Tóm Gbò E Jíízọ̀s Beè Lẹ̀ẹ̀là

23 Pọ́ọ̀l à gbóó ẹ̀b sĩ́ gbò e bà ólò beelá bel gbẹá Pọ̀b Tọ Bèèlaá vaá kọọ̀: “Pá vígà, nda palàge ié õ̀òa bug kèsĩ́ Bàrì tẹlẹ̀ nieí.” 2 Tṍóá, pọ̀b neǹ vààla gyọ́ọ ea kọlà Ànànáíàs à gbóó kọ́ nè gbò e bà beè di élaẹ́ lóá kọ bà á sáẹ bá gã́. 3 Pọ́ọ̀l à kọ́ nèe kọọ̀: “Oló eo bélì gbọọ̀ tọ e bà tẹ́lẹ̀ ẹ́ẹ́ ágbá ló, Bàrì é sá ni bá. Ò ĩ́ìtẽ́ kẽ tú Log beemá bel ló nda, boo tṍó e olo gé dọ Log tení dú ló gè kọ bà á sám bá?” 4 Gbò e bà di élá kĩá à gbóó kọọ̀: “Pọ̀b neǹ vààla gyọ́ọ Bàrì ní e olo gé on naa vóá ẹ́?” 5 Pọ́ọ̀l à kọọ̀: “Pá vígà, ním beè nyimá kọọ̀ ẹ̀ẹ̀ pọ̀b neǹ vààla gyọ́ọ, boo béè kọ ba beè emí kọọ̀, ‘Nóo é íè ge ló pọ́lọ́ bel nè nen ea gé bẹl pá o gbò.’”

6 Tṍó e Pọ́ọ̀l nyímá kọọ̀ sìgà gbò e ba beè di mm̀ Pọ̀b Tọ Bèèlaá dú pá Sádùsíì vaá sìgà ọ̀và à dú pá Fárìsíì, à gbóó vulí kpã́ kọọ̀: “Pá vígà, ndaà neǹ Fárìsíì, ndaà nvín neǹ Fárìsíì. Bà béélám bel ló boo béè kọ m̀ zigà kọọ̀ gbò e ba beè ù é kẽeà aa kemà ú.” 7 Pá Fárìsíì nè pá Sádùsíì à gbóó kaná vaá pòòà boo béè bel ea lóí. 8 Boo béè kọọ̀ pá Sádùsíì náa ólò zìgà kọọ̀ kẽ̀èà aa kemà ú àbèè nyómá tóm àbèè nyómá dì, sõò pá Fárìsíì ólò zìgà kọọ̀ dénè nuí dì. 9 Vó à naa, kòvàa beè gbóó zoogá naa ní e sìgà gbò émì kpá pá Fárìsíì élá èla vaá tú bá kpóó loomá bel kọọ̀: “Née monì tọ́ọ̀ kà pọ́lọ́ e gbálàí sí, sõò beè nyómá àbèè nyómá tóm beè ló bel nèe—.” 10 Tṍó e kànaá ni zóógá, pọ̀ à gbóó sii pọ̀b neǹ béá kọ bà é fẹ́ Pọ́ọ̀l. À gbóó kọ́ nè gbò béá kọ bà á gé tú bá kpóó tuumá Pọ́ọ̀l lọ̀l vá bá domá kĩée e gbò béá ólò tõo.

11 Bílá deè deeá, Nen Ea Íéi beè gbóó eláẹ́ kpàn vaá kọọ̀: “Ié agẹ ló, boo béè kọọ̀ dì belí bé eo beè tú agẹ bá siimá neǹ ditõ̀ò kìlmàḿ ló gbẹá Jèrúselẹ̀m naaá, níà bé eo é íè ge si nágé neǹ ditõ̀ò kìlmàḿ ló gbẹá Róm̀ naa ẽ́.”

12 Tṍó e dee zilà, pá Júù beè gbóó bilá ló vaá zilá zíl kọ bà náa é déè àbèè ge õè tọ́ọ̀ nu dọ̀ọ̀mà tṍó e bà é fẹ́ẹ̀ Pọ́ọ̀l. 13 Nú ea é sígá ló 40 gbò gbálà ní e ba beè bilá ló vaá zilá zílí é. 14 Gbòí beè gbóó àà sí ló gbò togó vààla gyọ́ọ nè gbò kàneǹ pá Júù gé kọ́ nèva kọọ̀: “E beè zilá zíl kọ née é dé tọ́ọ̀ nu dọ̀ọ̀mà tṍó eé fẹ́ Pọ́ọ̀l. 15 Vó à naa, kàtogóí, boolo nè gbò e bà ólò beelá bel gbẹá Pọ̀b Tọ Bèèlaá, kọi nei pọ̀b neǹ bé kọ á túe domá vaá ò sẹlẹi ló belí kọọ̀ ò gbĩ́ gè kpáá ẹbvii mm̀ a bel leevè. Sõò besĩ́ à kálá iná kuló, beele é dí kpènà ló gè fẹ́ẹ.”

