Lé Kpẹ̀a E Jṍòn Beè Emí

19 Páílèt à gbóó kọ́ nè gbò bé kọ bà á tú Jíízọ̀s ààmà gé kpọ́ẹ té ló. 2 Gbò béá à gbóó ììlà gẹ́l suu naamá pẹ̀gẹ̀lẹ̀ uué ból, vaá tú do-doò dẽè kọ̀là ló nvèèe. 3 Ba beè olòó kyã̀à síé ló gé kọ́ nèe kọọ̀: “Kànà mòn kól, e Méné pá Júù!” Ba beè kilsĩ́ gè tú bá sa náe gé sĩ́. 4 Páílèt à gbóó kpáá dọ kèdẹi gé kọ́ nè va kọọ̀: “Ẹbvii! M̀ túùe domáí ló kèdẹi kọbé ò monii kọọ̀ ním gbĩ́ì tọ́ọ̀ kà pọ́lọ́ mòníé bá.” 5 Vó à naa, Jíízọ̀s à gbóó dọ kèdẹi. Pẹ̀gẹ̀lẹ̀ e bà tú gẹ́l suu naamá beè dìé ból, vaá do-doò dẽè kọ̀là ló beè dìé ló. Páílèt à gbóó kọ́ nè va kọọ̀: “Neenii é gbálàaí!” 6 Sõò tṍó e gbò togó vààla gyọ́ọ nè gbò kùdẽe ló moníe, bà gbóó vulí kpã́ kọọ̀: “Túe ká kú té! Túe ká kú té!” Páílèt à gbóó kọ́ nè va kọọ̀: “Boolo tuíe aamai gé tuíe kaí kú té, boo béè kọọ̀ nda ním gbĩ́ì tọ́ọ̀ kà pọ́lọ́ mòníé bá.” 7 Pá Júù à gbóó kọ́ nèe kọọ̀: “Beele íe log, vaá dì belí bé e beélè log kọ́ naa, à bọ́ló kọ á ù, boo béè kọọ̀ à kọ́ọ̀ ẹlẹẹ̀ sã́áná Bàrì.”

8 Tṍó e Páílèt dã́ gbò bel e bà gé ló, pọ̀ à gbóó kpáá palàge siíe. 9 À gbóó kpáá bã tọ e nen ea gé bẹl ólò tõo vaá bĩiná Jíízọ̀s kọọ̀: “Ãàe ní eo dúù e?” Sõò Jíízọ̀s náa beè aalá tọ́ọ̀ kà bel nèe. 10 Vó à naa, Páílèt à gbóó kọ́ nèe kọọ̀: “Ò dã́àm pĩi. Nóo nyímà kọọ̀ nda íè kpóó gè sọ̀ ni bá vaá m̀ ié kpóó gè fẹ́ ni?” 11 Jíízọ̀s à aalá nèe kọọ̀: “Nóo gáẹ̀ beè iém tọ́ọ̀ kà kpóó boo, beè Bàrì náa beè nè ni. Níà nú ea náa nen ea beè túm nvèè ní bá à sí pọ́lọ́ ea el ńlo é.”

12 Boo béè vó, Páílèt beè gbóó gbĩ́ bé ea é náa vaá à sọ́ẹ bá, sõò pá Júù beè vulí kpã́ kọọ̀: “Be ò sọ̀bá gbálàí, ọ̀ọ̀ níì kóò Sízà nì. Kọ̀láá nen ea tú a lóó naamá méné gé bé Sízà.” 13 Tṍó e Páílèt dã́ gbò belí, à gbóó tú Jíízọ̀s domá kèdẹi, vaá ĩitẽ́ boo kpòté bèèla bel, ea di kĩée ea kọlà Kĩée E Bà Tṍ Dem, sõò à kọlà Gábatà, mm̀ dém bel Híbrù. 14 Aẹ̀ beè Deé E Bà Ólò Kpoogá Dee Ló Nyòòmà Nàànù Ténì Zelí. Tṍóá beè láá dú òb nè bàà tóm fèèbe.* À gbóó kọ́ nè pá Júù kọọ̀: “Neenii bọọ ménéí!” 15 Sõò ba beè vulí kpã́ kọọ̀: “Túe ààmà! Túe ààmà! Túe ká kú té!” Páílèt à bĩiná va kọọ̀: “Ḿ fẹ́ bọọ méné?” Gbò togó vààla gyọ́ọ à aalá nèe kọọ̀: “Née íè tọ́ọ̀ kà méné daalá lọl ló Sízà.” 16 Tṍóá, à gbóó túe lọa bá nè va kọ bà á túe ká kú té.

