Lé Kpẹ̀a E Lúùk Beè Emí

23 Vó à naa, dénè gbòa à gbóó aa boo vaá faaláẹ má Páílèt. 2 Tṍóá, bà gbóó dààmà togó ló bel uué boo kọọ̀: “È monì kọọ̀ gbálàí dì ea gé dagẹ̀ gbò e bà di dóí kọ bà á gá kpẽ́ kpègè gbáá nè Sízà, vaá kọọ̀ ẹlẹ ní ea dúè Kráìst ea dú méné ẽ́.” 3 Páílèt à gbóó bĩináe kọọ̀: “É kọọ̀ olo ní eo dúù Méné pá Júù e?” Jíízọ̀s à aalá nèe kọọ̀: “Olo ní eo gé kọ́á.” 4 Tṍóá, Páílèt à gbóó kọ́ nè gbò togó vààla gyọ́ọ nè dénè gbòa kọọ̀: “Ním monì tọ́ọ̀ kà pọ́lọ́ e gbálàí sí.” 5 Sõò ba beè kilsĩ́ gè kọọ̀: “Nú ea nóòmà a tẹ́lẹ̀ tã̀àgã̀ zivèkà Jùdíà. A beè dààmà togó lọl Gálilì vaá kátogóí a íná kĩí.” 6 Tṍó e Páílèt dã́ naa vó, a beè gbóó bĩiná beè Jíízọ̀s dú Gálilì. 7 Tṍó ea nyímá kọọ̀ Jíízọ̀s dú bálásĩ́ kĩée e Hẹ́rọ̀d gé lẹẹlà bel ló, à gbóó lẹ̀ẹ̀làẹ má Hẹ́rọ̀d ea beè dì nàgé Jèrúselẹ̀m tṍóá.

8 Nyíè Hẹ́rọ̀d beè palàge ẹẹ tṍó ea mon Jíízọ̀s. A dú kpã́á dee ea géè gbĩ́ gè mònie, boo béè gã́bug nú ea ni dã́ ea kilíé ló, vaá à géè gbĩ́ gè mònmà dẽè sìgà tóm dũ̀ùnè ea é sí. 9 À gbóó dààmà togó gè bĩináe gã́bug bíb, sõò náa beè aalá tọ́ọ̀ kà bel tẹlẹ dẽe. 10 Sõò gbò togó vààla gyọ́ọ nè gbò émì kpá beè nvèè súng, elá èla, vaá kilsĩ́ gè gbàẹ bel. 11 Tṍóá, Hẹ́rọ̀d nè pá a gbò bé beè gbóó nvèèmàe lẹ́, vaá a beè màngã̀e tení dú ló gè nvèèe pọ̀b kọ̀là ló, vaá lẹ̀ẹ̀làẹ òòmà má Páílèt. 12 Kà lèlà deeá, Páílèt nè Hẹ́rọ̀d beè gbóó dú bàà díì-díílá kóò, sõò besĩ́ à kalá dọ̀ tṍóá, pálaa ọ̀và géè ọlá.

