Lé Kpẹ̀a E Jṍòn Beè Emí
20 Kà lèlà túá dee ló sèa, Mérì ea dú Màgdálà beè nùmà sí ló kóló demá* tṍó e dee gáà ẹẹ, vaá mòn kọọ̀ ba beè kpọlẹ̀ báà dem e ba beè uú gã́ kóló demá* lọ̀l. 2 À gbóó teelá sí ló Sáímòn Pítà nè nakà neǹ nyòòne nvée e Jíízọ̀s ólò vùlèa, vaá kọ́ nè va kọọ̀: “Baa tú Nen Ea Íéi lọl mm̀ kóló demá, vaá née nyímà kĩée e bà túe kìlmà.”
3 Tṍóá, Pítà nè nakà neǹ nyòòne nvéeá à gbóó àà sí ló kóló demá. 4 Pálaa ọ̀và beè gbá teelá àà, sõò nakà neǹ nyòòne nvéeá beè teelá èl Pítà, vaá vàlẹ̀ bá iná ló kóló demá. 5 À gbóó tòòlà dẽe ẹ̀bmà m, vaá mòn báà kàna ea di kĩá, sõò náa beè bã m. 6 Tṍó e Sáímòn Pítà dú, à gbóó kyã̀à bã mm̀ kóló demá, vaá mòn báà kàna ea di kĩá. 7 Báà kàn e ba beè bọbvíé togó náa beè di ló nagbò báà kàn e ba beè pìgíé lóá, sõò a beè ulá tõó enè ketõ̀ò. 8 Tṍóá, nakà nen ea ólò nyoonée nvée ea beè vàlẹ̀ bá iná ló kóló demá à gbóó bã̀ nàgé m. Tṍó ea mon naa vó, à gbóó zìgà. 9 Sõò bà gáà beè dã ból ló nú e Kpá Káí beè kọ̀, kọọ̀ à é íè ge kẽ̀èà aa kemà ú. 10 Vó à naa, gbò e bà ólò nyoonée nvéeá beè gbóó òòà kil be.
11 Sõò Mérì beè kilsĩ́ gè elá kpàn kóló demá tò. Tṍó ea gé tóá, à gbóó tòòlà dẽe ẹ̀bmà mm̀ kóló demá, 12 vaá mòn bàà kà nyómá tóm e bà nveà ẹ́ẹ́ kọ̀là ló, e bà di ĩ́ìtẽ́ kĩée e ba beè tú íí Jíízọ̀s maameá. Enè ọ̀và beè ĩìtẽ́ deè kĩée e ba beè túe togó kpee, enè ọ̀và à ĩìtẽ́ deè kĩée e ba beè túe kpóó tọ́ kpee. 13 Bà gbóó bĩináe kọọ̀: “Pábia, éé ní ea náa ò gé tó é?” À kọ́ nè va kọọ̀: “Bà tú Nen Ea Íém ààmà, vaá ním nyímà kĩée e bà túe kìlmà.” 14 Tṍó ea ló belí lọ̀l, à gbóó kììa ló kẽ vaá mòn Jíízọ̀s ea di élá kĩá, sõò náa beè nyimá kọ níà Jíízọ̀s. 15 Jíízọ̀s à gbóó kọ́ nèe kọọ̀: “Pábia, éé ní ea náa ò gé tó é? Mée ní eo gé gbĩ́ ẽ́?” Boo béè kọọ̀ Mérì doomà kọọ̀ níà nen ea ólò sí tóm mm̀ gbabe á, à gbóó kọ́ nèe kọọ̀: “Tẹ́ẹ̀, be olo ní eo beè dàlàẹ ààmàe, kọ́ kĩée eo dalàẹ kìlmà nèm, kọbé m̀ sí gé dàlàẹ ààmà.” 16 Jíízọ̀s à gbóó kolíe kọọ̀: “Mérì!” Tṍó e Mérì kiìa ló kẽ, à gbóó kolíé mm̀ Híbrù kọọ̀: “Ràbónì!” (ea tõó dọ̀ “Neǹ Dòbá!”) 17 Jíízọ̀s à gbóó kọ́ nèe kọọ̀: “Ó gá siím bá ló, boo béè kọọ̀ m̀ gáà àà kil ló ńdáà Tẹ̀. Sõò àà sí ló pá ńdáà vígà gé kọ́ nè va kọọ̀, ‘M̀ é aà kil ló ńdáà Tẹ̀, ea dú bọọ Tẹ̀, nè ńdáà Bàrì, ea dú bọọ Bàrì.’” 18 Mérì ea dú Màgdálà à gbóó àà gé kọ́ nè gbò e bà ólò nyoone nvéè Jíízọ̀s kọọ̀: “Nda a mon Nen Ea Íéi!” Tṍóá, à gbóó kọ́ nú e Jíízọ̀s beè kọ́ nèe nè va.
