Lé Kpẹ̀a E Lúùk Beè Emí

9 Tṍóá, Jíízọ̀s à gbóó kolí Òb Nè Bàà Nen e bà ólò nyoonée nvéeá, vaá nè va kpóó gè lẹ̀ẹ̀mà bel ló gbò zọ nè ge boomá kele-kele íb zọ̀ló. 2 À gbóó lẹ̀ẹ̀là va kọ bà á àà gé kọ́ kpẹ̀a ea kil ló Boǹ Méné Bàrì vaá bó gbò nen. 3 À gbóó kọ́ nè va kọọ̀: “Ó gá faalai tọ́ọ̀ nu siimaí boo kyẽèí, àbèè kpóóté gè tọgá kẽ àbèè bẹ̀lẹ̀ ge nvèè gyã́á m àbèè fétúlú àbèè kpègè àbèè dõona kà kọ̀là ló gè nvèà. 4 Sõò kọ̀láá kà tọ eo bãì, tõoníí kĩá dọ̀ọ̀mà tṍó eo é aalii. 5 Kọ̀láá kĩée eo ínàì vaá gbò nen náa túi, kpalai sãa lọaí kè kátọ tṍó eo é aalíí boná, kọbé à sí va neǹ ditõ̀ò ló.” 6 Ba beè gbóó àà bã bálásĩ́ kĩá vaá kọ́ kpẹ̀a aa bon dọ bon vaá bó gbò nen gbẹá kọ̀láá kĩée e bà íná.

7 Tṍó e Hẹ́rọ̀d* ea géè bẹ̀l enè bálásĩ́ ea di kĩá dã́ kọ̀láá kà nú ea gé nááá, à gbóó palàge bọọẹ́ ló boo béè kọọ̀ sìgà gbò géè kọọ̀ Jṍòn Neǹ Dììlè Nen Múú a kẽeà aa kemà ú. 8 Sìgà gbò à kọọ̀ níà Èláíjà ea ni oòa kẽ dù, boo tṍó e sìgà gbò géè kọọ̀ níà enè neń ea dṹùnà gbò kọ́ọ̀ bùlà Bàrì e ba beè di deè kéléá ea ni kẽeà aa kemà ú. 9 Hẹ́rọ̀d à gbóó kọọ̀: “Nda beè fùl togó lọl meǹ Jṍòn. Níì mókà gbálà em gé kpáá dã́ nú ea kil lóí é?” À gbóó gbĩ́ bé ea é náa láá mònie.

10 Tṍó e gbò tómá oòa kẽ, bà gbóó kọ́ kọ̀láá kà nú e ba beè naa nè Jíízọ̀s. Tṍóá, à gbóó faalá va kilma boǹ Bẹ̀tsáídà kĩée ea é dú áá ọ̀và. 11 Sõò tṍó e gã́bug nen nyímá naa vó, bà gbóó nyoonée. A beè tú lé bá tuumá va, vaá dààmà togó gè ló bel ea kil ló Boǹ Méné Bàrì nè va, vaá bó gbò e bà íe bíi ló bóa. 12 Tṍó e dee é gé bilá, Òb Nè Bàà Nená beè gbóó dúé ló gé kọ́ nèe kọọ̀: “Lẹ̀ẹ̀là gbòí ààmà kọbé bà láá bã gbò boń ea di kuló kĩí gbĩ́ kĩée e bà é tõo nè kĩée e bà é láá zálí nú e bà é dé, boo béè kọọ̀ kĩí di kpã́á aa ló bon.” 13 À gbóó kọ́ nè va kọọ̀: “Boolo neí va gyã́á.” Bà kọ́ nèe kọọ̀: “Áá vòò kpò fétúlú nè bàà paà gyã́à ní ea dìí bá kĩí ẽ́. Áá bèè kọọ̀ èé aà gé zalí gyã́á e dénè gbòí é dé.” 14 Nú ea é láá toolá 5,000 gbò gbálà beè di kĩá. À gbóó kọ́ nè pá a gbò nyòòne nvée kọọ̀: “Kọi neí va kọ bà á dõ̀òà kpò-kpò ĩìtẽ́ kẽ, vaá buù gbò á toolá 50 nen.” 15 Ba beè gbóó kọ́ nè va kọ bà á ĩìtẽ́ kẽ vaá dénè ọ̀và à gbóó ĩìtẽ́ kẽ. 16 A beè gbóó tú vòò kpò fétúlú nè bàà paà gyã́àa, vaá tṍó ea ni dalà dẽe ẹ̀bmà gbàn deè káála vaá tã̀àgã ló Bàrì boo lọ̀l, à gbóó baagi nè gbò e bà ólò nyoonée nvée kọ bà á nè gbòa. 17 Dénè ọ̀và beè dè vaá à m-má va. Bà gbóó bõonè ló ní ea sígá ló vaá à m-má mm̀ 12 kà kùn.