13 Tṍóá, Páílèt à gbóó kolí gbò togó vààla gyọ́ọ, gbò e bà gé bẹl, nè dénè gbòa bõonè, 14 vaá kọ́ nè va kọọ̀: “O beè tui gbálàí domai kọ à náa kọọ̀ gbò nen á lọ̀l togó kèbá kpóó ea gé bẹl. Sõò nda a dóe ẹ̀b gbẹaí kèsĩ́ vaá mòn kọọ̀ gbálàí náa náa tọ́ọ̀ kà nú eo gé kọ́i uulííé booá. 15 Mm̀ kà-kà, kọbèè Hẹ́rọ̀d mon kọọ̀ gbálàí gáà si tọ́ọ̀ kà pọ́lọ́ ea bĩ́íná kọ bà á fẹ́ẹ. Níà nú ea náa à lẹ̀ẹ̀làẹ òòmà má beele é. 16 Vó à naa, m̀ é née kpọ̀té vaá sọ̀ẹ bá.” 17* —— 18 Sõò dénè gbòa beè vulí kpã́ kọọ̀: “Fẹ́ẹ,* vaá ò sọbá Bàrábàs nèi!” 19 (Ba beè sii gbálàí nvee kpọ́gọ́lọ́ boo béè kọ a beè naa kọọ̀ gbò e bà di ba bon á lọ̀l togó kèbá kpóó ea gé bẹl nè ge kọ à fẹ́ nen.) 20 Páílèt à gbóó kpáá ló bel nè gbòa boo béè kọ à géè gbĩ́ gè sọ̀bá Jíízọ̀s. 21 Bà gbóó dààmà togó gè vulí kpã́ kọọ̀: “Túe ká kú té! Túe ká kú té!” 22 À gbóó kpáá bĩiná va ní ea égè taà tóm kọọ̀: “Ló éé? Mókà pọ́lọ́ ní e gbálàí sí é? Ním monì kọ à sí pọ́lọ́ ea bọ́ló kọ bà á fẹ́ẹ. Vó à naa, m̀ é née kpọ̀té vaá sọ̀ẹ bá.” 23 Bà gbóó kpáá kilsĩ́ gè vulí kpã́ kọ á fẹ́ẹ, dọ̀ọ̀mà tṍó e Páílèt zigà. 24 Vó à naa, Páílèt à gbóó beeláfùl ge naa nú e bà kọ́. 25 À gbóó sọ̀bá gbálà ea beè naa kọọ̀ gbò nen á lọ̀l togó kèbá kpóó ea gé bel vaá à fẹ́ nen, e ba beè kọ á sọ̀bá á. Sõò a beè tú Jíízọ̀s nè va kọ bà á túe naamá nú ea léémá va.

26 Tṍó e bà gé fááláẹ ààmà, bà gbóó sii ene kà gbálà ea kọlà Sáímòn, ea dú Sàìrínì, ea géè aa ene kà boń ea di kuló kĩá. Bà gbóó tú té tã̀àgã̀a* toolèe kọ á toolá bììa nvéè Jíízọ̀s. 27 Gã́bug nen beè bììàẹ́ nvée, bií ló gbò bia e bà géè tó saá bá nù nyíe vaá bã̀àgã̀é boo. 28 Jíízọ̀s à gbóó kììa ló kẽ ẹ̀b gbò biaá vaá kọọ̀: “Gbò bià Jèrúselẹ̀m, ó gá tonai boo béè nda. Tãa vó, toi boo béè bọọ bá nè bọọ gbò nvín. 29 Boo béè kọọ̀ tṍó gé dú e gbò nen é beè kọọ̀, ‘Ẹ́ẹ́-ẹẹ̀ nyíe á di ló pábia ea dĩ́i, neń e náa man nvín, nè neń e náa ne má nvín!’ 30 Tṍóá, bà é gbóó kọ́ nè gù kọọ̀, ‘Dọ̀í boo!’ vaá kọ́ nè kpá-kpá ńgù kọọ̀, ‘Uuáí boo!’ 31 Be bà náa gbò nuí tṍó e té di-dí nyim, éé é nááá tṍó ea ni kã́a ẽ́?”

32 Ba beè faalá nágé bàà kà neǹ pọ́lọ́ e bà é tú va ká kú té. 33 Tṍó e bà íná kĩée ea kọlà Kóó Togó, bà gbóó tú pálaa kà neǹ pọ́lọ́á nè ẹ̀ẹ̀ ká kú té. Ba beè tú enè nen káẹ́ boo bá lè, bà tú enè nen káẹ́ boo bá kie. 34 Sõò Jíízọ̀s géè kọọ̀: “Tẹ̀, ia ló nè va, boo béè kọ bà náa nyímá nú e bà gé náa.” Nagé, ba beè uuá ńnóm boo béè ge dõ̀ònà a kọ̀là ló. 35 Gbòa beè elá èla vaá ẹ̀bviẹ, sõò gbò e bà gé bẹl beè gbẽená sĩ́ va, vaá kọọ̀: “A beè dùùlà dõona gbò. Á gbóó dùùlà a bá be ẹ̀ẹ̀ Kráìst, ea dú Neń E Bàrì Beè Sà.” 36 Kọbèè gbò bé beè màngã̀e, nèe agẹ míí kọ á õ̀, 37 vaá kọọ̀: “Be ọ̀ọ̀ Méné pá Júù, dùùlà o bá.” 38 Ba beè emí nágé nu sẹlẹ́ẹ́ boo togó kọọ̀: “Níì Ménè pá Júù.”