Bà gbóó tú Jíízọ̀s ààmà. 17 Jíízọ̀s à gbóó bẹ̀ẹ̀là a té tã̀àgã̀* kilma kĩée ea kọlà Ketõ̀ò Kóó Togó, ea kọlà Gọ́lgọtà mm̀ dém bel Híbrù. 18 Bà gbóó túe ká kú té gbẹá kĩá bií ló dõona kà bàà nen. Enè nen beè dìé boo bá lè, enè nen à dìé boo bá kie, vaá Jíízọ̀s à gbóó di zẹ̀ẹ̀. 19 Páílèt beè emí nágé nu sẹlẹ́ boo té tã̀àgã̀a kọọ̀: “Jíízọ̀s ea dú Názarẹ̀t, Ménè pá Júù.” 20 Gã́bug pá Júù beè bugi nuí, boo béè kọọ̀ kĩée e ba beè ká Jíízọ̀s beè di kuló bon, vaá ba beè emí mm̀ dém bel Híbrù, Látìn, nè Gríìk. 21 Sõò gbò togó vààla gyọ́ọ̀ pá Júù beè kọ́ nè Páílèt kọọ̀: “Ó gá emí naamá, ‘Méné pá Júù,’ sõò emí kọ ẹlẹ beè kọọ̀, ‘Ndaà Méné pá Júù.’” 22 Páílèt à aalá nè va kọọ̀: “Kọ̀láá kà nú em emí, m beè emí lọ̀l.”

23 Tṍó e gbò béá ni tú Jíízọ̀s ká kú té, bà gbóó tú a pọ̀b kọ̀là ló vaá dõ̀òmà ténì báàsĩ́, naa ní e buù báàsĩ́ é tulà buù neǹ bé. Vaá ba beè tu nágé a kọ̀là ló ea beè nvee kè kẽ. Sõò kọ̀là ló ea beè nvee kè kẽ náa íe dẽè díí e ba beè gbà, boo béè kọọ̀ ba beè lò lọl gbàn deè tẹlẹ kunukẽ̀. 24 Vó à naa, bà gbóó kọ́ nè ene kọọ̀: “Naanii mè née é baa, sõò èé úúá ńnóm boo kọbé è nyímá ló nen ea é kuu bá. Níí beè naaá kọbé à ḿm̀-mè nú ea di mm̀ Kpá Káí, ea kọ́ọ̀: “Ba beè dõ̀ònà ńdáà pọ̀b kọ̀là ló, vaá uuá ńnóm boo ńdáà kọ̀là ló.” Níà kà lèlà nú e gbò béá beè naa ẽ́.

25 Sõò kà Jíízọ̀s nè a vígà pábia* nè Mérì ea dú vaà Klópàs nè Mérì ea dú Màgdálà beè di élá kuló té tã̀àgã̀ e ba beè ká Jíízọ̀s booá. 26 Tṍó e Jíízọ̀s mon a kà nè nen ea ólò nyoonée nvée ea ólò palàge vùlè e bà di élá kĩá, à gbóó kọ́ nè a kà kọọ̀: “Pábia, nee o nvíní!” 27 À kọ nágé nè nen ea ólò nyoonée nvéeá kọọ̀: “Nee o kàí!” Lọl tṍóá ààmà, nen ea ólò nyoonée nvéeá à gbóó faaláẹ kilma ńlẹ́ẹ̀ be.