18 Tṍó e tṍó téní e áá ẹ̀ẹ̀ beè di kĩée ea gé tã̀àgã ló Bàrì, gbò e bà ólò nyoonée nvée beè gbóó dúé ló. Jíízọ̀s à gbóó bĩiná va kọọ̀: “Mée ní e gbò nen kọ́ọ̀ nda dúù e?” 19 Bà aalá kọọ̀: “Sìgà gbò kọ́ọ̀ ọ̀ọ̀ Jṍòn Neǹ Dììlè Nen Múú, sìgà nen à kọọ̀ ọ̀ọ̀ Èláíjà, vaá sìgà gbò à kọọ̀ ọ̀ọ̀ enè neń eo dṹùnà gbò kọ́ọ̀ bùlà Bàrì e ba beè di deè kéléá ea kẽeà aa kemà ú.” 20 Tṍóá, à gbóó bĩiná va kọọ̀: “Vaá mée ní e boolo bulàì kọọ̀ nda dúù e?” Pítà à aalá kọọ̀: “Ọ̀ọ̀ Kráìst e Bàrì lẹẹlà.” 21 À gbóó palàge ãané va kọ bà á gá kọ́ nè tọ́ọ̀ nen. 22 À gbóó kọọ̀: “Sã́áná nená é mon gã́bug tã̀àgã̀ vaá gbò kàneǹ pá Júù nè gbò togó vààla gyọ́ọ nè gbò émì kpá é kiníe vaá fẹ́ẹ. Sõò Bàrì é kẽée lọl kemà ú ní ea égè taà dee.”

23 Tṍóá, Jíízọ̀s à gbóó kọ́ nè dénè gbò e ba beè di kĩá kọọ̀: “Be à íé neń ea gbĩ́ gè nyooném nvée, á kìn a lóó vaá à dalà a té tã̀àgã̀* aa dee dọ dee, vaá gbóó kilsĩ́ gè nyooném nvée. 24 Boo béè kọọ̀ kọ̀láá neń ea gbĩ́ gè kpènà a dùm é pee, sõò kọ̀láá neń ea pee a dùm boo béè nda, ní ea é kpenà a dùm ẽ. 25 Mm̀ kà-kà, mókà bélè ní e nen é íe be à íe dénè nú ea di bàlà booí vaá pee a dùm àbèè ge kolmà bá tã̀àgã̀ tẹẹá boo é? 26 Boo béè kọọ̀ kọ̀láá neń ea sííá kẹ́ẹ ló nda nè nà moǹ bel, Sã́áná nená é sííáẹ kẹ́ẹ ló tṍó ea é fáálá a ka nè níí a Tẹ̀ nè níí gbò nyómá tóm e bà di káí domá. 27 M̀ lóò kà-kà bel nèi kọọ̀ sìgà gbò e bà di kĩí náa é ú dọ̀ọ̀mà tṍó e bà é mon Boǹ Méné Bàrì.”