39 Tṍóá, enè neǹ pọ́lọ́ e ba beè káẹ́ kú téá beè gbóó dààmà togó gè ló pọ́lọ́ bel nèe kọọ̀: “Oloò Kráìst, sẹ̀ olo níì ẹ̀ẹ̀ nì ẽ? Dùùlà o bá vaá ò duulà nàgé beele!” 40 Nakà gbálàa à gbóó kọ́ nèe kọọ̀: “Nóo síìà pọ̀ ló Bàrì, bã̀àna kátogóí eo zọọ̀ gbálàí ié tẽ̀ènè kà kpọ̀téí? 41 À lelà kọ beele é di kĩí, boo béè kọọ̀ níà kpẽ́ ea dú ló nú e beele beè naa, sõò gbálàí náa beè sí tọ́ọ̀ kà pọ́lọ́.” 42 Tṍóá, à gbóó kọọ̀: “Jíízọ̀s, kẽ̀èàḿ boo tṍó eo é íná mm̀ o Boǹ Méné.” 43 Jíízọ̀s à gbóó kọ́ nèe kọọ̀: “M̀ lóò kà-kà bel nè ní nieí kọọ̀, ò é dím ló mm̀ Páradaìs.”

44 Tṍóá beè láá dú boo òb nè bàà tóm* fèèbe, vaá zivèkà dóá beè gbóó kuu gín dọ̀ọ̀mà tṍó ea é láá dú boo taà tóm* fèèbè, 45 boo béè kọọ̀ nàànì beè gimí. Tṍóá, kàn e ba beè fùlmà mm̀ tọọ̀ káíá beè gbóó bààlà bàà báà. 46 Jíízọ̀s à gbóó kòòlà kpã́ kọọ̀: “Tẹ̀, m̀ túù nà dùm* nvèè ní bá.” Tṍó ea kọ́ vó lọ̀l, à gbóó ù. 47 Tṍó e enè neǹ bé ea beè di kĩá mon nú ea nááá, à gbóó lèèlà Bàrì kọọ̀: “Kà-kà, gbálàí beè neǹ lé lab dògò.” 48 Tṍó e dénè gbò e ba beè di kĩá e bà géè ẹ̀b nú ea gé nááá mon naa vó, bà gbóó bã̀àgã̀ vaá saá bá nù nyíe tṍó e bà gé ooà kil be. 49 Vaá dénè gbò e ba beè nyimáe ló, bií ló gbò bia e ba beè bììàẹ́ nvée aa Gálilì beè elá kpã́á olòó ẹ̀b nú ea gé nááá.

50 A beè ié ene kà gbálà ea kọlà Jósẹ̀f ea ólò sí tóm Pọ̀b Tọ Bèèlaà Pá Júù ea beè di kĩá. Aẹ̀ bèè lé nen vaá dú neǹ lé lab dògò. 51 (Gbálàí náa beè nvèè sãa kúm ba láb nè nú e bà géè noo.) À dú Àrìmàtíà, ea dú ene kà bon ea di Jùdíà, vaá à géè elá bànà Boǹ Méné Bàrì. 52 Gbálàí beè sí ló Páílèt gé bànie kọ á neèe íí Jíízọ̀s. 53 À gbóó dàlàẹ lọl gbàn deè sẹlẹ́ kunukẽ̀ vaá tú kà lé báà kàn kọ̀lmàe. À gbóó túe maamé mm̀ kóló dem* e bà gáà lì tọ́ọ̀ neń m. 54 Aẹ̀ beè deé e bà ólò Kpoogá Dee Ló Nyòòmà Deè Bõ̀séi, vaá Deè Bõ̀séi é beè gé dààà togó. 55 Sõò gbò bia e ba beè bììa nvéè Jíízọ̀s aa Gálilìa beè nyoonée gé ẹ̀b bànà úá* nè bé ea túe maamé m naa. 56 Bà gbóó òòa kẽ gé naa kà kpée-kpéè nù ló nóo, sõò ba beè bṍséi Deè Bõ̀séi nyòòmà bé e log kọ́ naa.