16 Sõò ene kà nvín e vígà Pọ́ọ̀l beè màn beè dã́ nú e bà gé nooí, vaá gbóó sí ló Pọ́ọ̀l kĩée e gbò bé ólò tõo gé kọ́ nèe naa vó. 17 Pọ́ọ̀l à gbóó kolí enè neǹ togó gbò bé nvea ló vaá kọ́ nèe kọọ̀: “Tú nvín ãa gbálàí siimá ló pọ̀b neǹ bé, boo béè kọ à íe nú ea gbĩ́ gè kọ́ nèe.” 18 À gbóó túe siimá ló pọ̀b neǹ béá vaá kọ́ nèe kọọ̀: “Pọ́ọ̀l ea di kpọ́gọ́lọ́í beè kolím vaá kọ ḿ tú nvín ãa gbálàí siimá ní ló, boo béè kọ à íe nú ea gbĩ́ gè kọ́ nè ni.” 19 Pọ̀b neǹ béá à gbóó siíe bá ló bá kilma kpògà kẽ vaá bĩináe kọọ̀: “Éé ní eo gbĩ́ gè kọ́ nèm ẽ́?” 20 À gbóó kọọ̀: “Pá Júù a bílá ló gè kọ́ nè ni kọ ó tú Pọ́ọ̀l domá Pọ̀b Tọ Bèèla sṍóeá boo, vaá bà noo gè sẹlẹ ló belí kọọ̀ bà gbĩ́ gè kpáá nyimàè gã́bug nú ea kil ló a bel. 21 Ó gá gbàn va tṍ ló, boo béè kọọ̀ nú ea é sígá ló 40 gbò gbálà di gṹá e bà gé élá bànàe, vaá ba beè zilá zíl kọ bà náa é déè àbèè ge õè tọ́ọ̀ nú dọ̀ọ̀mà tṍó e bà é fẹ́ẹ̀ẹ, vaá bà di kpènà ló e bà gé élá bànà tṍó eo é sọtọ́ deè.” 22 Tṍóá, pọ̀b neǹ béá à gbóó aa ló nvín ãa gbálàí kọ á àà, vaá ãanée kọọ̀: “Ó gá kọ́ nè tọ́ọ̀ nen kọ o beè ló belí nèm.”

23 À gbóó kọ́ nè bàà kà neǹ togó gbò béá kọọ̀: “Kpoogei dee ló 200 gbò bé, bií ló 70 gbò e bà é bã́ boo nyà-nyà, nè 200 gbò e bà é fáálá sòbà e bà é kyãà kil Sìzàríà tṍó ea é láá dú boo sĩ́ìna òb tóm* bílá deeí. 24 Nagé, kpoogei dee ló gbò nyà-nyà e Pọ́ọ̀l é bã́ boo, vaá ò fáálaíe imaí ló Fílìx ea gé bẹl mm̀ sĩ́deè e tọ́ọ̀ nu náa é nááaé ló.” 25 A beè gbóó emí kpá lẹ̀ẹ̀la tóm kọọ̀:

26 “Nda Klọ́dìọ̀s Lísìàs gé kanà ni mon e Fílìx E Ka Di Ló, Eo Gé Bẹl Jùdíà! 27 Pá Júù beè sii gbálàí vaá gbĩ́ gè fẹ́ẹ, sõò nda beè vàlẹ̀ bá faalá pá ńdáà gbò bé gé dùùmàe, boo béè kọ m̀ dã́à kọọ̀ ẹ̀ẹ̀ nvín sãà Róm̀. 28 M beè faaláẹ siimá ba Pọ̀b Tọ Bèèla boo béè kọ m beè gbĩ́ gè nyimá íb pọ́lọ̀ e bà kọ́ à sí. 29 M beè gbĩ́té ló mòn kọọ̀ bel e bà lóé ló kuu dùlà bel ea kil ló ba Log, sõò bà náa láà kọ́ tọ́ọ̀ kà pọ́lọ́ ea sí ea náa kọ á bọ́ló gè fẹ́ẹ abèè ge kọ á sí kpọ́gọ́lọ́. 30 Sõò boo béè kọ baa náa kọ́ ḿ nyimá nú e bà gé noo nyòòmàe, m̀ é gbẹ́á boo lẹ̀ẹ̀làẹ má ni, vaá kọ́ nè gbò e bà kọ́ à sí pọ́lọ́á kọ bà á kọ́ pọ́lọ́ ea sí gbẹá ní kèsĩ́.”

31 Vó à naa, tṍó e dee ni bílá, gbò béá beè gbóó faalá Pọ́ọ̀l kilma boǹ Àntípatrìs dì belí bé e ba beè kọ́ nèva naa. 32 Deé ea bẽene, ba beè sọ̀tọ́ deè kọọ̀ gbò e ba beè bã boo nyà-nyàa á zọ̀ẹ àà, sõò nagbò béá beè òòà kil kĩée e gbò bé ólò tõo. 33 Gbò e ba beè bã boo nyà-nyàa beè bã Sìzàríà vaá tú Pọ́ọ̀l bií ló kpá lẹ̀ẹ̀la tómá nè nen ea gé bẹlá. 34 À gbóó bugi vaá bĩiná bálásĩ́ kĩée ea dú. Tṍóá, à gbóó nyimá kọ à aa Sìlísìà. 35 À gbóó kọọ̀: “M̀ é palàge pãané ni tṍ ló tṍó e gbò e ba beè ló ni bel ló é dú.” À gbóó kọ bà á túe sẹlẹ́ pọ̀b tọọ̀ Hẹ́rọ̀d vaá kùe dẽe ló.