28 Kàsĩ́, tṍó ea é láá dú aatáà dee aa ló tṍó ea beè ló gbò belí, a beè gbóó faalá Pítà, Jṍòn, nè Jém̀z kilma boo ene kà gù gé tã̀àgã ló Bàrì. 29 Tṍó ea gé tãàgã ló Bàrìa, sĩ́e beè gbóó nyaaá vaá a kọ̀là ló beè palàge mò. 30 Tẽ̀ènè tṍóá, bàà nen beè gbóó zọ̀ẹ loá bel. Aẹ̀ bèè Mózìs nè Èláíjà. 31 Gbòí beè palàge mò, vaá bà gbóó dààmà togó gè ló bel ea kil ló bé ea é aa bàlà booí naa, ea é gé mm-má gbẹá Jèrúselẹ̀m. 32 Dáá beè palàge di dẽè Pítà nè gbò e ba beè dìé ló, sõò tṍó e bà kẽeà, bà gbóó mòn bé e ẹlẹ nè bàà neń e bà di élaẹ́ kpàn mo naa. 33 Tṍó e gbòí é gé ààẹ́ ló àà, Pítà à gbóó kọ́ nè Jíízọ̀s kọọ̀: “Neǹ Dòbá, à dú lé kọ è di kĩí. Sọ̀i tọ́ deè kọ é tìb taà kà pẹ́ẹ̀ kĩí, ene kà é dú ńlo, ene kà dú níí Mózìs, vaá ene kà dú níí Èláíjà.” Pítà géè ló bel, sõò náa beè nyimá nú ea géè kọ̀. 34 Boo tṍó ea gé ló belí, bù dee beè gbóó dààmà togó gè kọ̀l va. Tṍó e bù deeá kọl va, pọ̀ à gbóó sií va. 35 Mon à gbóó sìlà aa gbàà bù deeá kọọ̀: “Níì nà Sã́áná em beè sà. Gbanííe tṍ ló.” 36 Tṍó e bà dã́ moná, áá Jíízọ̀s ní e ba beè mòn ẽ. Mm̀ gbò deeá, bà náa beè kọ́ nú e bà moná nè tọ́ọ̀ nen.

37 Tṍó e dee zilà e bà gé aa boo gùa, gã́bug nen beè gbóó zọ̀ẹ nyòònà. 38 Ene kà gbàlà à gbóó tõó gbàà gbòa kọ́ nèe kọọ̀: “Neǹ Dòbá, m̀ banì kọ ó ẹ̀b nà nvín págbálàí, boo béè kọọ̀ níà áá nvín em íèe.” 39 Tṍó e zọ bã́é m, à ólò naa kọ á vulí kpã́ vaá tú gọ́í siimáe, naa ní ea é gbọ múú kyáá, vaá náa ólò gbĩ́ gè ààẹ́ ló bã̀àna tṍó e gã́bug kom ni bã́é ló. 40 M beè bàn gbò e bà ólò nyooné ni nvée kọ bà á kpó zọí lọ̀líé m, sõò bà náa beè láá kpò. 41 Jíízọ̀s à aalá kọọ̀: “Boólo eo dúì gbò e nóo íèì zìgà vaá dui gbò pọ́lọ́, begè dẽè tṍó ea tõ̀ò vàẹ ní em é kilsĩ́ gè dììmàí ló vaá ĩ̀ìmà bọọ lábvẹ́? Tú o nvín domá kĩí.” 42 Sõò bã̀àna tṍó e nvíná ínaé kuló, zọá beè tobvíe sá kẽ vaá tú kà agẹ bá gọ́í siimáe. Sõò, Jíízọ̀s beè kọ́ bel zọá vaá bó nvín págbálàa. À gbóó òòmàe nè a tẹ̀. 43 Bé e Bàrì íe kpóó naa beè palàge bọọ́ vá ló.

Tṍó e dénè nú ea náa dì ea gé bọọ́ vá ló, à gbóó kọ́ nè pá a gbò nyòòne nvée kọọ̀: 44 “Palàge pãanei tṍ vaá ò kẽeaí boo gbò belí, boo béè kọọ̀ bà é gé tení ló Sã́áná nená nvee bá gbò ọ́b.” 45 Sõò bà náa beè dã́ ból ló bel ea géè lòí. Kàsĩ́, a beè dú gè gṍ vá ló kọbé bà náa dã́ ból ló, vaá pọ̀ beè sií va gè bĩináe bíb ea kil ló.

