Tóm Gbò E Jíízọ̀s Beè Lẹ̀ẹ̀là
10 À íe ene kà gbálà ea kọlà Kọ̀nílìọ̀s, ea beè di Sìzàríà, ea beè di togó enè gbò bé pá Ítalì. 2 Ẹlẹ nè pá a tọ ólò siiá pọ̀ ló Bàrì. A beè olòó dõo nu nè gbò tãa vaá palàge bàn Bàrì lee. 3 Tṍó ea é láá dú taà tóm boo fèèbe,* nyómá tóm Bàrì beè dúé ló mm̀ mòànù dẽe, vaá kolíe kọọ̀: “Kọ̀nílìọ̀s!” 4 Pọ̀ à gbóó sii Kọ̀nílìọ̀s naa ní ea gọlíé ló ẹ̀b vaá bĩiná kọọ̀: “Éé ní eo gbĩ́ì kọ ḿ naa, e Nen Ea Íém ẽ́?” À kọ́ nèe kọọ̀: “Bàrì nveè kpíí ló gbò o tã̀àgã ló Bàrì nè gbò nú eo ólò dõo nè gbò tãa, vaá à é ólòó kẽ̀èà ní boo. 5 Vó à naa, kátogóí, lẹ̀ẹ̀là gbò nen siimá Jọ́pà kọ bà á gé kolí ene kà gbálà ea kọlà Sáímòn, e bà ólò kolíe Pítà. 6 Gbálàí di tọ ló Sáímòn, ea ólò naa kpá nom e bà é tú siimá tóm, ea tọ di gã́ pèneá.” 7 Nyómá tóm ea géè ló bel nèeá gé aà gé, à gbóó kolí bàà kà a gyóòlo nè enè neǹ bé ea di zẹ̀ẹ̀ gbò e bà ólò sí tóm nèe, ea ólò siià pọ̀ ló Bàrì, 8 vaá nootẽ́ dénè nu nèva. À gbóó lẹ̀ẹ̀là va siimá Jọ́pà.
9 Deé ea bẽene e bà di èèlè e bà gé aà, e ba ni íná kuló boná, Pítà à gbóó àà kil boo tọ gbàn deè tṍó ea é láá dú boo òb nè bàà tóm fèèbe* gé tã̀àgã ló Bàrì. 10 Sõò tákói beè palàge táẹ́ ló vaá a beè gbĩ́ gè dé gyã́á. Boo tṍó e bà gé kpóògè dee ló gyã́áá, à gbóó mòà nuù dẽe 11 vaá mòn káála ea kuuà nè nú ea bélí gbele pọ̀b báà kàn, e bà síi bá ló ténì gá ea di ló lọl káála tẹlẹ boo kunukẽ̀í, 12 vaá kọ̀láá íb nom ea íe ténì kà kpóó tọ nè gbò nom e kọ́g di ló, e bà ólò tẹlẹ̀ ké e bà di boo kunukẽ̀í nè gbò ńnóm beè di boo. 13 Mon à gbóó kọ́ nèe kọọ̀: “Pítà, aa boo, kèl vaá ò ba!” 14 Pítà à kọ́ nèe kọọ̀: “Ním é láá bà, e Nen Ea Íém, boo béè kọ m̀ gáà bà tọ́ọ̀ kà nú e náa õoà àbèè kọ náa dú lé tọ́ọ̀ dee.” 15 Moná à gbóó kpáá kọ́ nèe ní ea égè bàà tóm kọọ̀: “Kùb ge kolí nú e Bàrì beè õ̀ònà kolíe nú e bè náa õoà.” 16 Níí beè naaá ní ea égè taà tóm, vaá tẽ̀ènè tṍóá, bà gbóó dàlà nú e Pítà beè mòna kilma káála.
