Tóm Gbò E Jíízọ̀s Beè Lẹ̀ẹ̀là
11 Gbò e Jíízọ̀s lẹẹlàa nè pá vígà e bà beè di Jùdíà beè gbóó dã́ kọọ̀ gbò e bà di gbò dó àla a zigà nàgé ló moǹ bel Bàrì. 2 Vó à naa, tṍó e Pítà íná Jèrúselẹ̀m, gbò e bà ólò nvèè sãa kúm kọ bà á kòòà beè gbóó dààmà togó gè kanáe 3 kọọ̀: “Ò kil tọọ̀ gbò e bà gáà kòòà gé zọ̀ va deá nu.” 4 Pítà à gbóó palàge baatẽ́ nú ea kil ló belí nèva kọọ̀:
5 “M beè di boǹ Jọ́pà em géè tã̀àgã ló Bàrì, m̀ gbóó mòà nuù dẽe vaá mòn nú ea bélí gbele pọ̀b báà kàn é bà síi bá ló ténì gá ea di ló lọl káála tẹlẹ̀ḿ ló. 6 M beè gbóó palàge ẹ̀b vaá mòn kọ̀láá íb nom ea íe ténì kà kpóó tọ ea di boo kunukẽ̀í, gbò nom̀ kọ̀l, gbò nom e kọ́g di ló e bà ólò tẹlẹ̀ ké, nè gbò ńnóm. 7 M beè dã nágé moń ea kọ́ nèm kọọ̀: ‘Pítà, aa boo, kèl vaá ò ba!’ 8 Sõò m beè kọọ̀: ‘Ním é láá bà, e Nen Ea Íém, boo béè kọ m̀ gáà bà tọ́ọ̀ kà nú e náa õoà àbèè kọ náa dú lé tọ́ọ̀ dee.’ 9 Ní ea égè bàà tóm, moń ea aa káálaá à gbóó kpáá kọ́ nèm kọọ̀: ‘Kùb ge kolí nú e Bàrì beè õ̀ònà kolíé nú e bè náa õoà.’ 10 Tṍó e nuí nááá ní ea égè taà tóm, bà gbóó òòmà dénè nú em beè mòna kilma káála. 11 Tẽ̀ènè tṍóá, m beè gbóó mòn taà nen e bà lẹẹlà lọl Sìzàríà mám e bà di élá nùtọ kĩée em ólò tõoá. 12 Nyómáá beè gbóó kọ́ nèm kọ ḿ nyooné va àà, vaá ḿ gá ié tọ́ọ̀ kà bàà-bàà bùlà. Vaá ọ̀ọ̀lẹ̀ kà vígà págbálà e bà dìḿ lóí beè zọ̀m bã tọọ̀ gbálàa.
13 “A beè kọ́ nèm kọọ̀ nyómá tóm beè silàẹ̀ẹ́ ló gbẹá a tọ vaá kọọ̀: ‘Lẹ̀ẹ̀là gbò nen kọ bà á sí Jọ́pà gé kolí Sáímòn e bà ólò kolíe Pítà, 14 mè à é kọ́ nè ni nú ea é náa kọọ̀ olo nè dénè pá o tọ á láá dùùà.’ 15 Sõò tṍó em daàmà togó gè ló bel, nyómá káí beè gbóó dọ̀ vá boo dì belí bé ea beè zẹ́ẹ́ dọ̀ nàgé boo beele naaá. 16 Tṍóá, m beè gbóó kẽ̀èa boo bel e Nen Ea Íéi beè olòó kọ̀, ea kọ́ọ̀: ‘Jṍòn beè tú gbò nen diilé múú, sõò boolo é diiaí múú tení dú ló nyómá káí.’ 17 Vó à naa, beè tẽ̀ènè íb dõ̀ònù e Bàrì beè nè beéle e íè zìgà mm̀ Jíízọ̀s Kráìst, ea dú Nen Ea Íéi, ní ea ne nàgé baala ẹ́, ndaà mée e nda é láá kpega deè Bàrì e?”