46 Ba beè gbóó tala boo neń ea palàge bọọ ea dì vá zẹ̀ẹ̀. 47 Boo béè kọọ̀ Jíízọ̀s nyímá nú e bà gé bugi togó boo, à gbóó tú ene kà ńkem̀ nvín ele ku kpàn kĩée e ẹlẹ dì, 48 vaá kọ́ nè va kọọ̀: “Kọ̀láá neń ea tú nvíní boo béè ńdáà bée tú nágé nda, vaá kọ̀láá neń ea tú nda tú nágé neń ea beè lẹ̀ẹ̀làm. Boo béè kọọ̀ kọ̀láá neń ea dìí zẹ̀ẹ̀ ea tú a lóó kilma kẽ ní ea bọọ ẹ́.”

49 Jṍòn à gbóó kọ́ nèe kọọ̀: “Neǹ Dòbá, e beè mòn neń ea gé tú o bée kpoomá zọ lọl mm̀ gbò nen, vaá e beè gbĩ́ gè kpègie, boo béè kọ náa ólò dìí ló.” 50 Jíízọ̀s à kọ́ nèe kọọ̀: “Ó gá kpegííe, boo béè kọọ̀ kọ̀láá neń e náa béi dìí ló.”

51 Tṍó e deé e Jíízọ̀s é gé àà kil káála ni íná kuló, a beè gbóó beeláfùl ge àà kil Jèrúselẹ̀m. 52 À gbóó lẹ̀ẹ̀la sìgà gbò e bà ólò nyoonée nvée kọ bà á olòó gyà. Bà gbóó àà gé bã ene kà boń ea di Sàmérìà gé kpoogè dee ló kẽ sẹ̀ẹ̀ẹ. 53 Sõò gbò e bà di kĩá náa beè tú Jíízọ̀s tṍó e bà nyímá kọ à gé kil Jèrúselẹ̀m. 54 Tṍó e Jém̀z nè Jṍòn mon naa vó, bà gbóó kọọ̀: “Neń Ea Íéi, é kọ ò gbĩ́ì kọ é kolí sã́ lọl káála kyọ̀ọ̀mà sĩ́ dénè ọ̀và?” 55 Jíízọ̀s à gbóó kììa ló kẽ vaá kọ́ va bel. 56 Jíízọ̀s nè gbò e bà ólò nyoonée nvée à gbóó àà kil dõona kà bon.

57 Tṍó e bà di èèlè e bà gé aà, ene kà gbálà à gbóó kọ́ nèe kọọ̀: “Nda é nyooné ni kil kọ̀láá kĩée eo kilì.” 58 Sõò Jíízọ̀s à kọ́ nèe kọọ̀: “Kpòòlò íe kóló ea ólò tõó m, vaá gbò ńnóm à ié tẹ̀ e bà ólò ma m, sõò Sã́áná nená náa íe tọ́ọ̀ ketõ̀ò ea ólò dẹlẹ togó.” 59 À kọ́ nè dõona nèn kọọ̀: “Dù gé nyooném nvée.” Gbálàa à aalá kọọ̀: “Neń Ea Íém, nèm tṍó mè m̀ é zẹ́ẹ́ sí be gé lì ńdáà tẹ̀.” 60 Sõò Jíízọ̀s à kọ́ nèe kọọ̀: “Sọ̀bá gbò íí kọ bà á lì gbò íí, vaá ò aà gé kọ́ kpẹ̀a ea kil ló Boǹ Méné Bàrì.” 61 Dõona nèn à kọ nágé nèe kọọ̀: “Nda é nyooné ni e Neń Ea Íém, sõò zẹ́ẹ́ sọ̀m tọ́ deè kọ ḿ àà gé kọ́ nè pá nà tọ kọ bà á agẹlẹ ló.” 62 Jíízọ̀s à kọ́ nèe kọọ̀: “Neń e báẹ ni íná ló tóm ea gé sí, vaá à kpáá ẹ̀à nvée náa bọ́ló gè bã mm̀ Boǹ Méné Bàrì.”