Lé Kpẹ̀a E Máátìù Beè Emí
9 A beè gbóó bã mm̀ faà sĩ́ múú fùl sábá pèneá kil boń ea ólò tõo. 2 Ba beè tú ene kà gbálà e báàsĩ́e ọọ* nvee boo váì kpàì domáé ló. Tṍó e Jíízọ̀s mon bé e bà íe zìgà naa, à gbóó kọ́ nè neń e báàsĩ́e ọọá kọọ̀: “Ié agẹ ló, e nà nvín! M ia ló o pọ́lọ́ nè ni.” 3 Sìgà gbò émì kpá beè gbóó kọ́ nè ene kọọ̀: “Gbálàí gé on Bàrì.” 4 Boo béè kọọ̀ Jíízọ̀s nyímá nú ea dì vá bùlà, à gbóó kọ́ nè va kọọ̀: “Éé ní ea náa vaá ò gé bugii togó boo pọ́lọ́ nu ẽ́? 5 Gbàà ge kọọ̀, ‘M ia ló o pọ́lọ́ nè ni,’ nè ge kọọ̀, ‘Aa boo kyã̀à,’ mókà ea di gbàà ní ea válí é? 6 Sõò kọbé ò nyímai kọọ̀ Sã́áná nená íe kpóó gè ia ló pọ́lọ́ nè gbò nen—” à gbóó kọ́ nè neń e báàsĩ́e ọọá kọọ̀: “Aa boo, tú o váì kpàì vaá ò aà kil be.” 7 À gbóó aa boo kil be. 8 Pọ̀ beè sii dénè gbòa tṍó e bà mon naa vó, naa ní e bà leelà Bàrì ea beè tú íb kpóó ea náaá nè nen.
9 Tṍó e bà gé aa kĩá àà, Jíízọ̀s à gbóó mòn ene kà gbálà ea kọlà Máátìù, ea di ĩ́ìtẽ́ tọ gbò lọ̀l kpègè gbáá. À gbóó kọ́ nèe kọọ̀: “Nyooném nvée.” Tẽ̀ènè tṍóá, à gbóó aa boo nyoonée. 10 Tṍó e tṍó téní e Jíízọ̀s beè di tọọ̀ Máátìù ea géè dé gyã́á, gã́bug gbò lọ̀l kpègè gbáá nè gbò náàkyọ̀ beè gbóó dù, vaá zọ̀ pá a gbò nyòòne nvée nè ẹ̀ẹ̀ deá nu. 11 Sõò tṍó e pá Fárìsíì mon naa vó, bà gbóó bĩiná gbò e bà ólò nyoone nvéè Jíízọ̀s kọọ̀: “Éé ní ea náa bọọ neǹ dòbá à zọ̀ gbò lọ̀l kpègè gbáá nè gbò náàkyọ̀ deá gyã́á ẽ́?” 12 Tṍó e Jíízọ̀s dã́ naa vó, à gbóó kọọ̀: “Gbò válá ló náa íe bíi ló neǹ dóm biè, sõò gbò e lóó va zọ ní e bà íée bíi ló é. 13 Aalii gé bugii togó boo nú e níí tõó dọ̀: ‘M̀ gbĩ́ì sàn nyíe, níì vààla gyọ́ọ nì.’ Boo béè kọọ̀ m beè dú ló gè kolí gbò náàkyọ̀, níì gbò lé lab dògò nì.”
14 Tṍóá, gbò e bà ólò nyoone nvéè Jṍòn beè gbóó dù gé bĩináe kọọ̀: “Éé ní ea náa vaá beele nè pá Fárìsíì ólò ká gã́ vaá pá ńlóò gbò nyòòne nvée náa ólò ká gã́ ẽ́?” 15 Jíízọ̀s à gbóó kọ́ nè va kọọ̀: “É kọọ̀ pá kóò neń ea gé ílí va íe bíi ló gè bã̀àgã̀ tṍó e neń ea gé ílí vaá dì vá ló? Tṍó gé dú e bà é tú neń ea gé ílí vaá lọ̀l vá ló ààmà. Tṍóá, bà é gbóó ká gã́. 16 Tọ́ọ̀ nen náa ólò tú ãa báà nu gbá dẽè nómá pọ̀b kọ̀là ló, boo béè kọọ̀, nómá báà nuá é zọọà aa dẽè ãa báà nuá, vaá à gbóó kpáá bààlà èl bé ea beè dì naa. 17 Níà bé e gbò nen náa ólò tú ãa míí tṍ mm̀ nómá bẹ̀lẹ̀ míí e bà tú kpá nom naamá naa ẽ́. Be bà náa vó, bẹ̀lẹ̀á é pómí bààlà vaá mííá eèa kẽ. Vaá bẹ̀lẹ̀ míí e bà tú kpá nom naamáá é gbóó kyọ̀à. Sõò gbò nen ólò tú ãa míí tṍ mm̀ ãa bẹ̀lẹ̀ míí e bà tú kpá nom naamá, vaá pálaa kà gbóó dì.”
