Kpá E Pọ́ọ̀l Beè Lẹ̀ẹ̀là Má Pá Róm̀
15 À bọ́ló kọọ̀ beele e lóói agà é nvèè bá nè gbò e lóó va náa agà, vaá é gá naa nú ea é léé ló áá beele. 2 Naanii mè buù bẹ̀ì é náa nú ea é léé ló dõona nèn kọbé à síèe kpóó ló. 3 Boo béè kọọ̀ bã̀àna Kráìst náa beè naa nú ea é léé ló áá a bá, dì belí bé e Kpá Káí beè kọ́ naaá kọọ̀, “Gbò e bà nveemà lẹ́ olo nveemà nàgé lẹ́ nda.” 4 Boo béè kọ ba beè emí kọ̀láá kà nú ea di mm̀ Kpá Káí tṍó ea kil nvéeá kọbé à nóòmài nu, kọbé tení dú ló gè ié ĩ̀ìmà nè nvèè nyíé gbàà e Kpá Káí néi, è láá ié ból dẽesĩ́. 5 Bàrì ea ólò naa kọ ó iei ĩ̀ìmà nè nvèè nyíé gbàà á naa kọ ó labvii láb belii Kráìst Jíízọ̀s, 6 kọbé ò láá tui kũ̀ùnà mòn nveemai ka ló Bàrì ea dú Tẹ̀ Jíízọ̀s Kráìst ea dú Nen Ea Íéi.
7 Vó à naa, tui lé bá tuumai ene dì belí bé e Kráìst beè tú lé bá tuumá boolo naaá kọbé à nveè ka ló Bàrì. 8 Boo béè kọọ̀ nda kọ́ọ̀ nèi kọọ̀ Kráìst beè sí tóm nè gbò e ba beè kòòà, naamá gè zogè kọọ̀ Bàrì ólò ló kà-kà bel kọbé à zógè kọọ̀ nú e Bàrì beè zìgà nè ba gbò nómá tẹ̀a dú kà-kà, 9 kobé gbò dó àla nveè ka ló Bàrì boo béè a sàn nyíe, dì belí bé e ba beè emí naaá kọọ̀: “Níà nú ea náa nda é leelà ni gbẹá zẹ̀ẹ̀ gbò dó àla, vaá ọlí sọ́l lèèmà o bée é.” 10 A beè kpáá kọọ̀: “Booló gbò dó àla, zọi pá a gbò iei ẹ́ẹ́-ẹẹ̀ nyíe.” 11 A beè kpáá kọ nágé kọọ̀, “Leelai Jìhóvà,* e dénè boólo eo dií gbò dó àla, vaá dénè nen á lèèlàẹ.” 12 Vaá Àìzáíà beè kọ nágé kọọ̀: “À íe lí té ea é aa tọọ̀ Jẹ́sì, ea é aa kẽ vaá bẹ̀l gbò dó àla, vaá ẹlẹ ní e gbò dó àla é ból dẽe sĩ́ ẽ́.” 13 Bàrì ea ólò naa kọ ó iei ból dẽesĩ́ á naa kọ ó iei zààvà nè fẹ́ẹ́-fẹẹ̀ ló tení dú ló gè dẹlẹíe nyíé boo, kọbé ò láá kpáá palàge iei ból dẽesĩ́ tení dú ló kpóó ea aa bá nyómá káí.
14 Pá vígà, kátogóí, nda palàge àgala boo kọọ̀ ò dií kpènà ló gè naanii lé nu, ò nyímàì nú ea kil ló kọ̀láá kà nu, vaá ò é láá duulai bá deè tṍ ene. 15 Sõò m̀ lọà pọ̀ ló emí kpáí mái naamá gè kpáá tú dõona kà nu kẽeéí nyíe, boo béè sàn nyíe e Bàrì íeḿ ló 16 kọbé m̀ láá dú nen em é nveè bá nè gbò e bà di gbò dó àla dì belí gyóòloò Kráìst Jíízọ̀s. M̀ ólò sí tóm ea di káí, ea dú gè vee lé kpẹ̀a ea aa bá Bàrì, kọbé Bàrì láá tú gbò e bà di gbò dó àla naamá vààla gyọ́ọ ea di õ̀òa tení dú ló nyómá káí.
