọọ̀ olo ólò zìb nu? 22 Oló eo ólò kọọ̀, “Ó gá kuná gã̀,” é kọ olo ólò kuná gã̀? Oló e gbò ńbàlì e bà náàmà bá ólò palàge bẽemá, é kọ olo ólò kọ̀ọ̀là tọọ̀ káí gbò ńbàlì e bà náàmà bá? 23 Oló eo ólò gaavá boo log, é kọọ̀ ò ólò lọ̀l ka ló Bàrì tení dú ló gè dọ̀ log? 24 Boo béè kọọ̀ dì belí bé e ba beè emí naaá, “O náanii kọọ̀ gbò e bà di gbò dó àla á òn béè Bàrì.”
25 Mm̀ kà-kà, ge kòòà ólò dọ̀ bélè áá tṍó eo náà nú e log kọ́, sõò be ò dọ log, o gè kòòà dú zọ̀là pọ́ì. 26 Beè nen ea gáà kòòà náa nú ea lela kèsĩ́ Bàrì dì belí bé e Log kọ́ naa, náa kal ló béè kọ à gáà kòòà, bà é ẹb kọ a kooà, sẹ̀ níì vó nì? 27 Vaá nen e bà gáà koóe vaá à sẹlẹ Logá é béélá bel ló oló eo dọọ̀ log, náa kal ló béè kọọ̀ ò íè log e ba beè emí vaá o beè kòòà. 28 Ge dú kààà neǹ Júù níì nú e nen monmà dẽe nì, vaá kààà ge koo nen níì nú e bà ólò naá ló kpáló nen nì. 29 Sõò nú ea di bùlà nen ní ea tú nen naamá kààà neǹ Júù e, vaá mm̀ nyíée ní ea é kooà tení dú ló nyómá káí é, níì tení dú ló log e ba beè emí nì. Bàrì ní ea ólò lèèlà nen ea meà naa vó é, níì gbò nen nì.