18 Boo tṍó ea gé ló gbò belí nè va, enè neǹ tùle bõ̀ònaló fã̀ pá Júù beè gbóó dù gé kumíe dúnú ke gbàà vaá kọọ̀: “À gá dọ vóí, ńdáà síla é íè ge ù. Sóo-sóo, dù gé dẹlẹ́ẹ bá ból, mè dùm é ooà bã̀é m.”
19 Tṍóá, Jíízọ̀s à gbóó aa boo bììa nvéè gbálàa, vaá pá a gbò nyòòne nvée beè bììàẹ́ nvée nagé. 20 À íe ene kà ńnváá ea géè mòn tã̀àgã̀ boo béè kọọ̀ mii a síé ló mm̀ 12 gbáá, ea géè kyã̀à dú vá nvée. À gbóó daa bá ló zái ea di ló a pọ̀b kọ̀là ló. 21 Boo béè kọọ̀, à géè kọ́ nèà a bá kọọ̀: “Be m̀ láá daa gé bá ló áá a pọ̀b kọ̀là ló, m̀ é bóá.” 22 Jíízọ̀s à gbóó kììa ló kẽ vaá tṍó ea moníe, à gbóó kọ́ nèe kọọ̀: “Ié agẹ ló, e nà nvín pábia! O zìgà a náa kọ ó boá.” Lọl tṍóá ààmà, kpálóe beè gbóó valí.
23 Tṍó ea íná tọọ̀ neǹ tùle bõ̀ònaló fã̀ pá Júùa vaá mòn gbò e bà gé uuli vìli vaá tò, 24 Jíízọ̀s à gbóó kọọ̀: “Dọí kèdẹi, boo béè kọọ̀ nvín pábiaí náa ú, sõò à di dáá.” Tṍó ea kọ́ vó, bà gbóó dààmà togó gè màngã̀e vaá nvèèmàe lẹ́. 25 Tṍó e gbòa ni dọ́ kèdẹi, a beè gbóó kyã̀à bã tọá, sii bá ló bá nvín pábiaá, vaá a gbóó aa boo. 26 Mm̀ kà-kà, kpẹ̀a ea kil ló nuí beè zààlà iná dénè ketõ̀ò ea di bálásĩ́ kĩá.
27 Tṍó e Jíízọ̀s kyãà aa kĩá, bàà neǹ gímá dẽe beè bììàẹ́ nvée vaá olòó vulí kpã́ kọọ̀: “Nvín Dévìd, iéi sàn nyíe ló.” 28 Tṍó ea kyãà bã tọ, gbò gímá dẽeá beè gbóó dúé ló. Jíízọ̀s à gbóó bĩiná va kọọ̀: “É kọọ̀ ò íèì zìgà kọ m̀ é láá bói?” Bà aalá kọọ̀: “Ẽei, e Neń Ea Íéi.” 29 Jíízọ̀s beè gbóó daá va bá boo dẽe vaá kọọ̀: “Bọọ zìgà á naa kọ ó boai.” 30 Tṍóá, bà gbóó mòn nu. Jíízọ̀s à gbóó palàge ãané va kọọ̀: “Ó gá zigai kọọ̀ tọ́ọ̀ nen á nyimá.” 31 Sõò tṍó e bà dọ́ kèdẹi, bà gbóó kọ́ nú ea nááá zaalí zivèkà bálásĩ́ kĩá.
32 Gbòa gé aà gé, gbò nen à gbóó faalá ene kà gbálà e zọ dìé m, vaá náa ólò láá ló bel domáé ló. 33 Tṍó e Jíízọ̀s ni kpó zọá lọ̀líé m, gbálà e bè náa géè láá ló belá beè gbóó ló bel. À gbóó palàge bọọ́ ló gbò e bà di kĩá naa ní e bà kọ́ọ̀: “Íb nú ea náaí gáà naaá Ízrẹẹ̀l tọ́ọ̀ dee.” 34 Sõò pá Fárìsíì géè kọọ̀: “Kpóó Pọ́lọ́ Nyómá ea di togó gbò zọ ní ea kpóómá zọ lọ̀líé m ẽ́.”
35 Jíízọ̀s beè gbóó kyã̀à bã kọ̀láá kà ńkem̀ bon nè pọ̀b bon, vaá noomà nu gbẹá mm̀ gbò tọ bõ̀ònaló fã̀ pá Júù, kọ́ lé kpẹ̀a ea kil ló boǹ ménéá vaá bó kọ̀láá íb zọ̀ló nè bo. 36 Tṍó ea mon gã́bug gbòa, ba beè dúe ńsàn nyíe boo béè kọọ̀ ba beè dì belí gbò naanà ból e kom di ló e bà gé dõogẽ kyã̀à, e neǹ tùle á gé ló. 37 À gbóó kọ́ nè gbò e bà ólò nyoonée nvée kọọ̀: “Gã́bug nu a léèvè, sõò gbò tóm ea di gbàà dú ńkem. 38 Vó à naa, banii Tẹ̀ Íè nú ea ni léèvèí kọ á kpáá lẹ̀ẹ̀là gbò tóm tẹlẹ mm̀ a ól.”