17 Boo tṍó e Pítà dì ea gé dégíli boo nú e mòànù dẽeá tõó dọ̀, gbò e Kọ̀nílìọ̀s beè lẹ̀ẹ̀làa à gbóó dù gé bĩiná kĩée e tọọ̀ Sáímòn dì, vaá ba beè elá ló gbànsĩ́ ea di ló beá. 18 Bà gbóó kolí kól vaá bĩiná beè Sáímòn e bà ólò kolíe Pítàa dì vá ló tọá. 19 Boo tṍó e Pítà dì ea gé bugi togó boo mòànù dẽeá, nyómá káí à gbóó kọ́ nèe kọọ̀: “Ẹ̀b! À íe taà kà gbálà e bà gé bĩ́íná ni. 20 Boo béè vó, aa boo tọ gbàn deèí kil kunukẽ̀, vaá ò nyooné va àà. Ó gá ié tọ́ọ̀ kà bàà-bàà bùlà, boo béè kọọ̀ nda ní em beè lẹ̀ẹ̀là va ẹ́.” 21 Tṍóá, Pítà à gbóó kil kunukẽ̀ ló gbòa vaá kọọ̀: “Neenii nda eo gé gbĩ́ií. Éé ní eo dúì ló é?” 22 Bà aalá nèe kọọ̀: “Neǹ togó gbò bé ea kọlà Kọ̀nílìọ̀s ní ea beè lẹ̀ẹ̀lài é. Ẹ̀ẹ̀ neǹ lé lab dògò, vaá à ólò siiá pọ̀ ló Bàrì, vaá dénè pá Júù ólò ló lé bel ea kilíé ló. Ene kà nyómá tóm Bàrì beè kọ́ nèe kọ á lẹ̀ẹ̀là tóm kolmá ni domàè a tọ, kọbé à dã́ nú eo é kọ́ nèe.” 23 Vó à naa, Pítà à gbóó kọ́ nèva kọ bà á bã tọ vaá tõonìèé ló.
Deé ea bẽene, à gbóó zọ̀ va àà, vaá sìgà pá vígà e bà di Jọ́pà beè nyoonée. 24 Deé ea bẽene, a beè gbóó iná Sìzàríà. Kọ̀nílìọ̀s géè ẹ̀bmà va dẽe, naa ní ea beè kolí pá a dúà ló nè pá a kóò. 25 Tṍó e Pítà bã́ tọá, Kọ̀nílìọ̀s beè gbóó zọ̀ẹ nyòònà, vaá dọ̀ẹ́ ke gbàà kumí sĩ́ kẽ nèe. 26 Pítà à gbóó dàlàẹ lọl boo vaá kọọ̀: “Aa boo, ndaà nen belí nágé olo.” 27 Tṍó e Pítà zọ́ẹ loá bel lọ̀l, à gbóó bã tọ vaá mòn gã́bug gbò e bà di bṍóná. 28 À gbóó kọ́ nèva kọọ̀: “Ò palàge nyimai kọọ̀ log náa ténmá kọọ̀ neǹ Júù á zọ̀ nen ea dú dõona kà dó naaá nu. Sõò Bàrì beè zogèm kọ ḿ gá kọ ná kọọ̀ nen náa õoà. 29 Níà nú ea náa vaá ním beè láá kọọ̀ ním é dú tṍó eo lẹẹlàì tóm kolmám mi ẽ́. Níà nú ea náa m̀ bĩinái kọọ̀, éé ní eo beè kolím mi ló é?”
30 Tṍóá, Kọ̀nílìọ̀s à gbóó kọọ̀: “Kà lèlà íb tṍóí, ténì deé ea kil nvéeá, m beè di ńdáà tọ em géè tã̀àgã ló Bàrì tṍó ea é láá dú taà tóm boo fèèbe.* Tṍóá, ene kà gbálà ea nveà kọ̀là ló ea nyágĩ́ à gbóó elám deèsĩ́ 31 vaá kọọ̀: ‘Kọ̀nílìọ̀s, Bàrì a dã́ o tã̀àgã ló vaá kẽ̀èa boo gbò nú eo ólò dõo nè gbò tãa. 32 Vó à naa, lẹ̀ẹ̀là gbò nen siimá Jọ́pà kọ bà á gé kolí Sáímòn, e bà ólò kolíe Pítàa. Gbálàí di tọ ló Sáímòn ea ólò naa kpá nom e bà é tú siimá tóm, ea tọ di gã́ pèneá.’ 33 Níà nú ea náa m̀ gbẹá boo lẹ̀ẹ̀là tóm kolmá ni ẽ́, vaá à dú lé kọ ò dúù. Kátogóí, dénè bẹ̀ì di kèsĩ́ Bàrì boo béè ge dã́ dénè nú e Jìhóvà* beè kọ ó kọ̀.”