17 Vó à naa, nyíém ẹ́ẹ boo béè kọ m̀ dúù nen em gé nyoone nvéè Kráìst Jíízọ̀s, vaá m̀ gé sí tóm nè Bàrì. 18 Ním é dõogẽ kọ́ kọ̀láá kà nú ea kil ló nú e nda ni náa, daalá lọl ló nú e Kráìst ni túm naamá kọbé gbò e bà di gbò dó àla gbaníe tṍ ló tení dú ló nà moǹ bel nè nà láb, 19 bií ló gbò tóm dũ̀ùnè em beè sì nè kpóó ea aa bá nyómá káí Bàrì, vaá gbò nuí a náa kọ ḿ láá palàge vee lé kpẹ̀a ea kil ló Kráìst aa Jèrúselẹ̀m iná dénè Ìlírikòm. 20 Vó beè naa kọ ḿ beeláfùl kọ ním é vee lé kpẹ̀aí kĩée e dõona nèn beè kọ́ nú ea kil ló béè Kráìst, kọbé náa dú gè kọọ̀ m̀ gé tib tọ boo dò díí kẽè dõona nèn, 21 dì belí bé e Kpá Káí kọ́ naaá kọọ̀: “Gbò e bà gáà dã tọ́ọ̀ nú ea kilíé ló é mon, vaá gbò e bà gáà dã̀ é dã́ ból ló.”
22 Níà nú ea náa vaá gã́bug tṍó em ni noo kọ m̀ é dúí ló, m̀ gáà laa dù e. 23 Sõò náa íe kĩée ea di bálásĩ́í em gáà kọ kpẹ̀a, vaá a beè tànim gè dúí ló gã́bug gbáá ea kil nvéeá. 24 Vó à naa, m̀ ẹbmà dẽe kọọ̀ tṍó em é sí Spéìn, m̀ é moníi vaá ò é túleḿ mi ima deèsĩ́ tṍó em ni tú sìgà tṍó tõ̀òmàí ló. 25 Sõò kátogóí, m̀ é gé àà kil Jèrúselẹ̀m gé nvèè bá nè gbò e bà di káí e bà di kĩá. 26 Boo béè kọ à tan pá vígà e bà di Màsìdónìà nè Àkéíà ge dõo nu nè gbò tãa e bà di zẹ̀ẹ̀ gbò e bà di káí e bà di Jèrúselẹ̀m. 27 Mm̀ kà-kà, a beè palàge ẹẹlẹ̀ va nyíe gè naa vó, boo béè kọọ̀ ba beè sii kom bá pá vígà e bà di Jèrúselẹ̀m, boo béè kọọ̀ beè pá vígà beè kọ́ nú ea kil ló Bàrì nè gbò e bà di gbò dó àla, à bọ́ló kọọ̀ gbò e bà di gbò dó àla á tú nu e bà íe nvèèmà bá nè pá vígà. 28 Tṍó em ni tú nú e ba beè dõo nè pá vìgàí nè va lọ̀l, m̀ é béeaí ló tṍó em gé kil Spéìn. 29 Gbá ló vó, m̀ nyímà kọọ̀ tṍó em é ínaí ló, m̀ é tú tã́áná dee bá ea aa bá Kráìst nèi.
30 Kátogóí e pá vígà, m̀ síèi kpóó ló tení dú ló Nen Ea Íéi, ea dú Jíízọ̀s Kráìst, nè tení dú ló vulè e nyómá káí náa kọ é ié, kọ ó palàge tãagãi ló Bàrì maḿ mi, belí bé e nda gé náaí, 31 kọbé m̀ láá dùùà aa bá gbò e bà náa ólò fã̀ Bàrì e bà di Jùdíà, nè ge kọọ̀ gbò e bà di káí e bà di Jèrúselẹ̀m á tú ẹ́ẹ́-ẹẹ̀ nyíe tuumá tóm em gé sí nè va, 32 kọbé be à dú bùlà Bàrì, m̀ láá tú ẹ́ẹ́-ẹẹ̀ nyíe domáí ló naa ní e lóó dénè bẹ̀ì é dĩinà. 33 Bàrì ea ólò naa kọ é ié fẹ́ẹ́-fẹẹ̀ ló á tõó ló dénè bọ̀ì. Á dì naa vó.