28 Tṍó e níí nááá lọ̀l, e Jíízọ̀s nyímá kọ a náànìè dénè nú ea Tẹ̀ beè kọ á naanìè, à gbóó kọọ̀: “Òòm ká kpáá.” A beè ló belí kọbé à ḿm̀-mè nú e ba beè emí mm̀ Kpá Káí. 29 Ene kà káná e agẹ míí di ḿ-má m beè di kĩá. Bà gbóó tú sàpó nvee dáà té ea kọlà hísọ̀p* diilé m nvèèé gã́. 30 Tṍó e Jíízọ̀s daa gã́ ló mííá, à gbóó kọọ̀: “A tá.” À gbóó uu sĩ́ kẽ vaá ù.

31 Deeá beè dú Deé E Bà Ólò Kpoogá Dee Ló Nyòòmà Deè Bõ̀séi. Vó à naa, kọbé ba íí náa gbẹ́á boo té tã̀àgã̀á Deè Bõ̀séi (boo béè kọ níà bèè kà pọ̀b kà Deè Bõ̀séi), pá Júù à gbóó bàn Páílèt kọ bà é búnìè va kpóó tọ, vaá tú ba íí ààmà. 32 Vo à naa, gbò bé à gbóó dù gé buni kpóó tọọ̀ bàà nen e ba beè dìé lóá. 33 Sõò tṍó e bà íná ló Jíízọ̀s, bà gbóó mòn kọ a ú. Boo béè vó, bà náa beè buníe kpóó tọ. 34 Sõò enè neǹ bé beè tú a sòbà tìbmàe gbàà kú. Tẽ̀ènè tṍóá, mii nè múú à gbóó kolá. 35 Nen ea beè mòn nuí beè kọ́ nú ea kil ló, vaá nú ea kọ́ dú kà-kà, vaá à nyímá kọọ̀ nú ea kọ̀ẹ̀ dú kà-kà, kọbé ò ziga naigé. 36 Mm̀ kà-kà, gbò nuí beè naaá kọbé nú e ba beè emí mm̀ Kpá Káí ḿḿ-má, ea kọ́ọ̀: “Bà náa é búni tọ́ọ̀ kà a kpóó.” 37 Dõona kà dọ̀ Kpá Káí beè kọ nágé kọọ̀: “Bà é beè dàlà dẽe ẹ̀bmà nen e ba beè tú sòbà tìbmàa.”

38 Tṍó e gbò nuí nááá lọ̀l, Jósẹ̀f, ea dú Àrìmàtíà, ea géè gũá nyoone nvéè Jíízọ̀s boo béè kọọ̀ pọ̀ beè siíe ló pá Júù, beè gbóó bĩiná Páílèt be à é láá tuè íí Jíízọ̀s ààmà. Páílèt à gbóó kọ à é láá tú ààmà. Vó à naa, à gbóó sì gé dàlà a íí ààmà. 39 Nìkòdímòs, ea beè tú bílá dee domá ló Jíízọ̀sa beè du nágé. A beè faalá nóo e bà tú máà nè álò naamá, ea é láá kòn enè gbò pã́ònd. 40 Vó à naa, nyòòmà bé e pá Júù ólò lì nen naa, bà gbóó tú kpée-kpéè nù ló nóo nvee gbàà kàn kọ̀lmà íí Jíízọ̀s. 41 A beè ẽenà kọọ̀ à íe gbabe ea beè di kĩée e ba beè fẹ́ẹ gbẹáá,* vaá kóló dem* e bà ã́àa tòg, e bà gáà lì tọ́ọ̀ nen m beè di mm̀ gbabe á. 42 Boo béè kọọ̀ à dú deé e pá Júù géè Kpoogá Dee Ló Nyòòmà Deè Bõ̀séi vaá kóló demá beè di kuló, bà gbóó tú Jíízọ̀s li m.