34 Tṍóá, Pítà à gbóó dààmà togó gè ló bel vaá kọọ̀: “Kátogóí, nda a palàge dã́ ból ló kọọ̀ Bàrì náa ólò sà sĩ́ fìnì dìbmà béle, 35 sõò à ólò tú gbò e bà di kọ̀láá kà dó e bà sííáẹ pọ̀ ló vaá naa nú ea lelà. 36 A beè lẹ̀ẹ̀là Jíízọ̀s Kráìst má pá Ízrẹẹ̀l kọ á vee lé kpẹ̀a ea kil ló fẹ́ẹ́-fẹẹ̀ ló nèva—ẹlẹ ní ea dú Nen Ea Íe dénè nen ẽ́. 37 Ò nyímàì togó bel e gbò nen géè loá bel boo beeá ló zivèkà Jùdíà. Belí beè dààà togó dú Gálilì tṍó e Jṍòn kọ́ nú ea kil ló dììa múú lọ̀l. 38 À géè ló bel ea kil ló Jíízọ̀s, ea dú Názarẹ̀t. À géè kọ́ nú ea kil ló bé e Bàrì beè sàẹ tení dú ló nyómá káí nè kpóó naa, nè bé ea beè naa lé nu gbẹá kọ̀láá kĩée ea íná vaá bó gbò e Pọ́lọ́ Nyómá géè biigè ló naa, boo béè kọọ̀ Bàrì beè dìé ló. 39 Beele beè mònmà dẽè kọ̀láá kà nú ea beè naa gbẹá dó e pá Júù dì nè gbẹá Jèrúselẹ̀m, sõò ba beè fẹ́ẹ tení dú ló gè túe ká kú té. 40 Bàrì beè kẽée lọl kemà ú ní ea égè taà dee vaá sọ̀tọ́ deè kọọ̀ gbò nen á mònie. 41 Níì dénè nen ní ea beè monieé nì, sõò áá beéle e Bàrì beè sà ní e beè mònie ẽ́. E beè zọ̀ẹ dè vaá õ̀ tṍó ea kẽeà aa kemà ú á. 42 Nagé, a beè kọ é vee nè gbò nen vaá tú agẹ bá siimá neǹ ditõ̀ò kọọ̀, ẹlẹ ní ea dú nen e Bàrì beè sà kọ á beelá bel ló gbò e ba di dùm nè gbò e ba beè ù e. 43 Dénè gbò kọ́ọ̀ bùlà Bàrì sí neǹ ditõ̀ò kilma ló Jíízọ̀s kọọ̀, Bàrì é ia ló pọ́lọ́ nè kọ̀láá nen ea íée zìgà m tení dú ló a bée.”
44 Tṍó e Pítà dì ea gé ló belí, nyómá káí beè gbóó dọ boo dénè gbò e bà géè dã́ belá. 45 Vaá a beè palàge bọọ́ ló gbò e bà gé nyoone nvéè Jíízọ̀s e ba beè kòòà e ba beè zọ̀ Pítà dùa, boo béè kọọ̀ Bàrì dõo nagé nyómá káí nè gbò e bà dú dõona kà dó. 46 Boo béè kọ bà dã́ tṍó e bà gé ló dõona kà gbò dém bel vaá nvèè ka ló Bàrì. Tṍóá, Pítà à gbóó kọọ̀: 47 “É kọọ̀ à íe nen ea é láá kọọ̀ bà á gá tú gbò e ba ni íe nyómá káí belí beéleí diilé múú?” 48 Tṍóá, à gbóó kọ bà á dììa múú boo béè Jíízọ̀s Kráìst. Bà gbóó bànie kọ á tú sìgà dee tõomàè vá ló.