19 Tṍó ea ni dú ló èlà kà lèlà túá dee ló sèa, gbò e bà ólò nyoone nvéè Jíízọ̀s beè kùà nùtọ ló tõó m boo béè kọọ̀ pọ̀ beè sií va ló pá Júù. Jíízọ̀s à gbòò dù gé elá vá zẹ̀ẹ̀ vaá kọ́ nè va kọọ̀: “Fẹ́ẹ́-fẹẹ̀ ló á dìí ló.” 20 Tṍó ea ló belí lọ̀l, à gbóó tú báẹ nè gbàà kúe zogè va. Nyíè pá a gbò nyòòne nvée à gbóó ẹẹ, boo béè kọ bà mon Nen Ea Íéi. 21 Jíízọ̀s à gbóó kpáá kọ́ nè va kọọ̀: “Fẹ́ẹ́-fẹẹ̀ ló á dìí ló. Dì belí bé e Tẹ̀a beè lẹ̀ẹ̀là nda naaá, nda é lẹẹlà nàgé boólo.” 22 Tṍó ea ló belí lọ̀l, à gbóó uulí va séi boo vaá kọ́ nè va kọọ̀: “Iei nyómá káí. 23 Be ò iai ló pọ́lọ́ nei nen, Bàrì é ia ló nèe. Sõò be nóo iàì ló pọ́lọ́ nei nen, Bàrì náa é ia ló nèe.”
24 Sõò Tómòs, e bà ólò kolíe Bàà Nvín Kà, ea dṹùnà Òb Nè Bàà Nená, náa beè dì vá ló tṍó e Jíízọ̀s beè iná vá ló. 25 Vó à naa, nagbò nyòòne nvéeá géè kọ́ nèe kọọ̀: “Beele e mon Nen Ea Íéi!” Sõò a beè kọ́ nè va kọọ̀: “Be ním monì dẽè túlú e ba beè káẹ́ báá, vaá tú bám daá dẽe, vaá tú bá daaẹ́ gbàà kú nagé, ním é zigà.”
26 Tṍó e aatáà dee ni téní, gbò e bà ólò nyoonée nvée beè kpáá bõoná mm̀ tọ e ba beè dìa, vaá Tómòs beè dì vá ló. Náa kal ló béè kọọ̀ ba beè iilá nùtọá, Jíízọ̀s beè gbóó dù gé elá vá zẹ̀ẹ̀ vaá kọọ̀: “Fẹ́ẹ́-fẹẹ̀ ló á dìí ló.” 27 À gbóó kọ́ nè Tómòs kọọ̀: “Neém báí, daám bá kè kábá vaá ò daám bá gbàà kú. Kùb ge ié bàà-bàà bùlà vaá ò zigà.” 28 Tómòs à gbóó kọ́ nèe kọọ̀: “Nen Ea Íém nè ńdáà Bàrì!” 29 Jíízọ̀s à bĩináe kọọ̀: “É kọ o zigà boo béè kọ o moním? Ẹ́ẹ́-ẹẹ̀ nyíe á di ló nen ea zigà vaá à gáà mòn.”
30 Mm̀ kà-kà, Jíízọ̀s beè sí gã́bug dõona kà gbò tóm dũ̀ùnè gbẹá kèsĩ́ pá a gbò nyòòne nvée, e bè á gé mm̀ úl kpáí. 31 Sõò ba beè emí gbò níí m kọbé ò zigai kọọ̀ Jíízọ̀s ní ea dú Kráìst, ea dú Sã́áná Bàrì e, vaá be ò zigai, ò é íei dùm tení dú ló a bée.