18 Tṍó e bà dã́ gbò belí, bà gbóó pĩigã́.* Ba beè gbóó lèèlà Bàrì kọọ̀: “Beè vó, Bàrì a ne nàgé deè gbò e bà di gbò dó àla kọ bà á ọgá naa ní e bà é íe dùm.”
19 Tṍóá, gbò e bíígá ló beè naa kọ bà á teelá zààlà boo béè nú ea nááá ló Stívìna beè kil kpã́á Fìnísìà, Sáíprọ̀s, nè Ántiọ̀k, sõò ba beè ló moǹ bel Bàrì nè áá pá Júù. 20 Sõò sìgà ọ̀và e ba beè aa Sáíprọ̀s nè Sàìrínì kil Ántiọ̀k beè gbóó dààmà togó gè ló moǹ bel Bàrì vaá kọ́ lé kpẹ̀a ea kil ló Jíízọ̀s, ea dú Nen Ea Íéi nè gbò e bà ólò ló Gríìk. 21 Jìhóvà* beè tãanè va dee bá, vaá gã́bug nen beè gbóó nyoone nvéè Nen Ea Íéi.
22 Tṍó e gbò e bà di bõ̀ònatõ̀ò ea di Jèrúselẹ̀m dã́ kpẹ̀a ea kil vá ló, bà gbóó lẹ̀ẹ̀là Bánabàs siimá kpã́á Ántiọ̀k. 23 Tṍó ea íná kĩá vaá mòn bé e Bàrì íé va sàn nyíe ló naa, à gbóó ṍ kààgà vaá dààmà togó gè siè va kpóó ló kọ bà á kilsĩ́ gè nyoone nvéè Nen Ea Íéi lọl mm̀ dénè ba nyíe, 24 boo béè kọ aẹ̀ beè lé nen, e nyómá káí Bàrì beè dìé boo vaá a beè ié zìgà. Vaá gã́bug nen beè kpáá dọ ló gbò e bà géè nyoone nvéè Nen Ea Íéi. 25 Vó à naa, à gbóó àà kil Tásọ̀s gé palàge gbĩ́ Sọ́ọ̀l. 26 Tṍó ea moníe, à gbóó faaláẹ kilma Ántiọ̀k, vaá ba beè tú enè gbáá zọ̀ọ̀mà bõ̀ònatõ̀ò ea di kĩá bõoná vaá noomà nuù gã́bug nen, vaá Ántiọ̀k ní e gbò e bà gé nyoone nvéè Jíízọ̀s beè dààmà togó gè kọ̀là Gbò E Bà Gé Nyoone Nvéè Kráìst gbẹá ẹ́, vaá níí beè naaá tení dú ló tùle ea aa bá Bàrì.
27 Mm̀ gbò deeá, gbò kọ́ọ̀ bùlà Bàrì ólò aa Jèrúselẹ̀m dú Ántiọ̀k. 28 Tení dú ló nvèè bá ea aa bá nyómá káí Bàrì, enè ọ̀và ea kọlà Ágabọ̀s beè gbóó elá èla vaá kọ́ nú ea kil ló agẹ bá kíi ea é beè gé dọ boo zivèkà kunukẽ̀í, vaá níí beè naaá mm̀ gbò deé e Klọ́dìọ̀s géè bẹ̀l. 29 Vó beè naa kọọ̀ gbò e bà gé nyoone nvéè Jíízọ̀s á beeláfùl ge lẹ̀ẹ̀là nu má pá vígà e ba di Jùdíà dẹ̀ẹ̀a boo nú e bá buù ọ̀và sim tùlà. 30 Vaá ba beè lẹ̀ẹ̀là tenmá bá Bánabàs nè Sọ́ọ̀l má gbò kànen.